Bako Nanggad Haliputon an Kamot ni Jehova

1. Paano si Moises nagpahiling nin pagtitiwala ki Jehova kan giniyahan niya an mga Israelita paluwas sa Ehipto?

SINAMBIT sa libro nin Hebreo an mga indibidwal na nagpahiling nin pagtubod. An saro sa sainda iyo si Moises, na nagpahiling nin ekstraordinaryong pagtubod. (Heb. 3:2-5; 11:23-25) Nagpahiling siya nin pagtubod kan giniyahan niya an mga Israelita paluwas sa Ehipto. Dai siya natakot ki Faraon saka sa saiyang hukbo. Nagtiwala siya ki Jehova, asin giniyahan niya an banwaan pabalyo sa Dagat na Pula asin kan huri sa kaawagan. (Heb. 11:27-29) Kadaklan sa mga Israelita nawaran nin kumpiyansa sa kakayahan ni Jehova na atamanon sinda, pero padagos na nagtiwala si Moises sa saiyang Diyos. Dai nasudya an pagtubod ni Moises, huling milagrosong tinawan nin Diyos nin kakanon asin tubig an saiyang banwaan sa alang na kaawagan.a—Exo. 15:22-25; Sal. 78:23-25.

2. Taano ta hinapot nin Diyos si Moises: “Haliputon daw an kamot ni Jehova”? (Bilang 11:21-23)

² Alagad, bagaman makusog an pagtubod ni Moises, mga sarong taon pagkatapos kan milagrosong pagligtas sa Israel, kinuwestiyon niya an kakayahan ni Jehova na tawan nin karne an Saiyang banwaan. Dai maimahinar ni Moises kun paano makakatao si Jehova nin igong karne tanganing mabasog an minilyon na nagkakampo sa tiwangwang na kaawagan. Bilang simbag, hinapot ni Jehova si Moises: “Haliputon daw an kamot ni Jehova?” (Basahon an Bilang 11:21-23.) Digdi, an ekspresyon na “an kamot ni Jehova” nanunungod sa banal na espiritu nin Diyos, o sa saiyang aktibong puwersa. Garo man sana hinahapot ni Jehova si Moises, ‘Sa hiling mo dai ko talaga kayang gibuhon kun ano an sinabi kong gigibuhon ko?’

3. Taano ta dapat na magin interesado kita sa eksperyensiya ni Moises asin kan mga Israelita?

³ Minsan daw naisip mo na kun baga itatao ni Jehova an materyal na mga pangangaipo mo asin kan saimong pamilya? Naisip mo man iyan o dai, siyasaton ta an eksperyensiya ni Moises asin kan mga Israelita, na nawaran nin kumpiyansa sa kakayahan nin Diyos na itao an mga pangangaipo ninda. An mga prinsipyo sa Kasuratan na kalabot diyan makakatabang sa sato na kumusog an satong kumpiyansa na bako nanggad haliputon an kamot ni Jehova.

MAKANUOD KI MOISES ASIN SA MGA ISRAELITA

4. Ano an posibleng dahilan kaya kinuwestiyon kan dakul an kakayahan ni Jehova na tawan sinda kan saindang materyal na mga pangangaipo?

⁴ Pag-ulayan ta an konteksto. An nasyon nin Israel asin “an sarong dakulang grupo” nin mga bakong Israelita “na manlain-lain an lahi” haloy-haloy na kaidtong nagbabaklay sa mahiwas na kaawagan haling Ehipto pasiring sa Dagang Panuga. (Exo. 12:38; Deu. 8:15) An grupong iyan nin mga bakong Israelita nagsawa sa pagkakan nin manna asin pati man an dakul na Israelita, na uminiba man sa pagreklamo. (Bil. 11:4-6) Nagpuon na hanap-hanapon kan mga tawo an mga kinakakan ninda kaidto sa Ehipto. Huli sa pagparareklamo saiya kan mga tawo, garo inisip na lugod ni Moises na siya na mismo an kaipuhan na magtao kaiyan sa sainda.—Bil. 11:13, 14.

5-6. Anong bakong marahay na ugali kan mga bakong Israelita an nakaimpluwensiya sa dakul na Israelita, asin ano an manunudan ta diyan?

⁵ Minalataw na naimpluwensiyahan an mga Israelita kan kawaran nin apresasyon na ipinahiling kan mga bakong Israelita. Puwede man kitang maimpluwensiyahan kan pagigin bakong mapagpasalamat kan iba asin magin diskontento sa kun ano an itinatao sa sato ni Jehova. Puwedeng mangyari iyan kun pagpaparahanapon ta kun ano an igwa kita kaidto o kun maaara kita sa kun anong igwa an iba. Alagad, magigin mas maugma kita kun hihinguwahon tang magin kontento ano man an satong kamugtakan.

