Espesyal na Kampanya Para Makapuon nin Pag-adal sa Bibliya sa Setyembre

Sa Setyembre, maghihinguwa kitang marhay na alukan nin pag-adal sa Bibliya an lambang kagharong, gamit an brosyur na Mabuhay nin Maugma Sagkod Pa Man! An mga parahayag puwedeng mag-auxiliary payunir na may kahagadan na 30 oras. Paano ta gigibuhon an espesyal na kampanyang ini?

• Sa Inot na Pakikipag-ulay: Gamiton an likod na cover kan brosyur para mapukaw an interes kan kaulay, asin hinguwahon na maidemonstrar an pag-adal. Girumdumon an mga dating nagpahiling nin interes, kaiba na an mga dinadalaw liwat. Dawa dai sinda nag-ako nin pag-adal kaidto, puwede sindang magin interesado sa bago niyatong paagi nin pag-adal asin brosyur. Dai dapat iwalat an mga brosyur sa mga harong na mayong tawo o iiba sa mga surat sa mga dai man nagpahiling nin interes kaidto. An Komite sa Paglilingkod kan Kongregasyon puwedeng mag-areglo nin dagdag na pagtiripon sa paglilingkod sa bulan na iyan.

• Iba Pang Oportunidad: Kun an kongregasyon nindo naggagamit nin mga literature cart, idispley an brosyur na Mabuhay nin Maugma Sagkod Pa Man! Sabihon sa mga nagpahiling nin interes na apuwera sa brosyur, puwede sindang mag-ako nin libreng pag-adal sa Bibliya. Idemonstrar sa halipot an pag-adal sa Bibliya, o iareglar na gibuhon iyan sa ibang panahon. An paraataman sa paglilingkod puwedeng gumibo nin areglo na an kuwalipikadong mga parahayag magduman sa mga lugar nin negosyo sa saindong teritoryo para mag-alok nin pag-adal sa Bibliya. Puwede ka man mag-alok nin pag-adal sa Bibliya sa mga katrabaho o sa mga nanunumpungan mo mantang impormal na nagpapatotoo.

Pinagbutan kita ni Jesus na “gumibo . . . nin mga disipulo,” na “tinutukduan sinda.” (Mat 28:19, 20) Matabangan lugod kita kan espesyal na kampanyang ini na magibo an katuyuhan na ini, gamit an Mabuhay nin Maugma Sagkod Pa Man!