Kun Paano Mapapauswag an Saimong mga Pamibi

1-2. (a) Ano an puwedeng makaulang sa sato na sabihon ki Jehova an nasa puso niyato? (b) Paano ta naaraman na mamumuton na dinadangog ni Jehova an satong mga pamibi?

KUN minsan daw pagmati mo an saimong mga pamibi pauruutro, hababaw, o rutina na sana? Kun iyo, dai ka nagsosolo. Huli sa kasibutan ta sa aroaldaw, tibaad magin tendensiya tang maghidali sa satong mga pamibi. O tibaad masakitan pa ngani kitang sabihon ki Jehova an nasa puso niyato huling pagmati ta bako kitang angay na magdulok sa saiya.

² Inaasigurar sa sato kan Bibliya na an mahalaga ki Jehova, bako kun gurano kagayon kan pagkapahayag ta kan satong mga pamibi, kundi kun baga namimibi kita nin may mapakumbabang puso. Dinadangog niya “an pakiulay kan mga mahuyo.” (Sal. 10:17) Mamumuton niyang dinadangog an lambang tataramon niyato huling talagang interesado siya sa sato.—Sal. 139:1-3.

3. Anong mga hapot an pag-uulayan ta sa artikulong ini?

³ Tibaad maihapot niyato: Taano ta makakapamibi kita ki Jehova nin daing pag-alangan? Paano ta magigibong magin mas makahulugan an satong mga pamibi? Paano an paghurop-hurop sa udok sa pusong mga pamibi na nasa Bibliya makakatabang sa sato na mapauswag an satong mga pamibi? Asin ano an puwede tang gibuhon kun dai ta maipahayag sa tataramon an satong mga namamatian dahil sa grabeng pagkapurisaw? Pag-ulayan ta an simbag sa mga hapot na ini.

MAMIBI KI JEHOVA NIN DAING PAG-ALANGAN

4. Ano an makakatabang sa sato na mamibi ki Jehova nin daing pag-alangan? (Salmo 119:145)

⁴ Kun mamansayon ta si Jehova bilang sarong maimbod na amigo na an gusto iyo an pinakaikakarahay niyato, magigibo tang mamibi sa saiya nin daing pag-alangan. Hininguwa kan kagsurat kan Salmo 119 na magkaigwa nin arog kaiyan na mamumuton na relasyon ki Jehova. Napaatubang man siya sa mga problema. Ginibuhan siya nin maraot kan mapandayang mga tawo. (Sal. 119:23, 69, 78) Kinaipuhan niya man na atubangon an saiyang mga kaluyahan. (Sal. 119:5) Dawa arog kaiyan, dai siya nag-alangan na ipahayag ki Jehova an nasa puso niya.—Basahon an Salmo 119:145.

5. Taano ta dai niyato dapat pagtugutan an negatibong paghiling sa sadiri na mapugulan kitang mamibi? Iilustrar.

⁵ Dinadagka ni Jehova na mamibi sa saiya dawa an mga nakagibo nin magabat na kasalan. (Isa. 55:6, 7) Kaya dai ta dapat pagtugutan an negatibong pagmansay sa sadiri na mapugulan kitang mamibi. Para iilustrar, aram kan sarong piloto na puwede siyang makikomunikar sa mga air traffic controller kun kaipuhan niya nin tabang. Mag-aalangan daw siyang magkontak sa sainda huling nasusupog siya ta dai niya na aram kun sain na an lokasyon niya o dahil napasala siya? Siyempre dai! Sa kaagid na paagi, dawa kun may mga pagkakataon na dai ta na aram an satong gigibuhon o kun nakagibo kita nin kasalan, puwede kitang mamibi ki Jehova nin daing pag-alangan.—Sal. 119:25, 176.

KUN PAANO MAGIGIN MAS MAKAHULUGAN AN SAIMONG MGA PAMIBI

6-7. Paano an paghurop-hurop sa mga kuwalidad ni Jehova makakatabang sa sato na magin mas makahulugan an satong mga pamibi? Magtao nin halimbawa. (Hilingon man an footnote.)

⁶ Pag sinasabi ta ki Jehova an satong kauruiraruming mga iniisip asin namamatian, nagigin mas makahulugan an satong mga pamibi. Kaya, ano an puwede tang gibuhon tanganing magin arog kaiyan an mga pamibi ta?

