ARTIKULONG PAG-AADALAN 15
KANTA 30 Sakuyang Ama, Sakuyang Diyos Asin Katuod
“An Pagrani sa Diyos Marahay” Nanggad sa Sato!
“Para sa sakuya, an pagrani sa Diyos marahay sa sako.”—SAL. 73:28.
POKUS
Kun paano kita urog na magigin harani ki Jehova asin an mga pakinabang kan paggibo kaiyan.
1-2. (a) Ano an kaipuhan mong gibuhon para magkaigwa ka nin dayupot na amigo? (b) Ano an pag-uulayan ta sa artikulong ini?
IGWA ka daw nin dayupot na amigo? Paano kamo nagin mag-amigo? Posibleng marhay na nagtao ka nin panahon para makaibanan siya, naaraman an mga kadipisilan na inaagihan niya asin an mga gusto saka dai niya gusto. Nahiling mo na igwa siya nin marahayon na mga kuwalidad na gusto mong arugon. Asin namutan mo siya bilang amigo.
2 Nangangaipo nin panahon asin paghihinguwa tanganing magkaigwa ka nin dayupot na amigo. Iyan man an kaipuhan tanganing magkaigwa kita nin dayupot asin personal na relasyon sa Diyos na Jehova. Pag-uulayan sa artikulong ini kun paano kita magigin mas harani sa satong Diyos asin an mga pakinabang kan paggibo kaiyan. Inot, pag-ulayan ta kun taano ta marahay na magin harani sa satong pinakadayupot na Amigo, si Jehova.
3. Taano ta dapat tang hurop-hurupon an mga pakinabang kan pagigin dayupot ki Jehova? Iilustrar.
3 Siguradong mauyon ka na an pagrani ki Jehova marahay. Pero an paghurop-hurop sa kun gurano man nanggad iyan karahay makakamotibar sa sato na padagos na urog na magin dayupot sa saiya. (Sal. 63:6-8) Halimbawa, aram niyato na marahay sa sato an pagkakan nin masustansiyang mga kakanon, pag-ehersisyo, pagkaigwa nin supisyenteng pahingalo, asin pag-inom nin igong tubig. Dawa arog kaiyan, dakul an daing gayo nagtatao nin atensiyon sa mga bagay na ini kaya napapabayaan ninda an saindang salud. Alagad, mantang mas parati tang iniisip-isip an mga pakinabang sa sato kan mga kaugalian na marahay para sa salud, mas posible man na padagos tang maisasagibo an mga iyan. Sa kaagid na paagi, tibaad aram niyato na an pagrani ki Jehova marahay sa sato, pero an paghurop-hurop sa mga pakinabang kan paggibo kaiyan makakamotibar sa sato na padagos na urog na magin dayupot sa satong Amigo.—Sal. 119:27-30.
4. Arog kan ipinaparisa sa Salmo 73:28, anong sabuot an ipinahayag kan salmista?
4 Basahon an Salmo 73:28. An kagsurat kan Salmo 73 sarong Levita na ninombrahan na maglingkod bilang musikero sa templo ni Jehova. Posibleng marhay na haloy na siyang maimbod na nagsasamba ki Jehova. Minsan siring, namatian niya na kaipuhan niya pa man giraray na ipagirumdom sa saiyang sadiri asin sa iba na “an pagrani sa Diyos” marahay sa saiya asin sa sainda. Ano an nagkapira sa mga pakinabang kan paggibo kaiyan?
“AN PAGRANI SA DIYOS” NAGTATAO NIN KAUGMAHAN
5. (a) Taano ta nagtatao sa sato nin kaugmahan an urog na pagigin dayupot ki Jehova? (b) Base sa Talinhaga 2:6-16, magtao nin espesipikong mga halimbawa kun paano ka personal na makikinabang asin mapoprotektaran kan kadunungan ni Jehova.
5 Mantang urog kitang nagigin dayupot ki Jehova, urog man kitang nagigin maugma. (Sal. 65:4) Totoo ini sa dakul na dahilan. An saro iyo na nakikinabang kita sa pag-aplikar kan praktikal na kadunungan na yaon sa saiyang Tataramon, an Bibliya. An siring na kadunungan nagpoprotektar sa sato sa maraot na mga impluwensiya asin ilinilikay kita sa magabat na mga pagkakasala. (Basahon an Talinhaga 2:6-16.) Angay sana na sinasabi kan Bibliya: “Maugma an tawong nakakanumpong nin kadunungan asin an tawong nagkakamit nin pakasabot.”—Tal. 3:13.
