An Kahadian nin Diyos Daw Nasa Puso nin Tawo?
An simbag kan Bibliya
Dai, an Kahadian nin Diyos bako lang basta nasa puso nin mga Kristiyano.a Sinasabi kan Bibliya kun sain talaga iyan paagi sa pag-apod kaiyan na “an kahadean nin lagñit.” (Mateo 4:17, Magna Banal na Kasuratan) Mangnuhon kun paano ipinapahiling kan Bibliya na saro iyan na tunay na gobyerno na namamahala hali sa langit.
An Kahadian nin Diyos igwa nin mga tagapamahala, mga nasasakupan, mga ley, asin mandato tanganing ipautob an kabutan nin Diyos sa langit asin sa daga.—Mateo 6:10; Kapahayagan 5:10.
An gobyerno, o Kahadian, nin Diyos mamamahala sa gabos na “mga banwaan, mga nasyon, asin mga grupong manlain-lain an lengguwahe” sa daga. (Daniel 7:13, 14) An awtoridad kaiyan na mamahala hali mismo sa Diyos, bako sa mga sakop kaiyan.—Salmo 2:4-6; Isaias 9:7.
Sinabi ni Jesus sa saiyang maimbod na mga apostol na makakaibanan niya sinda sa Kahadian nin langit para “magtukaw sa mga trono.”—Lucas 22:28, 30.
An Kahadian igwa nin mga kaiwal, na paparaon kaiyan.—Salmo 2:1, 2, 8, 9; 110:1, 2; 1 Corinto 15:25, 26.
Dai itinutukdo kan Bibliya na an Kahadian nin langit nasa puso nin sarong tawo na garo baga namamahala iyan sa puso niya. Alagad, ipinapahiling kaiyan na an “tataramon manungod sa Kahadian” o an ‘maugmang bareta kan Kahadian’ puwede asin dapat na magkaigwa nin epekto sa satong puso.—Mateo 13:19; 24:14.
Ano an buot sabihon kan “an Kahadean nin Dios yaon saindo”?
May mga tawo na nariribong kun yaon talaga sain an Kahadian dahil sa pagkatradusir kan ibang mga bersiyon nin Bibliya sa Lucas 17:21. Halimbawa, sa An Marahay na Bareta Biblia sinasabi na “an Kahadean nin Dios yaon saindo.” Para masabutan nin tama an bersikulong ini, dapat tang aramon an konteksto.
An Kahadian nin Diyos mayo sa matagas na puso kan mga gustong gumadan ki Jesus
An kaulay digdi ni Jesus mga Fariseo, sarong grupo nin mga lider nin relihiyon na nagkokontra sa saiya asin nakipagkumplutan para ipagadan siya. (Mateo 12:14; Lucas 17:20) Rasonable daw na isipon na an Kahadian yaon sa saindang matagas na puso? Sinabi ni Jesus sa sainda: “Sa laog nindo pano kamo nin pagsagin-sagin asin karatan.”—Mateo 23:27, 28.
Arog kaini an tamang pagkatradusir nin ibang bersiyon nin Bibliya sa sinabi ni Jesus sa Lucas 17:21: “An kahadean nin Dios nasa tagña nindo.” (Samo an italiko; Magna Banal na Kasuratan) “An Kahadian nin Diyos nasa kaibanan nindo.” (Bagong Kinaban na Traduksiyon, nota sa ibaba) An Kahadian nin langit nasa “tagña” o “kaibanan” kan mga Fariseo, sa paagi na si Jesus, an saro na pinili nin Diyos na mamahala bilang Hadi, nakatindog sa atubangan ninda.—Lucas 1:32, 33.
a Itinutukdo kan dakul na relihiyon na Kristiyano na an Kahadian nin Diyos yaon sa laog, o puso, nin sarong tawo. Halimbawa, sa Estados Unidos, binanggit kan Southern Baptist Convention na an Kahadian nin Diyos puwedeng iyo an “paghadi kan Diyos sa puso asin buhay kan indibidwal.” Sa libro man na Jesus of Nazareth, sinambit ni Pope Benedict XVI na “an Kahadian nin Diyos minaabot sa saro na may pusong nagdadangog.”