Sarong hoben na lalaki na nagmamasid sa mga tawong naglalakaw pasiring sa Kingdom Hall

HAPOT KAN MGA HOBEN

Taano ta Dapat Mag-atender sa mga Pagtiripon sa Kingdom Hall?

Duwang beses kada semana, nagtitiripon an mga Saksi ni Jehova sa saindang mga lugar nin pagsamba, na inaapod na mga Kingdom Hall. Ano an ginigibo diyan, asin paano ka makikinabang sa pag-atender diyan?

Paano ginigibo an mga pagtiripon sa Kingdom Hall?

An Kingdom Hall sarong lugar kun sain pinag-aadalan kun paano praktikal na maiaaplikar an mga katukduan sa Bibliya. An mga pagtiripon diyan makakatabang saimo na:

manudan an katotoohan dapit sa Diyos.
masabutan an kahulugan kan mga pangyayari ngunyan.
magin mas marahay na tawo.
makahanap nin marahay na mga amigo.

Aram daw nindo? An lugar na pinagtitiripunan kan mga Saksi ni Jehova inaapod na Kingdom Hall huling an Kahadian nin Diyos an parating pinag-uulayan diyan.—Mateo 6:9, 10; 24:14; Lucas 4:43.

Taano ta dapat kang mag-atender?

An mga impormasyon na itinatao diyan makakatabang saimo. An mga prinsipyo sa Bibliya na pinag-uulayan sa mga pagtiripon kan mga Saksi ni Jehova makakatabang saimo na ‘mahanap an kadunungan.’ (Talinhaga 4:5) Nangangahulugan iyan na an Bibliya makakatabang saimo na gumibo nin madunong na mga desisyon sa buhay. Saro pa, sinisimbag kaiyan an importanteng mga hapot sa buhay, arog nin:

Uni an pira sa mga tema kan pahayag na itinatao sa mga pagtiripon sa puro kan semana:

Taano ta Dapat Magpagiya sa Bibliya?
Sain Kamo Makakakua nin Tabang sa mga Panahon nin Kasakitan?
Kun Ano an Ginigibo kan Kahadian nin Diyos Para sa Sato Ngunyan.

“May kaeskuwela ako na nag-atender sa pagtiripon. Nagtukaw siya sa kataid mi, saka pinasubli mi siya kan mga librong ginagamit ta. Pagkatapos, sinabi niya sako na hanga siyang marhay sa mga nadangog niyang komento sa hapot-simbagan. Sinabi man niya na mayo nin mga arog kaidtong libro na pinag-aadalan sa simbahan ninda.”—Brenda.

Aram daw nindo? Libre an pag-atender sa Kingdom Hall, mayo nin ano man na pangungulekta.

Makakaibanan mo an mga tawong makakapakusog saimo. Sinasabi kan Bibliya na an sarong dahilan kun taano ta dapat na magtiripon an mga Kristiyano iyo na tanganing ‘pakusugon an lambang saro.’ (Hebreo 10:24, 25) Sa kinaban na ini na pano nin mga tawong makasadiri, nakakaginhawa an pakikiiba sa mga tawo na iniinot an Diyos asin an iba.

“Pagkatapos nin maghapon, minsan mamundo ako saka pagal-pagal, pero pag kaiba ko an mga tawo sa Kingdom Hall nagrarahay an pagmati ko. Pagkatapos kan pagtiripon, nagpupuli ako na maugmahon saka may kusog para atubangon an sunod na aldaw.”—Elisa.

Aram daw nindo? Igwa nin labing 120,000 na kongregasyon nin mga Saksi ni Jehova sa bilog na kinaban, na nagtitiripon sa labing 60,000 na mga lokasyon. Kada taon, may average na mga 1,500 na Kingdom Hall an itinutugdok para sa nagdadakul na bilang nin mga nag-aatender sa pagtiripon.a

An sinasabi kan ibang tin-edyer

“Kan high school ako, saro kong kaklase an pirang beses na nag-iba sako sa pagtiripon, asin naghanga siya ta iribang nag-aadal nin Bibliya an mga hoben saka mga may edad na. Dai pa sana nahahaloy nag-atender man an boss ko, tapos naghanga siya ta pirmi kitang naggagamit nin Bibliya. Huli sa pag-apresyar niya sa satong pagtiripon, lalo man akong napahiro na pahalagahan iyan!”—Jessica.

“An mga pagtiripon nakakatabang sako na dai mapurisaw saka magparahadit. Nanudan mi kun paano magkaigwa nin nakakakontentong buhay, magin mas marahay na tawo, asin dakul pa. Kada pag-atender ko sa Kingdom Hall, napapakusog ako saka narerepreskuhan.”—Timothy.

“Sabi kan inimbitaran kong lalaki pagkatapos kan pagtiripon: ‘Nag-atender sana ako para patunayan na sala an mga paniniwala nindo. Pero mga paniniwala ko palan an sala!’ Naghanga man siya sa pagigin mainamigo kan mga Saksi ni Jehova. Sinabi pa niya: ‘Ngunyan ko lang kamo nakaibanan, pero ipinamati nindo sako na garo haluyon ko na kamong kabisto!’”—Jacob.

“Minsan iniisip ko, ‘Mahali na lang tulos ako pagkatapos kan pagtiripon.’ Pero pag nasa pagtiripon na ako, dai ko na iyan naiisip. Pagkatapos kan pagtiripon, nakikipag-ulay ako sa iba tapos dai ko na maisip kun taano ta gusto kong maghali tulos kan inot. Kun bakong dahil sa mga pagtiripon, dai kutana ako nagkaigwa nin marahayon na mga amigo ngunyan.”—Madison.

a Para makahanap nin Kingdom Hall, buksan an page na “Mga Pagtiripon kan mga Saksi ni Jehova” asin i-click an “Humanap nin Lokasyon na Harani Saindo.”