Arugon an Maimbod na mga Anghel

1-2. (a) Ano an pagkakaiba niyato sa mga anghel? (b) Ano an mga pagkakapareho niyato asin kan mga anghel?

KAN irani ka ni Jehova sa katotoohan, inimbitaran ka niya na magin parte nin sarong mamumuton na pamilya na kompuwesto nin manlain-lain na klase nin parasamba, asin kaiba diyan an milyon-milyon na maimbod na mga anghel. (Dan. 7:9, 10) Pag iniisip ta an manungod sa mga anghel, tibaad an naiisip ta iyo na ibang-iba sinda sa sato. Halimbawa, an mga anghel haloy na panahon nang nag-eeksister bago pa kita linalang. (Job 38:4, 7) Mas makapangyarihan sinda kisa sato. Asin an pagigin banal asin matanos ninda dai nanggad niyato maaabot bilang mga tawong bakong perpekto.—Luc. 9:26.

² Minsan siring, sa ibong kan mga pagkakalain na iyan, dakul kitang pagkakapareho sa mga anghel. Halimbawa, arog kan mga anghel, kaya ta man na ipahiling an marahayon na mga kuwalidad ni Jehova. Igwa man kita nin libertad na magdesisyon, arog kan mga anghel. Arog ninda, igwa man kita nin kanya-kanyang pangaran asin personalidad pati man nin manlain-lain na responsabilidad. Asin, arog kan mga anghel, igwa kita nin pangangaipo na sambahon an satong Kaglalang.—1 Ped. 1:12.

3. Ano an manunudan ta sa maimbod na mga anghel?

³ Huling dakul kitang pagkakapareho sa mga anghel, makakapakusog sa sato an saindang marahay na halimbawa asin may mga manunudan kita diyan. Sa katunayan, dakul kitang manunudan na marahayon na mga leksiyon sa sainda. Sa artikulong ini, pag-uulayan niyato kun paano ta maaarog an kapakumbabaan kan maimbod na mga anghel pati man an saindang pagkamuot sa mga tawo, pakatagal, asin an mga paghihinguwa ninda na mapagdanay na malinig an kongregasyon.

MAPAKUMBABA AN MGA ANGHEL

4. (a) Paano nagpapahiling nin kapakumbabaan an mga anghel? (b) Taano ta mapakumbaba an mga anghel? (Salmo 89:7)

⁴ Mapakumbaba an maimbod na mga anghel. Dawa ngani eksperyensiyado sinda, makapangyarihan, asin madunong, nagsusunod sinda sa mga instruksiyon ni Jehova. (Sal. 103:20) Mantang isinasagibo ninda an saindang mga asignasyon, dai lamang ninda ipinaghahambog an mga naisasagibo ninda o ipinagpapasikat an saindang kapangyarihan na nakakalabi sa tawo. Maugma nindang ginigibo an kabutan nin Diyos dawa pag dai naaaraman kan iba an pangaran ninda.a (Gen. 32:24, 29; 2 Ha. 19:35) Nagsasayuma sindang akuon an ano man na kamurawayan na para lang ki Jehova. Taano ta mapakumbabang marhay an mga anghel? Huling namumutan ninda si Jehova asin hararom an paggalang ninda sa saiya.—Basahon an Salmo 89:7.

5. Paano nagpahiling nin kapakumbabaan an sarong anghel kan itinatanos niya si apostol Juan? (Hilingon man an ritrato.)

⁵ Pag-isipan an sarong pangyayari na nagpapahiling kan kapakumbabaan kan mga anghel. Kan mga 96 C.E., sarong dai pinangaranan na anghel an nagpahiling nin makangangalas na bisyon ki apostol Juan. (Kap. 1:1) Ano an nagin reaksiyon ni Juan sa bisyon? Pinurbaran niyang sambahon an anghel. Pero an maimbod na espiritung linalang na iyan pinugulan tulos si Juan na sinasabi: “Mag-ingat ka! Dai mo iyan paggibuhon! Uripon man sana ako kapareho mo asin kan mga tugang mo . . . Sambahon mo an Diyos!” (Kap. 19:10) Mapakumbaba nanggad an anghel! Dai siya interesado sa kamurawayan o sa paghanga. Tulos niyang sinabihan si Juan na an Diyos na Jehova an sambahon. Kasabay kaiyan, dai minenos kan anghel si Juan. Minsan ngani mas haloy nang marhay na naglilingkod ki Jehova an anghel saka mas makapangyarihan nanggad siya kisa ki Juan, mapakumbaba niyang inapod na kapwa niya uripon an apostol. Asin dawa ngani kinaipuhan kan anghel na itanos si Juan, dai niya inanggutan an gurang nang apostol na ini. Imbes, nagtaram an anghel sa mabuot na paagi. Posibleng marhay na nasabutan niyang arog kaidto an nagin reaksiyon ni Juan huli sa labi-labing paggalang asin paghanga kaini sa saiyang nahiling.

