Kun Paano Mahahali an mga Pagduda

1-2. (a) Anong mga pagduda an tibaad mamatian kan mga lingkod ni Jehova? (b) Ano an pag-uulayan ta sa artikulong ini?

GABOS na tawo ano man an edad nagkakaigwa nin mga pagdudaa paminsan-minsan. Halimbawa, imahinara an sarong hoben na Saksi na nag-iisip-isip kun baga interesado talaga sa saiya si Jehova. Tibaad dai siya sigurado kun baga mapabawtismo siya. O pag-isipan an sarong medyo maedad nang brother na kan siya hoben pa pinili niyang inuton an intereses kan Kahadian imbes na sarong karera sa kinaban na ini. Ngunyan na may pamilya na siya asin igo lang para sa mga pangangaipo ninda an naitatao niya, tibaad nagkakaigwa na siya nin mga pagduda manungod sa mga nagin desisyon niya. Imahinaron an sarong may edad nang sister na limitado na an kusog. Tibaad pinangluluyahan siya nin buot dahil dai niya na kayang gibuhon an mga nagigibo niya kaidto. Naihapot mo na daw sa saimong sadiri: ‘Naririparo daw talaga ako ni Jehova? Sulit daw an mga pagsasakripisyong ginibo ko para ki Jehova? Kapaki-pakinabang pa daw ako ki Jehova?’

² Kun dai ta hihinguwahon na masimbag an arog kaining mga hapot, puwedeng makaapektar iyan sa satong pagsamba. Sa artikulong ini, pag-uulayan ta kun paano an pagpokus sa mga prinsipyo sa Bibliya makakatabang sa sato kun nagdududa kita (1) kun baga interesado si Jehova sa sato, (2) kun baga madunong an mga nagin desisyon ta kaidto, o (3) kun baga kapaki-pakinabang pa man giraray kita ki Jehova.

KUN PAANO HAHALION AN SAIMONG MGA PAGDUDA

3. Ano an sarong paagi tanganing mahali ta an satong mga pagduda?

³ An sarong paagi tanganing mahali ta an satong mga pagduda iyo an paghanap kan simbag sa satong mga hapot gamit an Tataramon nin Diyos. Kun gigibuhon ta iyan, mapapakusog kita, mag-uuswag sa espirituwal, asin magigin mas andam na ‘marigon na manindugan sa pagtubod.’—1 Cor. 16:13.

4. Paano niyato magigibong “siyertuhon an gabos na bagay”? (1 Tesalonica 5:21)

⁴ Basahon an 1 Tesalonica 5:21. Mangnuhon na dinadagka kita kan Bibliya na “siyertuhon an gabos na bagay.” Paano ta iyan magigibo? Puwede tang siyertuhon kun baga totoo an satong tinutubod paagi sa pagkumparar kaiyan sa kun ano an sinasabi kan Bibliya. Halimbawa, pag-isipan an sitwasyon kan hoben na nag-iisip-isip kun baga talagang mahalaga siya sa Diyos. Aakuon na sana daw niya na totoo iyan? Dai. Dapat niyang “siyertuhon an gabos na bagay” paagi sa pag-aram kan kaisipan ni Jehova manungod diyan.

5. Paano ta “nadadangog” an mga simbag ni Jehova sa satong mga hapot?

⁵ Mantang binabasa ta an Tataramon nin Diyos, “nadadangog” ta si Jehova na nakikipag-ulay sa sato. Pero urog pa diyan an kaipuhan tang gibuhon para maaraman an saiyang kaisipan manungod sa sarong espesipikong hapot. Kaipuhan tang ipokus an satong pagbasa nin Bibliya sa temang gusto tang pag-adalan. Puwede tang i-research an temang iyan gamit an manlain-lain na kasangkapan sa pag-adal na itinatao kan organisasyon ni Jehova. (Tal. 2:​3-6) Puwede tang ipamibi ki Jehova na giyahan niya kita sa pag-research asin tabangan kitang maaraman an saiyang kaisipan manungod sa satong hapot. Dangan puwede kitang maghanap nin mga prinsipyo sa Bibliya asin nin praktikal na mga impormasyon na aplikado sa satong sitwasyon. Puwede man kitang makinabang paagi sa pag-adal sa mga salaysay sa Bibliya manungod sa mga lingkod nin Diyos na napaatubang sa kaagid na sitwasyon.

