Igwa Daw nin Maaasahan na Gobyerno na Mamamahala sa Satong Daga?—Ano an Sinasabi kan Bibliya?

Kadakul an isyu na nangyayari sa mga gobyerno sa bilog na kinaban. Yaon diyan an iskandalo kan mga pulitiko, mga eleksiyon na haros tabla an resulta, dai pagkauruyon kan mga partido, saka maribok na mga protesta. Asin nangyayari iyan dawa sa mga nasyon na garo baga marahay man an kamugtakan.

Sinasabi kan Bibliya na igwang sarong gobyerno na talagang maaasahan. Tibaad may ideya ka na manungod sa gobyernong iyan. Sinambit iyan ni Jesu-Cristo sa modelong pamibi na itinukdo niya.

• “Kun siring, mamibi kamo sa arog kaining paagi: ‘Ama niyamo na nasa langit, pakangbanalon an pangaran mo. Dumatong lugod an Kahadian mo. Mangyari lugod an kabutan mo, kun paano sa langit, siring man sa daga.’”—Mateo 6:9, 10.

Ano an sinasabi kan Bibliya manungod sa Kahadian na iyan?

An Kahadian—sarong maaasahan na gobyerno

An Kahadian mamamahala hali sa langit.

• Inapod ni Jesus an gobyernong iyan na “Kahadian kan kalangitan.” (Mateo 4:17; 5:3, 10, 19, 20) Huli kaiyan, sinabi niya: “An sakuyang Kahadian bakong kabtang kan kinaban na ini.”—Juan 18:36.

Sasalidahan kan Kahadian an mga gobyerno nin tawo.

• Sinasabi kan Bibliya: “Rurunuton [kan kahadian na ini] asin tatapuson an gabos na kahadian na iyan [nin tawo], asin ini sana an magdadanay sagkod lamang.”—Daniel 2:44.

An Kahadian, na si Jesu-Cristo an Hadi, dai nanggad malalaglag.

• Sinasabi kan Bibliya: “An saiyang pamamahala sarong daing sagkod na pamamahala na dai malihis, asin an saiyang kahadian dai malalaglag.”—Daniel 7:13, 14.

Gigibuhon kan Kahadian na matuninong asin matiwasay an bilog na daga.

•  Sinasabi kan Bibliya: ‘Matuninong na mamumuhay an lambang saro sa tahaw kan sadiri niyang ubasan saka mga kahoy nin higera, asin mayo nang magpapatakot saiya.’—Mikas 4:4, An Marahay na Bareta Biblia.

Aramon pa an manungod sa Kahadian

Kan si Jesus yaon pa digdi sa daga, ginamit niya an saiyang panahon para ‘ihulit an maugmang bareta kan Kahadian.’ (Mateo 9:35) Iprinopesiya man niya:

• “An maugmang baretang ini kan Kahadian ihuhulit sa bilog na kinaban bilang patotoo sa gabos na nasyon, dangan maabot an katapusan.”—Mateo 24:14.

Ngunyan, an maugmang bareta kan Kahadian ihinuhulit sa labing 240 kadagaan. Dinadagka mi ika na aramon pa an manungod sa gobyernong iyan asin kun paano ka makikinabang sa pamamahala kaiyan.

Hilingon an video na Ano an Kahadian nin Diyos?