6. Paano niyato maaarog an kapakumbabaan kan mga anghel?

⁶ Paano niyato maaarog an kapakumbabaan kan mga anghel? Arog kan mga anghel, maisasagibo ta man an satong mga asignasyon na dai ipinaghahambog an mga nahahaman ta o pinupurbaran na mapasatuya an onra. (1 Cor. 4:7) Dugang pa, dai ta dapat isipon na nakakalabi kita sa iba kun mas haloy na kitang naglilingkod ki Jehova kisa sainda o kun may partikular kitang mga pribilehiyo. Sa katunayan, mantang mas dakul kitang responsabilidad, lalo nang dapat niyatong mansayon an satong sadiri bilang mas hababa. (Luc. 9:48) Arog kan mga anghel, gusto tang paglingkudan an iba. Habo niyatong ipamati sa iba na nakakalabi kita sa sainda.

7. Paano kita makakapahiling nin kapakumbabaan pag may kaipuhan kitang itanos o tawan nin konseho?

⁷ Makakapahiling man kita nin kapakumbabaan pag kaipuhan niyatong itanos o tawan nin konseho an iba—sarong kapagtubod o satong aki. Pag nagtatao nin konseho, tibaad kaipuhan tang magin marigon. Pero arog kan anghel na mabuot na itinanos si Juan, puwede kitang magin marigon na dai man napapaluya an buot kan saro na tinatawan ta nin konseho. Kun dai ta ibinibilang na nakakalabi kita sa iba, maitatao ta an konsehong basado sa Bibliya sa magalang asin mamumuton na paagi.—Col. 4:6.

NAMUMUTAN KAN MGA ANGHEL AN MGA TAWO

8. (a) Uyon sa Lucas 15:10, paano ipinapahiling kan mga anghel an saindang pagkamuot sa mga tawo? (b) Ano an papel kan mga anghel sa gibuhon na paghuhulit? (Hilingon man an ritrato.)

⁸ An mga anghel bakong indiperente, o daing interes, sa mga tawo. Namumutan ninda an mga tawo. Nag-uugma sinda pag nagsusulsol an sarong nagkasala—an buot sabihon, pag an sarong nawarang karnero nagbalik ki Jehova o pag binago nin saro an saiyang pamumuhay dangan inako an katotoohan. (Basahon an Lucas 15:10.) Aktibo man na nakikikabtang an mga anghel sa gibuhon na paghuhulit kan Kahadian. (Kap. 14:6) Bagaman dai sinda direktang naghuhulit sa mga tawo, puwede nindang giyahan an sarong parahayag pasiring sa sarong indibidwal na gustong makanuod manungod ki Jehova. Siyempre, dai ta man lubos na masasabi na kalabot an mga anghel sa arin man na espesipikong pangyayaring arog kaiyan. Tutal, puwedeng gumamit si Jehova nin iba pang mga pamamaagi—arog kan saiyang banal na espiritu—para tabangan an mga tawo o para giyahan an saiyang mga lingkod. (Gibo 16:6, 7) Pero ginagamit niya pa man giraray an saiyang mga anghel sa dakul na paagi. Kaya pag ihinihiras ta an maugmang bareta, makakapagtiwala kita na yaon an mga anghel para suportaran kita.—Hilingon an kahon na “Sinimbag an Saindang mga Pamibi.”b

