Pagtao nin Ayuda sa Tahaw nin “mga Giyera Asin mga Bareta Manungod sa mga Giyera”

Sa huring mga aldaw na ini, linalauman ta na kita “makakadangog . . . nin ribok nin mga giyera asin mga bareta manungod sa mga giyera.” (Mateo 24:6) Pero, pag an satong mga tugang napapaatubang sa mga kasakitan dahil sa mga pangyayaring ini, naitatao sa sainda an tabang na kaipuhan ninda. Sinabi sa 2022 Update kan Namamahalang Grupo #3 an nakakapakusog na mga impormasyon manungod sa ginigibong pagtao nin ayuda sa Sirangan na Europa para sa mga apektado kan giyera sa Ukraine. Paano naitatao an mga ayudang ini dawa igwa nin nangyayaring giyera? Ano an epekto sa satong mga tugang sa Ukraine kan ginigibong pag-ayuda?

Ano an Kaipuhan? Paano Iyan Naihahatod?

Kan Pebrero 24, 2022, an aldaw na nagpuon an giyera sa Ukraine, inaprubaran kan Coordinators’ Committee an pondo para sa pag-ayuda na gagamiton para tabangan an satong mga tugang sa Ukraine. An sangang opisina sa Ukraine tulos-tulos na nagpuon na magbakal sa laog kan saindang nasyon nin mga kaipuhan asin idinistribwir iyan paagi sa 27 Disaster Relief Committee na inorganisar ninda.

Para masuportaran an ginigibo ninda, tulos-tulos na pinag-isipan sa World Headquarters kan Mga Saksi ni Jehova kun anong mga praktikal na tabang an puwedeng maitao. Inasignaran kan Coordinators’ saka Publishing committee kan Namamahalang Grupo an Global Purchasing Department na makipagtabangan sa mga representante na hali sa sangang opisina sa Ukraine saka Poland para maasikaso ini asin makagibo nin plano kun ano an gigibuhon. Aroaldaw na nagmiting an mga brother hali sa Purchasing, Shipping, saka Legal department sa kada sangang opisina, kaiba an sarong miyembro kan Komite kan Sangay sa Ukraine asin mga miyembro kan Global Purchasing Department para maorganisar an mga gigibuhon.

“Inot, kaipuhan ming aramon kun ano an kaipuhan,” an sabi ni Jay Swinney na naglilingkod sa Global Purchasing Department. “Gusto ming makatao nin kakanon saka mga gamit para sa kalinigan na kinatudan na kan mga tugang duman. Pero, an pag-aram sa kun ano an kaipuhan sarong parte sana kan kadipisilan. Kaipuhan mi man na pag-isipan kun paano maihahatod an mga ayuda palaog sa Ukraine sa pinakaligtas saka pinakamarikas na paaging posible dawa igwa nin giyera.”

Pag-abot nin Marso 9, 2022, napagdesisyunan na kun anong mga ayuda an kaipuhan. Mapadara nin mga kahon nin kakanon, na may laog na mga de-latang karne saka sira, mga grano (grains), bagas, saka mga beans, na may kasabay na mga gamit para sa kalinigan arog nin sabon saka tisyu. Kan panahon na idto, pigtatantiya na an para sa apat na semanang suplay nin arog kaiyan na ayuda para sa sarong tawo aabuton nin mga $65 (U.S.). Huling rinibo sa satong mga tugang an posibleng mangaipo kan mga ini, dakulang pondo an inaprubaran kan Coordinators’ Committee para sa pag-ayudang ini. Pero paano maihahatod an mga ini na dai man isinasapeligro an buhay kan satong mga tugang?

Kan Marso 13, duwang brother na taga Poland an nagtesting na maghatod hali sa sangang opisina sa Poland pasiring sa sarong bodega na harani sa Lviv, Ukraine. Bago sinda maghali, tinabangan sinda kan mga tugang na naglilingkod sa sangang opisina sa Poland saka Ukraine na mag-andam para sa gigibuhon nindang pagbiyahe. Kinumpleto kan sangang opisina an legal na mga papeles na kaipuhan tanganing makabalyo sa border para magtao nin ayuda, sinigurado na may malinaw na tanda an mga sakayan ninda na nagpapahiling na matao sinda nin ayuda, asin nakipagtabangan sa mga tugang sa Ukraine para maaraman an pinakamarikas na ruta pag nakabalyo na sinda sa border. Dahil sa marahay na pag-andam na ini saka sa bendisyon ni Jehova, naidistribwir an mga ayuda sa mga Disaster Relief Committee sa laog sana nin 24 oras pagkatapos na maihatod iyan sa Lviv, dangan ligtas na nakapuli sa Poland an naghatod na mga brother.

