Nungka Kitang Nagsosolo

1-2. (a) Taano ta masasabi niyato na nungka kitang nagsosolo sa pag-atubang sa mga pagbalo? (b) Ano an pag-uulayan ta sa artikulong ini?

PAG napapaatubang kita sa dipisil na mga pagbalo, tibaad mamatian niyato na garo baga solo-solo kita sa sarong sadit na bangka na nasa mabagyong dagat. Pero, dai kita nagsosolo sa pag-atubang sa satong mga pagbalo. An satong mamumuton na Ama sa langit dai sana nahihiling an satong mga kadipisilan kundi nanunuga man siya na tatabangan niya kitang makayanan an mga iyan. Mamumuton na inaasigurar ni Jehova an saiyang maimbod na mga lingkod: “Tatabangan taka.”—Isa. 41:10.

² Pag-uulayan sa artikulong ini kun paano kita tinatabangan ni Jehova paagi sa (1) paggiya sa sato, (2) pagtao sa sato kan mga pangangaipo ta, (3) pagprotektar sa sato, asin (4) pagranga sa sato. Inaasigurar kita ni Jehova na ano man na kadipisilan an napapaatubang sa sato, nungka niya kitang lilingawan. Nungka niya kitang babayaan. Kaya nungka kitang nagsosolo.

GINIGIYAHAN KITA NI JEHOVA

3-4. Paano kita ginigiyahan ni Jehova? (Salmo 48:14)

³ Basahon an Salmo 48:14. Aram ni Jehova na dai ta kayang giyahan an satong sadiri asin na kaipuhan ta siya tanganing giyahan kita. Paano niya ginigiyahan an saiyang maimbod na mga parasamba ngunyan? An sarong paagi iyo an Bibliya. (Sal. 119:105) Paagi sa saiyang ipinasabong na Tataramon, tinatabangan kita ni Jehova na gumibo nin mga desisyon asin patalubuon an mga kuwalidad na nagreresulta sa mas maugmang buhay ngunyan asin daing sagkod na buhay sa maabot.a Halimbawa, tinutukduan niya kita na halion an kulog nin buot, magin onesto sa gabos tang ginigibo, asin na kamutan nin udok an iba nin gikan sa puso. (Sal. 37:8; Heb. 13:18; 1 Ped. 1:22) Pag ipinapahiling ta an siring na diyosnon na mga kuwalidad, nagigin kitang mas marahay na magurang, agom, asin amigo.

⁴ Dugang pa, iiniba ni Jehova sa saiyang Tataramon an mga salaysay kan mga tawong nabuhay kaidto na napaatubang sa mga pagbalo asin nakamati nin mga emosyon na kaagid kan sa sato. (1 Cor. 10:13; Sant. 5:17) Pag binabasa ta an mga salaysay na ini asin isinasabuhay an mga leksiyon na nanunudan ta, nakikinabang kita sa kisiyera duwang paagi. Inot, narerealisar ta na dai kita nagsosolo—an iba napaatubang man sa kaagid na mga sitwasyon asin natagalan iyan. (1 Ped. 5:9) Ikaduwa, nanunudan ta kun paano makakayanan an mga pagbalo.—Roma 15:4.

5. Sairisay an ginagamit ni Jehova tanganing giyahan kita sa dalan pasiring sa buhay?

⁵ Naggibo man si Jehova nin areglo na magkaigwa nin mga tugang na magiya sa sato.b Halimbawa, an mga paraataman nin sirkito regular na nagdadalaw sa mga kongregasyon tanganing pakusugon kita. An saindang mga pahayag nakakapakusog sa satong pagtubod asin nakakatabang sa sato na mapagdanay an satong mahalagang marhay na pagkasararo. (Gibo 15:40–16:5) An mga elder sa kongregasyon nagpapahiling man nin sinserong interes sa kapakanan kan lambang parahayag. (1 Ped. 5:2, 3) An mga magurang ginigiyahan sa espirituwal an saindang mga aki, na tinatabangan an mga ini na pauswagon an kakayahan na mag-isip asin magkaigwa nin kapaki-pakinabang asin marahay na mga kaugalian. (Tal. 22:6) Asin an maygurang na mga Kristiyana tinatabangan an mas hoben na mga sister paagi sa pagpahiling nin marahay na halimbawa asin pagtao nin praktikal na sadol saka mamumuton na pampakusog.—Tito 2:3-5.

