Dai Paglingawan na Ipamibi an Iba

1. Paano ta naaraman na mahalaga ki Jehova an satong mga pamibi?

AN PAMIBI sarong makangangalas na probisyon. Pag-isipan ini: Nagdelegar si Jehova nin nagkapirang gibuhon sa mga anghel. (Sal. 91:11) Tinawan niya man an saiyang Aki nin magagabat na paninimbagan. (Mat. 28:18) Pero, kumusta pag-abot sa pagdangog sa mga pamibi? Sarong bagay iyan na nungka niyang idinelegar sa kiisay man. Si Jehova, an “Paradangog nin pamibi,” personal na nagdadangog sa sato.—Sal. 65:2.

2. Anong halimbawa an itinao ni apostol Pablo kun manungod sa pagpamibi para sa iba?

² Dawa ngani puwede kitang magdulok ki Jehova ano man na oras manungod sa ano man na ikinakahadit ta, dapat ta man na ipamibi an iba. Ginibo iyan ni apostol Pablo. Halimbawa, isinurat niya sa kongregasyon sa Efeso: “Padagos ko kamong sinasambit sa mga pamibi ko.” (Efe. 1:16) Namibi man si Pablo para sa mga indibidwal. Halimbawa, sinabi niya ki Timoteo: “Nagpapasalamat ako sa Diyos, . . . aldaw-banggi takang danay na ginigirumdom sa sakuyang mga pagngayo-ngayo.” (2 Tim. 1:3) May mga kahaditan man si Pablo asin ipinamibi niya iyan. (2 Cor. 11:23; 12:7, 8) Dawa arog kaiyan, nagtao siya nin panahon tanganing ipamibi an iba.

3. Taano ta tibaad nalilingawan niyato na ipamibi an iba?

³ Tibaad nalilingawan niyato kun minsan na ipamibi an iba. Taano? Sinambit kan sister na si Sabrinaa an sarong dahilan. Sinabi niya: “Sibot-sibot an buhay sa sistemang ini. Tibaad magparapokus na sana kita sa satong mga problema asin huli kaiyan an ipinapamibi ta na sana iyo an manungod sa mga pangangaipo ta.” Nangyayari daw ini sa saimo kun minsan? Kun iyo, makakatabang sa saimo an artikulong ini. (1) Ipapaliwanag kaini kun taano ta mahalaga na ipamibi an iba asin (2) matao ini nin mga suhestiyon kun paano mo iyan magigibo.

TAANO TA DAPAT NIYATONG IPAMIBI AN IBA?

4-5. Paano puwedeng magkaigwa nin “dakulang epekto” an pagpamibi niyato para sa iba? (Santiago 5:16)

⁴ An pagpamibi para sa iba “igwa nin dakulang epekto.” (Basahon an Santiago 5:16.) An pagpamibi daw para sa iba puwede talagang makatabang na mabago an resulta kan sarong sitwasyon? Iyo, puwede. Huling aram ni Jesus na madali na siyang nigaran ni Pedro, sinabi niya: “Namibi na ako para sa saimo na dai mawara an saimong pagtubod.” (Luc. 22:32) Aram man ni Pablo na dakula an puwedeng magibo nin pagpamibi. Kan siya bakong makatanusan na iprineso sa Roma, nagsurat siya ki Filemon: “Naglalaom ako na paagi sa mga pamibi nindo makakabalik ako sa saindo.” (Filem. 22; hilingon an study note na “dahil umaasa akong sa tulong ng mga panalangin ninyo.”) Asin iyan man nanggad an nangyari. Dai nahaloy, pinaluwas si Pablo asin naipagpadagos giraray an saiyang paghuhulit.

⁵ Siyempre, dai kita dapat magkaigwa kan kaisipan na dapat na pirming gibuhon ni Jehova kun ano an ipinapamibi ta. Tinatawan niya nin atensiyon an mga ipinapamibi kan saiyang mga lingkod, asin kun minsan pinipili niyang humiro kauyon kan saindang pakiulay. An katotoohan na ini makakatabang sa sato na udok na ipamibi ki Jehova an manungod sa sarong sitwasyon dangan may pagtitiwalang ipabaya iyan sa saiyang mga kamot.—Sal. 37:5; hilingon an 2 Corinto 1:11 saka an mga study note.

