HAPOT KAN MGA HOBEN
Paano Kun Nakulgan Ako kan Amigo Ko?
An dapat mong maaraman
Gabos na relasyon nin tawo puwedeng magkaproblema. Dahil bakong perpekto an amigo mo—dawa best friend mo pa—puwedeng may magibo o masabi siya na makakakulog sa saimo. Siyempre, bako ka man perpekto. Tibaad ngani may magirumduman kang pagkakataon na nakakulog ka man nin iba.—Santiago 3:2.
Mas madali kang makulgan huli sa Internet. Halimbawa, sarong tin-edyer na an pangaran David nagsabi: “Pag online ka tapos nahiling mo an mga ritrato kan amigo mo sa sarong gathering, tibaad mapaisip ka kun taano ta dai ka inimbitaran. Sunod kaiyan mamamati mo na garo pigtraydor ka, tapos mamumundo ka na.”
Puwede mong maresolberan an problema.
An puwede mong gibuhon
Siyasaton an sadiri. An sabi kan Bibliya: “Dai ka tulos makulgan nin buot, huling an pagkulog nin buot tanda nin sarong mangmang.”—Eclesiastes 7:9, nota sa ibaba.
“Kun minsan, marerealisar mo na lang na simpleng bagay man lang palan an ikinakakulog kan buot mo.”—Alyssa.
Pag-isipan: Sobra ka daw kasensitibo? Puwede ka daw na magin mas mapagpasensiya sa mga kaluyahan kan iba?—Eclesiastes 7:21, 22.
Pag-isipan an mga pakinabang kan pagpapatawad. An sabi kan Bibliya: “Kagayunan . . . an pagpalampas sa nagibong sala.”—Talinhaga 19:11.
“Dawa igwa ka nin dahilan na magreklamo, mas marahay kun lubos kang mapatawad, an buot sabihon dai mo na dapat pigpapara-pagirumdom saiya su nagibo niya para maghagad giraray siya saimo nin tawad. Pag nagpatawad ka na, tapos na idto.”—Mallory.
Pag-isipan: Grabe daw talagang marhay an nangyari? Puwede daw na magpatawad ka na sana para magkaigwa nin katuninungan?—Colosas 3:13.
An pauruutrong pagsambit kan mga nagibong sala kan amigo mo garo man sana pauruutrong pagbukas kan pinto kaya minalaog an malipot na duros asin dai napapagdanay an pagigin maimbong kan kuwarto
Isipon an kapakanan kan ibang tawo. An sabi kan Bibliya: ‘Tawan nindo nin atensiyon bako sana an sadiri nindong kapakanan, kundi an kapakanan man kan iba.’—Filipos 2:4.
“Pag igwa nin pagkamuot saka respeto sa saindo bilang mag-amigo, mas madaling husayon an mga problema dahil pinapahalagahan mong marhay an pagigin mag-amigo nindo. Dakulaon na an ginibo mo para sa relasyon nindo, kaya habo mong basta na lang mawara iyan.”—Nicole.
Pag-isipan: May nahihiling ka daw na dawa sarong rasonableng bagay sa sinabi kan amigo mo?—Filipos 2:3.
An punto: Magayon na manudan mo kun ano an dapat gibuhon pag nakulgan an buot mo, huling sarong kakayahan iyan na magagamit mong marhay pag adulto ka na. Kaya ngunyan pa sana, hinguwahon mong magkaigwa na kan kakayahan na iyan.