‘Nanudan Mo Na Daw an Sekreto’ nin Pagigin Kontento?

1. Ano an kahulugan kan pagigin kontento, asin ano man an bakong kahulugan kaiyan?

IKA daw kontento? An sarong tawong kontento nakakamati nin kaugmahan asin katuninungan paagi sa pagpokus sa mga bendisyon na igwa siya ngunyan. Dai siya nauuyam o naaanggot huli sa mga bagay na mayo siya. Minsan siring, an pagigin kontento dai nangangahulugan na dai ta na iisipon kun paano ta pa magagamit an satong buhay. Halimbawa, mayo man nin maraot na mawuton nin sarong Kristiyano na urog pang makapaglingkod ki Jehova. (Roma 12:1; 1 Tim. 3:1) Alagad, dai nawawara an kaugmahan niya kun dai niya tulos makamtan an mga pribilehiyo nin paglilingkod arog kan inaasahan niya.

2. Taano ta peligroso an pagigin bakong kontento?

² An pagkabakong kontento puwedeng magresulta sa seryosong mga konsekwensiya. An mga dai nakokontento sa kun ano an igwa sinda tibaad magtrabaho nin dakulon na oras tanganing magkaigwa kan materyal na mga bagay na dai man talaga ninda kaipuhan. Nakakamundo, may mga Kristiyano na naghabon pa ngani nin kuwarta asin iba pang mga bagay na minamawot ninda. Tibaad inisip ninda, ‘Tama lang na magkaigwa ako kaini,’ ‘Kaidto ko pa ini gusto,’ o ‘Ibabalik ko man an kuwarta.’ Pero an paghabon, ano man na klase iyan, dai nakakapaugma ki Jehova asin nagdadara nin kasusupgan sa saiya. (Tal. 30:9) Huli sa grabeng pagkadisganar na dai ninda nakamtan an sarong pribilehiyo nin paglilingkod, an iba biyo nang nagpundo sa paglilingkod ki Jehova. (Gal. 6:9) Paano man puwedeng mangyari sa sarong dusay na parasamba ni Jehova an siring na bagay? Tibaad luway-luway na siyang dai nagigin kontento.

3. Anong nakakaasigurar na katotoohan an manunudan ta sa Filipos 4:11, 12?

³ Gabos kita puwedeng magin kontento. Isinurat ni apostol Pablo na “nanudan [niyang] magin kontento ano man an [saiyang] kamugtakan.” (Basahon an Filipos 4:11, 12.) Isinurat niya an mga tataramon na iyan mantang nakapreso. Dawa arog kaiyan, dai niya naiwara an saiyang kaugmahan. “Nanudan [niya] an sekreto” nin pagigin kontento. Kun nadidipisilan kitang magin kontento, an mga tataramon asin eksperyensiya ni Pablo makakaasigurar sa sato na kaya tang makapahiling nin pagigin kontento. Dai niyato asahan na awtomatiko na kitang magigin kontento sa satong kamugtakan. Imbes, dapat niyatong manudan na magin kontento. Paano? Pag-ulayan ta an mga kuwalidad na makakatabang sa sato na manudan an sekreto nin pagigin kontento.

MAGIN MAPAGPASALAMAT

4. Paano an pagigin mapagpasalamat nakakatabang sa sato na magin kontento? (1 Tesalonica 5:18)

⁴ Sa parati, an tawong mapagpasalamat saro man na tawong kontento. (Basahon an 1 Tesalonica 5:18.) Halimbawa, kun tunay kitang mapagpasalamat sa panginot na mga pangangaipo sa buhay, posibleng marhay na dai kita gayong maparahadit sa mga bagay na gusto niyato alagad mayo kita. Pag mapag-apresyar niyatong hinuhurop-hurop an mga pribilehiyo nin paglilingkod na igwa kita sa ngunyan, nakakatabang iyan na magpokus kita sa paggibo kan satong pinakamakakaya sa mga asignasyon na iyan imbes na pagparaisipon na sana kun paano ta makakamtan an sarong pribilehiyong gusto ta. Bakong makangangalas na dinadagka kita kan Kasuratan na iiba sa satong mga pamibi an mga kapahayagan nin pasasalamat ki Jehova! An pagigin mapagpasalamat nakakatabang sa sato na mamatian “an katuninungan nin Diyos na nakakalabi sa gabos na pakasabot.”—Fil. 4:6, 7.