6. Paano an pagpamibi para sa iba puwedeng magkaigwa nin epekto sa namamatian ta manungod sa sainda? (1 Pedro 3:8)

⁶ An pagpamibi para sa iba nakakatabang sa sato na magkaigwa nin “mapagpadangat na pagmalasakit.” (Basahon an 1 Pedro 3:8.) An tawong mapagmalasakit naririsa an pagsakit kan saiyang kapwa asin mawot niyang maginhawahan ini. (Mar. 1:40, 41) Si Michael na sarong elder nagsabi: “Pag namimibi ako para sa iba manungod sa mga pangangaipo ninda, urog kong nasasabutan an mga inaagihan ninda asin huli kaiyan lalo ko man sindang namumutan. Namamatian kong nagigin mas dayupot ako sa sainda, dawa ngani tibaad dai man ninda aram iyan.” Si Richard na saro man na elder nagsambit nin saro pang pakinabang. Sinabi niya: “Pag ipinapamibi ta an iba, mas napapahiro kitang tabangan siya.” Sinabi niya pa: “Pag nag-aalok kita nin praktikal na tabang sa saro na ipinapamibi ta, garo man sana kita nagtatabang na masimbag an pamibi ta para sa saiya.”

7. Paano an pagpamibi para sa iba makakatabang sa sato na magkaigwa nin balanseng pagmansay sa satong mga problema? (Filipos 2:3, 4) (Hilingon man an mga ritrato.)

⁷ An pagpamibi para sa iba nakakatabang sa sato na magkaigwa nin balanseng pagmansay sa satong mga problema. (Basahon an Filipos 2:3, 4.) An lambang saro sa sato may inaagihan na kadipisilan huling nabubuhay kita sa sarong kinaban na nasa kontrol kan Diyablo. (1 Juan 5:19; Kap. 12:12) Pag hinihinguwa tang magin ugali na ipamibi an iba, naipapagirumdom sa sato na “an arog kaiyan na klase nin mga kasakitan inaagihan man kan bilog na kasararuan kan [satong] mga tugang.” (1 Ped. 5:9) Si Katherine na sarong payunir nagsabi: “An pagpamibi para sa iba nagpapagirumdom sa sako na napapaatubang man sa mga kadipisilan an iba. An katotoohan na iyan nakakatabang sa sako na dai gayong magparapokus sa mga problema ko.”

KAIPUHAN NINDA AN SATONG MGA PAMIBI

8. Magtao nin mga halimbawa kun sairisay an mga puwede tang iiba sa satong mga pamibi.

⁸ Sairisay an puwede tang iiba sa satong mga pamibi? Puwede kitang mamibi para sa partikular na grupo nin mga tawo—halimbawa, an mga may hilang, an mga hoben na pigtutuya asin ginigipit kan mga kaeskuwela ninda, o an mga nagsasakit dahil sa mga epekto nin paggurang. An dakul sa satong mga kapagtubod nakakaeksperyensiya nin pagkontra hali sa saindang mga kapamilya o sa gobyerno. (Mat. 10:18, 36; Gibo 12:5) May mga tugang man kitang kinaipuhan na bayaan an saindang harong huli sa kariribukan sa pulitika. An iba man biktima nin mga kalamidad. Tibaad dai ta man bisto nin personal an mga tugang na ini alagad pag ipinapamibi ta sinda, ipinapahiling tang sinusunod ta an pagbuot ni Jesus na “kamutan nindo an lambang saro.”—Juan 13:34.

9. Taano ta dapat niyatong ipamibi an mga nanginginot sa organisasyon ni Jehova pati man an saindang mga agom?

⁹ Puwede ta man na ipamibi an mga nanginginot sa organisasyon ni Jehova. Kaiba digdi an Namamahalang Grupo asin an saindang mga paratabang, mga Komite kan Sangay, mga paraataman sa mga sangang opisina, mga paraataman nin sirkito, mga elder sa kongregasyon, asin mga ministeryal na lingkod. Dakul sa mga brother na ini an may inaatubang na kanya-kanyang mga kadipisilan mantang nagpapagal sinda alang-alang sa sato. (2 Cor. 12:15) Halimbawa, si Mark na sarong paraataman nin sirkito nagsabi: “An saro sa pinakadakulang kadipisilan na napapaatubang sa sako iyo an pagigin harayo ko sa sakong nagkakaedad nang mga magurang. Pareho sindang maluya na an salud. Dawa ngani itinatao man kan tugang kong babayi saka kan saiyang agom an mga pangangaipo kan mga magurang mi, makulog para sa sako na limitadong marhay an kaya kong gibuhon para sa sainda dahil harayo ako saka dai ko sinda maasikaso nin personal.” Aram man niyato o dai an mga kadipisilan na inaagihan kan mahihigos na brother na ini, marahay nanggad na dai ta paglingawan na iiba sinda sa satong mga pamibi. (1 Tes. 5:12, 13) Puwede ta man na ipamibi an saindang mga agom, huling an saindang maimbod na pagsuporta nakakatabang sa mga brother na ini na padagos na maisagibo an saindang mga asignasyon.