⁷ Hurop-hurupon an mga kuwalidad ni Jehova.a Mantang mas hinuhurop-hurop ta an mga kuwalidad ni Jehova, nagigin mas pasil man sa sato na ipahayag an satong mga iniisip. (Sal. 145:8, 9, 18) Pag-isipan an halimbawa ni Kristine, sarong sister na nagdakula sa pamilyang bayolente an ama. Sinabi niya: “Nadidipisilan ako kaidtong mansayon si Jehova bilang sarong Ama pag namimibi sa saiya. Naisip ko na babayaan niya ako dahil sa mga kaluyahan ko.” Anong kuwalidad ni Jehova an nakatabang sa saiya? Sinabi niya: “Nakakaasigurar sa sako an maimbod na pagkamuot ni Jehova. Aram kong dai niya bubutasan an kamot ko. Matumba man ako, mamumuton niya akong bubuhaton. Nakatabang ini sa sako na ipahayag sa saiya an mga bagay na nakakapaugma sa sako pati man an mga bagay na nakakapamundo sa sako.”

8-9. Ano an nagkapirang pakinabang kun iisip-isipon ta kun ano an mga sasabihon ta bago mamibi? Iilustrar.

⁸ Isip-isipon kun ano an sasabihon. Bago mamibi, tibaad kaipuhan mong haputon an saimong sadiri nin arog kaini: ‘Anong espesipikong mga problema an inaatubang ko ngunyan? Igwa daw nin siisay man na kaipuhan kong patawadon? Napapaatubang daw ako sa sarong bagong kadipisilan na kakaipuhanon ko an tabang ni Jehova tanganing makayanan?’ (2 Ha. 19:15-19) Puwede ta man na arugon an halimbawang itinao ni Jesus paagi sa pag-isip-isip sa kun ano an puwede tang sabihon ki Jehova sa pamibi may koneksiyon sa Saiyang pangaran, sa Saiyang Kahadian, asin sa Saiyang kabutan.—Mat. 6:9, 10.

⁹ Kan maaraman kan sister na si Aliska na may taning na an saiyang agom dahil sa kanser sa hutok, nasakitan siyang mamibi ki Jehova. Nagigirumduman niya: “Dahil sa grabeng pagkapurisaw, nadipisilan akong mag-isip nin malinaw kaya dai ako makapamibi.” Ano an nakatabang sa saiya? Sinabi niya: “Bago mamibi, iniisip-isip ko nguna kun ano an mga sasabihon ko, asin nakatabang iyan sako na masiguradong bako lang sa sadiri ko nakapokus an mga pamibi ko. Dahil sa pamamaaging ini, nagigin mas kalmado ako saka nagigin mas nasa kondisyon an kaisipan asin emosyon ko pag namimibi.”

10. Taano ta dapat niyatong hinguwahon na dai maghidali pag namimibi? (Hilingon man an mga ritrato.)

¹⁰ Dai maghidali pag namimibi. An halipot na mga pamibi puwede man na magin makahulugan, pero mas posibleng maipahayag ta an satong kauruiraruming mga iniisip kun dai kita mahidali pag namimibi.b Si Elijah na agom ni Aliska nagsabi: “Hinihinguwa kong mamibi nin dakul na beses sa bilog na aldaw, asin nagin mas dayupot ako ki Jehova paagi sa dai paghidali pag namimibi. Si Jehova dai mawawaran nin pasensiya sa paghalat sako na matapos an sakong pamibi, kaya puwede akong mamibi nin huruhalawig.” Purbaran ini: Magpili nin oras asin nin lugar na diyan puwede kang mamibi—tibaad sa makusog na boses pa ngani—na mayo nin mga makakadisturbo sa saimo, asin ugalion na dai maghidali pag namimibi.

HUROP-HURUPON AN UDOK SA PUSONG MGA PAMIBI NA NAKASURAT SA BIBLIYA

11. Ano an pakinabang kun huhurop-hurupon ta an udok sa pusong mga pamibi na nakasurat sa Bibliya? (Hilingon man an kahon na “Nahihiling Mo Daw an Sadiri Mo sa Sainda?”)

¹¹ Tibaad mahiling mong kapaki-pakinabang na hurop-hurupon an udok sa pusong mga pamibi asin mga kanta nin pag-umaw ki Jehova, o mga salmo, na nakasurat sa Bibliya. Mantang iniisip-isip mo kun paano ipinahayag kan mga lingkod nin Diyos an saindang kauruiraruming mga sabuot, mapapahiro kang sabihon ki Jehova an nasa puso mo. Tibaad makahanap ka man nin bagong mga kapahayagan nin pag-umaw na puwede mong iiba sa saimong mga pamibi. Asin posibleng marhay na makakahanap ka nin mga pamibing aplikado sa saimong sitwasyon.

12. Ano an mga puwede tang ihapot sa satong sadiri mantang hinuhurop-hurop ta an laog kan sarong pamibi?

¹² Mantang hinuhurop-hurop mo an laog kan sarong pamibi na nasa Kasuratan, haputon an sadiri: ‘Siisay an nagsambit kan pamibing iyan asin nasa anong kamugtakan siya kaidto? Aplikado daw sa sakong sitwasyon an mga kaisipan na ipinapahayag sa pamibing ini? Ano an mga manunudan ko diyan?’ Tibaad kaipuhan mong mag-research pa tanganing masimbag an mga hapot na ini, pero sulit nanggad iyan. Pag-isipan an pirang halimbawa.