9. Paano niyato maaarog an pagkamuot kan mga anghel sa mga tawo?

⁹ Paano niyato maaarog an pagkamuot kan mga anghel sa mga tawo? Pag nakadangog kita nin paisi na may saro na ibinalik na sa kongregasyon, puwede kitang mag-ugma, arog kan mga anghel. Hinguwahon nanggad na ipamati na welcome siya asin siyertuhon sa saiya na talagang namumutan ta siya. (Luc. 15:4-7; 2 Cor. 2:6-8) Maaarog ta man an mga anghel paagi sa paggibo kan gabos tang makakaya sa gibuhon na paghuhulit. (Ecl. 11:6) Asin kun paanong sinusuportaran kita kan mga anghel mantang ihinuhulit ta an maugmang bareta, puwede man kitang mag-isip nin mga paagi tanganing suportaran an satong mga tugang sa saindang ministeryo. Halimbawa, puwede daw kitang gumibo nin plano na makapartner sa ministeryo an sarong parahayag na bako pang eksperyensiyado? Puwede ta daw alalayan an mga tugang na may edad na o maluya an hawak tanganing makapartisipar sinda sa ministeryo?

10. Ano an manunudan ta sa eksperyensiya ni Sara?

¹⁰ Paano kun dahil sa satong kamugtakan nalilimitaran na an kaya niyatong gibuhon? Puwede pa man giraray kitang humanap nin mga paagi na magtrabaho kaiba an mga anghel sa gibuhon na paghuhulit. Pag-isipan an eksperyensiya ni Sara,c sarong sister sa India. Pakalihis nin mga 20 taon sa pagpapayunir, nagkahilang si Sara asin permanente nang dai nakakabangon. Normal sana na namundo siyang marhay. Pero huli sa mamumuton na suporta kan saiyang pamilya sa espirituwal asin sa regular na pagbasa nin Bibliya, luway-luway na nagkaigwa giraray si Sara nin positibong pananaw. Siyempre, kinaipuhan niyang i-adjust an saiyang ministeryo sa bago niyang kamugtakan. Huling dai niya na kaya maski an magtukaw para makagibo nin mga surat, nagpapatotoo na sana siya paagi sa telepono. Kaya inaapudan niya an mga dinadalaw niya liwat, asin sinasabi man ninda sa saiya kun sairisay pa an posibleng interesado. Ano an resulta? Sa laog sana nin pirang bulan, nagkaigwa si Sara nin 70 tinutukduan sa Bibliya—dai niya na iyan kayang makonduktahan gabos! Kaya itinao niya sa mga kakongregasyon niya an iba diyan. Dakul sa mga tinutukduan an nag-aatender na ngunyan sa satong mga pagtiripon. Siguradong ugmahon an mga anghel na magtrabaho kaiba an mga tugang, arog ni Sara, na ginigibo an gabos nindang makakaya sa gibuhon na paghuhulit!

NAGPAPAHILING NIN PAKATAGAL AN MGA ANGHEL

11. Paano nagpahiling an maimbod na mga anghel nin pambihirang pakatagal?

¹¹ An maimbod na mga anghel marahayon na halimbawa nin pakatagal. Rinibong taon na sindang nakakahiling nin inhustisya asin karatan. Nahiling nindang nagrebelde ki Jehova si Satanas asin an dakul na iba pang espiritung linalang na naglingkod kaidto kaibanan ninda. (Gen. 3:1; 6:1, 2; Jud. 6) May sinambit an Bibliya na sarong maimbod na anghel na nakaeksperyensiya nin direktang pagkontra nin sarong makapangyarihan na demonyo. (Dan. 10:13) Apuwera kaiyan, sa bilog na kasaysayan nin tawo, nahiling kan mga anghel na sadit na bilang sana nin mga tawo an nagsusuportar sa tunay na pagsamba. Sa ibong kan gabos na iyan, an maimbod na mga anghel na ini padagos na naglilingkod ki Jehova na may kagaya-gayahan asin kaigutan. Aram ninda na sa tamang panahon, hahalion nin Diyos an gabos na inhustisya.

12. Ano an makakatabang sa sato na makatagal?

¹² Paano niyato maaarog an pakatagal kan mga anghel? Arog kan mga anghel, tibaad makahiling kita nin mga inhustisya o mapaatubang sa pagkontra. Pero igwa kita kan kumbiksiyon ninda na sa tamang panahon, hahalion nin Diyos an gabos na karatan. Kaya arog kan maimbod na mga anghel, “dai kita [nagpupundo] sa paggibo nin marahay.” (Gal. 6:9) Asin nanunuga an Diyos na tatabangan niya kita na makatagal. (1 Cor. 10:13) Puwede tang ipamibi ki Jehova na tawan niya kita kan saiyang espiritu, na matabang sa sato na magin mapasensiya asin magaya-gaya. (Gal. 5:22; Col. 1:11) Paano kun napapaatubang ka sa pagkontra? Lubos na magtiwala ki Jehova, dai matakot. Pirmi kang tatabangan asin papakusugon ni Jehova.—Heb. 13:6.

