Kun Paano Kita Tinatabangan ni Jehova na Makatagal

1. Taano ta kaipuhan niyato nin pakatagal, asin siisay an makakatabang sa sato na makapahiling kaiyan? (1 Pedro 5:10)

SA MASAKIT na huring mga aldaw na ini, kaipuhan kan mga lingkod ni Jehova nin pakatagal. An iba nasasakitan huling igwa sinda nin malalang hilang, nagadanan nin mahal sa buhay, o kaya napapaatubang sa pagkontra kan mga kapamilya o gobyerno. (Mat. 10:18, 36, 37) Makakasigurado ka na ano man na kadipisilan an napapaatubang sa saimo, kaya kang tabangan ni Jehova na makatagal.—Basahon an 1 Pedro 5:10.

2. Sain hali an satong kakayahan na makatagal bilang mga Kristiyano?

² An pakatagal iyo an kakayahan na magpadagos asin danay na magkaigwa nin makusog na paglaom mantang napapaatubang sa mga ulang, persekusyon, pagbalo, o mga sugot. Bilang mga Kristiyano, an satong kakayahan na makatagal dai minagikan sa sadiri tang kusog; imbes, hali iyan ki Jehova, an saro na kayang magtao sa sato nin “puwersa na urog kisa sa ordinaryo.” (2 Cor. 4:7) Sa artikulong ini, pag-uulayan ta an apat na probisyon na itinatao ni Jehova tanganing tabangan kitang makatagal. Aaramon ta man kun paano ta maaaprobetsaran an kada saro kaiyan.

PAMIBI

3. Taano ta masasabi niyatong sarong makangangalas na paagi nin pakikikomunikar ki Jehova an pamibi?

³ Tinawan kita ni Jehova nin sarong makangangalas na probisyon na makakatabang sa sato na makatagal. Pinagin posible niya na makaulay niyato siya sa ibong kan makasalan tang kamugtakan. (Heb. 4:16) Pag-isipan ini: Puwede kitang mamibi sa saiya ano man na oras asin manungod sa ano man na bagay. Kaya niya kitang dangugon ano man an satong lengguwahe asin sain man kita, dawa kun nagsosolo kita o nakapreso. (Jon. 2:1, 2; Gibo 16:25, 26) Pag nahahadit kitang marhay na huli kaiyan dai ta maipahayag sa mga tataramon an mga iniisip ta, nasasabutan pa man giraray ni Jehova kun ano an gusto tang sabihon. (Roma 8:26, 27) Tunay nanggad na sarong makangangalas na paagi nin pakikikomunikar ki Jehova an pamibi!

4. Taano ta nasabi niyatong kauyon kan kabutan ni Jehova an satong mga pamibi na tabangan kitang makatagal?

⁴ Sa saiyang Tataramon, inaasigurar sa sato ni Jehova na “ano man na hagadon ta kauyon kan saiyang kabutan, dinadangog niya kita.” (1 Juan 5:14) Puwede ta daw hagadon ki Jehova na tabangan kitang makatagal? Iyo! An paggibo kaiyan kauyon kan saiyang kabutan. Taano ta nasabi niyato iyan? Huling pag tinatagalan ta an mga pagbalo, tinatawan ta si Jehova nin isisimbag sa nagtutuya sa saiya, si Satanas na Diyablo. (Tal. 27:11) Apuwera kaiyan, sinasabi kan Bibliya na gustong-gusto ni Jehova na “ipahiling an saiyang kusog alang-alang sa mga bilog an puso para sa saiya.” (2 Cron. 16:9) Kaya makakasigurado kita na igwa si Jehova kan kakayahan asin kan pagmawot na tabangan kitang makatagal.—Isa. 30:18; 41:10; Luc. 11:13.

