Ano an Dakulang Babilonya?

An simbag kan Bibliya

Ilinaladawan kan libro nin Kapahayagan an “sarong babayi” na sarong “maimpluwensiyang hostes” asin may pangaran na “sarong misteryo: ‘Dakulang Babilonya.’” (Kapahayagan 17:1, 3, 5) Irinerepresentar kan babaying ini an gabos na palsong relihiyon kan kinaban bilang sarong grupo, na “mas pinili pa . . . an kaputikan kisa sa katotoohan mapadapit sa Diyos.”a (Roma 1:25) Bagaman magkalain sa dakul na aspekto an mga relihiyon na iyan, irinarayo ninda gabos an mga tawo sa pagsamba sa tunay na Diyos, si Jehova.—Deuteronomio 4:35.

Mga midbidan kan Dakulang Babilonya

1. An Dakulang Babilonya sarong simbolo. Iprinesentar an libro nin Kapahayagan “paagi sa mga tanda,” kaya rasonable sanang isipon na an Dakulang Babilonya sarong simbolo, bakong literal na babayi. (Kapahayagan 1:1) Dugang pa, “nakatukaw [siya] sa ibabaw kan dakul na katubigan,” na nagrerepresentar sa “mga banwaan asin mga grupo nin tawo asin mga nasyon saka mga lengguwahe.” (Kapahayagan 17:1, 15) Dai iyan magigibo nin sarong literal na babayi.

2. An Dakulang Babilonya nagrerepresentar sa sarong internasyonal na organisasyon. Inaapod an babayi na “dakulang siyudad na igwa nin kahadian na nakakasakop sa mga hadi sa daga.” (Kapahayagan 17:18) Huli kaiyan, lakop sa bilog na kinaban an saiyang sakop asin impluwensiya.

3. An Dakulang Babilonya sarong relihiyosong organisasyon, bakong pulitikal o komersiyal. Relihiyosong marhay na siyudad an suanoy na Babilonya, asin midbid iyan sa mga espiritistikong gibuhon arog kan “pang-eengkanto” saka “pangkukulam.” (Isaias 47:1, 12, 13; Jeremias 50:1, 2, 38) An totoo, an mga nakaistar sa siyudad na iyan nagsasagibo nin palsong pagsamba na kontra sa tunay na Diyos na si Jehova. (Genesis 10:8, 9; 11:2-4, 8) An mga namamahala sa Babilonya may pagkaaroganteng ibinilang an saindang sadiri na mas urog kisa ki Jehova asin sa pagsamba sa saiya. (Isaias 14:4, 13, 14; Daniel 5:2-4, 23) Siring man, midbid an Dakulang Babilonya sa “paggibo [niya] nin espiritismo.” Ipinapahiling kaiyan na saro siyang relihiyosong organisasyon.—Kapahayagan 18:23.

   Dai puwedeng magin sarong pulitikal na organisasyon an Dakulang Babilonya, huling “an mga hadi sa daga” matarangis sa saiyang pagkalaglag. (Kapahayagan 17:1, 2; 18:9) Bako man siyang komersiyal na organisasyon, huling ipinapahiling kan Bibliya na lain siya sa “mga negosyante sa daga.”—Kapahayagan 18:11, 15.



Photograph taken by courtesy of the British Museum

4. An Dakulang Babilonya angay na simbolo kan palsong relihiyon. Imbes na tukduan an mga tawo kun paano rumani sa tunay na Diyos, si Jehova, an totoo ginigiyahan lugod sinda kan palsong relihiyon na sambahon an ibang mga diyos. Inaapod iyan kan Bibliya na “espirituwal na prostitusyon.” (Levitico 20:6; Exodo 34:15, 16) Padagos na itinutukdo nin dakul na palsong relihiyon an mga paniniwala na hali pa sa suanoy na Babilonya, arog kan trinidad, imortalidad kan kalag, asin paggamit nin mga imahen sa pagsamba. Isinalak man kan mga relihiyon na ini sa saindang pagsamba an pagkamuot sa kinaban. An arog kaiyan na klase nin pagigin bakong maimbod inaapod kan Bibliya na espirituwal na pagsambay.—Santiago 4:4.

   An kayamanan kan palsong relihiyon asin an pagpasikat ninda kaiyan kauyon kan paglaladawan kan Bibliya sa Dakulang Babilonya, na “nakasulot nin badong purpura asin iskarlata” saka “nin bulawan asin mamahalon na mga bato saka mga perlas.” (Kapahayagan 17:4) An Dakulang Babilonya iyo man an ginigikanan kan “makababalding mga bagay sa daga,” o kan mga katukduan asin paggawi na nakakaraot sa reputasyon nin Diyos. (Kapahayagan 17:5) An mga kabilang sa palsong relihiyon iyo an “mga grupo nin tawo asin mga nasyon saka mga lengguwahe” na nagsusuportar sa Dakulang Babilonya.—Kapahayagan 17:15.

An Dakulang Babilonya iyo an responsable sa kagadanan “kan gabos na ginadan sa daga.” (Kapahayagan 18:24) Sa bilog na kasaysayan, dai lang nagsusutsut an palsong relihiyon para magpuon nin mga giyera asin terorismo. Dai man kaiyan nagigibong itukdo sa mga tawo an katotoohan manungod ki Jehova, an Diyos nin pagkamuot. (1 Juan 4:8) Dakul an napabulos na dugo huli kaiyan.

Ano an pagmansay nin Diyos sa Dakulang Babilonya?

Sa paghiling nin Diyos, “nagkaparatong-patong na an [mga kasalan kan Dakulang Babilonya] na uminabot sagkod sa langit.” (Kapahayagan 18:4, 5) Anggot an Diyos sa palsong relihiyon huling bakong totoo an itinutukdo kaiyan manungod sa saiya asin dai kaiyan tinatrato nin tama an mga miyembro kaiyan.

Ano an mangyayari sa Dakulang Babilonya?

Sinasabi kan Bibliya na “ipinahayag na nin Diyos an paghukom niya” sa Dakulang Babilonya. (Kapahayagan 18:20) Paagi sa simbolikong pananaram, ihinula kan Bibliya na tatapuson nin Diyos an gabos na palsong relihiyon. (Kapahayagan 18:8) Papahiruon niya an mabangis na hayop na mapulahon an kulor—na nagrerepresentar sa sarong makapangyarihan na pulitikal na organisasyon—na atakihon an palsong relihiyon asin biyong laglagon iyan. (Kapahayagan 17:16, 17) “Arog kaiyan karikas an gigibuhon na pag-apon sa Babilonya na dakulang siyudad, asin dai na siya nuarin man manunumpungan.” (Kapahayagan 18:21) Kaya, may marahay na dahilan nanggad an mga gustong paugmahon an Diyos na “magruluwas . . . sa tahaw ninda,” na isinusuway an saindang sadiri sa palsong relihiyon.—2 Corinto 6:14-17.