6. Ano an dapat tang gibuhon para makinabang sa paggiya ni Jehova?

⁶ Tinatawan kita ni Jehova kan paggiyang kaipuhan ta. Paano ta maipapahiling na nagpapasalamat kita sa mga ginigibo niya para sa sato? Sinasabi kan Talinhaga 3:5, 6: “Magtiwala ka ki Jehova sa bilog mong puso, asin dai ka manarig sa sadiri mong pakasabot.” Kun gigibuhon ta iyan, “itatanos niya an [satong] mga dalan,” buot sabihon, tatabangan niya kita na makalikay sa dakul na problema asin na magkaigwa nin mas maugmang buhay. Nagpapasalamat nanggad kita na tinatawan kita ni Jehova nin mamumuton asin personal na sadol!—Sal. 32:8.

ITINATAO NI JEHOVA AN SATONG MGA PANGANGAIPO

7. Ano an nagkapirang paagi na itinatao sa sato ni Jehova an satong mga pangangaipo? (Filipos 4:19)

⁷ Basahon an Filipos 4:19. Apuwera sa paggiya sa sato sa espirituwal, tinatabangan kita ni Jehova sa paghihinguwa tang magkaigwa kan kinakaipuhan tang kakanon, bado, asin istaran. (Mat. 6:33; 2 Tes. 3:12) Dawa ngani natural sana na mahadit kita manungod sa satong pisikal na mga pangangaipo, dinadagka kita ni Jehova na dai magparahadit nin sobra manungod sa siring na mga bagay. (Hilingon an study note sa Mateo 6:25.) Taano? Huling an satong Ama nungkang papabayaan an saiyang maimbod na mga parasamba sa panahon kan saindang pangangaipo. (Mat. 6:8; Heb. 13:5) Lubos kitang makakapagtiwala sa sinabi niya na itatao niya sa sato an satong mga pangangaipo.

8. Ano an ginibo ni Jehova para ki David?

⁸ Pag-isipan kun paano tinabangan ni Jehova si David. Sa masakit na mga taon kan buhay ni David kan saro siyang dulag, tinawan siya ni Jehova asin an saiyang mga tawuhan kan kinakaipuhan ninda tanganing padagos na mabuhay. Mantang hinuhurop-hurop an pag-ataman sa saiya ni Jehova sa naglihis na mga taon, isinurat ni David: “Hoben pa ako kaidto asin gurang na ngunyan, pero dai pa akong nahiling na siisay man na matanos na pinabayaan, ni nahiling na mga aki niya na nakikilimos nin makakakan.” (Sal. 37:25) Posibleng marhay na sa saimong buhay, nahiling mo na man kun paano mamumuton na itinatao ni Jehova sa saiyang maimbod na mga lingkod an mga pangangaipo ninda.

9. Paano itinatao ni Jehova sa saiyang mga lingkod ngunyan an saindang mga pangangaipo sa panahon nin kalamidad? (Hilingon man an mga ritrato.)