6. Ano an dahilan kaya nawara an kaugmahan kan salmista?
6 Siyempre, dawa an mga amigo ni Jehova nakakamati man nin kamunduan paminsan-minsan. Nawara an kaugmahan kan kagsurat kan Salmo 73 kan magpadara siya sa negatibong kaisipan. Nauyam siya asin naara huling, sa isip niya, an maraot na mga tawo na daing pakiaram sa Diyos o sa Saiyang mga pamantayan hayahay an buhay. Inisip niya na an mga tawong madahas asin mapalangkaw pirming iyo an mayaman saka marahay an salud asin dai lamang nag-aagi nin kasakitan. (Sal. 73:3-7, 12) Napurisaw na marhay an salmista kaya may pagkakataon na inisip niya kun baga sulit an mga paghihinguwa niya na maglingkod ki Jehova. Huli sa grabeng kamunduan, sinabi niya: “Talagang mayo nin saysay na pinagdadanay ko pang dalisay an sakong puso asin na hinuhugasan ko an sakong mga kamot para ipahiling na daing sála ako.”—Sal. 73:13.
7. Pag nakakamati kita nin kamunduan, ano an puwede tang gibuhon? (Hilingon man an ritrato.)
7 Dawa ngani grabe an kamunduan kan salmista, may ginibo siya para mabago an kaisipan niya. “Luminaog [siya] sa banal na santuwaryo nin Diyos,” na diyan itinanos ni Jehova an saiyang kaisipan. (Sal. 73:17-19) Pag mamundo kita, aram iyan kan satong pinakadayupot na Amigo, si Jehova. Kun mamimibi kita sa saiya para sa paggiya asin aakuon an tabang na itinatao niya paagi kan saiyang Tataramon asin kan kongregasyon, tatawan niya kita kan panglaog na kusog tanganing makayanan an kamunduan. Dawa pag namamatian niyatong dai ta na kaya an mga ikinakahadit ta, rarangahon asin papaginhawahon kita ni Jehova.—Sal. 94:19.a
An Levita na nagsurat kan Salmo 73 nakatindog sa “banal na santuwaryo nin Diyos” (Hilingon an parapo 7)
“AN PAGRANI SA DIYOS” NAGTATAO SATO NIN MAKAHULUGAN NA BUHAY ASIN NIN PAGLAOM
8. Sa anong iba pang importanteng mga paagi marahay sa sato an pagrani sa Diyos?
8 An pagrani sa Diyos marahay sa sato sa duwang iba pang importanteng paagi. Inot, nagtatao iyan sa sato nin makahulugan na buhay. Ikaduwa, nagtatao iyan sa sato nin siguradong paglaom para sa maabot. (Jer. 29:11) Urog ta pang siyasaton an mga pakinabang na ini.
9. Paano an pagigin dayupot ki Jehova nagtatao nin kahulugan sa satong buhay?
9 An pagigin dayupot ki Jehova nagtatao sa sato nin makahulugan na buhay. Iniisip kan dakul na tawo ngunyan na dai nagtutubod na may Diyos na mayong kahulugan an buhay asin na pag-abot nin panahon mapapara an katawuhan. Minsan siring, huli sa pag-adal ta kan Tataramon nin Diyos, nagin kumbinsido kita na an Diyos “nag-eeksister asin na siya an nagigin paratao nin balos sa mga udok na naghahanap sa saiya.” (Heb. 11:6) Dawa ngunyan, tunay na maugma an satong buhay huling ginigibo ta kun ano an pagkadisenyo sa sato na gibuhon niyato—an paglingkudan an satong Ama sa langit, si Jehova.—Deu. 10:12, 13.
10. Ano an ihinahayag kan Salmo 37:29 manungod sa magigin puturo kan mga naglalaom ki Jehova?
10 Para sa dakul, an saindang paglaom limitado sana sa buhay na igwa sinda ngunyan—pagtrabaho, pagpamilya, asin pagtipon para sa panahon na dai na ninda kayang magtrabaho. Dai ninda iiniiba an Diyos. Sa ibong na lado, an mga lingkod ni Jehova ibinubugtak sa saiya an saindang paglaom. (Sal. 25:3-5; 1 Tim. 6:17) Dayupot na kita sa satong Diyos kaya nagtitiwala kita sa saiya saka sa ipinanuga niya sa sato. Kaiba sa puturong ipinanuga niya an paglaom na sambahon ta siya sagkod lamang sa Paraiso.—Basahon an Salmo 37:29.