6. Paano nakakatabang sa sato an mga pagtiripon para mahali an satong mga pagduda?

⁶ “Nadadangog” ta man si Jehova na nakikipag-ulay sa sato pag nag-aatender kita sa satong mga pagtiripon. Kun regular kitang nag-aatender sa mga pagtiripon, puwede tang madangog sa sarong pahayag o komento an sarong bagay na iyo mismo an kaipuhan ta para mahali an satong mga pagduda. (Tal. 27:17) Pag-ulayan niyato ngunyan kun paano mahahali an nagkapirang partikular na pagduda.

PAG NAGDUDUDA KA KUN BAGA INTERESADO SA SAIMO SI JEHOVA

7. Ano an tibaad maihapot kan nagkapira?

⁷ Naisip mo na daw kun minsan, ‘Naririparo daw talaga ako ni Jehova?’ Kun pagmati mo bako kang mahalaga, tibaad maisip mo na garo baga imposible na magin amigo kan Kaglalang kan uniberso. Posibleng naisip man iyan ni Hading David. Para sa saiya, makangangalas na si Jehova rinirisa kita na mga tawo man sana, kaya sinabi niya: “O Jehova, siisay man an tawo ta dapat mo pa siyang riparuhon, an aki nin tawong mortal ta dapat mo pa siyang tawan nin atensiyon?” (Sal. 144:3) Sain mo mahahanap an simbag sa hapot na ini?

8. Uyon sa 1 Samuel 16:​6, 7, 10-12, ano an hinihiling ni Jehova sa mga tawo?

⁸ Sa Bibliya, naaraman niyato na naririparo o tinatawan ni Jehova nin atensiyon an mga tawong garo baga bakong mahalaga para sa iba. Halimbawa, isinugo ni Jehova si Samuel sa harong ni Jesse para lahidan an saro sa mga aking lalaki kaini bilang hadi kan Israel pag-abot nin panahon. Inarapod ni Jesse an pito sa walo niyang aking lalaki tanganing iatubang ki Samuel pero dai niya iiniba si David, an pinakanguhod.b Alagad, si David an pinili ni Jehova. (Basahon an 1 Samuel 16:​6, 7, 10-12.) Nahiling ni Jehova kun ano talaga an panglaog na pagkatawo ni David—sarong hoben na lalaki na mapagpahalaga sa espirituwal na mga bagay.

9. Taano ta makakasigurado ka na interesado sa saimo si Jehova? (Hilingon man an ritrato.)

⁹ Pag-isipan kun sa ano nang mga paagi ipinahiling saimo ni Jehova na tinatawan ka niya nin atensiyon. Nagtatao siya nin sadol na angay sa kun ano mismo an kaipuhan mo. (Sal. 32:8) Bako daw na dai niya iyan magigibo kun dai ka niya midbid na marhay? (Sal. 139:1) Pag inaaplikar mo an sadol ni Jehova asin nahihiling mo kun paano iyan nakakatabang saimo, magigin kumbinsido ka na interesado sa saimo si Jehova. (1 Cron. 28:9; Gibo 17:​26, 27) Tinatawan ni Jehova nin atensiyon an mga paghihinguwa mo. Pighihiling niya an marahay na mga kuwalidad mo asin gusto niya na magin amigo ka niya. (Jer. 17:10) Buot niyang akuon mo an alok niyang magin Amigo mo siya.​—1 Juan 4:19.

