May mga Manunudan Ka Pa Daw sa Panginot na mga Katukduan sa Bibliya?

1. Ano an nagin epekto sa saimo kan mga katukduan sa Bibliya kan inot mong maaraman an katotoohan?

BINAGO kan panginot na mga katukduan sa Bibliya an satong buhay. Halimbawa, kan maaraman niyato na Jehova an pangaran kan Diyos, diyan nagpuon an pakikiamigo ta sa saiya. (Isa. 42:8) Kan maaraman ta an totoong kamugtakan kan mga gadan, dai na kita nagpaparaisip kun baga nagsasakit an mga gadan nang mahal niyato sa buhay. (Ecl. 9:10) Asin kan maaraman ta an panuga kan Diyos na Paraiso digdi sa daga, dai na kita nagpaparahadit manungod sa satong puturo. Tiwala kita na mabubuhay kita, bako sana nin halipot na panahon—70 o 80 taon—kundi sagkod lamang.—Sal. 37:29; 90:10.

2. Paano ipinaparisa kan 2 Pedro 1:12, 13 na puwedeng makinabang sa panginot na mga katukduan sa Bibliya dawa an maygurang na mga Kristiyano?

² Dapat na nungka niyatong pagbaliwalaon an panginot na mga katukduan sa Bibliya. An ikaduwang surat ni apostol Pedro isinurat niya para sa mga Kristiyano na “masarig na an pundasyon . . . sa katotoohan.” (Basahon an 2 Pedro 1:12, 13.) Pero kan panahon na iyan, napapaatubang sinda sa mga peligro sa espirituwal sa laog kan kongregasyon, kaiba diyan an bakong tunay na mga paratukdo saka bakong diyosnon na mga tawo. (2 Ped. 2:1-3) Gusto ni Pedro na pakusugon an mga tugang tanganing tabangan sindang maprotektaran an saindang sadiri sa mga peligrong iyan. Para magibo iyan, ipinagirumdom niya sa sainda an nagkapira sa mga katukduan na dati na nindang aram. An mga katukduan na iyan matabang sa sainda na mapagdanay an saindang integridad sagkod sa katapusan.

3. Iilustrar kun taano ta dapat na padagos na hurop-hurupon kan gabos na Kristiyano an panginot na mga katukduan sa Bibliya.

³ Dawa kun haloy na kita sa katotoohan, puwede pa man giraray kitang makakua nin bagong mga leksiyon hali sa panginot na mga katukduan sa Bibliya. Para iilustrar: An sarong matibay na chef saka an saro na baguhan pa lang tibaad maggamit nin parehong mga sangkap pag nagluluto nin sarong putahe. Pero sa paglihis nin panahon, nanudan na kan eksperyensiyadong chef kun paano magagamit na marhay an mga sangkap na iyan asin kun paano iyan ipepreparar sa bago asin interesanteng mga paagi. Kaagid kaiyan, an haloy nang mga lingkod ni Jehova tibaad nahihiling sa ibang mga anggulo an panginot na mga katotoohan sa Bibliya kumpara sa bago pa sanang mga tinutukduan sa Bibliya. Posibleng marhay na nagkaigwa nin mga pagbabago sa satong kamugtakan o mga pribilehiyo nin paglilingkod puon kan mabawtismuhan kita. Kun iaaplikar ta sa satong kamugtakan ngunyan an mga katukduan na nanudan ta kaidto, tibaad makakua kita nin bago asin praktikal na mga leksiyon. Hilingon ta kun ano pa an puwedeng manudan kan haloy nang mga Kristiyano sa tulong panginot na mga katukduan sa Bibliya.

SI JEHOVA AN KAGLALANG

4. Ano an nagin epekto sa sato kan maaraman tang si Jehova an Kaglalang?

⁴ “An nagtugdok kan gabos na bagay iyo an Diyos.” (Heb. 3:4) Aram niyato na an satong planeta asin an mga bagay na may buhay na yaon diyan ginibo kan Kaglalang na pinakamadunong asin pinakamakapangyarihan sa gabos. Siya an naggibo sa sato, kaya lubos niya kitang midbid. Urog pa diyan, nagmamakulog siya sa sato. Aram niya kun ano an pinakaikakarahay ta. Huling aram ta an simpleng katotoohan na ini na si Jehova an Kaglalang, nagkaigwa iyan nin dakulang epekto sa sato—natawan kaiyan nin tunay na kahulugan asin katuyuhan an satong buhay.

