Dai Mapagal

¹ An 1991 Yearbook nagsasambit nin nakakapukaw sa boot na pag-oswag na nangyayari sa bilog na kinaban. May bagong mga peak sa parahayag sa dakol na kadagaan.

² Alagad kumusta an saindong teritoryo? An mga tawo daw indiperente sa mensahe kan Kahadean? Dikit sana daw an paborableng naghihimate? Kun iyo, puwede kamong mapakosog kan sadol ni Pablo sa Galacia 6:9: “Kaya dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal.” Sa paggibo nin karahayan siertong kabilang an paghuhulit kan maogmang bareta kan Kahadean sa harong-harong. Maninigo kitang padagos na maghulit sagkod na sabihon ni Jehova na tapos na an gibohon. (Isa. 6:8) Maski sa masakit na mga teritoryo, may manonompongan pang arog karnerong mga tawo.

³ Ano an puwede niatong gibohon tanganing dai mapagal sa ministeryo? An pagliwat kan satong pagdolok o mga introduksion makatatabang. An ekselenteng mga suhestion manonompongan sa librong Reasoning. Naprobaran na daw nindo iyan? An halipoton alagad direktang pagdolok puwedeng makapukaw kan atension nin dakol na kagharong. Ipaaram sa mga tawo na yaon kamo duman huli ta personal kamong interesado sa saindang kapakanan.

IATUBANG AN MAS DAAN NA MGA PUBLIKASYON

⁴ Sa Pebrero ikakapaheling niato an satong pagmakolog sa iba paagi sa pag-alok nin mas daan na mga publikasyon na makukua sa satong tataramon. Helingon an Mga Paisi sa pahina 7 siring man an tugang na nangangataman sa literatura sa saindong kongregasyon tanganing maaraman kun ano an makukua sa lokal. An gabos na librong ini may ekselenteng mga puntong ipakikipag-olay manongod sa satong Topikong Mapag-oolayan may koneksion sa katoninongan. Patienot na mag-andam nin marhay tanganing magkaigwa nin espisipikong mga puntong itatampok.

⁵ Sierto nanggad na kita personalmenteng mapakokosog paagi kan satong pakikabtang sa paghuhulit kan Kahadean sa semanal na paagi. Saro pa, an satong espirituwalidad magdadanay na makosog paagi sa regular na pag-adal kan Tataramon nin Dios asin regular na pakikabtang sa mga pagtiripon kan kongregasyon.​—Heb. 10:​23-25.

PAKOSOGON AN IBA ASIN MAGDANAY NA MARIGON

⁶ Matatabangan nindo an saindong sadiri asin mapakokosog an iba paagi sa paghuhulit na kaiba ninda sa ministeryo sa langtad. (Gal. 6:10) Taano ta dai hapoton an mga payunir o an kamagurangan kun puwede kamong maghulit na kairiba sinda? Siring man, an mga iregular o inaktibo mapakokosog kan saindong interes sa saindang espirituwal na kapakanan.

⁷ Kita gabos nangangaipong magtagal asin dai mapagal sa paglilingkod ki Jehova. (Heb. 10:​36-39) Mamibi ki Jehova para sa kosog. (Isa. 40:​29-31) Hagadon saiya na tabangan kamong magtagal asin magkaigwa nin positibong kaisipan. Girumdomon, ginigibo niato an gibohon nin Dios. Dai nia lilingawan an ginigibo niato sa paglilingkod saiya. (Heb. 6:10) Kaya dai kita mapagal! Imbes, magkaigwa kita nin “dakol na gigibohon sa gibohon kan Kagurangnan,” na nananarig ki Jehova na pakosogon kita.​—1 Cor. 15:58.