Pagkaraot kan Daga—Ano an Sinasabi kan Bibliya?

“Marikas kitang nagrarani sa grabeng kapahamakan na dara nin klima. Mga darakulang siyudad na magigin lubog sa tubig. Grabeng mga heat wave. Makatatakot na mga bagyo. Lakop na kakulangan nin tubig. Pagkaubos kan minilyon na klase nin mga tinanom saka mga hayop. Bako ining uruistorya sana o bakong makatotoohan na salaysay. Ini an sinasabi sa sato kan siyensiya na magigin resulta kan mga palisiya niyato ngunyan sa paggamit nin enerhiya.”—An pahayag ni Antonio Guterres, secretary-general kan United Nations, manungod sa report kan Intergovernmental Panel on Climate Change na ipinaluwas kan Abril 4, 2022.

“Nagpapatanid an mga siyentista na sa maabot na mga taon an kapahamakan na dara kan climate change maaapektaran an haros gabos na 423 na mga national park [sa Estados Unidos], lalo na ta an mga parkeng ini madalion sanang maaapektaran kan paglangkaw nin temperatura. An kapahamakan na puwedeng mangyari garo man sana idtong mga kapahamakan na mababasa sa Bibliya: kasulo asin pagbaha, pagkatunaw kan mga yelo, paglangkaw kan tubig sa dagat asin mga heat wave.”—“Flooding Chaos in Yellowstone, a Sign of Crises to Come,” The New York Times, Hunyo 15, 2022.

Kaya daw masolusyunan an mga problema sa kapalibutan? Kun iyo, siisay an mataong solusyon sa mga iyan? Hilinga kun ano an sinasabi kan Bibliya.

Nakahula an pagkaraot kan kapalibutan

Sinasabi kan Bibliya na “laglagon [nin Diyos] idtong mga nagraraot kan daga.” (Kapahayagan 11:18) May manunudan kitang tulong bagay sa bersikulong ini kan Bibliya:

1. 1. An mga ginigibo kan mga tawo makakaraot na marhay sa daga.

2. 2. Matatapos an pagraot sa daga.

3. 3. An Diyos, bako an mga tawo, an masolusyon sa mga problema sa kapalibutan kan satong planeta.

May magayon na puturo an satong planeta

Sinasabi kan Bibliya na “an daga nagdadanay sagkod lamang.” (Eclesiastes 1:4) Pirming igwang maistar digdi.

•  “Magigin pagsadiri kan mga matanos an daga, asin maistar sinda diyan nin daing sagkod.”—Salmo 37:29.

Lubos na ibabalik an magayon na kamugtakan kan satong planeta.

• “An kaawagan asin an alang na daga maggagaya-gayang marhay,asin an disyertong kapatagan magigin maugma asin mamumurak arog kan azafran.”—Isaias 35:1.