Biyo Nang Mawawara an Pagkaungis Sagkod Lamang!
Dawa pa mahali ta sa satong puso an pagkaungis, dai ta makokontrol an mga ginigibo saka an pag-uugali kan iba. Padagos na magigin biktima nin pagkaungis an inosenteng mga tawo. Kaya, ano an permanenteng solusyon para mawara an pagkaungis?
An Diyos na Jehova sana an lubos asin permanenteng makakapapundo kan dai matapos-tapos na pagkaungis na nahihiling ta ngunyan. Iyan mismo an ipinapanuga kan Bibliya na gigibuhon niya.—Talinhaga 20:22.
HAHALION NIN DIYOS AN MGA DAHILAN NIN PAGKAUNGIS
1. SI SATANAS NA DIYABLO. Si Satanas, na rebelyosong anghel, an nasa likod kan pagkaungis na nahihiling ta ngunyan. Lalaglagon nin Diyos si Satanas pati na an gabos na nauungis sa iba arog niya.—Salmo 37:38; Roma 16:20.
2. AN KINABAN NI SATANAS NA PANO NIN PAGKAUNGIS. Hahalion nin Diyos an gabos na maraot na kabtang kan kinaban na ini, kaiba na an maraot na mga pulitiko asin mga lider nin relihiyon na nagkakawsa nin pagkaungis. Hahalion man nin Diyos an mahanab na sistema nin komersiyo pati na an korapsiyon saka an pang-aaprobetsar kaiyan sa mga tawo.—2 Pedro 3:13.
3. AN PAGKABAKONG PERPEKTO NIN TAWO. Ipinapaliwanag kan Bibliya na an gabos na tawo nagmana nin pagkabakong perpekto—an tendensiya na mag-isip, makamati, asin maggibo nin sala. (Roma 5:12) An pakamati asin pagpahiling nin pagkaungis sa iba an saro sa makasalan na mga tendensiyang iyan. Tatabangan nin Diyos an mga tawo na mahali an gabos na salang ingklinasyon tanganing biyo nang mawara an pagkaungis sagkod lamang.—Isaias 54:13.
NANUNUGA AN BIBLIYA NIN SARONG KINABAN NA MAYO NIN PAGKAUNGIS
1. MAYO NANG MAKAKAEKSPERYENSIYA NIN INHUSTISYA. An kinaban papamahalaan kan Kahadian nin Diyos, sarong matanos asin nagdadanay na gobyerno na mamamahala hali sa langit. (Daniel 2:44) Mawawara na an diskriminasyon asin pagpapalain-lain. Itatanos nin Diyos an gabos na inhustisya na naeeksperyensiyahan kan mga tawo ngunyan.—Lucas 18:7.
2. AN GABOS MAKAKAEKSPERYENSIYA NIN KATUNINUNGAN. Mayo na nin magsasakit dahil sa kadahasan o giyera. (Salmo 46:9) Magigin ligtas na lugar an daga, na iistaran sana nin mga tawong mamumuton sa katuninungan.—Salmo 72:7.
3. AN GABOS MABUBUHAY SAGKOD LAMANG SA PERPEKTONG KAMUGTAKAN. An gabos na nakaistar sa daga mapahiling nin tunay na pagkamuot sa kapwa. (Mateo 22:39) Mawawara an ano man na dahilan nin pagmundo, kaiba na an pagsabong sa isip kan bakong magayon na mga eksperyensiya. (Isaias 65:17) Sa panahon na iyan pag mayo na nin pagkaungis, “makakanumpong [an gabos] nin labi-labing kaugmahan huli sa abundang katuninungan.”—Salmo 37:11.
Gusto mo daw na mabuhay sa arog kaiyan na kinaban? Dawa ngunyan, nahahali na kan dakul na tawo an pagkaungis paagi sa pag-aplikar kan mga prinsipyo sa Bibliya. (Salmo 37:8) Iyan an ginigibo kan minilyon na mga Saksi ni Jehova sa bilog na kinaban. Dawa iba-iba an saindang kultura saka pinaghalian, nagkakasararo sinda asin namumutan an lambang saro na siring sa sarong pamilya.—Isaias 2:2-4.
Mauugma an mga Saksi ni Jehova na isabi saimo an mga nanudan ninda kun paano matatagalan an inhustisya asin diskriminasyon. An mga manunudan mo makakatabang saimo na padiit-diit na salidahan nin pagkamuot an ano man na pagkaungis na puwedeng namamatian mo. Manunudan mo kun paano magin mabuot sa gabos na tawo—dawa sa mga tawo na garo bakong mapagpasalamat o nagpapahiling nin pagkaungis. Bilang resulta, mas magigin maugma ka ngunyan asin mas magigin marahay an relasyon mo sa iba. Urog sa gabos, manunudan mo kun ano an puwede mong gibuhon para mabuhay sa irarom kan pamamahala kan Kahadian nin Diyos pag an pagkaungis mayo na sagkod lamang.—Salmo 37:29.
[Nota sa Ibaba]
a Available sa ibang lengguwahe.