NAGTATABANG AN MGA ANGHEL NA MAGDANAY NA MALINIG AN KONGREGASYON

13. Anong espesyal na asignasyon igwa an mga anghel sa huring mga aldaw? (Mateo 13:47-49)

¹³ Sa huring mga aldaw, tinawan ni Jehova an mga anghel nin sarong espesyal na asignasyon. (Basahon an Mateo 13:47-49.) Huli sa gibuhon na paghuhulit, nagkakainteres sa maugmang bareta an minilyon na tawo sa bilog na kinaban. An nagkapira sa mga tawong ini naggigibo nin mga pagbabago tanganing magin tunay na mga Kristiyano, mantang an iba dai. Inasignaran an mga anghel na ‘isuway an mga maraot sa mga matanos.’ Nangangahulugan iyan na inasignaran sindang tumabang na protektaran an pagigin dalisay kan kongregasyon. Dai iyan nangangahulugan na dai na puwedeng bumalik an gabos na nagpundo na sa pakikiasosyar sa sato sa ano man na dahilan; ni nangangahulugan man iyan na nungka nang magkakaigwa nin mga problema sa laog kan kongregasyon. Pero, makakasigurado kita na nagmamaigot an mga anghel na tumabang na mapagdanay na malinig an satong mga kongregasyon.

14-15. Paano ta maaarog an pagpapahalaga kan mga anghel sa kalinigan kan kongregasyon sa espirituwal asin sa moral? (Hilingon man an mga ritrato.)

¹⁴ Paano niyato maaarog an pagpapahalaga kan mga anghel sa kalinigan kan kongregasyon? Paagi sa paggibo kan satong kabtang para mapagdanay an kalinigan kan kongregasyon sa espirituwal asin sa moral. Tanganing magibo iyan, hinihinguwa niyato na maingatan an satong puso paagi sa pagpili nin marahay na mga kairiba asin pagsikwal sa ano man na nakakaraot na impluwensiya. (Sal. 101:3) Puwede man niyatong tabangan an satong mga kapwa parasamba na magdanay na maimbod ki Jehova. Halimbawa, ano an dapat tang gibuhon kun maaraman niyatong nakagibo nin magabat na kasalan an sarong kapagtubod? Huling namumutan niyato siya, dadagkahon ta siyang makipag-ulay sa mga elder. Kun dai niya iyan gigibuhon, sasabihon niyato sa mga elder an manungod diyan. Gusto nanggad niyatong matawan tulos nin tabang an siisay man na kapagtubod na maluya sa espirituwal!—Sant. 5:14, 15.

¹⁵ Nakakamundo, may mga nakagibo nin magabat na kasalan na kaipuhan na halion sa kongregasyon. Pag nangyari iyan, dapat niyatong “ipundo an pakikiiba” sa sainda.d (1 Cor. 5:9-13) Nakakatabang an areglong ini na mapagdanay na malinig an kongregasyon. Saro pa, paagi sa pagdesisyon na dai makiiba-iba sa mga hinali, an totoo pinapahilingan niyato sinda nin kabuutan. An satong marigon na paninindugan puwedeng makapahiro sa sainda na makapag-isip-isip. Kun gigibuhon ninda iyan, mag-uugma kita, siring man si Jehova asin an saiyang mga anghel.—Luc. 15:7.

16. Sa anong mga paagi mo hihinguwahon na arugon an mga anghel?

¹⁶ Sarong pribilehiyo nanggad na maaraman an manungod sa mga anghel asin na magtrabaho kaiba ninda! Arugon niyato an marahayon nindang mga kuwalidad: an saindang kapakumbabaan, pagkamuot sa mga tawo, pakatagal, asin an saindang pagpapahalaga sa kalinigan kan kongregasyon sa espirituwal asin sa moral. Kun aarugon niyato an maimbod na mga anghel, puwede man kitang magin parte kan pamilya ni Jehova nin mga parasamba sagkod lamang.