10-11. Nakakaugma daw ki Jehova an pangkagabsan na mga pamibi para sa satong mga tugang? Ipaliwanag.

¹⁰ Arog kan napag-ulayan ta, sa parati namimibi kita para sa mga grupo nin mga tugang. Halimbawa, maski mayo man kitang espesipikong tawong nasa isip, tibaad hagadon ta ki Jehova na tabangan an mga nakapreso o na rangahon an mga nagadanan nin mahal sa buhay. Si Donald na sarong elder nagsabi: “Dakulon kitang tugang na napapaatubang sa mga kadipisilan kaya kun minsan nagtatao kita nin pangkagabsan na mga pamibi tanganing maiiba niyato an gabos na nagsasakit.”

¹¹ Nakakaugma daw ki Jehova an siring na mga pamibi? Siyempre! Tutal, dai ta aram an espesipikong mga pangangaipo kan gabos niyatong kapagtubod. Kaya tama sanang magtao kita nin pangkagabsan na mga pamibi para sa mga grupo nin mga tugang. (Juan 17:20; Efe. 6:18) An mga pamibing ini nagtatao nin ebidensiya na igwa kita “nin pagkamuot sa bilog na kasararuan nin magturugang.”—1 Ped. 2:17.

PAG NAMIMIBI PARA SA MGA INDIBIDWAL

12. Paano an pagigin mapag-obserbar makakatabang sa sato na magin mas espesipiko sa satong mga pamibi?

¹² Magin mapag-obserbar. Apuwera sa pagpamibi para sa mga grupo nin mga tugang, tama man na ipamibi an partikular na mga indibidwal na sinasambit an saindang pangaran. Igwa daw sa saindong kongregasyon nin saro na may malalang hilang? Igwa daw nin mamundong hoben, tibaad dahil sa panggigipit sa eskuwelahan? Igwa daw nin nagsosolong magurang na nasasakitan na padakulaon an saiyang aki “sa disiplina asin sadol ni Jehova”? (Efe. 6:4) Paagi sa pagigin mapag-obserbar, urog kang makakapahiling nin pakikidamay, na makakapakusog man kan pagmawot mong ipamibi sinda.b—Roma 12:15.

13. Paano ta maipapamibi an mga indibidwal na dai ta personal na bisto?

¹³ Ipamibi an iba na sinasambit an saindang pangaran. Puwede tang gibuhon iyan dawa sa mga dai ta pa lamang bisto. Halimbawa, pag-isipan an manungod sa mga tugang niyatong nakapreso sa mga kadagaan arog kan Crimea, Eritrea, Russia, asin Singapore. Mahihiling mo sa jw.org an mga pangaran kan mga tugang na nakapreso.c Si Brian na sarong paraataman nin sirkito nagsabi: “Pag isinusurat ko an pangaran nin sarong nakapresong kapagtubod dangan sinasabi iyan sa makusog na boses, nakakatabang iyan sako na magirumduman an pangaran niya asin maiiba siya sa sakong personal na mga pamibi.”

14-15. Paano ta magigibong magin espesipiko an satong mga pakiulay?

¹⁴ Magsambit nin espesipikong mga pakiulay. Si Michael na sinambit kasubago nagsabi: “Mantang nagbabasa ako nin mga artikulo sa jw.org manungod sa nakapresong mga tugang, hinihinguwa kong imahinaron kun ano an mamamatian ko kun ako an nasa kamugtakan ninda. Aram kong mahahadit ako manungod ki agom, saka gusto ko na masiguradong maaasikaso an mga pangangaipo niya. Paagi kaiyan, nakakaisip ako nin espesipikong pakiulay na puwede kong iiba sa sakuyang mga pamibi para sa satong nakapresong mga brother na may agom.”—Heb. 13:3, nota sa ibaba.

