Ano an Nangyayari Saimo Pag Nagadan Ka?

An simbag kan Bibliya

An Bibliya nagsasabi: “Aram kan mga buhay na sinda magagadan, pero an mga gadan dai na lamang nin naaaraman.” (Eclesiastes 9:5; Salmo 146:4) Kaya, pag nagadan kita, dai na kita nag-eeksister. An gadan mayo na nin naiisip, nagigibo, o ano pa man na namamatian.

“Sa alpog ka man mabalik”

Ipinaliwanag nin Diyos kun ano an nangyayari pag nagadan kita kan makipag-ulay siya sa inot na tawo, si Adan. Huling dai nagin masinunod si Adan, sinabi nin Diyos sa saiya: “Huling ika alpog, sa alpog ka man mabalik.” (Genesis 3:19) Bago lalangon nin Diyos si Adan “hali sa alpog kan daga,” dai si Adan nag-eeksister. (Genesis 2:7) Sa kaagid na paagi, kan magadan si Adan, buminalik siya sa alpog asin dai na nag-eksister.

Arog man kaiyan an nangyayari sa mga nagagadan ngunyan. Manungod sa mga tawo saka mga hayop, an Bibliya nagsasabi: “Gabos sinda hali sa alpog, asin gabos sinda minabalik sa alpog.”—Eclesiastes 3:19, 20.

An kagadanan bako an katapusan kan gabos

Parating iinaagid kan Bibliya an kagadanan sa pagturog. (Salmo 13:3; Juan 11:11-14; Gibo 7:60) An sarong tawo na nanok na nagtuturog dai nag-aaram kan nangyayari sa palibot niya. Kaagid kaiyan, an gadan dai man nag-aaram. Pero, itinutukdo kan Bibliya na an gadan garo turog na kaya nin Diyos na pukawon asin tawan giraray nin buhay. (Job 14:13-15) Para sa mga bubuhayon liwat nin Diyos, an kagadanan bako an katapusan kan gabos.