5. Anong katotoohan an makakatabang sa sato na magin mapakumbaba? (Isaias 45:9-12)

⁵ An katotoohan na si Jehova an Kaglalang nagtutukdo sa sato na magin mapakumbaba. Kan nagpaparapokus na si Job sa saiyang sadiri asin sa ibang mga tawo, ipinagirumdom sa saiya ni Jehova na Siya an Kaglalang na makakamhan sa gabos. (Job 38:1-4) Nakatabang ki Job an pagirumdom na ini na mahiling na an mga pamamaagi ni Jehova nakakalabi kisa sa mga pamamaagi nin tawo. Kauyon kaini, isinurat ni propeta Isaias kan huri: “Dapat daw na sabihon kan dalipay sa Paragibo nin Kuron: ‘Ano an ginigibo mo?’”—Basahon an Isaias 45:9-12.

6. Nuarin lalo nang mahalaga na hurop-hurupon niyato an manungod sa daing kaagid na kadunungan asin kadakulaan kan satong Kaglalang? (Hilingon man an mga ritrato.)

⁶ Mantang nagigin mas eksperyensiyado an sarong Kristiyano, tibaad magpuon na siyang magtiwala nin sobra sa sadiri niyang mga opinyon imbes na magsarig ki Jehova asin sa Saiyang Tataramon para sa paggiya. (Job 37:23, 24) Pero ano an magigin epekto sa saiya kun huhurop-hurupon niyang marhay an manungod sa daing kaagid na kadunungan asin kadakulaan kan saiyang Kaglalang? (Isa. 40:22; 55:8, 9) An pundamental na katotoohan na ini makakatabang sa saiya na magdanay na mapakumbaba asin marealisar na mas mahalaga an kaisipan ni Jehova kisa kan sa saiya.

7. Ano an ginibo ni Rahela tanganing akuon an sarong pagliliwat?

⁷ Narealisar ni Rahela, na nakaistar sa Slovenia, na an paghurop-hurop manungod sa saiyang Kaglalang nakatabang sa saiya na akuon an sarong pagliliwat sa organisasyon. Inadmitir niya: “Kun minsan, nasasakitan akong akuon an mga desisyon kan mga nanginginot. Halimbawa, dawa kan nahiling ko na an 2023 Update kan Namamahalang Grupo #8, nabigla pa man giraray ako kan primerong beses akong makahiling nin sarong barabason na brother na nagpapahayag. Kaya namibi ako ki Jehova na tabangan akong maka-adjust sa pagliliwat na ini.” Nasabutan ni Rahela na bilang an Kaglalang kan langit asin daga, lubos na may kakayahan si Jehova na giyahan an saiyang organisasyon sa tamang direksiyon. Kun nasasakitan kang mag-adjust sa sarong bagong pakasabot o akuon an sarong bagong paggiya, mapakumbabang hurop-hurupon an nakakalabing kadunungan asin kapangyarihan kan satong Kaglalang.—Roma 11:33-36.

KUN TAANO TA TINUTUGUTAN NIN DIYOS AN PAGSAKIT

8. Paano kita nakinabang kan maaraman niyato kun taano ta tinutugutan nin Diyos an pagsakit?

⁸ Taano ta tinutugutan nin Diyos an pagsakit? An nagkapirang tawong dai aram an simbag diyan naanggot sa Diyos o nagkongklusyon na mayo talagang Diyos! (Tal. 19:3) Sa kabaliktaran, naaraman mong an kawsa nin pagsakit iyo an minanang kasalan saka pagkabakong perpekto, bako si Jehova. Nanudan mo man na huli sa pagigin mapasensiya ni Jehova sa mga tawo tinugutan niya an minilyon na mamidbid siya asin maaraman mismo ninda kun paano niya permanenteng tatapuson an pagsakit. (2 Ped. 3:9, 15) An mga katotoohan na ini nakaasigurar sa saimo asin nakatabang na urog kang magin harani sa saiya.

9. Sa anong mga sitwasyon marahay na hurop-hurupon niyato an mga dahilan kun taano ta tinutugutan ni Jehova an pagsakit?

⁹ Nasasabutan niyato na kaipuhan tang magin mapasensiya mantang hinahalat ta si Jehova na tapuson an pagsakit. Pero, pag kita o an satong mga mahal sa buhay nakakaeksperyensiya nin mga kadipisilan, inhustisya, o nagadanan, tibaad maisip niyato kun taano ta dai tulos naghihiro si Jehova. (Hab. 1:2, 3) Sa arog kaiyan na mga sitwasyon, madunong na hurop-hurupon niyato an mga dahilan kun taano ta tinutugutan ni Jehova na mag-agi nin kasakitan an mga matanos.a (Sal. 34:19) Puwede ta man na hurop-hurupon an manungod sa saiyang katuyuhan na lubos na tapuson an pagsakit sagkod lamang.

