1925—Sanggatos na Taon Na an Nakaagi

NASUDYANG INAASAHAN

Kan 1925, inaasahan kan dakul na Estudyante sa Bibliya na ibabalik sa taon na iyan an Paraiso digdi sa daga. Taano? Ini an sabi ni Brother Albert Schroeder, na kan huri nagin miyembro kan Namamahalang Grupo: “An pakasabot kaidto iyo na an mga natatada sa linahidan na mga parasunod ni Cristo mapasiring sa langit tanganing magin parte kan Kahadian asin na an maimbod na mga lalaki kan suanoy, arog ni Abraham, David, asin iba pa, bubuhayon liwat bilang mga prinsipe tanganing iyo na an manginot sa gobyerno kan daga bilang parte kan Kahadian nin Diyos.” Nagpadagos an taon asin dai nangyari an mga inaasahan ninda, kaya natural sanang nadisganar an nagkapira.—Tal. 13:12.

Sa ibong kan pagkadisganar na ini, an kadaklan sa Mga Estudyante sa Bibliya nagdanay na sibot sa gibuhon na paghuhulit asin padagos nindang urog na nasabutan an manungod sa paninimbagan nindang magin mga Saksi para ki Jehova. Halimbawa, pag-isipan an ginibo ninda tanganing maibrodkast an katotoohan sa hararayong lugar.

NAGTUGDOK NIN DAKUL PANG ISTASYON NIN RADYO

Dahil sa magayon na mga resulta kan istasyon nin radyo na WBBR kan sinundan na taon, naggibo an Mga Estudyante sa Bibliya nin saro pang istasyon nin radyo na kayang maabot an hararayong lugar. Sa pagkakataon na ini, itinugdok iyan harani sa Chicago, Illinois. WORD an pangaran kan bagong istasyon na iyan. Nagigirumduman ni Ralph Leffler, sarong radio engineer na kaiba sa mga nagtugdok kan istasyon: “Sa mga banggi nin tiglipot, nadangog an WORD sa hararayong mga lugar.” Halimbawa, nagsubaybay sa saro sa inot na mga brodkast an sarong pamilya na nakaistar sa siyudad nin Pilot Station sa Alaska na labing 5,000 kilometros an rayo. Pagkatapos nindang magdangog, naggibo nin surat an pamilya para sa mga nagtatrabaho sa istasyon tanganing pasalamatan sinda sa pagtao kan siring na programa na nakakapakusog sa espirituwal.

Manungod sa kakayahan kan istasyon na ini na maabot an hararayong lugar, sinabi kan The Watch Tower na Disyembre 1, 1925: “Saro an WORD sa mga istasyon nin radyo sa Estados Unidos na hararayong marhay na mga lugar an kayang maabot; nagpupunsiyonar iyan sa kusog na 5,000 watts. Magayon an signal kan istasyon na ini sa Sirangan sagkod sa Sulnupan na mga baybayon kan Estados Unidos, siring man sa Cuba asin dawa sa pinakapurong mga lugar sa norteng parte kan Alaska. Dakul na tawong dai pa lamang nadangog an katotoohan an nagin interesado kan magsubaybay sinda sa istasyon na ini.”

Kasabay kaiyan, hinihinguwa man kan Mga Estudyante sa Bibliya na urog na aprobetsaran an paggamit nin radyo tanganing ihulit an maugmang bareta sa Canada. Kan 1924, itinugdok sa Saskatoon, Saskatchewan, an istasyon nin radyo na CHUC. Saro iyan sa inot na mga istasyon nin radyo sa Canada na nagbobrodkast nin mga programang pigtutukar an mga temang manungod sa relihiyon. Pag-abot kan taon 1925, kinaipuhan na ilipat sa ibang lugar an sadit na istasyon na iyan. Kaya iinareglo kan Watch Tower Society na magin pagsadiri na ninda an istasyon dangan ilinipat an mga broadcasting studio kaini sa Regent Building, sarong lumang teatro sa Saskatoon na binakal asin pig-renovate ninda para sa katuyuhan na iyan.

