Ano an Kahadian nin Diyos?
An simbag kan Bibliya
An Kahadian nin Diyos sarong tunay na gobyerno na inestablisar kan Diyos na Jehova. “An kahadian nin Diyos” inaapod man na “Kahadian nin langit” huling an trono kaiyan nasa langit. (Marcos 1:14, 15; Mateo 4:17, An Marahay na Bareta Biblia) Dakul ining pagkakapareho sa mga gobyerno nin tawo pero nakakalabi ini sa gabos na bagay.
Tagapamahala. Pinili nin Diyos si Jesu-Cristo para magin Hadi kan Kahadian. An awtoridad na itinao sa saiya mas halangkaw nanggad kisa sa awtoridad na puwedeng akuon nin siisay man na tagapamahalang tawo. (Mateo 28:18) Napatunayan na ni Jesus na siya sarong maaasahan asin mapagmalasakit na Lider kaya talagang ginagamit ni Jesus an saiyang kapangyarihan para sa ikakarahay. (Mateo 4:23; Marcos 1:40, 41; 6:31-34; Lucas 7:11-17) Kauyon kan kabutan nin Diyos, nagpili si Jesus nin mga tawo hali sa iba-ibang nasyon para makaibanan niya sa langit na mamamahala bilang mga hadi sa daga.—Kapahayagan 5:9, 10.
Lawig nin pamamahala. Bakong arog kan mga gobyerno nin tawo na natatapos asin nariribayan, an Kahadian nin Diyos ‘dai nuarin man malalaglag.’—Daniel 2:44.
Sakop. Ano man an lahi o pinaghalian nin sarong tawo basta ginigibo niya an kabutan nin Diyos, puwede siyang magin sakop kan Kahadian nin Diyos.—Gibo 10:34, 35.
Pagbuot. An pagbuot (o katugunan) kan Kahadian nin Diyos dai lang basta nagbabawal nin salang gibo. Tinutukduan kaiyan an mga nasasakupan kaiyan na magin mas marahay na mga tawo. Halimbawa, sinasabi kan Bibliya: “‘Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip.’ Iyo ini an pinakaimportante asin panginot na tugon. An panduwa, na kaagid kaiyan, iyo ini: ‘Kamutan mo an saimong kapwa nin siring sa saimong sadiri.’” (Mateo 22:37-39) Dahil sa pagkamuot sa Diyos asin sa kapwa, pirming ginigibo kan mga sakop kan Kahadian an pinakamarahay para sa iba.
Edukasyon. Dawa ngani halangkaw an pamantayan kan Kahadian nin Diyos para sa magigin mga sakop kaiyan, tinutukduan man kaiyan an mga tawo kun paano iyan maaabot.—Isaias 48:17, 18.
Misyon. Sa Kahadian nin Diyos, dai mangyayari na an mga tagapamahala nagyayaraman mantang an mga sakop kaiyan nagtitirios. Imbes gigibuhon kaiyan an kabutan nin Diyos, kaiba na an panuga niya na mabubuhay nin daing katapusan sa paraisong daga an mga namumuot sa saiya.—Isaias 35:1, 5, 6; Mateo 6:10; Kapahayagan 21:1-4.