PAG NAGDUDUDA KA KUN BAGA MADUNONG AN MGA NAGIN DESISYON MO KAIDTO

10. Pag iniisip-isip ta an mga nagin desisyon ta kaidto sa buhay, ano an mga tibaad maihapot niyato?

¹⁰ May mga pagkakataon na an iba tibaad nag-iisip-isip kun baga tama an mga nagin desisyon ninda kaidto sa buhay. Tibaad nagdesisyon sindang bayaan an sarong magayon na karera o an sarong mapangganang negosyo tanganing mas lubos pang makapaglingkod ki Jehova. Ngunyan, dakul na taon na an naglihis—tibaad mga dekada pa ngani. Tibaad nahihiling ninda an mga kamidbid nindang nag-abot nin sekular na mga karera tapos ngunyan garo baga estable na sa pinansiyal. Huli kaiyan, tibaad maisip ninda: ‘Sulit daw an mga ginibo kong pagsasakripisyo para ki Jehova? O nagin dahilan daw iyan na mapalampas ko an iba pang mga oportunidad?’

11. Ano an nakapurisaw sa kagsurat kan Salmo 73?

¹¹ Kun napupurisaw ka man kan arog kaiyan na mga hapot, pag-isipan kun ano an namatian kan kagsurat kan Salmo 73. Nahihiling niyang an iba may marahay na salud, mayaman, asin mayong problema sa buhay. (Sal. 73:​3-5, 12) Mantang inoobserbaran niya sinda saka an garo baga kapangganahan ninda sa buhay, namati niya na daing saysay an saiyang mga paghihinguwa na paglingkudan si Jehova. ‘Nasasakitan siyang marhay sa bilog na aldaw’ huli kan nakakadisganar na kaisipan na iyan. (Sal. 73:​13, 14) Ano an ginibo niya para mahali an negatibong pagmating iyan?

12. Uyon sa Salmo 73:​16-18, ano an ginibo kan salmista tanganing mahali an namamatian niyang pagkapurisaw?

¹² Basahon an Salmo 73:​16-18. Nagduman an salmista sa sarong matuninong na lugar—sa santuwaryo ni Jehova. Diyan, nakapag-isip-isip siya nin malinaw. Nasabutan niya na dawa ngani garo baga komportable an buhay kan nagkapira, daing kasiguraduhan an puturo ninda. Huli kaini, nagkaigwa siya nin katuninungan nin isip, sa pakaaram na an pag-inot sa espirituwal na mga bagay iyo an pinakamarahay na desisyon. Bilang resulta, nagin determinado na giraray siya na padagos na paglingkudan si Jehova.​—Sal. 73:​23-28.

13. Paano ka magkakaigwa nin katuninungan nin isip kun dai ka sigurado sa mga nagin desisyon mo kaidto sa buhay? (Hilingon man an ritrato.)

¹³ Puwede ka man magkaigwa nin arog kaiyan na katuninungan nin isip sa tabang kan Tataramon nin Diyos. Paano? Hurop-hurupon an halaga kan mga bagay na igwa ka—kaiba na an kayamanan sa langit—asin ikumparar iyan sa mangyayari sa mga tawong an balos iyo sana an mga bagay na inaalok kan kinaban na ini. Tibaad lubos sindang nagsasarig sa mga naisagibo ninda sa buhay dahil mayo man sindang inaantisipar na paglaom sa maabot. Pero ika, nanunuga sa saimo si Jehova na bebendisyunan ka niya nin labi nanggad kisa sa maiimahinar mo. (Sal. 145:16) Pag-isipan man ini: Bako daw na dai man talaga niyato kayang maaraman kun ano kuta an magigin buhay ta kun ibang mga desisyon an pinili ta? Pero sarong bagay an sigurado: An mga naggigibo nin mga desisyon base sa pagkamuot ninda sa Diyos asin sa kapwa nungkang napapalampas an ano man na bagay na tunay nanggad na marahay.

PAG NAGDUDUDA KA KUN BAGA KAPAKI-PAKINABANG KA KI JEHOVA

14. Ano an sitwasyon kan nagkapira sa mga lingkod ni Jehova, asin ano an tibaad maihapot ninda?

¹⁴ An nagkapira sa mga lingkod ni Jehova namamatian an mga epekto nin paggurang, nasasakitan huli sa maluyang salud, o may problema sa pisikal o mental. Huli kaiyan, tibaad mamatian nindang bako sindang mahalaga ki Jehova. Tibaad maihapot ninda, ‘Kapaki-pakinabang pa daw ako ki Jehova?’