11. Ano an epekto sa sato kan pagrani niyato sa Diyos, asin ano an epekto sa saiya kan paggibo niyato kaiyan?
11 An pagrani sa Diyos marahay sa sato sa dakul na iba pang mga paagi. Halimbawa, nanunuga si Jehova na papatawadon niya an mga kasalan kan nagsusulsol na mga dayupot sa saiya. (Isa. 1:18) Huli kaiyan, dai kita napapagabatan nin grabeng pagkakonsiyensiya huli sa mga nagibo ta kaidtong kasalan. (Sal. 32:1-5) Asin maugma kita huling napapaugma ta si Jehova. (Tal. 23:15) Siguradong may naiisip ka pang ibang mga bendisyon na resulta kan pagkaigwa mo nin dayupot na relasyon sa Diyos. Pero paano ka padagos na magigin harani sa Diyos?
KUN PAANO PADAGOS NA ‘MAGIGIN HARANI SA DIYOS’
12. Ano na an mga ginibo mo tanganing urog na magin dayupot sa Diyos?
12 Kun saro kang bawtisadong Kristiyano, dakul ka nang ginibo para magin dayupot ki Jehova. Nakanuod ka nin dakul na katotoohan manungod sa Diyos na Jehova asin ki Jesu-Cristo, pinagsulsulan an mga kasalan mo kaidto, nagkaigwa nin makusog na pagtubod sa Diyos, asin hininguwang humiro kauyon kan saiyang kabutan. Alagad, tanganing urog na magin dayupot sa Diyos, kaipuhan tang padagos na gibuhon an mga bagay na ini.—Col. 2:6.
13. Anong tulong bagay an makakatabang sato na padagos na urog na magin dayupot ki Jehova?
13 Ano an makakatabang sa sato na padagos na urog na magin dayupot ki Jehova? (1) Dapat na padagos tang basahon asin pag-adalan an Bibliya. Mantang ginigibo ta iyan, an pasuhan ta bako lang basta manudan an panginot na mga katotoohan manungod sa Diyos. Imbes, dapat tang hinguwahon na masabutan an kabutan nin Diyos para sa sato asin mamuhay kauyon kan mga prinsipyo na itinao niya sa saiyang Tataramon. (Efe. 5:15-17) (2) Dapat na pakusugon ta an satong pagtubod paagi sa paghurop-hurop sa dakulon na ebidensiya kan saiyang pagkamuot sa sato. (3) Dapat na padagos tang ikaungis an mga bagay na nakakapamundo ki Jehova asin likayan an pakikiamigo sa mga tawo na naggigibo kan siring na mga bagay.—Sal. 1:1; 101:3.
14. Kauyon kan sinasabi sa 1 Corinto 10:31, ano an nagkapira sa mga bagay na puwede tang gibuhon sa aroaldaw tanganing mapaugma si Jehova? (Hilingon man an mga ritrato.)
14 Basahon an 1 Corinto 10:31. Mahalagang marhay na pagmaigutan niyatong gibuhon an mga bagay na nakakapaugma ki Jehova. Kaiba digdi bako lang an pakikikabtang sa ministeryo asin pag-atender sa mga pagtiripon sa kongregasyon, kundi pati man an mga bagay na ginigibo ta sa aroaldaw. Halimbawa, pag sadiyosan kita sa gabos na bagay asin ihinihiras ta sa iba kun ano an igwa kita, napapaugma niyato si Jehova. (2 Cor. 8:21; 9:7) Gusto niya man na magpahiling kita nin dakulang pagpapahalaga sa regalong buhay. Nagigin mas dayupot kita sa Kagtao nin buhay paagi sa pagkakan saka pag-inom nin tama sana asin paagi sa pag-asikaso sa satong salud sa iba pang rasonableng mga paagi. Pag nahihiling ni Jehova na hinihinguwa tang mapaugma siya sa gabos tang ginigibo, dawa sa garo baga saradit na bagay, lalo niya kitang mamumutan.—Luc. 16:10.
An maingat na pagmaneho, pag-ataman sa satong sadiri paagi sa pag-ehersisyo asin pagkakan nin masustansiyang mga kakanon, saka pagigin matinao nagkapira sa mga paagi na mapapaugma ta si Jehova (Hilingon an parapo 14)
15. Ano an inaasahan ni Jehova na magigin pagtratar niyato sa iba?
15 Si Jehova mabuot sa mga matanos asin sa mga bakong matanos. (Mat. 5:45) Inaasahan niya na magigin arog man kita kaiyan sa iba. Halimbawa, ‘dai kita nagtataram nin nakakaraot sa kiisay man, dai nagigin parapakiiwal, nagpapahiling nin lubos na kahuyuan sa gabos na tawo.’ (Tito 3:2) Kaya, dai ta minemenos an iba miling an mga paniniwala ninda bakong kapareho kan sa sato. (2 Tim. 2:23-25) Urog kitang nagigin dayupot ki Jehova pag pirmi kitang nagpapahiling nin kabuutan asin konsiderasyon sa pagtratar niyato sa gabos.