⁶ Dapat kuta ginirumdom kan mga Israelita an asigurasyon sa sainda nin Diyos na pag-abot ninda sa saindang bagong istaran magkakaigwa sinda nin abundang materyal na mga bagay. An panugang iyan uutubon sa Dagang Panuga, bako mantang nagbabaklay sinda sa kaawagan. Kaagid kaiyan, imbes na magparapokus sa kun ano an mayo kita sa sistemang ini nin mga bagay, marahay na hurop-hurupon ta kun ano an ipinanuga ni Jehova na itatao niya sa sato sa bagong kinaban. Puwede ta man na hurop-hurupon an mga teksto na makakatabang sa sato na kumusog an satong pagtitiwala ki Jehova.

7. Taano ta makakapagtiwala kita na bakong haliputon an kamot ni Jehova?

⁷ Alagad, tibaad maisip mo kun taano ta hinapot nin Diyos si Moises: “Haliputon daw an kamot ni Jehova?” Posibleng tinatabangan ni Jehova si Moises na isipon bako lang an manungod sa puwersa kan Saiyang makusog na kamot kundi pati man kun sagkod sain an kayang maabot kaiyan. Kaya nin Diyos na tawan nin abundang karne an mga Israelita dawa ngani yaon sinda sa harayong kaawagan. Paagi sa “makusog na kamot asin nakaunat na takyag,” ipinahiling nin Diyos an saiyang kapangyarihan. (Sal. 136:11, 12) Kaya pag kita nasa pagbalo, dai ta dapat pagdudahan kun baga kaya kitang abuton o tabangan kan kamot ni Jehova.—Sal. 138:6, 7.

8. Paano ta malilikayan an salang nagibo kan dakul na yaon kaidto sa kaawagan? (Hilingon man an ritrato.)

⁸ Dai nahaloy, tinawan ni Jehova nin karne an banwaan; nagkaigwa sinda nin bastanteng suplay nin pugo. Pero an mga Israelita dai nagpasalamat sa Diyos sa milagrong ini. Imbes, dakul an nagin grabe kahanab. Kaya daing pundo, sa laog nin saro may kabangang aldaw, nangurua sinda nin dakul na pugo. Naanggot na marhay si Jehova sa mga “nagpahiling nin makasadiring pagmawot,” asin pinadusahan sinda. (Bil. 11:31-34) May manunudan kita sa pangyayaring iyan. Kaipuhan niyatong mag-ingat para dai kita magin mahanab. Kita man mayaman o bako, dapat na ipriyoridad ta an pagtipon nin “kayamanan sa langit” paagi sa paghihinguwang magkaigwa nin dayupot na pakikiamigo ki Jehova asin ki Jesus. (Mat. 6:19, 20; Luc. 16:9) Kun gigibuhon ta iyan, makakasigurado kitang itatao sa sato ni Jehova an satong mga pangangaipo.

9. Kun manungod sa pagtabang nin Diyos, sa ano kita makakasigurado?

⁹ Inuunat ni Jehova an saiyang kamot para tabangan an saiyang mga lingkod ngunyan. Alagad, dai ini nangangahulugan na nungka kitang makakaeksperyensiya nin problema sa pinansiyal o na nungka kitang magugutom.b Pero nungka kitang papabayaan ni Jehova. Aalalayan niya kita sa manlain-lain na pagbalong inaagihan ta. Tanganing urog tang masabutan an katotoohan na iyan, pag-ulayan ta an duwang sitwasyon na diyan puwede tang ipahiling an satong pagtitiwala na iuunat ni Jehova an saiyang kamot tanganing tawan kita kan satong materyal na mga pangangaipo: (1) pag napapaatubang kita sa mga problema sa pinansiyal asin (2) pag nagpaplano kita manungod sa satong materyal na mga pangangaipo para sa maabot.

PAG-ATUBANG SA MGA PROBLEMA SA PINANSIYAL

10. Anong mga problema sa pinansiyal an tibaad mapaatubang sa sato?

¹⁰ Mantang paparani na an katapusan kan presenteng sistema nin mga bagay, asahan niyato na magrabe an mga kamugtakan sa ekonomiya. An kariribukan sa pulitika, giyera, mga kalamidad, o bagong mga pandemya tibaad magin dahilan nin dai inaasahan na mga gastos o na mawaran kita nin trabaho, mga pagsadiri, o istaran. Tibaad kaipuhanon tang maghanap nin bagong trabaho sa lugar na iniistaran ta o pag-isipan na magbalyo kita sa ibang lugar kaiba an satong pamilya tanganing masustentuhan sinda. Ano an makakatabang sa sato na makagibo nin mga desisyon na nagpapahiling na nagtitiwala kita ki Jehova?

