Nagpundo Sinda Para Tumabang

Nagmamaneho kaidto si Bob sa rikas na mga 100 kilometro por ora sa sarong malipot saka maduros na aldaw sa Alberta, Canada, kan biglang kuminupos an walang ruweda sa likudan kan saiyang van. Kan primero, mayong ideya si Bob kun ano an nangyari, kaya padagos lang siyang nagmaneho pasiring sa saiyang harong na limang kilometro pa an rayo.

Sa sarong surat na ipinadara ni Bob sa lokal na Kingdom Hall kan Mga Saksi ni Jehova, iinistorya niya an sunod na nangyari. “May limang hoben na nakasakay sa awto na nagsenyas sako,” an sabi niya. “Sinabi ninda na lupos an ruweda kan awto ko. Kaya naggilid kami, dangan nag-alok sinda na ribayan iyan. Dai ko lamang ngani aram kun may reserba akong ruweda o jack. Mantang nakatukaw ako sa sakong wheelchair sa gilid kan tinampo, nagkamang sinda sa irarom kan van tapos nakua ninda su ekstrang ruweda saka jack, tapos sinanglian ninda su ruweda. Malipot saka grabe an niyebe kaidto. Nakapandisente sindang bado, pero sinanglian ninda su ruweda para makapuli ako. Dai ko ’to magigibo kun ako sana.

“Salamat sa limang hoben na Saksi na nagtabang sako. Yaon sinda kaidto para magduman sa mga harong tanganing ihulit an saindang mensahe. Talagang ginigibo kan mga hoben na ini an itinutukdo ninda. Kun dai ninda ako tinabangan, biyo talaga akong mahahaloy asin sasarakitan sa sitwasyon na idto, kaya talagang nagpapasalamat ako sa ginibo ninda. Siisay an mahuna na igwa nin mga hoben na anghel sa tinampo kan aldaw na idto?”