5. Paano nakakatao sa sato nin katuninungan nin isip an pagpamibi? (Isaias 26:3)

⁵ Sinasabi kan Bibliya na pag udok kitang namimibi manungod sa satong mga ikinakahadit, “an katuninungan nin Diyos na nakakalabi sa gabos na pakasabot iyo an magbabantay sa [satong] puso asin kaisipan.” (Fil. 4:7) Pag-isipan an buot sabihon kaiyan. An mga tawong dai naglilingkod ki Jehova napapaatubang man sa mga kadipisilan, asin dakul sa sainda an nagpupurbar nin manlain-lain na pamamaagi tanganing magkaigwa nin katuninungan nin isip. Halimbawa, an iba nagsasagibo nin sarong klase nin meditasyon tanganing halion an gabos nindang iniisip, kaiba na an saindang mga ikinakahadit. Peligroso sa espirituwal an paghali kan gabos na iniisip. (Ikumparar an Mateo 12:43-45.) Saro pa, an katuninungan na itinatao ni Jehova pag namimibi kita nakakalabi nanggad kisa sa ano man na klase nin katuninungan na tibaad magkaigwa an saro paagi sa siring na meditasyon. Pag namimibi kita ki Jehova, ipinapahiling niyato na lubos kitang nananarig sa saiya asin tinatawan niya kita nin “dagos-dagos na katuninungan.” (Basahon an Isaias 26:3.) An sarong paagi na ginigibo iyan ni Jehova iyo an pagtabang sa sato na magirumduman an nakakapakusog na mga katotoohan na nanudan ta sa saiyang Tataramon. Nakakapakalma sa satong isip asin puso an mga katotoohan na iyan huling ipinapagirumdom kaiyan na nagmamalasakit sa sato si Jehova asin na gusto niyang magin mapanggana kita.—Sal. 62:1, 2.

6. Paano mo magagamit nin lubos an probisyon na pamibi? (Hilingon man an ritrato.)

⁶ An puwede mong gibuhon. Mantang tinatagalan mo an sarong pagbalo sa pagtubod, “ipasa mo ki Jehova an saimong pasan” asin mamibi na tawan ka niya kan saiyang katuninungan. (Sal. 55:22) Mamibi man na tawan ka niya kan kadunungan na kaipuhan mo tanganing makayanan an kadipisilan. (Tal. 2:10, 11) Kaiba kan mga pagngayo-ngayo mo para sa pakatagal, dai man paglingawan an mga pamibi nin pasasalamat ki Jehova. (Fil. 4:6) Maghanap nin mga indikasyon na tinatabangan ka ni Jehova sa inaagihan mong pagbalo, asin pasalamatan siya sa saiyang tabang. Dai pagtugutan na huli sa pagbalong iyan dai mo na mahiling an mga itinao niya na sa saimong bendisyon.—Sal. 16:5, 6.

TATARAMON NIN DIYOS

7. Paano an pag-adal nin Bibliya makakatabang sa sato na makatagal?

⁷ Itinao sa sato ni Jehova an saiyang Tataramon tanganing tabangan kitang makatagal. Igwa sa Bibliya nin dakul na teksto na nag-aasigurar sa sato na tatabangan niya kita. Pag-isipan an saro sanang halimbawa. Sinasabi sa Mateo 6:8: “Aram kan saindong Ama an mga kaipuhan nindo bago pa man kamo maghagad sa saiya.” Si Jesus an nagsabi kan mga tataramon na iyan, asin mayo na nin siisay man na mas urog na nakakamidbid ki Jehova kundi si Jesus. Kaya, mayo kitang dahilan na magduda kun baga tatabangan kita ni Jehova na magkaigwa kan mga pangangaipo ta mantang napapaatubang kita sa mga kadipisilan. Igwa sa Bibliya nin dakul na kaagid na teksto na makakapakusog kan satong determinasyon na magtagal.—Sal. 94:19.

8. (a) Magtao nin halimbawa nin sarong prinsipyo sa Bibliya na makakatabang sa sato na makatagal. (b) Ano an makakatabang sa sato na magirumduman an mga prinsipyo sa Bibliya pag kaipuhan ta iyan?

⁸ Makakatabang sa sato an mga prinsipyo sa Bibliya na makatagal. Igwa kaya an mga iyan nin praktikal na kadunungan na makakatabang sa sato na makagibo nin madunong na mga desisyon. (Tal. 2:6, 7) Halimbawa, dinadagka kita kan Bibliya na magpokus sana sa kada aldaw imbes na magparahadit manungod sa mga posibleng mangyari o dai mangyari sa masunod na aldaw. (Mat. 6:34) Kun nakaugalian ta nang basahon an Kasuratan asin hurop-hurupon iyan, mas posibleng magirumduman ta an mga prinsipyong kaipuhan niyato pag kaipuhan ta iyan.

9. Paano napapakusog kan mga salaysay sa Bibliya an satong pagtitiwala na tatabangan kita ni Jehova?

⁹ Igwa man sa Bibliya nin mga salaysay manungod sa totoong mga pangyayari sa buhay nin ordinaryong mga tawo na nagtiwala ki Jehova asin tinabangan niya. (Heb. 11:32-34; Sant. 5:17) Pag hinuhurop-hurop ta an siring na mga salaysay, napapakusog ta an satong pagtitiwala na si Jehova an “satong pailihan asin kakusugan, sarong tabang na makukua tulos sa mga panahon nin kasakitan.” (Sal. 46:1) Mantang pinag-aadalan ta an buhay kan maimbod na mga lingkod ni Jehova kaidto, napapahiro kitang arugon an saindang pagtubod asin pakatagal.—Sant. 5:10, 11.