5. Sa anong mga dahilan dapat kutang nagin mapagpasalamat an mga Israelita? (Hilingon man an ritrato.)

⁵ Pag-isipan an nangyari sa mga Israelita. Sa nagkapirang pagkakataon, nagreklamo sinda ki Jehova na mayo sinda kan mga kakanon na igwa sinda kaidto sa Ehipto. (Bil. 11:4-6) Totoo na bakong pasil an buhay sa kaawagan. Pero ano kuta an makakatabang sa sainda na magin kontento? Dapat kuta mapagpasalamat nindang hinurop-hurop an mga ginibo na ni Jehova para sa sainda. Grabe an nagin pagtratar sa sainda kaidto sa Ehipto bilang mga uripon kaya nagpadara si Jehova nin sampulong damat sa mga Ehipsiyo. Pagkatalingkas kan mga Israelita, “sinamsaman ninda an mga Ehipsiyo” nin mga bagay na gibo sa plata saka bulawan asin nin mga bado. (Exo. 12:35, 36) Kan nakorner kan mga Ehipsiyo an mga Israelita sa Dagat na Pula, milagrosong binanga ni Jehova an dagat. Asin mantang nagbabaklay sinda sa kaawagan, aroaldaw niya sindang pinakakan nin manna. Kaya, ano an problema? Nagin bakong kontento an mga Israelita, bakong dahil mayo sinda kan kakanon na kaipuhan ninda, kundi dahil bako sindang mapagpasalamat sa kun ano an igwa sinda.

6. Ano an nagkapirang paagi na makakatabang sa sato na magin mapagpasalamat?

⁶ Ano an makakatabang sa saimo na magin mapagpasalamat? Inot, magtao nin panahon kada aldaw para isip-isipon an manungod sa marahay na mga bagay na ikinakaugma mo. Puwede ka pa nganing maglista nin duwa o tulong bagay na ipinagpapasalamat mo. (Lam. 3:22, 23) Ikaduwa, ipahayag an saimong pasasalamat. Mag-inisyatiba na pasalamatan an iba sa mga ginigibo ninda para sa saimo. Urog sa gabos, pirming pasalamatan si Jehova sa kada aldaw. (Sal. 75:1) Ikatulo, pilion bilang dayupot na mga amigo an mga tawong mapagpasalamat. An pagigin mapagpasalamat nakakaulakit; siring man an pagkabakong kontento. (Deu. 1:26-28; 2 Tim. 3:1, 2, 5) Pag nakapokus kita sa pagpahayag kan satong pasasalamat, mas dikit an posibilidad na makamati kita nin pagkabakong kontento.

7. Paano nagin mapagpasalamat si Aci, asin ano an nagin resulta?

⁷ Pag-isipan an nangyari ki Aci na taga Indonesia. Sinabi niya: “Kaidtong COVID-19 na pandemya, pinunan kong ikumparar an kamugtakan ko sa kamugtakan kan mga kapagtubod ko. Huli kaiyan, nakamati ako nin pagkabakong kontento.” (Gal. 6:4) Ano an nakatabang sa saiya na mabago an saiyang kaisipan? Sinabi ni Aci: “Pinunan kong bilangon an nakakamtan kong mga bendisyon sa kada aldaw asin hurop-hurupon an dakul na marahay na bagay na igwa ako huli sa pagigin kabilang ko sa organisasyon nin Diyos. Dangan ipinapahayag ko ki Jehova an pasasalamat ko sa saiya. Bilang resulta, nakamati ako nin tunay na pagkakontento.” Kun pinapangibabawan ka nin negatibong mga kaisipan, puwede mo man daw iyan gibuhon tanganing magin mapagpasalamat ka giraray?