15. Sa ano kumbinsido an kagsurat kan Salmo 71?

¹⁵ Nakamati man nin arog kaiyan an kagsurat kan Salmo 71. Namibi siya: “Dai mo ako pagbayaan pag magluya na an sakong kusog.” (Sal. 71:​9, 18) Minsan siring, nagdanay na kumbinsido an salmista na kun maimbod siyang maglilingkod ki Jehova, gigiyahan asin tatabangan Niya siya. Arog kan nanudan kan salmista, nauugma si Jehova sa mga naggigibo kan saindang pinakamakakaya na paglingkudan Siya sa ibong kan saindang mga limitasyon.​—Sal. 37:​23-25.

16. Sa anong mga paagi kapaki-pakinabang ki Jehova an mga may edad na? (Salmo 92:​12-15)

¹⁶ Mga may edad na, mansayon an saindong sitwasyon arog kan pagmansay diyan ni Jehova. Matatabangan niya kamo na padagos na magin produktibo sa espirituwal dawa ngani tibaad nasasakitan kamo huli sa saindong pisikal na mga limitasyon. (Basahon an Salmo 92:​12-15.) Imbes na magpokus sa kun ano an mga dai na nindo kayang gibuhon, magpokus sa kun ano an mga kaya nindo. Halimbawa, puwede nindong pakusugon an iba paagi kan saindong maimbod na halimbawa asin sa personal na interes na ipinapahiling nindo. Puwede nindong ipakipag-ulay kun paano kamo tinabangan ni Jehova sa naglihis na mga taon asin iistorya an saindong makusog na paglaom na mauutob an saiyang mga panuga. Asin dai pagbaliwalaon kun gurano karahay kan puwedeng magibo kan saindong udok sa pusong mga pamibi para sa iba. (1 Ped. 3:12) Ano man an satong kamugtakan, gabos kita may maitatao ki Jehova saka sa iba.

17. Taano ta dai niyato dapat ikumparar sa iba an satong sadiri?

¹⁷ Kun nadidisganar ka huling dai mo kaya na urog pang makapaglingkod ki Jehova dahil sa sitwasyon mo, makakapagtiwala ka na pinapahalagahan niyang marhay an ano man na kaya mong maisagibo. Tibaad ikumparar mo an nagigibo mo sa nagigibo kan iba. Dai paggibuhon iyan! Taano? Huling si Jehova dai naggigibo nin siring na pagkumparar. (Gal. 6:4) Halimbawa, tinawan ni Maria si Jesus nin sarong mamahalon na regalong pahamot na lana. (Juan 12:​3-5) Sa ibong na lado, an dukha na babaying balo nagdonar sa templo nin duwang sadit na sensilyo na hababaon an kantidad. (Luc. 21:​1-4) Pero, ibinilang ni Jesus na kapahayagan nin pagtubod an duwang regalong iyan. An saiyang Ama, si Jehova, pinapahalagahan nanggad an ano man na ginigibo mo huli sa debosyon asin pagkamuot mo para sa saiya, gurano man iyan kasadit sa paghiling mo.

18. Ano an makakatabang sa sato na mahali an satong mga pagduda? (Hilingon man an kahon na “An Tataramon ni Jehova Makakatabang sa Saimo na Mahali an mga Pagduda.”)

¹⁸ Gabos kita nagkakaigwa nin mga pagduda paminsan-minsan. Pero arog kan naaraman ta, an mapagtitiwalaan na Tataramon nin katotoohan kan satong Diyos, an Bibliya, makakatabang sa sato na mahali iyan. Kaya hinguwahon na mahali an saimong mga pagduda; makakatabang iyan na masalidahan nin kumpiyansa an saimong pagkapurisaw. Daing duda na tinatawan ka ni Jehova nin atensiyon bilang indibidwal. Inaapresyar niya an saimong mga pagsasakripisyo, asin determinado siyang tawan ka nin balos. Makakasigurado ka na an gabos na maimbod na lingkod ni Jehova, ibinibilang niyang maninigo kan saiyang pagkamuot asin atensiyon.