Halangkaw na Opisyal sa Salud Nagpatanid sa Epekto kan Social Media sa mga Hoben—Ano an Sinasabi kan Bibliya?

Kan Mayo 23, 2023, nagpatanid sa publiko an sarong halangkaw na opisyal sa salud sa Estados Unidos manungod sa negatibong epekto kan social media sa dakul na hoben.

• “Dawa ngani puwedeng igwa nin mga pakinabang an social media para sa nagkapirang aki saka tin-edyer, napatunayan na an social media igwa man nanggad nin marauton na epekto sa mental, emosyonal, asin pisikal na salud kan mga aki asin tin-edyer.”—Social Media and Youth Mental Health: The U.S. Surgeon General’s Advisory, 2023.

Binanggit sa report an mga pagsiyasat na nagpapatunay kun taano ta dapat kitang mahadit diyan.

• An mga tin-edyer na edad 12 sagkod 15 “na naggagamit nin labing 3 oras kada aldaw sa social media doble an peligro sa pagkaigwa nin maluyang mental na salud kaiba na an mga sintomas nin depresyon saka sobrang pagkahadit.”

• Sa mga hoben na edad 14, “an sobrang paggamit nin social media nagresulta sa kakulangan nin turog, pangha-harass sa online, bakong marahay na itsura, hababang paghiling sa sadiri, asin depresyon na sa parati mas naeeksperyensiyahan nin mga babayi kisa mga lalaki.”

Paano mapoprotektaran kan mga magurang an saindang mga aki sa mga peligrong ini? Nagtatao an Bibliya nin praktikal na sadol.

Kun ano an magigibo kan mga magurang

Gumibo nin desisyon. Bilang mga magurang, pag-isipan an mga peligro asin magdesisyon kun tutugutan nindong gumamit nin social media an saindong aki o dai.

• Prinsipyo sa Bibliya: “Patuudon mo an aki sa dalan na dapat niyang lakawan.”—Talinhaga 22:6.

• Para sa dagdag na impormasyon, basahon an artikulong “Dapat Bang Gumamit ang Anak Ko ng Social Media?”

Kun tutugutan nindong gumamit nin social media an saindong aki, magin alerto sa posibleng mga peligro asin subaybayan an mga ginigibo kan saindong aki sa online. Paano?

Protektaran an saindong aki sa maraot na mahihiling sa online. Sanayon an saindong aki kun paano maaaraman asin malilikayan an maraot na mga mahihiling sa online.

• Prinsipyo sa Bibliya: “An seksuwal na imoralidad asin an lambang klase nin karigsukan o kahanaban dai man lamang dapat masambitan diyan sa saindo, . . . ni an makasusupog na paggawi o sa-buang urulay o bastos na karalwagan.”—Efeso 5:3, 4.

• Para sa praktikal na mga suhestiyon, basahon an artikulong “Ituro ang Tamang Paggamit ng Social Media sa Anak Mong Teenager.”

Magbugtak nin mga limitasyon. Halimbawa, magtao nin mga susundon kun nuarin o kun gurano kahaloy puwedeng maggamit nin social media an saindong aki.

• Prinsipyo sa Bibliya: “Padagos nindong bantayan nin istrikto an saindong paglakaw . . . siring sa mga tawong madunong, na ginagamit sa pinakamarahay an saindong panahon.”—Efeso 5:15, 16.

• Gamiton an whiteboard animation na Magin Madunong sa Paggamit nin Social Network para tabangan an saindong aki na masabutan kun taano ta kaipuhan an mga limitasyon.