MAGDANAY NA NAKAPOKUS ASIN MAPAKUMBABA

8. Ano an nangyari kaidto ki Baruc?

⁸ Si Baruc, na sekretaryo ni propeta Jeremias, may panahon na nakamati nin pagkabakong kontento. Nagkaigwa kaidto si Baruc nin dipisil na asignasyon—an suportaran si Jeremias mantang ipinapahayag kaini an sarong magabat na mensahe sa sarong bakong mapagpasalamat na nasyon. May pagkakataon na nawara sa pokus si Baruc. Imbes na magpokus sa buot ni Jehova na gibuhon niya, minalataw na nagpuon siyang magparaisip manungod sa sadiri niya asin sa gusto niyang gibuhon. Paagi ki Jeremias, sinabi ni Jehova ki Baruc: “Naghahanap ka nin darakulang bagay para sa sadiri mo. Punduha na an paghanap kan siring na mga bagay.” (Jer. 45:3-5) Garo man sana Niya sinasabi: “Magin kontento ka sa saimong presenteng kamugtakan.” Inako ni Baruc an pagtatanos asin padagos niyang nakamtan an pag-uyon ni Jehova.

9. Kauyon kan sinasabi sa 1 Corinto 4:6, 7, matatabangan kita kan kapakumbabaan na midbidon an anong katotoohan? (Hilingon man an mga ritrato.)

⁹ May mga pagkakataon na tibaad mamatian nin sarong Kristiyano na maninigo nanggad siya sa sarong partikular na pribilehiyo nin paglilingkod. Tibaad matibayon siya, mahiguson, o eksperyensiyadong marhay—o tibaad ngani igwa siya kaiyan gabos. Alagad, tibaad sa iba itinao an pribilehiyong iyan na gusto niyang makamtan. Ano an makakatabang sa saiya na dai maghinanakit? Puwede niyang hurop-hurupon an isinurat ni apostol Pablo na nasa 1 Corinto 4:6, 7. (Basahon.) An lambang pribilehiyo na itinatao sa sato asin an lambang talento na igwa kita gabos iyan hali ki Jehova. Igwa kita kan mga regalong ini bako dahil sa sadiri tang paghihinguwa o dahil maninigo kita. Gabos iyan kapahayagan kan daing kapantay o dai na kutana maninigong kabuutan ni Jehova.—Roma 12:3, 6, nota sa ibaba; Efe. 2:8, 9.

10. Ano an makakatabang sa sato na magin mapakumbaba?

¹⁰ Makakatabang sa sato na magin mapakumbaba an paghurop-hurop sa halimbawang itinao sa sato ni Jesus. Pag-isipan an nangyari kan bangging hanawan ni Jesus an mga bitis kan saiyang mga apostol. Isinurat ni apostol Juan: “Huling aram ni Jesus na [1] itinao na kan Ama sa saiyang kamot an gabos na bagay asin na [2] naggikan siya sa Diyos saka [3] mapasiring siya sa Diyos, [pinunan niyang] hanawan an mga bitis kan mga disipulo.” (Juan 13:3-5) Puwede kutanang inisip ni Jesus na maninigo sanang hanawan kan mga disipulo niya an saiyang mga bitis. Pero durante kan saiyang buhay digdi sa daga, nungka niyang inisip na maninigo sanang magkaigwa siya nin asensado asin komportableng buhay. (Luc. 9:58) Mapakumbaba si Jesus asin kontento. Nagtao siya nin perpektong halimbawa para sa sato.—Juan 13:15.

