An Pagigin Dayupot sa Lambang Saro Marahay Nanggad sa Sato!

1-2. Ano an sarong bagay na importante ki Jehova, asin ano an gusto niyang gibuhon ta?

IMPORTANTENG marhay ki Jehova kun paano niyato tinatratar an satong kapwa. Itinukdo ni Jesus na dapat tang kamutan an satong kapwa nin siring sa satong sadiri. (Mat. 22:37-39) Kaiba diyan an pagigin mabuot dawa sa mga bako niyatong kapagtubod. Pag nagpapahiling kita nin arog kaining kabuutan, inaarog ta an Diyos na Jehova na “pinapasirangan nin aldaw an mga maraot saka an mga marahay asin pareho niyang pinapauranan an mga matanos saka an mga bakong matanos.”—Mat. 5:45.

² Dawa ngani namumutan ni Jehova an bilog na katawuhan, lalo nang kinawiwilihan niya an mga tawong ginigibo kun ano an tama. (Juan 14:21) Gusto niya na arugon ta siya. Dinadagka niya kita na magkaigwa nin “makusog na pagkamuot” sa satong mga tugang asin na magin “mapagpadangat” sa sainda. (1 Ped. 4:8; Roma 12:10) Kun manungod sa pagpahiling nin siring na pagkamuot asin kapadangatan sa sarong tawo, tibaad naiisip ta an pagigin ugos niyato sa sarong namumutan na kapamilya o amigo.

3. Ano an dapat tang tandaan manungod sa pagkamuot?

³ An pagkamuot, arog sa sarong masitas, kaipuhan na atamanon tanganing magtalubo. Sinadol ni apostol Pablo an mga Kristiyano: “Padagos kamong magpahiling nin pagkamuot na sa-magturugang.” (Heb. 13:1) Gusto ni Jehova na padagos tang patalubuon an satong pagkamuot sa iba. Sa artikulong ini, pag-uulayan ta kun taano ta dapat kitang urog na magin dayupot sa satong mga kapwa parasamba asin kun paano ta iyan padagos na magigibo.

KUN TAANO TA DAPAT KITANG UROG NA MAGIN DAYUPOT SA LAMBANG SARO

4. Arog kan ilinadawan sa Salmo 133:1, paano ta mapapagdanay an satong apresasyon sa satong nagkakasararong kasararuan nin magturugang? (Hilingon man an mga ritrato.)

⁴ Basahon an Salmo 133:1. Uyon kita sa salmista na nagsurat na an tunay na pakikiamigo sa mga namumuot ki Jehova ‘marahay’ asin ‘maugma.’ Alagad, kun paanong puwedeng mawara an apresasyon nin saro sa sarong magayunon na kahoy na nahihiling niya aroaldaw, puwede man na mawara an satong apresasyon sa kagayunan kan satong Kristiyanong pagkasararo. Parati tang nahihiling an satong mga tugang, tibaad nagkapirang beses kada semana. Kaya paano ta mapapagdanay an satong apresasyon sa sainda? Magigin mas makusog an satong pagkamuot sa satong mga tugang kun matao kita nin panahon na isip-isipon kun gurano kahalaga sa kongregasyon asin sa sato an lambang saro.

5. Ano an puwedeng magin epekto sa iba kan pagkamuot na ipinapahiling niyato sa lambang saro?

⁵ An nagkapira sa mga primero pa lang na mag-atender sa satong pagtiripon napapahangang marhay sa pagkamuot na igwa kita para sa lambang saro. Diyan pa lang, tibaad isipon na nindang nahanap na ninda an katotoohan. Sinabi ni Jesus: “Paagi kaini, maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.” (Juan 13:35) Pag-isipan an eksperyensiya ni Chaithra, sarong estudyante sa unibersidad na nakikipag-adal kaidto nin Bibliya sa mga Saksi ni Jehova. Inako niya an imbitasyon na mag-atender sa sarong pangrehiyon na kumbensiyon. Pagkatapos kan inot na aldaw na pag-atender nin in person, sinabi niya sa nagba-Bible study sa saiya: “Dai pa lamang ako kinugos kan mga magurang ko. Pero sa kumbensiyon nindo, 52 na beses akong kinugos sa saro sanang aldaw! Paagi sa espirituwal na pamilyang ini, namatian kong namumutan ako ni Jehova. Gusto kong magin parte kan pamilyang iyan.” Padagos na nag-uswag si Chaithra sagkod na mabawtismuhan siya kan 2024. Iyo, pag nahihiling kan mga baguhan an satong marahay na mga gibo, kaiba na an pagkamuot ta para sa lambang saro, sa parati napapahiro sindang maglingkod ki Jehova.—Mat. 5:16.

