Duwang Bagong Miyembro kan Namamahalang Grupo

KAN Oktubre 5, 2024, sarong espesyal na paisi an itinao sa taunan na miting: Si Brother Jody Jedele asin Brother Jacob Rumph ninombrahan bilang bagong mga miyembro kan Namamahalang Grupo kan Mga Saksi ni Jehova. Pareho sindang maimbod na naglingkod ki Jehova sa laog nin dakul na taon.

Namundag si Brother Jedele sa Missouri, U.S.A. asin nagdakula siya sa katotoohan. Nakaistar an pamilya niya harani sa teritoryong bihirang mahulitan. Kaya, dakul siyang nabistong tugang hali sa manlain-lain na lugar na nagduman sa lugar ninda para tumabang sa paghuhulit kan maugmang bareta. Nagkaigwa nin dakulang epekto sa saiya an saindang pagkamuot saka pagkasararo. Nabawtismuhan siya kaidtong Oktubre 15, 1983 kan siya solterito pa sana. Gustong-gusto niya an ministeryo, kaya pagkatapos nin hayskul, nagpuon siyang magregular payunir kan Setyembre 1989.

Kan aki pa si Brother Jedele, siya saka an tugang niyang babayi iiniiba kan saindang mga magurang tanganing magbisita sa Bethel. Nakadagka sa duwang aki an mga pagbisitang ini na magin pasuhan ninda an paglilingkod sa Bethel—sarong pasuhan na naabot nindang duwa. Nag-abot si Brother Jedele sa Bethel sa Wallkill kan Setyembre 1990. Nagtrabaho siya inot sa Cleaning Department dangan kan huri sa Medical Services.

Kan mga panahon na iyan, nag-uuswag an kaharaning mga kongregasyon na Spanish an lengguwahe asin kaipuhan diyan nin mga brother. Kaya nag-asosyar si Brother Jedele sa saro diyan asin nagpuon na mag-adal nin Spanish. Dai nahaloy pagkatapos kaiyan, nabisto niya si Damaris, sarong payunir na sister na kasirkito niya. Pag-abot nin panahon, nagpakasal sinda, asin naglingkod na man si Damaris sa Bethel kaiba niya.

Kan 2005, naghali sinda sa Bethel tanganing atamanon an saindang maimbod na mga magurang. Durante kan panahon na iyan, naglingkod sinda bilang mga regular payunir. Nagtabang si Brother Jedele sa pagtukdo sa Paadalan sa Paglilingkod Bilang Payunir, asin naglingkod siya sa Hospital Liaison Committee asin sa Regional Building Committee sa lugar ninda.

Kan 2013, inimbitaran si Brother asin Sister Jedele na maglingkod giraray sa Bethel para sa proyekto nin pagtugdok sa Warwick. Asin puon kaidto, naglingkod man sinda sa Patterson asin Wallkill. Nagtrabaho si Brother Jedele sa Local Design/Construction Department asin sa Hospital Information Services. Kan Marso 2023, ninombrahan siya bilang paratabang sa Service Committee. Mantang iniisip-isip niya an mga nagin asignasyon niya, sinabi niya: “Pag tinatawan ka nin bagong mga asignasyon, kun minsan tibaad mamatian mong dai mo iyan kaya. Pero diyan mo kaipuhan na girumdumon na magsarig ki Jehova huling siya an nagpapangyaring maisagibo mo an ano man na ipinapagibo niya sa saimo.”

Namundag si Brother Rumph sa California, U.S.A. Kan aki pa siya, inaktibo an saiyang ina pero hininguwa kaining tukduan siya kan mga katotoohan sa Bibliya. Kada taon, nagduduman man siya sa lola niya, na sarong maimbod na Saksi. Dahil sa lola niya, nagkainteres siya sa katotoohan, asin sa edad na 13, nagpa-Bible study siya. Nabawtismuhan siya kaidtong Setyembre 27, 1992, kan siya tin-edyer. Nakakaugma huling nagin aktibo na giraray an saiyang ina, asin nagpuon na umuswag sa espirituwal an saiyang ama saka mga tugang dangan nabawtismuhan.

Kan hoben pa si Brother Rumph, nahiling niya kun gurano kaugma an mga payunir. Kaya pagkatapos niya nin hayskul, nagpuon siyang magpayunir kan Setyembre 1995. Kan taon 2000, naglipat siya sa Ecuador para maglingkod bilang need-greater. Diyan niya nabisto si Inga, sarong payunir na sister haling Canada, asin pag-abot nin panahon nagpakasal sinda. Pagkakasal sa sainda, naglingkod sinda sa sarong banwaan sa Ecuador na igwa nin sadit na grupo nin mga parahayag. Sa ngunyan, igwa na diyan nin sarong mauswag na kongregasyon.

Pag-abot nin panahon, inasignaran si Brother asin Sister Rumph na maglingkod bilang mga espesyal payunir asin kan huri sa pansirkitong gibuhon. Kan taon 2011, inimbitaran sindang mag-atender sa ika-132 na klase nin Gilead. Pagkagradwar diyan, naglingkod sinda sa manlain-lain na lugar sa bilog na kinaban asin nagkaigwa nin manlain-lain na asignasyon, arog kan paglilingkod sa Bethel, pagmimisyonero, asin pansirkitong gibuhon. Nagkapribilehiyo man si Brother Rumph na magtukdo sa School for Kingdom Evangelizers.

Dahil sa pandemyang COVID-19, nagbalik si Brother asin Sister Rumph sa Estados Unidos. Inimbitaran sindang maglingkod sa Bethel sa Wallkill, na diyan tinawan si Brother Rumph nin pagsasanay sa Service Department. Pag-abot nin panahon, iinasignar giraray sinda sa sangay nin Ecuador, kun sain naglingkod si Brother Rumph bilang miyembro kan Komite kan Sangay. Kan 2023, naglipat sinda sa Warwick. Kan Enero 2024, ninombrahan si Brother Rumph na maglingkod bilang paratabang sa Service Committee. Mantang iniisip-isip an mga nagin asignasyon niya, sinabi niya: “Nagigin espesyal an sarong asignasyon bako nanggad huli sa lugar kun sain ka naglilingkod kundi huli sa mga tawong nakakaiba mong maglingkod.”

Inaapresyar ta nanggad an pagmamaigot kan mga brother na ini, asin “padagos [niyatong] pahalagahan an mga tugang na arog [ninda].”—Fil. 2:29.