Sa Israel Daw Mapuon an Armagedon?—Ano an Sinasabi kan Bibliya?

Sinasabi kan Bibliya na an Armagedon bakong giyera na sarong espesipikong lugar sana sa kinaban an apektado kundi giyera iyan na mangyayari sa bilog na kinaban sa pag-ultanan kan gabos na gobyerno nin tawo saka kan Diyos.

•  “Mga kapahayagan iyan na ipinasabong nin mga demonyo . . . asin dinudumanan kan mga iyan an mga hadi sa bilog na daga, tanganing tiripunon sinda sa giyera kan dakulang aldaw kan Diyos na Makakamhan sa Gabos. . . . Tiniripon sinda kan mga iyan sa lugar na sa Hebreo inaapod na Armagedon.”—Kapahayagan 16:14, 16.

An tataramon na “Armagedon” hali sa Hebreong tataramon na Har Meghid·dohnʹ, na nangangahulugan na “Bukid nin Megido.” An Megido sarong siyudad sa teritoryo kan suanoy na Israel. Dahil diyan, may mga nagtutubod na an Armagedon mangyayari sa Israel. Alagad, dai kayang magkaigo sa rehiyon nin Megido o sa arin man na lugar sa Middle East “an mga hadi sa bilog na daga” pati an saindang mga hukbo.

An libro nin Kapahayagan isinurat “paagi sa mga tanda,” o simbolikong pananaram. (Kapahayagan 1:1) An Armagedon nanunungod, bako sa sarong literal na lugar, kundi sa sarong pangyayari sa bilog na kinaban na an mga nasyon matiripon sa huring pagkakataon para kalabanon an pamamahala kan Diyos.—Kapahayagan 19:11-16, 19-21.