Sa tabang kan istasyon na ini, napaabutan kan maugmang bareta sa inot na pagkakataon an dakul na nakaistar sa bakong matawong mga rehiyon kan Saskatchewan. Halimbawa, sa sarong puwerang banwaan, nagsurat an sarong babaying may apelyidong Graham para mag-request nin mga literatura sa Bibliya pagkatapos kaining magdangog sa sarong brodkast. Nagirumduman ni Brother George Naish, “An pakiulay niyang ‘Tukdui tabi kami!’ garo baga apuradong marhay kaya pinadarahan mi siya kan bilog na set kan Studies in the Scriptures.” Dai nahaloy, ipinapalakop na man kan babaying ini an mensahe kan Kahadian sa mas harayo pang lugar.

PAGLILINAW SA SATONG MGA TINUTUBOD

Mahihiling sa Marso 1, 1925, na isyu kan The Watch Tower an mahalagang marhay na artikulo na may titulong “Birth of the Nation” (sa Bicol, “Pagkamundag kan Nasyon”). Taano ta mahalagang marhay an artikulong ini? Nasasabutan na man kaidto kan Mga Estudyante sa Bibliya na igwa si Satanas nin organisasyon na kompuwesto nin dai nahihiling na maraot na mga espiritu sa langit asin kan sistema nin relihiyon, komersiyo, saka pulitika digdi sa daga. Alagad, paagi kan artikulong iyan, tinabangan kan “maimbod asin mapagmansay na uripon” an kasararuan nin magturugang na masabutan na igwa man si Jehova nin organisasyon, saro na biyong suway asin kontra sa organisasyon ni Satanas. (Mat. 24:45) Dugang pa, ipinaliwanag kan uripon na an Kahadian nin Diyos namundag kan 1914 asin na kan taon na ini, bilang resulta kan nangyaring “giyera sa langit,” si Satanas asin an saiyang mga demonyo pinalayas sa langit asin yaon na lang sinda ngunyan digdi sa daga.—Kap. 12:7-9.

Igwa nin mga nasakitan na akuon an bagong pakasabot na ini. Kaya, nagtao nin sadol an artikulo: “Kun may mga parabasa kan The Watch Tower na dai uyon sa mga sinambit digdi, isinusuherir na maingat nindang halaton nin may pagkakalmado an Kagurangnan, asin pirmi nindang pagdanayon na dalisay an saindang puso.”

Alagad, si Tom Eyre na sarong colporteur (inaapod na ngunyan na payunir) sa Britania nag-istorya kun ano an namatian kan kadaklan na Estudyante sa Bibliya manungod sa artikulong iyan: “Ugmahon an mga tugang sa paliwanag na ini manungod sa Kapahayagan 12. Kan marealisar mi nang naestablisar na sa langit an Kahadian, grabe su entusiyasmo mi na ibalangibog sa iba an maugmang baretang iyan. Ginanahan talaga kami na magin mas aktibo pa sa gibuhon saka nakatabang iyan samo na mahiling kun paano ginigiyahan ni Jehova an saiyang mga lingkod na makahaman nin mas darakula pang bagay.”

PAGPAPATOTOO MANUNGOD KI JEHOVA

Sa ngunyan, pamilyar na an mga Saksi ni Jehova sa mga tataramon na nasa Isaias 43:10: “‘Kamo an sakuyang mga saksi,’ an sabi ni Jehova, ‘Iyo, an sakuyang lingkod na pinili ko.’” Alagad, bago an taon 1925, bihiraon lang na tukaron sa satong mga publikasyon an manungod sa tekstong iyan. Pero kan taon 1925, tinukar sa 11 isyu kan The Watch Tower an manungod sa Isaias 43:10 asin 12!

Sa katapusan kan Agosto 1925, nagtiripon an Mga Estudyante sa Bibliya sa sarong kumbensiyon sa Indianapolis, Indiana. Sa pambukas na mensahe na nakaimprenta sa programa kan kumbensiyon, sinabi ni Joseph F. Rutherford: “Nagdigdi kita sa kumbensiyon na ini tanganing makakua nin . . . kusog hali sa satong Kagurangnan tanganing sa siring makabalik kita sa langtad na may panibagong kusog na magin saiyang mga saksi.” Sa bilog na walong aldaw na kumbensiyon na iyan, padagos na dinagka an mga nag-atender na magpatotoo manungod ki Jehova sa lambang oportunidad.