13. Anong leksiyon manungod sa pamibi an manunudan ta ki Hana? (1 Samuel 1:10, 11) (Hilingon man an ritrato.)

¹³ Basahon an 1 Samuel 1:10, 11. Kan sambiton ni Hana an pamibing ini, napapaatubang siya sa duwang magabat na problema. Baog siya, saka an saro pang agom kan agom niyang si Elkana ginigibong miserable an buhay niya. (1 Sam. 1:4-7) Kun napapaatubang ka sa sarong problema na padagos na nagpapadipisil sa saimong buhay, ano an manunudan mo sa pamibi ni Hana? Naginhawahan si Hana paagi sa pagpamibi nin halawig saka paagi sa pagpasa sa Diyos kan pagabat na nasa puso niya. (1 Sam. 1:12, 18) Arog ni Hana, puwede man kitang maginhawahan pag ‘ipinapasa ta ki Jehova an satong pasan’ paagi sa pagsabi sa saiya kan namamatian ta manungod sa partikular na mga problema niyato.—Sal. 55:22.

14. (a) Ano pa an manunudan ta sa halimbawa ni Hana? (b) Paano nakakatabang sa sato an paghurop-hurop sa Kasuratan tanganing maaraman kun ano pa an puwede tang sabihon sa satong mga pamibi? (Hilingon an footnote.)

¹⁴ Pirang taon pagkamundag kan aki niyang si Samuel, iprinesentar siya ni Hana sa Halangkaw na Saserdoteng si Eli. (1 Sam. 1:24-28) Paagi sa sarong udok sa pusong pamibi, ipinahayag ni Hana an saiyang kumbiksiyon na pinoprotektaran asin inaataman ni Jehova an Saiyang maimbod na mga lingkod.c (1 Sam. 2:1, 8, 9) Tibaad dai man nawara an mga problema niya sa pamilya, pero nagpokus si Hana sa kun paano siya binendisyunan ni Jehova. Ano an manunudan ta digdi? Kun may problema kitang padagos na tinatagalan, mas makakayanan ta iyan kun mapokus kita sa kun paano kita tinabangan ni Jehova puon kaidto sagkod ngunyan.

15. Pag nakakaeksperyensiya kita nin inhustisya, ano an manunudan ta sa pamibi ni propeta Jeremias? (Jeremias 12:1)

¹⁵ Basahon an Jeremias 12:1. May panahon kaidto na napurisaw si propeta Jeremias huling nahihiling niyang nagigin mapanggana sa buhay an mga maraot. Naapektaran man siya huli kan bakong marahay na pagtratar sa saiya kan mga kapwa niya Israelita. (Jer. 20:7, 8) Tibaad arog man kan sa saiya an namamatian ta pag nahihiling tang nagigin mapanggana sa buhay an bakong onestong mga tawo o pag tinutuya kita. Dawa ngani nagpahayag nin pagkadisganar si Jeremias, dai niya kinuwestiyon an hustisya nin Diyos. Kan mahiling niya kun paano dinisiplina ni Jehova an Saiyang rebelyosong banwaan, siguradong nagkusog an pagtitiwala niya sa hustisya nin Diyos. (Jer. 32:19) Arog ni Jeremias, puwede ta man na sabihon sa pamibi an gabos na namamatian niyatong pagkadisganar, na nagtitiwalang itatanos ni Jehova sa itinalaan niyang panahon an ano man na inhustisyang napapaatubang sa sato ngunyan.

16. Kun nalilimitaran kita kan satong kamugtakan, ano an manunudan ta sa idinistiyerong Levita? (Salmo 42:1-4) (Hilingon man an mga ritrato.)

¹⁶ Basahon an Salmo 42:1-4. An kantang ini isinurat nin sarong Levita na idinistiyero kaya dai niya nakakaibanan an saiyang mga kapagtubod. Ipinapahiling kan saiyang salmo kun ano an namamatian niya. Tibaad arog man kan sa saiya an namamatian ta kun dai na kita makahali sa harong dahil sa hilang o kun nakapreso kita dahil sa satong pagtubod. Tibaad magin paburubago an satong emosyon, pero marahay kun ipapahayag ta iyan sa satong pamibi. Puwede ining makatabang sa sato na masiyasat an satong kaisipan asin magin balanse an pagmansay ta sa mga bagay-bagay. Halimbawa, narealisar kan Levita na magkakaigwa siya nin bagong mga oportunidad na umawon si Jehova. (Sal. 42:5) Hinurop-hurop niya man kun paano siya inaataman ni Jehova. (Sal. 42:8) An udok na pagpamibi sa Diyos makakatabang sa sato na masiyasat an satong mga namamatian, magin balanse giraray an satong pagmansay, asin magkaigwa kan kusog na makatagal.