6. Paano puwedeng magin proteksiyon sa sato an paghihinguwa niyatong magin mas dayupot sa satong mga tugang?

⁶ An paghihinguwa niyato na magin mas dayupot sa satong mga tugang puwedeng magin sarong proteksiyon. Dinagka ni Pablo an mga kapwa niya Kristiyano: “Padagos nindong pakusugon an lambang saro sa kada aldaw . . . tanganing mayo nin siisay man sa saindo an mapatagas kan mapandayang kapangyarihan nin kasalan.” (Heb. 3:13) Kun mangyari na pangluyahan kitang marhay nin buot na dahil kaiyan an satong mga bitis nagpupuon nang maglihis sa dalan nin katanusan, puwedeng pahiruon ni Jehova an sarong mapag-obserbar na kapagtubod na tawan kita kan kaipuhan tang tabang. (Sal. 73:2, 17, 23) Tunay nanggad na marahay sa sato an siring na pampakusog nin buot.

7. Paano magkakonektar an pagkamuot asin pagkasararo? (Colosas 3:13, 14)

⁷ Kabilang kita sa sarong grupo nin mga tawo na nagmamaigot na magpahiling nin pagkamuot sa lambang saro, kaya nagkakamit kita nin dakul na bendisyon. (1 Juan 4:11) Halimbawa, pinapahiro kita kan pagkamuot na “padagos na pagpasensiyahan an lambang saro,” asin nakakatabang iyan sa pagkasararo niyato bilang mga Kristiyano. (Basahon an Colosas 3:13, 14; Efe. 4:2-6) Kaya, sa satong mga pagtiripon, namamatian ta an kaugmahan na nungka tang maeeksperyensiyahan sa ano pa man na ibang grupo digdi sa daga.

TAWAN NIN ONRA AN LAMBANG SARO

8. Ano an papel ni Jehova sa pagtabang sa sato na magkaigwa nin pagkasararo?

⁸ An pambilog na kinaban na pagkasararo na igwa kita sarong milagro. Pinapagin posible iyan ni Jehova sa ibong kan satong mga pagkabakong perpekto. (1 Cor. 12:25) Sinasabi kan Bibliya na “tinukduan [kita] nin Diyos na kamutan an lambang saro.” (1 Tes. 4:9) Sa ibang pagtaram, paagi sa Kasuratan, sinasabi sa sato ni Jehova kun ano mismo an kaipuhan tang gibuhon tanganing magin mas dayupot sa lambang saro. Puwede kitang ‘tukduan nin Diyos’ paagi sa maingat na pagsiyasat sa saiyang mga katukduan asin pag-aplikar kaiyan. (Heb. 4:12; Sant. 1:25) Asin iyan mismo an hinihinguwang gibuhon kan mga Saksi ni Jehova.

9. Ano an manunudan ta sa Roma 12:9-13 manungod sa pagtao nin onra sa lambang saro?

⁹ Paano kita tinutukduan kan Tataramon nin Diyos na hinguwahon na magin mas dayupot sa lambang saro? Pag-isipan kun ano an sinabi ni Pablo manungod sa bagay na ini, na mababasa sa Roma 12:9-13. (Basahon.) Mangnuhon an mga tataramon na “sa pagtao nin onra sa lambang saro, kamo an manginot.” Ano an buot sabihon kaiyan? Dapat na kita na an mag-inot na magpahiling nin ‘kapadangatan’ sa iba sa manlain-lain na paagi, arog kan pagpatawad sainda, pagigin mapag-istimar, asin pagigin matinao. (Efe. 4:32) Dai na paghalaton an saimong tugang na iyo an maghinguwang magin mas dayupot saimo. Puwedeng ika na an “manginot” sa paggibo kaiyan. Angay sana na sinabi ni Jesus: “Igwang urog na kaugmahan sa pagtao kisa sa pag-ako.”—Gibo 20:35.