10. Paano nakayanan ni Anne an pagkagadan kan saiyang ina?

¹⁰ An katotoohan manungod sa pagsakit makakatabang sa sato na magtagal. Si Anne, na nakaistar sa isla nin Mayotte, sa Indian Ocean, nag-istorya: “Kan magadan an sakong ina pirang taon na an nakaagi, namundo akong marhay. Pero, pirmi kong ipinapagirumdom sa sadiri ko na bako si Jehova an dahilan nin pagsakit. Gustong-gusto niyang halion an gabos na klase nin pagsakit asin buhayon liwat an satong mga mahal sa buhay. Pag hinuhurop-hurop ko an mga katotoohan na iyan, nagtatao iyan sa sako nin katuninungan nin isip na sa parati ikinakangalas ko.”

11. Huling aram niyato kun taano ta tinutugutan ni Jehova an pagsakit, paano iyan nakakatabang sa sato na padagos na maghulit?

¹¹ Huling aram niyato an katotoohan manungod sa kun taano ta tinutugutan nin Diyos an pagsakit, namomotibar kita kaiyan na padagos na maghulit. Pagkatapos na ipaliwanag ni Pedro na an pagigin mapasensiya ni Jehova nangangahulugan nin kaligtasan para sa mga nagsusulsol, isinurat niya: “Isip-isipon nindo kun dapat na magin anong klaseng tawo kamo. Dapat na kamo mga tawong banal an paggawi asin igwa nin mga gibong nagpapahiling nin debosyon sa Diyos.” (2 Ped. 3:11) Kaiba sa “mga gibong nagpapahiling nin debosyon sa Diyos” an satong ministeryo sa langtad. Arog kan satong Ama, namumutan ta an mga tawo. Gusto niyatong mabuhay sinda sa matanos na bagong kinaban nin Diyos. An mga tawo sa saindong komunidad mapasensiyang tinatawan ni Jehova nin oportunidad na sambahon siya. Dakulang pribilehiyo nanggad para sa sato na magin mga kapwa trabahador nin Diyos asin matabangan an pinakadakul na tawong posible na makanuod manungod sa saiya bago umabot an katapusan!—1 Cor. 3:9.

NABUBUHAY KITA SA “HURING MGA ALDAW”

12. Paano kita nakikinabang na aram niyatong nabubuhay kita sa “huring mga aldaw”?

¹² Tama nanggad an pagkaladawan kan Bibliya manungod sa magigin ugali kan mga tawo sa “huring mga aldaw.” (2 Tim. 3:1-5) Magmasid lang kita sa palibot, mahihiling ta nang nauutob an propesiyang ini. Mantang naoobserbaran tang lalong nagraraot an ugali kan mga tawo, lalo man kitang nagigin kumbinsido na mapagtitiwalaan an Tataramon nin Diyos.—2 Tim. 3:13-15.

13. Kauyon kan ilustrasyon ni Jesus na nasa Lucas 12:15-21, ano an marahay na ihapot niyato sa satong sadiri?

¹³ Huling nabubuhay kita sa huring mga aldaw, nakakamati kita nin pagkaapurado. Mangnuhon kun ano an manunudan ta manungod sa pagkaapurado sa ilustrasyon ni Jesus na nasa Lucas 12:15-21. (Basahon.) Taano ta inapod na “lulong” an mayaman na lalaki? Bako iyan dahil mayaman an lalaki, kundi dahil sala an mga priyoridad niya. Nagtipon siya nin “kayamanan para sa saiyang sadiri alagad [bako siyang] mayaman sa paghiling nin Diyos.” Taano ta apuradong marhay an bagay na iyan? Sinabi nin Diyos sa lalaki: “Ngunyan na banggi hahagadon ninda sa saimo an saimong buhay.” Mantang nagrarani an katapusan kan sistemang ini nin mga bagay, marahay na ihapot niyato sa satong sadiri: ‘Mahihiling daw sa mga pasuhan ko na nakakamati ako nin pagkaapurado? Anong mga pasuhan an dinadagka kong abuton kan mga aki ko? Ginagamit ko daw an sakong kusog, panahon, asin mga pagsadiri panginot na tanganing magtipon nin kayamanan para sa sakong sadiri o tanganing magtipon nin kayamanan sa langit?’

14. Arog kan ipinapahiling kan eksperyensiya ni Miki, taano ta madunong na hurop-hurupon an basado sa Kasuratan na mga ebidensiya na nabubuhay kita sa huring mga aldaw?

