Espesyal na Kampanya sa Pagwaras kan Bagong Brosyur
1 Dakol na tawo ngonyan an napupurisaw huli sa mga kamugtakan sa kinaban, alagad dikit sana an nakakasabot kun taano ta arog kaiyan an situwasyon, kun ano an mangyayari sa ngapit, asin kun ano an dapat nindang gibohon tanganing makaligtas sa nagdadangadang na paghokom. (Ezeq. 9:4) Tangani na tabangan sinda na maaraman an kahulogan kan satong mga panahon, sarong espesyal na kampanya sa pagwaras kan bagong brosyur na Magdanay Kamong Mapagbantay! an gigibohon sa bilog na nasyon poon sa Lunes, Marso 21, sagkod sa Domingo, Abril 17.
2 Puedeng ialok an brosyur kun nasa ministeryo sa harong-harong, kun nagdadalaw liwat, kun naghuhulit nin impormal, o kun nagpapatotoo sa pampublikong mga lugar. Minsan siring, dai maninigong iwaras nin basta na sana an Magdanay Kamong Mapagbantay! Imbes, iwawaras an mga brosyur solamente sa mga nagpapaheling nin interes sa sinasabi kan Biblia manongod sa kahulogan kan mga pangyayari sa kinaban. An mga dai nagpapaheling nin interes sa mensahe puedeng alokan na sana nin pulyeto.
3 Puede nindong makua an atension nin sarong tawo paagi sa pagsabing:
◼ “Dakol na tawo an nahahadit manongod sa grabeng mga problema asin labi-labi kanakakakubhan na mga pangyayari na lakop ngonyan. [Magsambit nin sarong halimbawa na aram sa lokal.] Aram daw nindo na ihinula sa Biblia an siring na mga bagay? [Pasimbagon. Dangan basahon an sarong teksto na angay para sa sinambit na halimbawa, arog kan Mateo 24:3, 7, 8; Lucas 21:7, 10, 11; o 2 Timoteo 3:1-5.] Ihinahayag kan Biblia an kahulogan kan satong mga panahon asin kun ano an nakatagama para sa katawohan. Boot daw nindong makaaram nin orog pa? [Pasimbagon. Ialok an brosyur kun nagpapaheling nin interes.] An brosyur na ini makukua na daing bayad. Kun gusto nindong magtao nin kadikit na donasyon para sa samong pambilog na kinaban na gibohon, maoogma kaming akoon iyan.”
4 O puede nindong manompongan na epektibo an pagdolok na ini:
4◼ “Dakol ngonyan an napupurisaw huli sa labi-labi kanakakakubhan na mga pangyayari o huli sa grabeng personal na trahedya. An nagkapira nag-iisip-isip kun taano ta dai nag-iinterbenir an Dios tangani na olangon an siring na mga bagay. Sinisierto sa sato kan Biblia na sa dai mahahaloy mahiro na an Dios tangani na haleon an pagdusa nin katawohan. Mangnoha an mga pakinabang na itatao nin Dios sa katawohan. [Basahon an Salmo 37:10, 11.] Boot daw nindong makaaram nin orog pa?” Magkonklusyon siring kan sinabi sa enotan.
5 Pagmaigotan na kuanon an ngaran asin adres kan lambang tawo na nag-ako nin kopya kan brosyur, asin iareglo na magbalik tangani na kultibaron an interes. An mga suhestion kun paano ini magigibo maluwas sa isyu kan An Satong Ministeryo sa Kahadean na Abril 2005. Kun an saro nagpapaheling nin odok na interes sa enot na pagdalaw, tibaad ensegida makapoon kamo nin pag-adal sa Biblia na ginagamit magsalang an Magdanay Kamong Mapagbantay! o ibang publikasyon, arog kan brosyur na Kahagadan.
6 Makukua an mga kopya kan bagong brosyur pagkatapos kan Pagtiripon sa Paglilingkod na pinag-oolayan an artikulong ini. Isinusuherir na an mga parahayag asin payunir kumua sana nguna kan ikakapasakamot ninda sa enot na pirang aldaw kan kampanya. Logod na bendisyonan ni Jehova an espesyal na aktibidad na ini para sa kaomawan nia asin para sa kapakinabangan kan mga sadiosan an puso sa gabos na lugar.—Sal. 90:17.