17. (a) Ano an manunudan ta sa pamibi ni propeta Jonas? (Jonas 2:1, 2) (b) Paano puwedeng makatabang sa sato an nagkapirang ekspresyon na nasa Mga Salmo pag napapaatubang kita sa mga kadipisilan? (Hilingon an footnote.)

¹⁷ Basahon an Jonas 2:1, 2. Sinambit ni propeta Jonas an pamibing ini kan nasa laog siya kan tulak nin sarong dakulang sira. Dawa ngani sinuway niya si Jehova, tiwala si Jonas na dadangugon nin Diyos an saiyang pamibi. Naggamit siya diyan nin dakul na ekspresyon na mahihiling sa Mga Salmo.d Kaya posibleng marhay na pamilyar siya sa mga iyan. Paagi sa paghurop-hurop sa mga iyan, naasigurar siyang tatabangan siya ni Jehova. Kaagid kaiyan, kun hihinguwahon tang magtuom nin nagkapirang teksto, puwede ta iyan na magirumduman asin makatao sa sato nin karangahan pag namimibi kita ki Jehova sa dipisil na mga sitwasyon.

PADAGOS NA RUMANI KI JEHOVA SA PAMIBI

18-19. Kun nasasakitan kita kun minsan na ipahayag sa mga tataramon an satong mga namamatian pag namimibi, anong asigurasyon an mahihiling ta sa Roma 8:26, 27? Magtao nin halimbawa.

¹⁸ Basahon an Roma 8:26, 27. Kun minsan, tibaad huli sa grabeng pagkapurisaw, dai na niyato maipahayag sa mga tataramon an mga namamatian ta. Pero may makakatabang sa sato. Sa siring na mga pagkakataon, “nakikiulay” para sa sato an banal na espiritu nin Diyos. Paano? Pinagin posible ni Jehova paagi sa saiyang espiritu na maingatan sa saiyang Tataramon an dakul na pamibi. Pag dai ta malinaw na maipahayag an satong mga iniisip, puwedeng akuon ni Jehova an partikular na mga ekspresyon sa mga pamibing iyan bilang mga pakiulay na garo man sana hali sa sato, asin puwede niyang simbagon an mga iyan.

¹⁹ Nakatabang iyan sa sister sa Russia na an pangaran Yelena. Inaresto siya dahil sa pagpamibi asin dahil sa pagbasa nin Bibliya. Nakaeksperyensiya si Yelena nin grabeng stress na huli kaiyan nasakitan siyang mamibi. Inistorya niya: “Dangan nagirumduman ko na pag namamatian kong dai ko na kaya asin pag dai ko na aram an sasabihon sa pamibi, aakuon ni Jehova bilang mga pakiulay ko an ipinasabong na mga pamibi kan mga lingkod nin Diyos kaidto . . . Nakarangang marhay iyan sako kan nasa masakiton talaga akong sitwasyon.”

20. Pag nasa nakaka-stress na sitwasyon kita, paano ta maiaandam an satong isip para mamibi?

²⁰ Pag nasa nakaka-stress na sitwasyon kita, puwedeng madipisilan kitang magpokus mantang namimibi. Tanganing maiandam an satong isip, puwede kitang magdangog sa mga audio recording kan Mga Salmo. Puwede ta man na isurat an gabos tang namamatian, arog kan ginibo ni Hading David. (Sal. 18, 34, 142; mga superskripsiyon.) Siyempre, mayo man nin istriktong mga susundon sa kun paano ta dapat andamon an satong sadiri para sa pagpamibi. (Sal. 141:2) Puwede mong gibuhon an sa hiling mong pinakamarahay para sa saimo.

21. Taano ta puwede kitang mamibi nin bilog na puso ki Jehova?

²¹ Nakakarangang marhay na maaraman na nasasabutan ni Jehova an satong mga namamatian dawa bago pa kita magsabi nin ano man. (Sal. 139:4) Alagad, nauugma siyang marhay na madangog an satong mga kapahayagan nin pagtitiwala sa saiya. Kaya dai mag-alangan na mamibi sa saimong Ama sa langit. Maggamit nin mga ekspresyon hali sa mga pamibi na nakasurat sa saiyang Tataramon. Mamibi nin bilog na puso ki Jehova. Iistorya sa saiya an mga bagay na nakakapaugma sa saimo saka an mga bagay na nakakapamundo sa saimo. Bilang saimong tunay na Amigo, pirmi nanggad na yaon para sa saimo si Jehova!