10. Paano mo lubos na magagamit an probisyon na Tataramon nin Diyos?

¹⁰ An puwede mong gibuhon. Basahon an Bibliya aroaldaw, asin ilista an mga tekstong para saimo partikular nang makakatabang sa sitwasyon mo. Nahiling kan dakul na an pagbasa kada aga kan teksto kan aldaw sarong marahayon na paagi na magkaigwa sinda nin nakakapakusog na punto hali sa Bibliya na iisip-isipon ninda sa bilog na aldaw. Napatunayan iyan kan sister na si Mariea kan parehong ma-diagnose na may kanser an saiyang mga magurang. Ano an nakatabang sa saiya na makatagal mantang inaataman niya sinda sa huring mga bulan kan saindang buhay? “Binabasa ko kada aga an teksto sa Pagsiyasat sa Kasuratan Aroaldaw tapos hinuhurop-hurop ko iyan,” an sabi niya. “Paagi sa rutinang ini nagkakaigwa ako nin iisip-isipon na sarong punto sa Kasuratan asin nakatabang iyan sako na magpokus sa kun ano an mas mahalaga imbes na sa sadiri ko saka sa nakakapurisaw na sitwasyon na napapaatubang sako.”—Sal. 61:2.

MGA KAPAGTUBOD

11. Taano ta nakakapakusog na maaraman na dai kita nagsosolo mantang nagtatagal kita nin mga pagbalo?

¹¹ An satong Kristiyanong mga tugang sa bilog na kinaban saro pang probisyon na itinatao sa sato ni Jehova para tabangan kitang makatagal. An maaraman ta lang na “an arog kaiyan na klase nin mga kasakitan inaagihan man kan bilog na kasararuan kan [satong] mga tugang” nakakaasigurar na sa sato na dai kita nagsosolo. (1 Ped. 5:9) Sa katunayan, makakasigurado kita na ano man na sitwasyon an inaagihan ta, nag-agi na man nin kaagid kaiyan an iba, asin natagalan ninda iyan. Buot sabihon, kaya ta man na makatagal!—Gibo 14:22.

12. Paano puwedeng makatabang sa sato an satong mga kapagtubod, asin ano an puwede tang gibuhon para sa sainda? (2 Corinto 1:3, 4)

¹² Mantang nagtatagal kita, puwede kitang mapakusog kan satong mga kapagtubod. Napatunayan iyan ni apostol Pablo. Parati siyang nagpapahayag nin pasasalamat para sa mga nagtabang sa saiya mantang nakapreso siya kaidto sa harong, na sinasambit sinda sa pangaran. Tinawan ninda si Pablo nin karangahan, pampakusog, asin nin praktikal na tabang. (Fil. 2:25, 29, 30; Col. 4:10, 11) Sa ngunyan tibaad makaeksperyensiya kita nin kaagid kaiyan. Pag kaipuhan ta nin tabang para makatagal, yaon an mga tugang para sa sato; asin pag kaipuhan ninda nin tabang, yaon kita para sa sainda.—Basahon an 2 Corinto 1:3, 4.

13. Ano an nakatabang sa sister na si Maya na makatagal?

¹³ An mga tugang nagin dakulang pampakusog sa sarong sister sa Russia na si Maya. Kan 2020, hinalughog an saiyang harong, asin kan huri kinaipuhan na idepensa an sadiri sa korte huli sa paghiras niya kan saiyang pagtubod. Sinabi ni Maya: “Kan panahon na haros dai ko na kayang magpadagos pa huli sa grabeng pangluluya nin buot, nag-apod saka nagsurat sako an mga tugang, na inaasigurar sa sako na namumutan ninda ako. Dati pa aram ko na man na parte ako nin sarong dakula saka mamumuton na pamilya. Pero puon kan 2020, lalong nagin totoo iyan sa sako.”

14. Paano kita makikinabang sa suporta kan satong mga kapagtubod mantang kita nagtatagal? (Hilingon man an ritrato.)

¹⁴ An puwede mong gibuhon. Mantang nagtatagal ka, magdanay na dayupot sa saimong Kristiyanong mga tugang. Dai mag-alangan na maghagad nin tabang sa mga elder. Puwede sindang magin “sarong sirungan sa duros, sarong pailihan sa makusugon na uran.” (Isa. 32:2, mga nota sa ibaba) Asin tandaan na arog mo may tinatagalan man na mga kadipisilan an saimong mga kapwa Kristiyano. Pag nagpapahiling ka nin kabuutan sa saro na nangangaipo, makakatabang iyan sa saimo na magdanay na balanse asin positibo mantang tinatagalan mo an sadiri mong pagbalo.—Gibo 20:35.

