Pinunan na Sakupon kan Russia an Ukraine

Amay na aga kan Pebrero 24, 2022, pinunan na salakayon kan militar kan Russia an Ukraine, sa ibong kan paghihinguwa kan mga lider sa kinaban na likayan an giyera. Paano posibleng makaapektar sa kinaban an ralaban na ini? Pirang aldaw pa sana an nakaagi, an secretary-general kan United Nations na si Antonio Guterres nagsabi: “Masakit isip-isipon kun gurano kadakula an dadarahon kaining pagsakit sa mga tawo asin danyos saka pagkaraot sa katiwasayan sa Europa saka sa bilog na kinaban.”

Ano an kahulugan kan arog kaining mga pangyayari uyon sa Bibliya?

• Ihinula ni Jesu-Cristo an panahon na diyan “an nasyon makikilaban sa nasyon asin an kahadian makikilaban sa kahadian.” (Mateo 24:7) Basahon an artikulong “Ano an Tanda kan ‘Huring mga Aldaw,’ o kan ‘Panahon kan Katapusan’?” para maaraman kun paano ipinapahiling kan Bibliya na an mga giyera ngunyan kautuban kan propesiya ni Jesus.

• Ilinaladawan sa libro kan Bibliya na Kapahayagan an giyera bilang sarong parakabayo na nakasakay sa “sarong kabayo na kulor kalayo” asin naghahali kan “katuninungan sa daga.” (Kapahayagan 6:4) Basahon an artikulong “An Apat na Parakabayo—Siisay Sinda?” para maaraman kun paanong an mga giyera ngunyan kautuban kan propesiyang ini.

• Ihinula kan libro nin Daniel an pagdinaugan kan “hadi kan norte” asin kan “hadi kan timog.” (Daniel 11:25-45) Hilingon an video na Nautob na Propesiya—Daniel Kapitulo 11 para maaraman kun taano ta masasabing an Russia saka an mga kaalyado kaiyan iyo an hadi kan norte.a

• Binabanggit man kan Kapahayagan an “giyera kan dakulang aldaw kan Diyos na Makakamhan sa Gabos.” (Kapahayagan 16:14, 16) Pero, bako ining giyera kan mga nasyon na arog kan nahihiling ta ngunyan. Basahon an artikulong “Ano an Ralaban nin Armagedon?” para maaraman an dagdag pang impormasyon sa maabot na pangyayaring iyan.

Taano ta makakalaom ka nin sarong magayon na puturo?

• Sinasabi kan Bibliya na ‘papapunduhon kan Diyos an mga giyera sa bilog na daga.’ (Salmo 46:9) Basahon an artikulong “Makakaasa Ka sa Isang Magandang Kinabukasan” para mas maaraman pa an manungod sa puturo na ipinapangako nin Diyos.

• Tinukduan ni Jesus an mga parasunod niya na ipamibi na dumatong lugod an Kahadian nin Diyos. (Mateo 6:9, 10) An Kahadian na iyan iyo an gobyerno sa langit na magpapangyaring mautob an kabutan nin Diyos para sa daga, asin kaiba sa kabutan nin Diyos an pagkaigwa nin katuninungan sa bilog na kinaban. Para maaraman kun ano an mga pakinabang na maitatao saimo kan Kahadian, hilingon an video na Ano an Kahadian nin Diyos?

May labing 129,000 na Saksi ni Jehova sa Ukraine. Arog kan mga Saksi sa gabos na iba pang nasyon, inaarog ninda si Jesus paagi sa pagdanay na neutral sa pulitika asin pagsayumang magpartisipar sa giyera. (Juan 18:36) Sa bilog na kinaban, padagos na ibinabalangibog kan mga Saksi ni Jehova na an ‘maugmang bareta kan Kahadian’ iyo an solusyon sa mga problema kan katawuhan, kaiba na an giyera. (Mateo 24:14) Dinadagka mi ika na kontakon kami para mas maaraman pa an manungod sa mensahe nin paglaom kan Bibliya.