An Diyos Daw an May Kontrol sa Satong Buhay, o May Libertad Kitang Magdesisyon?
An simbag kan Bibliya
Tinawan kita nin Diyos kan kakayahan na gumibo kan sadiri tang mga desisyon imbes na siya o an kapaladan an magkontrol sa mga mangyayari sa sato. Pag-isipan kun ano an itinutukdo kan Bibliya.
Linalang kita nin Diyos uyon sa saiyang ladawan. (Genesis 1:26) Bakong arog kan mga hayop na minahiro paagi sa instinct, kita may pagkakaagid sa satong Kaglalang dahil igwa kita kan kakayahan na magpahiling nin mga kuwalidad arog kan pagkamuot saka hustisya. Saka arog niya, may libertad kita na magdesisyon.
Dakula an satong paninimbagan sa kun ano an magigin puturo ta. Dinadagka kita kan Bibliya na ‘pilion an buhay paagi sa pagdangog sa mga sinasabi nin Diyos,’ buot sabihon, paagi sa pagpili na sunudon an saiyang mga pagbuot. (Deuteronomio 30:19, 20) Paano ta iyan magigibo kun mayo kitang libertad na magdesisyon? Imbes na puwersahon kita na gibuhon kun ano an sinasabi niya, an Diyos mabuot na nakikiulay sa sato: “Kun tatawan mo lang kuta nin atensiyon an sakuyang mga tugon! Dangan an saimong katuninungan magigin siring sa salog.”—Isaias 48:18.
Kun magin mapanggana man kita sa sarong bagay o dai, bako iyan dahil sa kapaladan. Nakadepende iyan sa satong mga pagmamaigot. Sinasabi kan Bibliya, “Ano man na magigibo kan saimong kamot, gibuha sa bilog mong kusog.” (Eclesiastes 9:10) Sabi pa kaiyan: “An mga plano kan mahigos siguradong magigin mapanggana.”—Talinhaga 21:5.
An libertad na magdesisyon sarong mahalagang marhay na regalo sa sato nin Diyos. Dahil diyan, magigibo tang kamutan siya sa “bilog [niyatong] puso.”—Mateo 22:37.
Bako daw na an Diyos an nagkokontrol sa gabos na bagay?
Itinutukdo kan Bibliya na an Diyos an Makakamhan sa Gabos; daing limite an saiyang kapangyarihan. (Job 37:23; Isaias 40:26) Pero, dai niya ginagamit an saiyang kapangyarihan para kontrulon an gabos na bagay. Halimbawa, sinasabi kan Bibliya na “pinugulan [kan Diyos] an sadiri” niya laban sa suanoy na Babilonya, sarong kaiwal kan saiyang banwaan. (Isaias 42:14) Sa ngunyan, pinupugulan niya man an saiyang sadiri sa mga tawong ginagamit an saindang libertad na magdesisyon para kulugan an iba. Pero pag-abot nin panahon, mahiro an Diyos laban sa sainda.—Salmo 37:10, 11.