10. Paano ta maipapahiling na mahigos kita “sa pagtao nin onra sa lambang saro”? (Hilingon man an ritrato.)

¹⁰ Interesante na pagkatapos tulos na sabihon sa sato ni Pablo na manginot kita sa pagtao nin onra sa lambang saro, dinagka niya kita na “magin mahigos, bakong hugakon.” An sarong tawong mahigos, maigot. Pag tinawan siya nin trabaho, matiyaga niya iyan na ginigibo. Ineengkaminar kita kan Talinhaga 3:27, 28: “Dai mo ipanguri an marahay sa mga maninigo mong tawan kaiyan kun kaya mo man sanang magtabang.” Kauyon kaiyan, pag may nahiling kitang nangangaipo nin tabang, ginigibo ta an satong makakaya tanganing tabangan siya. Dai kita nagpapaliman-liman; dai ta man iniisip na may ibang tawo na man na magibo kaiyan.—1 Juan 3:17, 18.

11. Ano an makakatabang sa sato na magin mas dayupot sa lambang saro?

¹¹ An saro pang paagi na matatawan ta nin onra an iba iyo an pagpatawad tulos sa sainda pag nakulgan ninda kita. An Efeso 4:26 nagsasabi: “Dai nindo pagpasulnupon an aldaw na anggot pa kamo.” Taano? Huling kun magdadanay kitang anggot, sinasabi sa bersikulo 27 na “[tinatawan niyato] nin oportunidad an Diyablo.” Sa saiyang Tataramon, pauruutrong sinasabi sa sato ni Jehova na patawadon ta an lambang saro. Sa Colosas 3:13, dinadagka kita na “padagos na . . . lubos na patawadon an lambang saro.” An pagpatawad sa mga salang nagigibo sato kan iba saro sa pinakamarahay na paagi na magin mas dayupot kita sa sainda. Pag ginigibo ta iyan, nakakatabang kita na “mapagdanay an pagkasararo kan espiritu sa nakakapasararong bugkos nin katuninungan.” (Efe. 4:3) Sa madaling sabi, an pagpapatawad puwedeng direktang makakontribwir sa satong pagkasararo asin katuninungan.

12. Paano kita tinatabangan ni Jehova na magin mapagpatawad?

¹² Iyo, tibaad madipisilan kitang patawadon an mga nakakulog sa sato. Pero magigibo ta iyan sa tabang kan espiritu nin Diyos. Pagkatapos kitang sadulon na “magin mapagpadangat . . . sa lambang saro” asin na “magin mahigos,” sinadol pa kita kan Kasuratan: “Magin malaad paagi sa espiritu.” An sarong tawong “malaad” “nagpapahiling nin labi-labing kaigutan asin entusiyasmo na resulta kan impluwensiya” kan banal na espiritu. (Hilingon an study note sa Roma 12:11.) Kaya makakatabang sa sato an espiritu nin Diyos na makapahiling kita nin mamumuton na kapadangatan asin na lubos na patawadon an lambang saro. Huli kaiyan, udok tang hinahagad ki Jehova na tabangan niya kita.—Luc. 11:13.

‘DAI DAPAT MAGKAIGWA NIN MGA PAGKABARANGA DIYAN SA SAINDO’

13. Ano an puwedeng magin dahilan na magkaigwa nin mga pagkabaranga sa sato?

¹³ An kongregasyon kompuwesto nin “gabos na klase nin tawo” na magkakalain nin personalidad asin pinaghalian. (1 Tim. 2:3, 4) Kun dai kita mag-iingat, an mga pagkakalain-lain na ini puwedeng magkawsa nin pagkabaranga sa mga bagay na kalabot an personal na pagpili, arog kan pagbado asin pag-ayos sa sadiri, pagbulong, o libangan. (Roma 14:4; 1 Cor. 1:10) Huling tinukduan kita kan Diyos na kamutan an lambang saro, dapat niyatong likayan na iinsistir na mas marahay an satong personal na mga kagustuhan kisa kan sa iba.—Fil. 2:3.

