Taano ta Grabe an Pagkaungis na Nangyayari Ngunyan?—Ano an Sinasabi kan Bibliya?

An mga bareta ngunyan pano nin mga report manungod sa mga tawo na grabeng makataram sa kapwa ninda o nakagibo nin krimen huli sa pagkaungis, mga tawong ginigibuhan nin maraot kan iba dahil iba an lahi ninda, asin manungod sa giyera.

• “Huli sa nangyayaring giyera sa Israel asin Gaza saka sa mga ginigibo kan mga ekstremista, mas naggrabe sa mga social media an maraot na mga pananaram huli sa pagkaungis.”—The New York Times, Nobyembre 15, 2023.

• “Puon kan Oktubre 7, nagin mas matindi asin nakakaalarma an pagdakul nin mga insidente nin pagkaungis, maraot na mga pananaram asin krimen sa kinaban huli sa pagkaungis.”—Dennis Francis, presidente kan United Nations General Assembly, Nobyembre 3, 2023.

Bako nang bago an maraot na mga pananaram huli sa pagkaungis, kadahasan, asin giyera. Sa katunayan, ilinaladawan kan Bibliya na an mga tawo kaidto “iinaasentar nin siring sa mga pana an saindang mariringis na tataramon” asin nagsusuportar sa giyera saka kadahasan. (Salmo 64:3; 120:7; 140:1) Pero, ipinapaliwanag kan Bibliya na an pagkaungis na nahihiling ta ngunyan igwa nin dakulang importansiya.

Pagkaungis—Sarong tanda sa panahon ta ngunyan

Ipinapahiling kan Bibliya an duwang rason kun taano ta lakop ngunyan an pagkaungis.

1. 1. Ihinula kaiyan an panahon na “magigin malipot an pagkamuot kan kadaklan.” (Mateo 24:12) Imbes na magpahiling nin pagkamuot, an kadaklan sa mga tawo mapahiling nin mga ugali na magigin dahilan na ikaungis ninda an lambang saro.—2 Timoteo 3:1-5.

2. 2. Ipinapahiling kan grabeng pagkaungis sa kinaban ngunyan an maraot na impluwensiya ni Satanas na Diyablo. Sinasabi kan Bibliya na “an bilog na kinaban nasa kapangyarihan kan saro na maraot.”—1 Juan 5:19; Kapahayagan 12:9, 12.

Alagad, ipinapahiling man kan Bibliya na madali nang tapuson nin Diyos an mga bagay na nagigin dahilan nin pagkaungis. Urog pa diyan, hahalion niya an gabos na kasakitan na resulta kan pagkaungis. An Bibliya nangangako:

• “Papahidon [nin Diyos] an lambang luha sa saindang mga mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog. An mga dating bagay nakalihis na.”—Kapahayagan 21:4.