11. Paano an kapakumbabaan nakatabang ki Dennis na magin kontento?

¹¹ Si Dennis, na taga Netherlands, hininguwang arugon an kapakumbabaan ni Jesus, pero dai iyan nagin madali. Sinabi niya: “May mga beses na naririsa kong nakakamati ako nin pride o pagkadiskontento pag nakakaresibi an iba nin pribilehiyo nin paglilingkod. Pag nangyayari iyan, pinag-aadalan ko an manungod sa kapakumbabaan. Sa JW Library^® app, may pigmarkahan akong mga teksto manungod sa kapakumbabaan tanganing madali ko iyan na mahanap asin mabasa giraray. Nag-download man ako sa cellphone ko nin mga pahayag manungod sa kapakumbabaan, asin parati ko iyan na dinadangog.a Nanudan ko na an mga ginigibo ta para ki Jehova gabos iyan para sa kamurawayan niya asin bako para sa sadiri ta. An lambang saro sa sato may sadit na papel sa kun ano an mga naisasagibo ni Jehova.” Kun namamatian mong dai ka na nagigin kontento sa saimong sitwasyon, hinguwahon na magin mapakumbaba. Makakatabang ini na kumusog an pakikiamigo mo ki Jehova asin na magin kontento ka.—Sant. 4:6, 8.

HUROP-HURUPON AN SAIMONG PAGLAOM

12. Anong paglaom sa maabot an nakakatabang sa sato na magin kontento? (Isaias 65:21-25)

¹² Urog kitang makakamati nin pagkakontento pag hinuhurop-hurop ta an magayunon na paglaom na naghahalat sa sato. Ipinapahiling mismo kan mga tataramon ni Jehova na isinurat ni propeta Isaias kun gurano kanakakadisganar an buhay sa ngunyan asin inaasigurar kita na hahalion ni Jehova an mga dahilan kaiyan. (Basahon an Isaias 65:21-25.) Maistar kita sa ligtas asin komportableng mga harong, magkakaigwa nin nakakaugmang gibuhon, saka makakan nin masustansiya asin masiram na mga kakanon. Nungka kitang mahahadit pa na kita o an satong mga aki mamumugtak sa peligro. (Isa. 32:17, 18; Ezek. 34:25) Magayunon asin tiwasay an satong puturo.

13. Sa anong mga kamugtakan lalo nang kaipuhan tang magpokus sa satong paglaom?

¹³ Kaipuhan niyatong magpokus ngunyan sa satong paglaom nin urog kisa kasuarin man. Taano? Huling nabubuhay kita sa “huring mga aldaw” asin gabos kita napapaatubang sa “masakit” na mga problema. (2 Tim. 3:1) Aroaldaw kitang tinatabangan ni Jehova na makatagal paagi sa pagtao sa sato nin paggiya, kusog, asin tabang na kaipuhan ta. (Sal. 145:14) Saro pa, nakakatabang sa sato an satong Kristiyanong paglaom pag nasa masakit kitang mga sitwasyon. Tibaad nasasakitan kang maitao an materyal na mga pangangaipo kan saimong pamilya. Buot sabihon daw kaini pirmi ka na lang masasakitan para lang makaraos? Dai nanggad! Nanuga si Jehova na itatao niya sa saimo an kaipuhan mo—asin an labi pa nanggad diyan—sa Paraiso. (Sal. 9:18; 72:12-14) Tibaad nakakamati ka nin dai mahali-haling kulog, depresyon, o iba pang malalang hilang. Arog na sana daw kaini an saimong buhay—mayo na lamang nin paglaom na makamati nin kaginhawahan sagkod lamang? Bako nanggad. An hilang asin kagadanan mawawara na sa bagong kinaban nin Diyos. (Kap. 21:3, 4) An paglaom na iyan nakakatabang sa sato na magin kontento ngunyan asin dai makamati nin kaanggutan saka paghinanakit. Makakamati kita nin pagkakontento dawa pag napapaatubang kita sa inhustisya, nagadanan nin mahal sa buhay, nagtatagal nin hilang, o ano man na iba pang pagbalo. Taano? Huling gurano man kasakit kan inaagihan tang mga kadipisilan ngunyan, aram niyato na an “kasakitan minaagi sana” asin dai na mahahaloy permanente na iyan na sosolusyunan sa bagong kinaban.—2 Cor. 4:17, 18.