PUWEDE KITANG ‘RUMANI SA DIYOS’ DAWA PAG NAKAGIBO KITA NIN SALA
16. Nagpuon na makamati nin ano an kagsurat kan Salmo 73?
16 Pero paano kun pakalihis nin pirang panahon, magpuon ka nang makamati na bako kang maninigo sa pagkamuot ni Jehova? Arog kan pinag-ulayan ta, kaagid kaiyan an nangyari sa kagsurat kan Salmo 73. Sa grabeng kamunduan, sinabi niya: “Dikit-dikitan pang malagalag an mga bitis ko; haros madarinas na ako sa mga paglakad ko.” (Sal. 73:2) Inadmitir niya mismo na siya ‘naghinanakit’ asin nagin “daing pag-iisip” na “garo daing isip na hayop” sa atubangan ni Jehova. (Sal. 73:21, 22) Inisip daw niya na huli sa nagin salang sabuot asin kaisipan niya, wara na siyang paglaom na magbago asin bako nang maninigo sa pagkamuot ni Jehova?
17. (a) Dawa kan nakakamati an salmista nin grabeng pangluluya nin buot, ano an minalataw na ginibo niya? (b) Ano an manunudan ta sa eksperyensiya niya? (Hilingon man an mga ritrato.)
17 Kun namatian man kan salmista na binayaan na siya ni Jehova, siguradong dai man nahaloy an pagmating iyan. Minalataw na kan panahon na pinangluluyahan siyang marhay, nasabutan niya na kaipuhan niyang urog na magin harani sa Diyos, arog kan maririsa sa mga tataramon niya: “Pero ngunyan, padagos akong minaiba sa saimo [Jehova]; kapot mo an tuong kamot ko. Ginigiyahan mo ako paagi sa saimong sadol, asin pagkatapos dadarahon mo ako sa kamurawayan.” (Sal. 73:23, 24) Dapat man kitang magsarig ki Jehova bilang satong gapo na nagpapakusog sa sato pag kita nangluluya o nadidisganar. (Sal. 73:26; 94:18) Dawa pa kun temporaryong malagalag an satong mga bitis, puwede kitang bumalik ki Jehova asin makakasigurado kita na siya “andam na magpatawad.” (Sal. 86:5) Dapat kitang urog na magin dayupot sa satong Diyos lalo na sa panahon na pinangluluyahan kitang marhay.—Sal. 103:13, 14.
Pag pagmati ta nangluluya kita sa espirituwal, dapat kitang rumani ki Jehova paagi sa urog na pakikikabtang sa satong pagsamba sa saiya (Hilingon an parapo 17)
‘RUMANI SA DIYOS’ SAGKOD LAMANG
18. Taano ta mayong limitasyon sa kun gurano kita puwedeng magin dayupot ki Jehova?
18 Mayong limitasyon sa kun gurano kita puwedeng magin dayupot ki Jehova asin sa kun gurano kadakul an puwede tang maaraman manungod sa saiya. Sinasabi kan Bibliya na an mga dalan ni Jehova, an saiyang kadunungan, asin an saiyang kaaraman ‘dai nanggad masususog.’—Roma 11:33.
19. Anong asigurasyon an itinatao sa sato kan Mga Salmo?
19 An Salmo 79:13 nagsasabi: “Kami na saimong banwaan asin aripumpon sa saimong pasabsaban, magpapasalamat sa saimo sagkod lamang; asin ipapahayag mi an saimong kaumawan sa gabos na henerasyon.” Mantang padagos kang nagigin harani sa Diyos, makakasigurado ka man na mag-aako ka nin daing sagkod na mga bendisyon asin may kumpiyansang makakapagsabi: “An Diyos iyo an gapo kan sakong puso asin an sakong kahirasan sagkod lamang.”—Sal. 73:26.
KANTA 32 Kumampi ki Jehova!
a An iba na nasasakitan huli sa dai mawara-warang paghadit, pagkapurisaw, o pagmundo tibaad kaipuhan na magkonsulta sa sarong doktor. Para sa urog pang impormasyon, hilingon an Torrengbantayan, Num. 1 2023.