¹⁴ Puwedeng magbago an bilog na pananaw niyato sa buhay kun iisip-isipon ta an manungod sa mga ebidensiya na nabubuhay kita sa huring mga aldaw. Iyan an nangyari sa sister na an pangaran Miki. Inistorya niya: “Pagkagradwar ko, gustong-gusto kong makakua nin trabahong manungod sa pag-adal nin mga hayop. Pasuhan ko man na magregular payunir asin magin need-greater. Isinuhestiyon sako kan maygurang kong mga amigo na pag-isipan na marhay kun baga realistiko sako na hinguwahon na mag-abot nin sekular na karerang gusto ko asin kasabay kaiyan abuton pa man giraray an sakong espirituwal na mga pasuhan. Ipinagirumdom ninda sako na madali nang matapos an sistemang ini. Pero, ipinagirumdom man ninda na sa bagong kinaban magkakaigwa ako nin daing sagkod na panahon para pag-adalan an pinakadakul na hayop nin sagkod sa gusto ko. Kaya an kinua ko na lang, halipot asin praktikal na pagsasanay. Nakatabang iyan sa sako na magkaigwa nin trabahong makakasuportar sa pagregular payunir ko asin kan huri sa pagbalyo sa Ecuador, kun sain mas dakula an pangangaipo.” Si Miki asin an saiyang agom naglilingkod ngunyan sa pansirkitong gibuhon sa nasyon na iyan.

15. Taano ta dai kita dapat magpundo sa paghihinguwang hulitan an mga tawong dai pa nagpapahiling nin interes sa maugmang bareta? Magtao nin halimbawa. (Hilingon man an mga ritrato.)

¹⁵ Dai kita madisganar kun sa primero habo kan mga tawo na akuon an maugmang bareta. An mga tawo puwedeng magbago. Pag-isipan an halimbawa ni Santiago, na tugang ni Jesus sa ina. Nahiling niya si Jesus na nagdakula, nagin an Mesiyas, asin nagtukdo sa paaging dai pa nagibo nin siisay man na tawo. Pero sa halawig na panahon, dai nagin parasunod ni Jesus si Santiago. Saka lang siya nagin disipulo pagkatapos na buhayon liwat si Jesus. Asin nagin maiguton nanggad siyang disipulo!b (Juan 7:5; Gal. 2:9) Kaya mahalagang marhay na dai kita magpundo sa paghihinguwang hulitan an mga paryente tang dai pa nagpapahiling nin interes o na kontakon saka dalawon giraray an mga dai nag-ako kaidto kan mensahe kan Kahadian. Girumdumon na nabubuhay kita sa huring mga aldaw, kaya apurado an satong gibuhon na paghuhulit. An mga sinasabi mo sa sainda ngunyan puwedeng magkaigwa nin epekto sa sainda pag-abot nin panahon, tibaad dawa pagkatapos na magpuon an dakulang kasakitan.c

DANAY NA MAGIN MAPAGPASALAMAT SA MGA PAGIRUMDOM NI JEHOVA

16. Paano ka nakinabang sa mga pagirumdom ni Jehova? (Hilingon man an kahon na “Gamiton an mga Iyan Para Tabangan an Iba.”)

¹⁶ An nagkapira sa espirituwal na kakanon na inaako ta pigpreparar para sa mga tawong dai pa lamang nakadangog nin panginot na mga katotoohan sa Bibliya. Halimbawa, an satong pampublikong pahayag kada semana, nagkapirang artikulo asin video sa jw.org, saka an satong pampublikong mga magasin dinisenyo panginot na para sa mga bakong Saksi. Dawa arog kaiyan, nakikinabang kita sa mga pagirumdom na yaon diyan. Napapararom kaiyan an pagkamuot ta ki Jehova, napapakusog an satong pagtubod sa saiyang Tataramon, asin natatabangan kitang magin mas epektibo sa pagtukdo kan panginot na mga katotoohan.—Sal. 19:7.

17. Sa anong mga sitwasyon marahay na hurop-hurupon ta an panginot na mga katukduan sa Bibliya?

¹⁷ Bilang mga Saksi ni Jehova, ugmahon kita pag nagkakaigwa nin paglilinaw sa satong pakasabot sa sarong katotoohan sa Kasuratan. Pero, nagpapasalamat man kitang marhay sa pundamental na mga katukduan sa Bibliya na inot tang nanudan asin nakatabang sato na akuon an katotoohan. Kun iniisip tang iinsistir an satong sadiring opinyon imbes na magpasakop sa paggiya hali sa organisasyon ni Jehova, mapakumbabang girumdumon kun siisay an naggigiya sa organisasyon na iyan—an Kaglalang na pinakamadunong asin makakamhan sa gabos. Pag kita o an sarong mahal sa buhay may tinatagalan na pagbalo, magin mapasensiya asin hurop-hurupon kun taano ta tinutugutan ni Jehova an pagsakit. Asin pag nagdedesisyon kun paano ta gagamiton an satong panahon asin mga pagsadiri, girumdumon an pagkaapurado kan huring mga aldaw na ini. Lugod na an mga pagirumdom ni Jehova padagos na makapakusog, makamotibar, asin makatabang sa sato na magin madunong.