Bako Daw Maraot na Libangan an Okulto?

Ano sa hiling mo?

• May peligro daw sa pagkonsulta sa mga horoscope, Ouija board, o sa mga psychic?

• An mga istorya daw dapit sa okulto simbolismo sana nin labanan nin marahay asin maraot, o iyan daw totoo asin peligroso?

Maaaraman sa artikulong ini kun taano ta nakakaakit an espiritismo asin kun taano ta kaipuhan mong mag-ingat.

• Taano ta nakakaakit iyan?

• Taano ta kaipuhan mag-ingat?

• An puwede mong gibuhon

• An sinasabi kan ibang tin-edyer

Taano ta nakakaakit iyan?

Tanganing makaganar nin dakul na kuwarta, inaaprobetsaran kan entertainment industry an manungod sa okulto, na ginigibo iyan na pinakatema nin mga pelikula, programa sa TV, video game, asin mga libro. Bilang resulta, dakul na aki asin hoben an nagkakainteres sa astrolohiya, mga demonyo, bampira, asin pangkukulam. Taano? Kaiba sa mga dahilan an:

• Pagigin mausyoso: Para maaraman kun baga totoo an mga espiritu

• Paghadit: Para purbaran na maaraman an mangyayari sa maabot na panahon

• Komunikasyon: Para purbaran na makipag-ulay sa sarong mahal sa buhay na gadan na

An mga dahilan na iyan bako man talagang sala. Halimbawa, natural sana na mag-isip kita kan manungod sa maabot na panahon o na mapungaw kita sa sarong mahal sa buhay na gadan na. Pero may mga peligro na dapat aram mo.

Taano ta kaipuhan mag-ingat?

May seryosong mga patanid an Bibliya laban sa ano man na konektado sa espiritismo. Halimbawa, sinasabi kaiyan:

“Dai dapat magkaigwa sa saindo . . . nin siisay man na naghuhula, nin siisay man na nagmamahika, nin siisay man na naghahanap nin mga senyales, nin espiritista, nin siisay man na naggagamit nin orasyon para gibuhan nin maraot an iba, nin siisay man na nagkokonsulta sa sarong espiritista o parahula, o nin siisay man na naghahapot sa gadan. Huli ta an siisay man na naggigibo kan mga bagay na iyan makababaldi ki Jehova.”—Deuteronomio 18:10-12, NW.

Taano ta kinokondenar na marhay kan Bibliya an espiritismo?

• An pagsagibo nin espiritismo pagsuporta sa mga demonyo. Itinutukdo kan Bibliya na may mga anghel na nagrebelde sa Diyos asin nagin kaiwal niya. (Genesis 6:2; Judas 6) An maraot na mga anghel na ini, na inaapod na mga demonyo, dinadaya an mga tawo paagi sa mga espiritista, manghuhula, asin sa mga naghuhula sa tabang nin mga espiritu, mga senyales, asin astrolohiya. Kun naggigibo kita kan mga bagay na ini, magigin amigo kita kan mga kaiwal nin Diyos.

• An espiritismo nagpapalakop kan salang paniniwala na may partikular na mga tawo na kayang maaraman an mangyayari sa maabot. Pero an Diyos sana an makakapagsabi: “Puon sa kapinunan patiinot ko nang sinasabi an mangyayari, asin puon kan suanoy na panahon, sinasabi ko na an mga bagay na dai pa nagigibo.”—Isaias 46:10, NW; Santiago 4:13, 14.

• An espiritismo nagpapalakop nin salang paniniwala na an mga gadan kayang makikomunikar sa mga buhay. Pero sinasabi kan Bibliya: “An mga gadan dai na lamang nin naaaraman . . . Mayo na nin gibo ni pagpaplano ni kaaraman ni kadunungan sa Lubungan.”—Parahulit 9:5, 10, NW.

Huli sa mga dahilan na iyan, linilikayan kan mga Saksi ni Jehova an mga gibong konektado sa espiritismo. Linilikayan man ninda an mga libangan na nagtatampok nin mga zombie, bampira, asin misteryosong mga bagay saka pangyayari. “Kun may halo iyan na espiritismo,” an sabi nin sarong hoben na si Maria, “dai ko iyan dapat hilingon.”a

An puwede mong gibuhon

• Magin determinadong “mapagdanay an malinig na konsiyensiya” sa atubangan ni Jehova paagi sa paglikay sa ano man na gibo o libangan na konektado sa okulto.—Gibo 24:16.

• Halion o rauton an ano man na bagay na yaon sa saimo na konektado sa okulto. Basahon an Gibo 19:19, 20, asin arugon an marahay na halimbawa kan mga Kristiyano kan inot na siglo sa bagay na ini.

Tandaan: Pag linilikayan mo an mga gibo asin libangan na konektado sa okulto, naninindugan ka sa kampi ni Jehova. Asin nakakapaugma nanggad iyan sa puso niya!—Talinhaga 27:11.