An Panahon Para sa Dugang na Gibohon
1 Mantang an katapusan kan palakaw na ini orog na naghaharani na asin naheheling niato kun paanong mayaman na binibendisyonan ni Jehova an satong ministeryo, maninigo niatong sunudon an hatol ni apostol Pedro na ‘pasariga an saindong isip para sa gibohon.’—1 Ped. 1:13; Isa. 60:22.
2 Kan itinao ni Pedro an hatol sa itaas, nagsurat sia manongod sa kaligtasan na mapapasato paagi sa dugo ni Jesu-Cristo. An satong pagbalangibog kan maogmang bareta nin Kahadean sarong paagi sa pagpaheling kan satong pagtubod asin pagpahayag kan satong apresasyon sa mga pakinabang na naako niato huli sa pagkamoot ni Jehova na ipinahayag paagi sa regalo kan saiyang Aki. (Juan 3:16) An panahon nin Memorial iyo an panahon na magin orog pang aktibo sa itinao nin Dios na gibohon na ini.
AN SELEBRASYON KAN MEMORIAL ASIN ESPESYAL NA PAHAYAG
3 An selebrasyon kan Memorial sa taon na ini isasagibo pakasolnop kan aldaw sa Marso 30. Minsan ngonyan, sa pag-antisipar kan espesyal na petsang iyan, puwede niatong siyasaton an satong relasyon ki Jehova asin an paagi na ginigirumdom niato an atang ni Jesus. Nagpapaheling daw kita nin pagtubod aroaldaw paagi sa estriktong pagsunod sa matanos na mga pamantayan ni Jehova sa satong pag-iisip, pagtaram, asin paggawe? Nagpapaheling daw kita nin pagkamoot sa iba paagi sa pagmamaigot niato sa gibohon na paghuhulit asin paggibo nin mga disipulo? Sa espesyal na paagi kada taon sa Memorial, ginigirumdom niato an ginibo ni Jehova Dios asin ni Jesus para sa sato. (Luc. 22:19; 1 Cor. 11:23, 24) An siring na paggirumdom dapat magpahiro sato na positibong maghiro sono sa satong indibiduwal na mga abilidad asin kamugtakan.
4 Sa Abril 7, an kadaklan na kongregasyon sa bilog na kinaban mag-aatubang nin espesyal na pahayag sa temang “An Pagdatong kan Mesiyas Asin an Saiyang Pamamahala.” Kanigoan karahay na oportunidad para sa mga bagohan na magpoon nang makiiba sa kongregasyon! An mga nag-atender sa Memorial maninigong pakosogon na mag-atender sa espesyal na pahayag na ini.
DUGANGAN AN PAGWARAS NIN MAGASIN
5 An gabos na parahayag kan Kahadean mag-aapresyar kan espesyal na pagmamaigot sa pag-andam kan mga isyu kan Watchtower asin Awake! para sa Abril asin Mayo. (Helingon an “Magin Andam Para sa Kampanya sa Suskripsion sa Watchtower” sa pahina 8.) Siertohon na pumedido nin ekstrang mga kopya sa tugang na nangangataman sa magasin sa saindong kongregasyon tanganing magkaigwa kamo nin dakol na magagamit. Sa pag-abot kan mga magasin, lubos na magin pamilyar sa kada isyu. Ini magpupukaw kan saindong kaigotan sa pag-atubang kaiyan sa langtad.
6 Puwede daw nindong iiba sa saindong iskedyul na mag-auxiliary payunir sa Marso, Abril, o Mayo? Sa ibang kongregasyon labing kabanga kan mga parahayag an auxiliary payunir kan Abril kan nakaaging taon. Kun dakol an iribang nakikikabtang sa sarong panahon, makatatabang sinda asin makakapakosog sa lambang saro sa espesyal na panahon na ini nin gibohon. An kamagurangan maoogmang tumabang paagi sa paggibo nin dugang na areglo sa paglilingkod sa langtad kun kaipuhan.
7 Kun dai kamo makapagpayunir sa panahon na ini, sagkod saen nindo madudugangan an saindong pakikabtang sa ministeryo sa langtad? Sierto nanggad na naoogma si Jehova sa bilog na kalag na paglilingkod na nagpapahayag kan satong pagkamoot asin apresasyon sa saiya asin sa saiyang Aki, si Jesus. An saiyang espiritu matabang sato sa pagdolot nin kawiliwiling mga atang nin pag-omaw.—Heb. 13:15.