Dawa ngani nagin mapanggana an inot nindang ginibong paghatod, dai malampas sa sarong tonelada sana an naihatod nindang mga ayuda. Kinakarkulo na 200 tonelada pa an kaipuhan! Paano maibibiyahe asin maididistribwir an arog kaiyan kadakul na ayuda sa pinakamarikas na paaging posible?

“Gikan sa Buot na Mapresentar kan Saindang Sadiri an Saimong Banwaan”

Kan mabasa an mga bareta sa jw.org manungod sa kun paano naapektaran an satong mga tugang kan mga pangyayari sa Ukraine, may mga indibidwal hali sa manlain-lain na parte kan kinaban na gustong tumabang. An mga nasa hararayong lugar nagdonar nin kuwarta sa pambilog na kinaban na gibuhon kan Mga Saksi ni Jehova, huling aram ninda na an itinao ninda gagamiton sa pinakamarahay na paagi. An iba na nakaistar sa kaharaning mga nasyon nagtao kan saindang panahon, kusog, asin materyal na mga pagsadiri para tumabang. Uni an nagkapirang halimbawa.

Sa Poland, an mga boluntaryo nagpatos nin manampulong ribong pang-ayuda, asin an mga aki nagdrowing sa mga card. “Dakul na beses ko nang nabasa an teksto sa Salmo 110:3, na diyan sinabi na ‘gikan sa buot na mapresentar kan saindang sadiri’ an banwaan ni Jehova,” an sabi ni Bartosz Kościelniak, na naglilingkod sa Purchasing Department sa sangang opisina sa Poland. “Pero kan mahiling ko mismo an pagsuporta kan mga tugang, an ginatos na boluntaryo na andam na magduman tulos saka magtrabaho, napatunayan ko na talagang totoo an mga tataramon na iyan.”

Sarong Saksi ni Jehova na kagsadiri nin sarong international logistics company na nagpasubli kan saiyang mga trak saka nagdonar nin gasolina para diyan an nagsabi: “Para sako, oportunidad ini na ipahiling ko an pagkamuot ko sa sakong mga tugang saka ki Jehova. Maugmahon ako na nag-alok ako nin tabang.” Pigtatantiya na labing 7,700 na litrong gasolina an naidonar, asin ginamit kan mga tugang an saindang panahon saka kusog para magmaneho nin haros 48,000 kilometros sa paghatod nin mga ayuda!

Huli sa gikan sa buot asin mamumuton na pagtabang kan satong mga tugang, kan Marso 28—15 aldaw sana pakalihis kan inot na paghatod nin ayuda—100 na tonelada nin kakanon, mga gamit para sa kalinigan, asin medikal na mga suplay an naihatod sa Ukraine! Asin dahil sa bukas-palad na mga donasyon hali sa satong mga tugang asin mga supplier, nabawasan na marhay an pondo na kaipuhan gastuson para sa mga ayudang ini. Sagkod sa ngunyan, labing 190 toneladang mga ayuda an naipadara kan Mga Saksi ni Jehova sa Ukraine. Paano an mga ini nakatabang sa satong mga tugang?

“Kaiba Digdi an Pagkamuot Nindo”

Pag nakaabot na sa Lviv an mga ayudang ini, ididistribwir na kan mga Disaster Relief Committee an mga ini sa mga nangangaipo sa bilog na Ukraine. Naghatod nin mga ayuda sa manlain-lain na siyudad, na an iba labing 1,300 kilometros an rayo sa Lviv. Dawa ngani naghinguwa na magibo ini sa pinakamarikas na paagi, nangaipo pa man giraray ini nin panahon.a

Si Markus Reinhardt, na miyembro kan Komite kan Sangay sa Ukraine, nagsabi: “Sa krisis na ini, nahiling mismo kan dakul na tugang an pagkamuot ni Jehova saka an pakinabang kan pagsunod na marhay sa mga instruksiyon na hali sa saiyang organisasyon—dawa dai pa nin nangyayaring trahedya. Halimbawa, dinagka an gabos na magsaray sa saindang harong nin suplay nin kakanon saka tubig na igo para sa pirang semana. May koneksiyon sa instruksiyon na ini, an elder na si Anton na naglilingkod sa Kyiv nagsabi: ‘Inandam kami kan organisasyon ni Jehova para sa masakit na mga sitwasyon, asin nagpapasalamat kami diyan. An pagkaigwa nin radyo saka nin suplay nin kakanon asin nin tubig talagang nakapagligtas kan samong buhay.’ Nagpapasalamat kaming marhay na sinunod kan mga tugang an instruksiyon na ini ta nakapagtao ini nin panahon sa sangang opisina na maorganisar an kinakaipuhan na mga pag-ayuda.”