14. Paano ta mapapakusog an satong paglaom?

¹⁴ An paglaom mahalagang marhay para magin kontento kita, kaya paano ta iyan mapapakusog? Kun paanong tibaad kaipuhan nin saro na magsulot nin salming para mahiling nin mas malinaw an hararayong bagay, tibaad kaipuhan ta man na gumibo nin angay na mga lakdang tanganing pakusugon an satong paglaom para mahiling ta nin mas malinaw an maabot na Paraiso. Pag nagpaparahadit kita manungod sa satong pinansiyal, puwede tang imahinaron an magigin buhay ta pag dai na kaipuhan an kuwarta saka mayo na nin utang asin nin mga magigin tios. Kun nahahadit kita manungod sa mga pribilehiyo sa paglilingkod na dai ta pa nakakamtan, puwede tang isip-isipon kun gurano nanggad kadaing saysay kan siring na paghadit pag kita perpekto na asin ribo-ribong taon nang naglilingkod ki Jehova. (1 Tim. 6:19) Tibaad sa primero masakitan kitang hurop-hurupon an manungod sa puturo huling nagpaparahadit kita manungod sa presente. Alagad sa paglihis nin panahon, magigin pasil na sana sa sato na hurop-hurupon an manungod sa puturo na ipinanuga ni Jehova sa sato.

15. Ano an nanudan mo sa sinabi ni Christa?

¹⁵ Pag-isipan kun paano an paglaom nakatabang ki Christa, na agom ni Dennis, na sinambit sa inutan. Sinabi niya: “Igwa ako nin naglalalang hilang sa kalamnan kaya kaipuhan kong mag-wheelchair asin maghigda lang nin haros bilog na aldaw. Aroaldaw nakakamati ako nin kulog. Dai pa sana nahahaloy, sinabi sako kan doktor ko na dai na ako mararahay. Pero naisip ko tulos, ‘Iba man kaya an paghiling niya sa puturo.’ Nakapokus ako sa paglaom ko, na nagtatao sako nin katuninungan nin isip. Sa ngunyan, tibaad kaipuhan kong magtagal sa kinaban na ini, pero lubos kong ikakaugma an buhay sa bagong kinaban!”

“AN MGA MAY PAGKATAKOT SA SAIYA DAI NAGKUKULANG NIN ANO MAN”

16. Taano ta nasabi ni Hading David na an mga natatakot ki Jehova “dai nagkukulang nin ano man”?

¹⁶ An sarong kontentong lingkod ni Jehova mapapaatubang pa man giraray sa mga problema. Si Hading David nagadanan nin kisiyera tulo sa saiyang mga aki. Sinahutan siya nin sala, trinaydor, asin hinanting bilang sarong dulag sa laog nin nagkapirang taon. Alagad, sa ibong kan grabeng mga pagbalong ini, sinabi niya manungod ki Jehova: “An mga may pagkatakot sa saiya dai nagkukulang nin ano man.” (Sal. 34:9, 10) Taano ta nasabi niya iyan? Huling, bilang mga lingkod ni Jehova, dawa ngani dai kita nag-aasa na magkakaigwa kita nin buhay na mayo lamang nin problema, sigurado kitang dai nanggad kita magkukulang o mawawaran kan mga bagay na talagang kaipuhan ta. (Sal. 145:16) Asin makakaasa kita na tatabangan kita ni Jehova na makayanan an gabos na pagbalong napapaatubang sa sato. Puwede kitang magin kontento.

17. Taano ta determinado kang manudan an sekreto nin pagigin kontento?

¹⁷ Gusto ni Jehova na magin kontento ka. (Sal. 131:1, 2) Kaya hinguwahon na manudan an sekreto nin pagigin kontento. Kun pagmamaigutan mong magin mapagpasalamat, magdanay na nakapokus saka mapakumbaba, asin kun papakusugon mo an saimong paglaom, masasabi mo: “Iyo, kontento ako.”—Sal. 16:5, 6.