⁹ Itinatao man ni Jehova an mga pangangaipo kan saiyang mga lingkod sa mga panahon nin kalamidad. Halimbawa, kan magkaigwa nin tiggutom kan inot na siglo, an mga Kristiyano hali sa manlain-lain na kadagaan nagpadara nin mga probisyon sa saindang mga tugang na nangangaipo. (Gibo 11:27-30; Roma 15:25, 26) Ipinapahiling man kan mga lingkod nin Diyos ngunyan an arog kaiyan na pagkabukas-palad. Pag nagkaigwa nin kalamidad, mamumuton na pinapahiro ni Jehova an saiyang mga lingkod na magtao kan panginot na mga pangangaipo arog nin kakanon, tubig, bado, asin bulong sa mga nakaistar sa mga apektadong lugar. An mga construction team hinihirahay an mga naraot na harong asin mga Kingdom Hall. Asin an mga lingkod ni Jehova nagtatao tulos nin emosyonal asin espirituwal na tabang sa mga nawaran nin harong o nin mahal sa buhay.c

10-11. Ano an manunudan mo sa eksperyensiya ni Borys?

¹⁰ Bukas-palad man na itinatao ni Jehova an mga pangangaipo kan mga dai pa nagsasamba sa saiya. Siring man, naghahanap kita nin mga oportunidad na magpahiling nin kabuutan sa mga bako tang kapagtubod. (Gal. 6:10) Sa parati, nagreresulta ini sa marahayon na patotoo. Pag-isipan an eksperyensiya ni Borys, na prinsipal nin sarong eskuwelahan asin nakaistar sa Ukraine. Dawa ngani bako siyang Saksi ni Jehova, pirmi niyang tinatratar nin may kabuutan an mga estudyante niyang Saksi asin iginagalang an saindang pagtubod. Kan magdesisyon si Borys na magdulag huli sa giyera sa lugar kun sain siya nakaistar asin magbalyo sa mas ligtas na parte kan nasyon, tinabangan siya kan satong mga tugang. Kan huri, nag-atender si Borys sa Memoryal kan kagadanan ni Cristo. Mantang hinuhurop-hurop ni Borys an saiyang eksperyensiya, sinabi niya: “Mabuuton sako an mga Saksi saka inasikaso talaga ninda ako. Nagpapasalamat nanggad ako sa mga Saksi ni Jehova.”

¹¹ Maaarog ta man an satong mahihirakon na Ama sa langit paagi sa pagpahiling nin pagkamuot sa mga nangangaipo, kapagtubod man niyato sinda o bako. (Luc. 6:31, 36) Lugod na an satong mga paghihinguwa na magpahiling nin pagkamuot sa mga tawo makapahiro sa sainda na magin mga disipulo ni Cristo. (1 Ped. 2:12) Pero ano man an magin resulta, makakamati kita nin urog na kaugmahan huli sa pagtao.—Gibo 20:35.

PINOPROTEKTARAN KITA NI JEHOVA

12. Anong proteksiyon an ipinanuga ni Jehova na itatao niya sa saiyang mga lingkod bilang grupo? (Salmo 91:1, 2, 14)

¹² Basahon an Salmo 91:1, 2, 14. Sa ngunyan, nanunuga si Jehova na tatawan niya kita nin espirituwal na proteksiyon. Nungka niyang tutugutan si Satanas na rauton an tunay na pagsamba. (Juan 17:15) Asin pag-abot kan “dakulang kasakitan,” lubos kitang makakapagtiwala na uutubon ni Jehova an saiyang panuga na iingatan niya an saiyang mga lingkod bako lang sa espirituwal kundi pati man sa pisikal.—Kap. 7:9, 14.

13. Sa anong mga paagi kita pinoprotektaran ni Jehova bilang indibidwal?

¹³ Anong proteksiyon an itinatao ni Jehova sa sato bilang indibidwal? Paagi sa Kasuratan, tinatabangan kita ni Jehova na maaraman kun ano an tama asin sala. (Heb. 5:14) Pag namumuhay kita kauyon kan mga prinsipyo na yaon sa Tataramon nin Diyos, napoprotektaran ta an satong sadiri sa espirituwal asin pisikal na danyos. (Sal. 91:4) Saro pa, nagtatao si Jehova nin proteksiyon paagi sa kongregasyon. (Isa. 32:1, 2) Paagi sa pakikiiba-iba sa mga tawong namumuot ki Jehova asin namumuhay kauyon kan saiyang mga prinsipyo, napapakusog kita asin natatabangan na malabanan an maraot na mga impluwensiya.—Tal. 13:20.