Kan Sabado, Agosto 29, tinukar ni Brother Rutherford an temang “A Call to Action” (sa Bicol, “Sarong Pangapudan na Humiro”). Sa saiyang pahayag, idinuon niya an kahalagahan kan pagpapatotoo: “Sinabi ni Jehova sa saiyang banwaan . . . : ‘Kamo an sakuyang mga saksi [na] ako an Diyos.’ Dangan tinawan sinda kan malinaw na pagbuot na ini na mayo nanggad nin ano man na pagduwa-duwa: ‘Magpatindog kamo nin sarong senyal para sa mga banwaan.’ Mayo na nin iba pa digdi sa daga na mapatindog nin senyal para sa mga banwaan apuwera sa [saiyang mga lingkod], an mga igwa kan espiritu kan Kagurangnan, asin sa siring saiyang mga saksi.”—Isa. 43:12; 62:10.

Pagkatapos kan pahayag ni Brother Rutherford, nag-uyon an gabos na nagdadangog sa binasa niyang resolusyon na may titulong “Message of Hope” (sa Bicol, “Mensahe nin Paglaom”) na nagtutukdo sa Kahadian nin Diyos bilang an tunay na paglaom tanganing makamtan “an bendisyon na katuninungan, prosperidad, marahay na salud, buhay, katalingkasan asin daing sagkod na kaugmahan.” Kan huri, itrinadusir an resolusyon na ini sa nagkapirang lengguwahe asin inimprenta bilang tract. Mga 40 milyones na kopya kaiyan an naidistribwir.

Naglihis pa an nagkapirang taon bago opisyal na inapod kan Mga Estudyante sa Bibliya an grupo ninda bilang Mga Saksi ni Jehova. Pero sa paglihis nin panahon, padagos nindang urog na nasabutan an saindang paninimbagan na magin saiyang mga saksi.

PAGDALAW LIWAT SA MGA INTERESADO

Mantang nagdadakul an bilang kan Mga Estudyante sa Bibliya sa bilog na kinaban, urog man sindang dinagka na mag-recanvass, o magdalaw liwat, sa mga nagpahiling nin interes kaidto sa maugmang bareta. Kasunod kan kampanya para sa pagdistribwir kan tract na Message of Hope, nagtao nin instruksiyon an The Bulletina: “Maggibo nin areglo na mag-recanvass sa mga harong na dai napasakamutan nin literatura, pero nawalatan nin kopya kan Message of Hope.”

Mahihiling sa Enero 1925 na isyu kan The Bulletin an minasunod na report hali sa sarong Estudyante sa Bibliya sa Plano, Texas: “Napangalas kami huling an teritoryong nagkapirang beses nang pig-canvass, sa parati, mas marahay pa kisa sa bagong mga teritoryo. May sarong sadit na banwaan sa teritoryo mi na limang beses na pig-canvass sa nakaaging sampulong taon. . . . Dai pa sana nahahaloy, pig-recanvass iyan ni Sister Hendrix saka ni Nanay asin nakapasakamot sinda nin mas dakul na libro kisa [kasuarin man].”

Asin sa nasyon nin Panama, sarong colporteur an nagsurat: “Dakul na tawong nagsayumang makipag-ulay sako kaidto an nagbago an sabuot kan dalawon ko sinda sa ikaduwa o ikatulong pagkakataon. An kadaklan sa mga ginibo ko sa taon na ini nakapokus sa pag-recanvass sa mga nakaulay ko kaidto; asin an nagkapira diyan nakakaugma an nagin resulta.”

PAGTANAW SA PUTURO

Sa saiyang taunan na surat para sa gabos na colporteur, ilinadawan ni Brother Rutherford an mga aktibidad kan nag-aging taon asin an mga gigibuhon sa maabot: “Sa nag-aging taon, nagin pribilehiyo nindong rangahon an dakul na nagmumundo. An gibuhon na ini nagtao nin kaugmahan sa saindong puso . . . An masunod na taon matao sa saindo nin mga oportunidad na magpatotoo para sa Diyos asin sa saiyang kahadian asin na patindugon an saiyang senyal para sa mga banwaan. . . . Lugod na padagos kitang iribang kusugan an boses asin kantahon an pag-umaw sa satong Diyos asin sa satong Hadi.”

Patapos na an taon 1925 asin may mga ginigibo nang plano an mga tugang tanganing pahiwason an saindang mga pasilidad sa Brooklyn. Dangan sa taon 1926, mapuon an sarong proyekto nin pagtugdok na iyo an pinakadakula sa gabos na ginibo kan organisasyon kasuarin man.