11. Ano an makakatabang sa saimo na maatubang an mga problema sa pinansiyal? (Lucas 12:29-31)

¹¹ An sarong panginot asin epektibong paagi iyo na sabihon ki Jehova an saimong mga ikinakahadit. (Tal. 16:3) Hagadon sa saiya na tawan ka kan kadunungan na kaipuhan mo tanganing makagibo nin marahay na mga desisyon asin nin kalmadong puso tanganing malikayan mong ‘magparahadit’ manungod sa saimong sitwasyon. (Basahon an Lucas 12:29-31.) Padagos man na hagadon sa saiya na tabangan kang magin kontento sa mga panginot na pangangaipo sa buhay. (1 Tim. 6:7, 8) Mag-research sa satong mga publikasyon kun paano mapangganang maaatubang an mga problema sa pinansiyal. Dakul an nakinabang sa mga reperensiya na mahihiling sa jw.org manungod sa kun paano aatubangon an mga problema sa pinansiyal.

12. Anong mga hapot an makakatabang sa sarong Kristiyano para makagibo nin pinakamarahay na desisyon para sa saiyang pamilya?

¹² May mga indibidwal na naengganyar na akuon an sarong trabaho sa ibang lugar na harayo sa saindang pamilya. Pero sa parati nagin bakong madunong na desisyon iyan. Bago akuon an sarong bagong trabaho, pag-isipan bako lang an posibleng magin mga bentaha sa pinansiyal kundi pati man kun ano an magigin epekto kaiyan sa espirituwalidad nindo. (Luc. 14:28) Haputon an sadiri: ‘Ano an puwedeng magin epekto sa relasyon mi ni agom kun harayo ako sa saiya? Kun mabalyo ako, ano an magigin epekto kaiyan sa pakikiasosyar ko sa mga tugang asin sa sakong ministeryo?’ Kun may mga aki ka, kaipuhan mo man na ihapot sa saimong sadiri an mahalagang hapot na ini: ‘Paano ko mapapadakula an sakong mga aki “sa disiplina asin sadol ni Jehova” kun dai ninda ako kaiba?’ (Efe. 6:4) Magpagiya sa kaisipan nin Diyos, bako sa kaisipan kan mga kapamilya o mga amigo na daing paggalang sa mga prinsipyo sa Kasuratan.c Si Tony, na nakaistar sa sulnupan na Asia, inalukan kaidto nin nagkapirang trabaho na halangkaw an suweldo sa ibang nasyon. Alagad, pagkatapos na ipamibi iyan asin ipakipag-ulay sa saiyang agom, nagdesisyon siyang sayumahan an mga alok asin hininguwang bawasan an gastos kan pamilya. Sa ngunyan, ini an sabi ni Tony: “Nagkaigwa ako kan pribilehiyo na matabangan an nagkapirang tawo na mamidbid si Jehova, saka an mga aki mi entusiyastiko sa paglilingkod ki Jehova. Nanudan kan pamilya mi na sagkod na namumuhay kami kauyon kan mga tataramon sa Mateo 6:33, aatamanon kami ni Jehova.”

PAGPLANO MANUNGOD SA SATONG MATERYAL NA MGA PANGANGAIPO PARA SA MAABOT

13. Ano an mga rasonableng puwede tang gibuhon ngunyan na makakatabang para magkaigwa kita kan satong materyal na mga pangangaipo pag gurang na kita?

¹³ An pagtitiwala ta sa kamot ni Jehova puwede man mabalo pag iniisip-isip ta kun ano daw kaya an magigin kamugtakan ta pag gurang na kita. Sinasabi sato kan Bibliya na magin mahigos kita sa pagtrabaho tanganing magkaigwa kita kan satong materyal na mga pangangaipo para sa maabot. (Tal. 6:6-11) Rasonable man na magtipon para sa puturo sigun sa kakayahan niyato. Totoo na an kuwarta maski paano nakakatao nin proteksiyon. (Ecl. 7:12) Alagad, dapat niyatong likayan na ipokus an satong buhay sa pagparahanap nin materyal na mga bagay.