14. (a) Taano ta dai kita pinoprotektaran nin Diyos sa gabos na pagbalo? (b) Ano an inaasigurar sa sato kan Salmo 9:10? (Hilingon man an footnote.)

¹⁴ Kun minsan, pinoprotektaran ni Jehova an saiyang mga parasamba kaidto sa pisikal na danyos. Alagad, dai niya iyan ginibo sa gabos na pagkakataon. Kun minsan, minaabot sa sato an “dai linalauman na mga pangyayari.” (Ecl. 9:11) Saro pa, sa bilog na kasaysayan, may mga lingkod si Jehova na itinugot niyang mapaatubang sa persekusyon asin sa kagadanan pa ngani tanganing mapatunayan na putikon si Satanas. (Job 2:4-6; Mat. 23:34) Totoo man iyan sa ngunyan. Dawa ngani tibaad dai man halion ni Jehova an satong mga pagbalo o kasakitan, makakasigurado kita na nungka niyang babayaan an mga namumuot sa saiya.d—Sal. 9:10.

RINARANGA KITA NI JEHOVA

15. Paano kita nararanga kan pamibi, Tataramon nin Diyos, asin mga kapwa Kristiyano? (2 Corinto 1:3, 4)

¹⁵ Basahon an 2 Corinto 1:3, 4. Kun minsan, nakakamati kita nin grabeng kamunduan, kahaditan, o kapurisawan. Tibaad may inaagihan kang sarong nakakapurisaw na sitwasyon ngunyan asin pagmati mo nagsosolo ka. Igwa daw nin siisay man na nakakasabot sa namamatian mo? Igwa, si Jehova. Dai niya sana namamatian an satong kulog kundi ‘rinaranga niya man kita sa gabos tang inaagihan na pagbalo.’ Paano? Pag nagngangayo-ngayo kita ki Jehova sa pamibi, tinatawan niya kita kan “katuninungan nin Diyos na nakakalabi sa gabos na pakasabot.” (Fil. 4:6, 7) Nararanga man kita pag binabasa ta sa Bibliya an mga tataramon ni Jehova para sa sato. An ipinasabong na mga kapahayagan nin pagkamuot, kadunungan, asin paglaom na mababasa ta sa kayamanan na iyan makakapagian kan satong pagmati. Asin nararanga kita sa Kristiyanong mga pagtiripon huling nakakaibanan ta diyan an mga tugang na namumutan kita saka nakakanuod kita diyan nin basado sa Bibliyang mga impormasyon na nakakapakusog sa sato.

16. Ano an manunudan mo sa eksperyensiya ni Nathan asin Priscilla?

¹⁶ Para ipahiling kun paano si Jehova nagtatao nin karangahan asin pampakusog paagi sa saiyang Tataramon, pag-isipan an eksperyensiya ni Nathan asin Priscilla, na nakaistar sa Estados Unidos. Mga pirang taon na an nakaagi, nagdesisyon sinda na magbalyo kun sain mas dakula an pangangaipo para sa mga parahayag kan Kahadian. “Nagtiwala kami na bebendisyunan ni Jehova an mga paghihinguwa mi,” an sabi ni Nathan. Alagad, pag-abot ninda sa saindang bagong asignasyon, napaatubang sinda sa dai inaasahan na mga problema sa salud asin sa pinansiyal. Kan huri, kinaipuhan kan mag-agom na magbalik sa saindang lugar pero padagos pa man giraray sindang nasakitan sa pinansiyal. “Naisip ko kun taano daw ta dai kami binendisyunan nin Diyos arog kan hinuhuna ming gigibuhon niya. Naisip ko pa ngani kun ’baad may nagibo akong sala,” an sabi ni Nathan. Pero pag-abot nin panahon, narealisar ni Nathan asin Priscilla na dai sinda pinabayaan nin Diyos sa panahon kan saindang pangangaipo. Sinabi ni Nathan: “Sa masakit na mga panahon na idto, an Bibliya nagin arog sa sarong madunong na amigo na nagtatao sa samo nin pampakusog asin paggiya. An pagpokus sa kun paano kami tinabangan ni Jehova na matagalan an kasakitan na idto imbes na sa mismong problema naiandam kami na maatubang nin may pagtubod an maabot na mga kadipisilan.”