AN SATONG PAGLAOM

15. Paano nakatabang ki Jesus an paglaom, asin paano man iyan nakakatabang sa sato? (Hebreo 12:2)

¹⁵ Tinawan kita ni Jehova nin siguradong paglaom para tabangan kitang makatagal. (Roma 15:13) Girumdumon kun paano an paglaom nakatabang ki Jesus na matagalan an pinakamasakit na aldaw kan saiyang buhay digdi sa daga. (Basahon an Hebreo 12:2.) Aram ni Jesus na an saiyang kaimbudan makakakontribwir sa pagbindikar kan pangaran ni Jehova. Asin hinahalat-halat niya nang makaibanan giraray an saiyang Ama asin pag-abot nin panahon maglingkod kaiba an saiyang mga tugang sa Kahadian sa langit. Sa kaagid na paagi, an satong paglaom na mabuhay nin daing sagkod sa bagong kinaban nin Diyos nakakatabang sa sato na matagalan an ano man na kadipisilan na naeeksperyensiyahan ta sa kinaban na ini ni Satanas.

16. Paano an paglaom nakatabang sa sarong sister na makatagal, asin ano an nanudan mo sa sinabi niya?

¹⁶ Pag-isipan kun paano an paglaom sa Kahadian nakatabang sa sarong sister sa Russia na si Anna, na an agom inaresto dangan iprineso nguna mantang naghahalat na bistahon. Sinabi ni Anna: “Nakatabang sa sako an pagpamibi manungod sa satong paglaom sa maabot saka an paghurop-hurop diyan para dai ako gayong pangluyahan nin buot. Nasasabutan ko na bako ini an katapusan. Magigin mapanggana si Jehova, asin iyo man kita.”

17. Paano ta maipapahiling an pasasalamat niyato sa satong paglaom na basado sa Bibliya? (Hilingon man an ritrato.)

¹⁷ An puwede mong gibuhon. Magtao nin panahon na isip-isipon an manungod sa magayunon na puturo na itinagama sa sato ni Jehova. Isipa na yaon ka na sa bagong kinaban nin Diyos saka imahinara an mga bendisyon na makakamtan ta. Mamamatian mong an ano man na pagbalong tibaad napapaatubang sa sato ngunyan magigin garo baga “minaagi sana asin magian.” (2 Cor. 4:17) Gibuhon man an makakaya mo na ihiras sa iba an saimong pagtubod. Imahinara na sana kun gurano kasakit an sitwasyon ninda. Napapaatubang sinda sa mga kadipisilan sa kinaban ni Satanas pero dai ninda aram an manungod sa katuyuhan nin Diyos sa maabot. Puwede mong mapukaw an interes ninda sa satong paglaom sa Kahadian dawa sa halipot sanang pakikipag-ulay.

18. Taano ta makakapagtiwala kita sa mga panuga ni Jehova?

¹⁸ Pagkatapos na matagalan an dakul na pagbalo, sinabi ni Job ki Jehova: “Aram ko na ngunyan na kaya mong gibuhon an gabos na bagay asin na mayo nin bagay na naiisip mong gibuhon an imposible sa saimo.” (Job 42:2) Arog kan nanudan ni Job, mayo nin ano man na makakaulang na mautob an katuyuhan ni Jehova. An katotoohan na iyan makakapakusog sa sato mantang nagtatagal kita. Para iilustrar, imahinara na igwa nin sarong babaying may hilang na nagdulok na sa dakul na doktor pero dai ninda siya nabulong. Pero kan madeterminaran nin sarong eksperyensiyado asin pinagtitiwalaan na doktor kun ano an hilang niya asin ipinaliwanag kaini kun paano siya bubulungon, naginhawahan an babayi, dawa ngani mangangaipo nin panahon para marahay siya. Magigibo niya nang magtagal huling aram niyang may magayon siyang paglaom—an paglaom na mararahay siya. Sa kaagid na paagi, an satong pagtitiwala manungod sa satong paglaom na Paraiso sa maabot makakatabang sa sato na makatagal.

19. Ano an kaipuhan ta tanganing makatagal?

¹⁹ Arog kan pinag-ulayan ta, tinatabangan kita ni Jehova na matagalan an satong mga pagbalo paagi sa pamibi, sa saiyang Tataramon, sa satong mga kapagtubod, asin sa satong paglaom. Kun lubos tang gagamiton an mga probisyon na ini, tatabangan kita ni Jehova na makayanan an gabos na kadipisilan na tibaad mapaatubang sa sato sagkod na mag-abot an aldaw na mayo na an mga kasakitan sa kinaban na ini ni Satanas.—Fil. 4:13.