14. Taano ta dapat niyatong pag-isipan an Hebreo 13:5 pag nagpaplano manungod sa satong pinansiyal na mga pangangaipo para sa maabot?

¹⁴ Nagsaysay si Jesus nin sarong ilustrasyon manungod sa kamangmangan kan pagtipon nin kuwarta alagad “bakong mayaman sa paghiling nin Diyos.” (Luc. 12:16-21) Mayo nin siisay man na nakakaaram kun ano an mangyayari sa kinaagahan. (Tal. 23:4, 5; Sant. 4:13-15) Napapaatubang kita sa sarong partikular na kadipisilan bilang mga parasunod ni Cristo. Sinabi ni Jesus na dapat na andam kitang ‘butasan’ an gabos tang mga pagsadiri tanganing magin disipulo niya. (Luc. 14:33, nota sa ibaba) Maugma iyan na ginibo kan mga Kristiyano kan inot na siglo sa Judea. (Heb. 10:34) Sa presenteng panahon, kinaipuhan na isakripisyo kan dakul na tugang an saindang pinansiyal na seguridad huling nagsayuma sindang magsuportar sa ano man na partido sa pulitika. (Kap. 13:16, 17) Ano an nakatabang sa sainda na gibuhon iyan? Igwa sinda nin lubos na pagtitiwala sa panuga ni Jehova: “Dai taka nuarin man babayaan, asin dai taka nuarin man papabayaan.” (Basahon an Hebreo 13:5.) Ginigibo ta an satong pinakamakakaya na magplano manungod sa satong mga pangangaipo para sa maabot, asin kun may mangyari man sa sato na dai inaasahan, nagtitiwala kita na tatabangan kita ni Jehova.

15. Ano an dapat na magin pagmansay kan Kristiyanong mga magurang sa saindang mga aki? (Hilingon man an ritrato.)

¹⁵ Sa nagkapirang kultura, nag-aaki an mga mag-agom panginot na tanganing an mga aki ninda an magtao sa sainda nin pinansiyal na suporta pag naggurang na sinda. An mga magurang na ini garo man sana ibinibilang na “retirement plan” an mga aki ninda. Sinasabi kan Bibliya na dapat na itao kan mga magurang an mga pangangaipo kan saindang mga aki. (2 Cor. 12:14) Siyempre, mantang nagkakaedad na an mga magurang, tibaad mangaipo na sinda nin nagkapirang praktikal na tabang, asin dakul na aki an maugmang nagtatao kaiyan. (1 Tim. 5:4) Pero nasasabutan kan Kristiyanong mga magurang na magigin pinakamaugma sinda, bako kun papadakulaon ninda an saindang mga aki sa katuyuhan na makakua sa sainda nin pinansiyal na suporta, kundi kun tatabangan ninda an saindang mga aki na magin mga lingkod ni Jehova.—3 Juan 4.

16. Paano maihahanda kan mga magurang an saindang mga aki tanganing masuportaran kan mga ini an saindang sadiri sa pinansiyal? (Efeso 4:28)

¹⁶ Paagi sa saimong halimbawa, tukduan an saimong mga aki na magtiwala ki Jehova mantang tinatabangan mo sindang mag-andam kun paano ninda susuportaran an saindang sadiri. Puon sa pagkaaki, ipahiling sa sainda an kahalagahan kan kahigusan. (Tal. 29:21; basahon an Efeso 4:28.) Mantang nagdadakula sinda, tabangan sinda na gibuhon an saindang pinakamakakaya sa pag-eskuwela. Marahay na mag-research an Kristiyanong mga magurang asin gamiton an mga prinsipyo sa Bibliya tanganing tabangan an saindang mga aki sa pagdedesisyon kun paano gagamiton an edukasyon sa madunong na paagi. Maihahanda kaini an mga aki tanganing masuportaran ninda an saindang sadiri sa pinansiyal asin lubos na makapartisipar sa Kristiyanong ministeryo.

17. Sa ano kita makakasigurado?

¹⁷ Makakaasa an maimbod na mga lingkod ni Jehova na kaya asin mawot niyang itao an saindang materyal na mga pangangaipo. Mantang paparani na kita sa katapusan kan sistemang ini nin mga bagay, asahan niyato na mababalo an pagtitiwala ta ki Jehova. Pero, ano man an mangyari, lugod na magin determinado kita na magtiwala na gagamiton ni Jehova an saiyang kapangyarihan tanganing tawan kita kan satong materyal na mga pangangaipo. Makakasigurado kita na an saiyang makusog na kamot asin an saiyang nakaunat na takyag nungkang magigin haliputon para maabot kita.