17. Paano nag-ako nin karangahan an sister na si Helga? (Hilingon man an ritrato.)

¹⁷ An satong mga tugang puwedeng magtao sa sato nin dugang pang karangahan. Paano? Pag-isipan an halimbawa ni Helga, na nakaistar sa Hungary. Sa laog nin mga dekada, nakaeksperyensiya siya nin manlain-lain na kadipisilan na huli kaiyan napurisaw talaga siya asin namatian niyang mayo siyang halaga. Pero pag ginigirumdom niya iyan, nahihiling niya kun paano siya rinanga ni Jehova paagi sa kongregasyon. Isinurat niya: “Pirmi akong tinatabangan ni Jehova pag nahihiling niyang nangluluya ako huli sa sekular na trabaho, pag-asikaso sa aki kong may hilang, asin sa iba pang mga kadipisilan. Sa naglihis na 30 taon, mayo ni sarong aldaw na dai niya inutob an saiyang panuga na rarangahon niya ako. Parati niya akong pinapakusog paagi sa mabuot, makonsiderasyon, asin mapag-apresyar na mga tataramon hali sa iba. Parati akong nakakaresibi nin text, kard, o komendasyon sa panahon mismo na kaipuhan kong marhay iyan.”

18. Paano niyato mararanga an iba?

¹⁸ Igwa kita kan pribilehiyo na arugon an satong Diyos paagi sa pagranga sa iba. Paano ta iyan magigibo? Mapasensiyang magdangog sa sainda, makipag-ulay na may pagranga, asin tabangan sinda sa praktikal na mga paagi. (Tal. 3:27) Hinihinguwa tang rangahon an gabos na nagsasakit, kaiba na an mga dai pa naglilingkod sa Diyos. Pag an satong mga pagtaraid nakakaeksperyensiya nin grabeng kamunduan, hilang, o kahaditan, dinadalaw ta sinda, dinadangog, asin hinihirasan nin nakakapakusog na mga teksto hali sa Bibliya. Pag inaarog ta si Jehova, “an Diyos nin gabos na karangahan,” matatabangan ta an satong mga kapagtubod na matagalan an mga pagbalo asin tibaad matabangan ta pa ngani an mga bakong kapagtubod na akuon ninda an dalisay na pagsamba.—Mat. 5:16.

SI JEHOVA PIRMING YAON PARA SA SATO

19. Ano an ginigibo ni Jehova para sa sato, asin paano ta siya maaarog?

¹⁹ Nagmamakulog na marhay si Jehova sa gabos na namumuot sa saiya. Dai niya kita binabayaan pag nasa kasakitan kita. Kun paanong an sarong magurang mamumuton na inaataman an saiyang aki, inaataman man ni Jehova an saiyang maimbod na mga parasamba. Ginigiyahan niya kita, tinatawan kan satong mga pangangaipo, pinoprotektaran, asin rinaranga. Inaarog ta an satong mamumuton na Ama sa langit pag tinatabangan ta asin pinapakusog an iba pag nasa kasakitan sinda. Dawa mapaatubang kita sa mga kasakitan asin kamunduan, makakasigurado kita na kaibanan ta si Jehova. Tutal, nanuga siya: “Dai ka matakot ta kaibanan mo ako.” (Isa. 41:10) Nakakaasigurar nanggad na panuga iyan! Talagang nungka kitang magsosolo.