Ano an namatian kan mga tugang kan maresibi na ninda an ayudang ini? Si Mykola asin Zinaida, na nakaistar sa Kharkiv, nagsabi nin arog kaini manungod sa saindang namamatian: “Naabot an puso mi kan pagmalasakit nindo. Salamat na marhay sa kakanon saka bulong. Nahiling mi nanggad an kamot ni Jehova dahil digdi.” Si Valentyna, na nakaistar man sa Kharkiv, nagsabi: “Kan magpuon an giyera, nagin grabe an pila sa mga groseri. Kun minsan, dai makakabakal kan mga kinakaipuhan. Pero aram asin nahiling ni Jehova an problemang ini. Nagpili siya nin mga brother na madistribwir nin mga ayuda sa mga harong, asin an laog kan mga iyan iyo talaga an mga kinakaipuhan! Sa arog kaining dipisil na mga kamugtakan, pag garo baga mayo nang paglaom an sitwasyon, namamatian saka nahihiling an pagmalasakit ni Jehova asin kan saiyang organisasyon sa espesyal na paagi. . . . Magayunon nanggad na mamatian an saiyang napapanahon asin kinakaipuhan na marhay na tabang asin suporta.”

Si Yevhen asin Iryna, na naghali sa Mariupol, nagsabi: “Nagpapasalamat kaming marhay sa saindong pagmalasakit saka suporta sa samong pamilya. Talagang napapanahon iyan. An totoo, kan inot, paghuna mi mga produkto sana an laog kan mga kahon na ini, pero kan binukasan mi na an mga iyan, narealisar mi na kaiba digdi an pagkamuot nindo!”

Siguradong nahihiling nindo kun paano ginamit ni Jehova an saiyang espiritu para giyahan an saiyang mga lingkod tanganing maihatod ninda an mga ayudang ini sa tahaw nin “mga giyera asin mga bareta manungod sa mga giyera.” Dakula man an naitabang kan saindong mga donasyon sa pambilog na kinaban na gibuhon na an kadaklan itinao paagi sa donate.jw.org. Pinapasalamatan na marhay an saindong pagigin bukas-palad!

Pagtao nin Ayuda sa Pinakamarikas Asin Pinakaligtas na Paaging Posible

1. 

   Pebrero 24, 2022: Inaprubaran kan Coordinators’ Committee an pondo para sa pag-ayuda sa Ukraine, na nakatabang sa sangang opisina na mapunan an pagtao nin mga ayuda

2. 

   Pebrero 24–Marso 8, 2022: Nagpuon an sangang opisina sa Ukraine na magbakal nin mga gamit sa saindang nasyon asin idinistribwir an mga iyan paagi sa mga Disaster Relief Committee. Nagpuon man na mag-andam an sangang opisina sa pag-ako saka pagdistribwir nin mga ayuda haling Poland

3. 

   Marso 9, 2022: Inaprubaran kan Coordinators’ Committee an paghatod nin mga ayuda sa Ukraine

4. 

   Marso 10–12, 2022: May ginibong plano para testingon na maghatod nin kakanon saka mga suplay haling Poland pasiring sa Lviv, Ukraine

5. 

   Marso 13, 2022: Pigtesting an pagpadara nin kakanon saka mga suplay haling Poland pasiring sa Lviv, Ukraine

6. 

   Marso 14–16, 2022: Sa sarong Assembly Hall na harani sa Poznan, Poland, inorganisar an mga boluntaryo sa Local Design/Construction para magpatos nin mga ayuda na may laog na mga kakanon saka mga gamit para sa kalinigan

7. 

   Marso 17, 2022: Apat na aldaw pakatapos kan mapangganang pagtesting, 13 toneladang ayuda an pinunan na ibiyahe pasiring sa border kan Ukraine

8. 

   Marso 21–27, 2022: Arog kan ginibo kan nainot, an natatadang mga ayuda pinatos sa Poland dangan ipinadara sa Ukraine asin idinistribwir sa laog nin 24 oras sa mga lugar na nangangaipo

9. 

   Marso 28, 2022: Mayo pang 20 aldaw pagkatapos na maaprubaran, 100 na toneladang kakanon, mga gamit para sa kalinigan, asin medikal na mga suplay an naipadara sa Ukraine

Sagkod sa ngunyan, labing 190 toneladang mga ayuda an naipadara kan Mga Saksi ni Jehova sa Ukraine.