14. Dapat na pirmi niyatong hinguwahon na magin ano, asin taano?

¹⁴ Malilikayan ta man na magkaigwa nin mga pagkabaranga sa kongregasyon paagi sa paghihinguwang magin nakakapaginhawa asin nakakaparigon sa iba sa gabos na panahon. (1 Tes. 5:11) Dai pa sana nahahaloy, dakul na inaktibo o hinali sa kongregasyon an nagbalik. Maugma ta sindang inaako! (2 Cor. 2:8) Mangnuhon an nangyari sa sarong sister na nag-atender giraray sa Kingdom Hall pagkatapos na magin inaktibo sa laog nin sampulong taon. Sinabi niya, “Mainamigo sindang nagngirit sa sako saka inabrasa ninda ako.” (Gibo 3:19) Ano an nagin epekto sa saiya kan mga simpleng pagpahiling na idto nin kabuutan? Sinabi niya, “Naipamati kaiyan sako na ginigiyahan ako kan kamot ni Jehova tanganing magin maugma giraray.” Paagi sa pagigin nakakaparigon sa gabos, puwede kitang gamiton ni Cristo na magtao nin kaginhawahan sa mga “nagpapagal saka nagagabatan.”—Mat. 11:28, 29.

15. Ano an saro pang paagi na makakakontribwir kita sa pagkasararo? (Hilingon man an ritrato.)

¹⁵ Makakakontribwir kita sa pagkasararo sa saro pang paagi—an satong pagtaram. Sinabi kan Job 12:11: “Bakong pigtetesting kan talinga an mga tataramon kun paanong pignanamitan kan dila an kakanon?” Kun paanong an sarong mahusay na paraluto pirming nanamitan nguna an saiyang linuto para masiguradong masiram iyan bago iserbi sa iba, marahay man na bago ta sabihon an sarong bagay pag-isipan ta ngunang marhay iyan. (Sal. 141:3) An dapat na magin pasuhan ta pirmi iyo na siguraduhon tang an sasabihon ta nakakapakusog, nakakapaginhawa, asin ‘kapaki-pakinabang sa mga nagdadangog.’—Efe. 4:29.

16. Sairisay an lalo nang dapat na maghinguwang magin nakakapakusog an pagtaram?

¹⁶ An mga agom na lalaki asin mga magurang lalo nang dapat na maghinguwang magin nakakapakusog an saindang pagtaram. (Col. 3:19, 21; Tito 2:4) An mga elder man dapat na magin gikanan nin kaginhawahan asin karangahan bilang mga pastor kan aripumpon ni Jehova. (Isa. 32:1, 2; Gal. 6:1) Ipinapagirumdom sa sato kan sarong talinhaga sa Bibliya: “An tataramon na sinabi sa tamang panahon—abaang rahay nanggad!”—Tal. 15:23.

MAMUOT “PAAGI SA GIBO ASIN KATOTOOHAN”

17. Paano ta masisigurado na hali sa puso an satong pagkamuot sa satong mga tugang?

¹⁷ Dinadagka kita ni apostol Juan na “mamuot, bakong paagi sa tataramon o paagi sa dila, kundi paagi sa gibo asin katotoohan.” (1 Juan 3:18) Gusto niyato na magin hali sa puso an satong pagkamuot sa satong mga tugang. Paano ta magigibo iyan? Mantang mas dakul na panahon tang nakakaibanan an satong mga tugang, nagigin mas dayupot kita sa lambang saro asin mas nagkukusog an satong pagkamuot sa lambang saro. Kaya gumibo nin mga paagi para magkaoportunidad kitang makaibanan sinda—sa mga pagtiripon saka sa ministeryo. Dalawon sinda. Pag ginigibo ta iyan, ipinapahiling niyato na “tinukduan [kita] nin Diyos na kamutan an lambang saro.” (1 Tes. 4:9) Asin padagos ta mismong maeeksperyensiyahan na “abaang rahay asin abaang ugma na an mga magturugang may pagkasararong nag-iirok na magkairiba!”—Sal. 133:1.