Mga Literature Cart—Nagtatao nin “Patotoo sa Gabos na Nasyon”

Sa laog nin labing sampulong taon, nagin parte na kan satong ministeryo an mga literature cart asin nakua kaiyan an atensiyon kan mga tawo. Sa bilog na kinaban, pamilyar na diyan an mga tawo. An disenyo kaiyan dai lang nakakakua nin atensiyon kundi praktikal man. Posibleng marhay na mauyon kamo ki Asenata, sarong sister sa Poland, na nagsabi: “Simple sana an disenyo kan mga cart pero magayon iyan paghilingon. Pasil iyan i-set up saka ilipat-lipat.”

Naisip na daw nindo kun paano dinisenyo asin ginibo an mga cart?

Sarong Epektibong Disenyo

Kan 2001, sa pag-aprubar kan Namamahalang Grupo, pigtesting kan mga tugang ta sa France an manlain-lain na pamamaagi nin pampublikong pagpapatotoo, kaiba na an paggamit nin mga cart. Pinurbaran ninda an iba-ibang disenyo. Halimbawa, pig-customize ninda an mga trolley nin bagahe saka nin groseri para diyan idispley asin isaray an mga literatura. Pag-abot nin panahon, an sangang opisina sa France nagpili nin sarong disenyo na dakul na taon na ginamit nin mga parahayag.

Naugmang marhay an mga tugang sa France sa nagin resulta kan ginibo nindang pagtesting nin manlain-lain na pamamaagi nin pampublikong pagpapatotoo. Kaya kan 2011, inaprubaran kan Namamahalang Grupo an sarong pagtesting na gigibuhon sa New York City, U.S.A., na diyan gagamiton sa pampublikong pagpapatotoo an mga cart asin lamesa. Dai nahaloy, narealisar kan mga payunir na nagpartisipar sa programa na dakul an bentaha kan paggamit nin cart, arog kan pagigin madali kaiyan na ilipat-lipat. Nagtao man an mga payunir nin praktikal na mga suhestiyon kun paano pa mapapagayon an disenyo kan mga cart. An nainot na mga kahoy na cart na mano-manong ginibo medyo magabat kaya masakit iyan darahon pasakat asin pababa sa mga hagyan. Kaya binago an disenyo kaiyan para magin tama sana an gian pero dai man maipapalid nin duros. Kaiba man sa bagong disenyo kaiyan an mas darakula asin mas matibay na mga ruweda na magayon gamiton maski sa lubak-lubak na mga agihan. Dugang pa, linagan man iyan nin sadit na kahon para magin sarayan nin ekstrang mga literatura.

Nagin mapanggana an pagtesting na iyan! Kaya kan 2012, inaprubaran kan Namamahalang Grupo an paggamit nin mga cart sa bilog na kinaban. Nakakua an mga tugang nin manufacturer na puwedeng maggibo kaiyan nin bultuhan gamit an magian pero matibay na mga materyales.

Sa paglihis nin mga taon, may ginibong saradit na pagbabago tanganing mas mapagayon pa an mga cart. Halimbawa, kan 2015, linagan nin takop na plastik an atubangan kaiyan para dai mabasâ nin uran. Naapresyar iyan ni Dina, na nakaistar sa nasyon nin Georgia. An sabi niya, “May sadiring ‘kurukapote’ na man su cart para maprotektaran an mga publikasyon.” Kan 2017, naggibo man nin mga magnetic poster para sa nagkapirang lengguwahe. Si Tomasz, sarong brother na taga Poland, nagsabi: “Kaidto, matrabaho pag maribay nin poster dahil adhesive poster idto. Kaya magayunon na ideya an paggamit nin mga magnetic poster.” Kan 2019, may mga ginibo pang pagbabago sa mga materyales kan cart pati man sa paggibo kaiyan tanganing magin mas matagal pa iyan.

Paggibo nin mga Literature Cart

Saro sanang manufacturer an naggigibo kan mga literature cart dangan idinidistribwir iyan sa bilog na kinaban. Sa ngunyan, an sarong cart nagkakantidad nin mga Php 2,340 ($43 U.S.), dai pa kabali an shipping saka iba pang mga gastos. Kun susumahon, mga labing Php 871 milyon ($16 milyon U.S.) na ngunyan an nagastos sa mga cart, asin labing 420,000 na an naipadara sa mga kongregasyon sa bilog na kinaban.

Para magamit sa pinakamarahay na paagi an mga donasyon, pig-o-order nin bultuhan an mga literature cart. Dugang pa, an mga kongregasyon puwede na man ngunyan mag-order nin mga piyesa asin hirahayon an mga cart imbes na ribayan iyan.

Paggamit nin mga Cart Para Magpatotoo

Gustong-gusto kan mga parahayag sa bilog na kinaban an paggamit nin mga literature cart. Si Martina, na taga Ghana, nagsabi: “Sa kadaklan na pamamaagi kan satong pagmiministeryo, kita an nagrarani sa mga tawo. An gusto ko sa cart witnessing, an mga tawo an nagrarani sato. Dawa an mga nag-aaragi puwedeng mapatotoohan.”

Sa saro pang nasyon sa Aprika, may lalaking nagrani sa cart asin nagkua nin mga publikasyon sa lengguwahe niya. Pakalihis nin sarong semana, nagbuwelta siya asin nagsabi: “Binasa ko su gabos na literatura. Mahalagang marhay an laog kan mga ’yan. Ipapabasa ko ’yan sa mga kapamilya ko sa baryo mi,” na mga 500 kilometros an rayo. Pakalihis nin duwang bulan, nagbalik siya asin nagsabi: “Binasa kan mga tawo sa baryo mi su gabos na literatura; ugmahon sinda sa nabasa ninda. Gusto nindang magin Saksi ni Jehova. Pero may mga hapot sinda. Halimbawa, aram ninda na para mabawtismuhan, kaipuhan sindang ilubog sa tubig. Kaya lang, mayong salog na harani sa baryo mi. Kaipuhan mi tabing magdigdi para magpabawtismo?” Naggibo nin areglo an mga parahayag para makontak an lalaking ini nin sarong payunir na nagtataram kan lengguwahe niya. Puon kaidto, regular na sindang nagba-Bible study kan payunir.

Nakakaugmang mahiling na ginagamit an mga literature cart para maghulit “sa bilog na kinaban bilang patotoo sa gabos na nasyon.” (Mateo 24:14) Paano nababayadan an mga gastos sa paggibo kaiyan? Paagi sa mga donasyon sa pambilog na kinaban na gibuhon, na an dakul diyan ipinadara paagi sa donate.jw.org. Salamat sa saindong pagigin bukas-palad.