¹⁵ Pag iniisip-isip ta kun kumusta daw an buhay sa aroaldaw kan satong mga tugang sa laog kan presuhan, makakaisip kita nin iba pang mga paagi na magin espesipiko sa satong mga pamibi. Halimbawa, puwede tang ipamibi na lugod na magin mabuot an mga bantay sa presuhan asin na lugod na tugutan kan mga nasa katungdan na buwelong makapagsamba an satong mga tugang. (1 Tim. 2:1, 2) Puwede tang ipamibi na lugod na an lokal na kongregasyon mapakusog kan halimbawa kan saindang maimbod na kakongregasyon na nakapreso o na lugod na mahiling kan mga bakong kapagtubod an marahay na paggawi kan nakapresong tugang asin na magdangog sinda sa satong mensahe. (1 Ped. 2:12) Siyempre, puwede ta man na gibuhon an kaagid kaiyan pag namimibi kita para sa satong mga tugang na napapaatubang sa ibang mga pagbalo. Paagi sa pagigin mapag-obserbar, pagpamibi para sa iba na sinasambit an saindang pangaran, asin pagsambit nin espesipikong mga pakiulay, maipapahiling niyato na ‘nagsusupay an satong pagkamuot sa lambang saro.’—1 Tes. 3:12.

BALANSENG PAGMANSAY MANUNGOD SA SATONG MGA PAMIBI

16. Paano ta mapagdadanay na balanse an satong pagmansay manungod sa satong mga pamibi? (Mateo 6:8)

¹⁶ Arog kan naaraman ta, an satong mga pamibi puwedeng makatabang na mabago an resulta kan sarong sitwasyon. Alagad, kaipuhan tang magkaigwa nin balanseng pagmansay. Pag namimibi kita, dai man kaiyan buot sabihon na dai pa aram ni Jehova an mga sinasabi ta; dai man kita dapat magsuhestiyon sa saiya kun ano an pinakamarahay na gibuhon sa sarong sitwasyon. Aram ni Jehova kun ano an kaipuhan kan saiyang mga lingkod bago pa ngani ninda—o niyato—marealisar na kaipuhan ta palan iyan. (Basahon an Mateo 6:8.) Kun arog kaiyan, taano ta dapat pa kitang mamibi para sa iba? Apuwera sa mga dahilan na sinambit sa artikulong ini, an saro pang dahilan iyo na iyan kaya an ginigibo nin mapagmakulog na mga tawo. An pagkamuot an nagpapahiro sa sato na ipamibi an lambang saro. Asin nauugma si Jehova na mahiling na ipinapabanaag kan saiyang mga lingkod an saiyang pagkamuot.

17-18. Paano puwedeng iilustrar an satong mga pamibi para sa satong mga kapagtubod?

¹⁷ Dawa kun an satong mga pamibi garo baga dai nakakatabang na mabago an resulta kan sarong sitwasyon, ipinapahiling nanggad kaiyan na namumutan ta an satong mga tugang, asin naririsa iyan ni Jehova. Puwede ta iyan na iilustrar nin arog kaini: Imahinara na may sarong pamilya na igwang duwang aki—sarong aking lalaki asin sarong mas nguhod na aking babayi. May hilang an aking lalaki asin nakahigda. Kaya nakimahirak an sadit na aking babayi sa saiyang ama: “Pa, tabangi man po si Kuya. Grabe po an hilang niya!” May ginigibo na man an ama para sa aki niyang lalaki; namumutan niya ini asin inaasikaso niyang marhay. Pero, siguradong ugmahon siya na mahiling an dakulang pagmakulog kan saiyang aking babayi sa kuya niya na huli ngani kaiyan nakimahirak siya sa saiya na parahayon ini.

¹⁸ Iyan an dinadagka sa sato ni Jehova na gibuhon niyato—an pagmakulgan an lambang saro asin ipamibi an lambang saro. Mantang ginigibo ta iyan, maipapahiling niyato paagi kan satong mga pamibi na bako kitang makasadiri, imbes, igwa kita nin tunay na pagmakulog sa satong mga tugang asin naririsa iyan ni Jehova. (2 Tes. 1:3; Heb. 6:10) Saka, arog kan napag-ulayan ta, may mga pagkakataon na an satong mga pamibi puwede pa nganing makatabang na mabago an resulta kan sarong sitwasyon. Kaya lugod na gibuhon ta an satong pinakamakakaya na girumdumon na mamibi para sa lambang saro.