Biyernes, Hulyo 18
Ginibo niya kita na magin sarong kahadian, mga saserdote kan saiyang Diyos asin Ama.—Kap. 1:6.
Sarong limitadong bilang nin mga disipulo ni Cristo an linahidan nin banal na espiritu, asin igwa sinda nin espesyal na relasyon ki Jehova. An 144,000 na ini maglilingkod bilang mga saserdote sa langit kaiba ni Jesus. (Kap. 14:1) An Banal kan tabernakulo nagrerepresentar sa saindang kamugtakan bilang pinaniaki sa espiritu mantang nasa daga bilang mga aki nin Diyos. (Roma 8:15-17) An Kabanal-banali nagrerepresentar sa langit, kun sain nag-iirok si Jehova. An “kurtina” na nagseseparar sa Banal asin sa Kabanal-banali nagrerepresentar sa pisikal na hawak ni Jesus na ulang sa paglaog niya sa langit bilang an nangungurog na Halangkaw na Saserdote kan espirituwal na templo. Paagi sa pagtao kan saiyang pisikal na hawak bilang atang para sa katawuhan, binuksan ni Jesus an dalan pasiring sa buhay sa langit para sa gabos na linahidan na Kristiyano. Dapat man nindang itao an saindang pisikal na hawak para mag-ako kan saindang balos sa langit.—Heb. 10:19, 20; 1 Cor. 15:50. w23.10 28 ¶13
Sabado, Hulyo 19
Kukulangon ako nin panahon kun isasaysay ko pa an manungod ki Gideon.—Heb. 11:32.
Nagdanay na kalmado si Gideon kan kritikaron siya kan mga Efraimita. (Huk. 8:1-3) Bako siyang anggot na suminimbag. Nagpahiling siya nin kababaan nin pag-iisip paagi sa pagdangog sa saindang mga reklamo, asin mataktika niyang pinakalma an mainit na sitwasyon. Inaarog si Gideon kan madunong na mga elder paagi sa pagdangog na marhay asin pagigin kalmado pag kinikritika. (Sant. 3:13) Kaya nakakakontribwir sinda sa katuninungan kan kongregasyon. Kan umawon si Gideon huli sa kapangganahan niya sa Midian, itinao niya an onra ki Jehova. (Huk. 8:22, 23) Paano puwedeng arugon si Gideon kan ninombrahan na mga lalaki? Dapat nindang itao ki Jehova an kaumawan sa mga nagibo ninda. (1 Cor. 4:6, 7) Halimbawa, kun komendaran an sarong elder huli sa abilidad niya sa pagtutukdo, puwede niyang darahon an atensiyon sa gikanan kan instruksiyon, an Tataramon nin Diyos, o sa pagsasanay na inaako ta hali sa organisasyon ni Jehova. Puwede man na pag-isipan kan mga elder kun baga an saindang paagi nin pagtutukdo nakakakua nin sobrang atensiyon sa saindang sadiri. w23.06 4 ¶7-8
Domingo, Hulyo 20
An mga kaisipan ko bako nindong mga kaisipan.—Isa. 55:8.
Kun dai itinatao sa sato an hinahagad ta sa pamibi, puwede tang ihapot sa satong sadiri, ‘Tama daw an ipinapamibi ko?’ Sa parati, iniisip niyato na aram ta kun ano an pinakamarahay para sa sato. Pero an mga ipinapamibi ta tibaad bako man talaga an pinakamarahay. Kun ipinapamibi ta an manungod sa sarong problema, tibaad igwa pa nin mas marahay na solusyon sa problemang iyan kisa sa solusyon na hinahagad ta. Asin an iba sa hinahagad ta tibaad bakong kauyon kan kabutan ni Jehova. (1 Juan 5:14) Halimbawa, pag-isipan an manungod sa mga magurang na namibi ki Jehova na magdanay sa katotoohan an aki ninda. Garo baga angay man na hagadon iyan. Alagad, dai pipiriton ni Jehova an siisay man sa sato na paglingkudan siya. Gusto niya na gabos kita, pati na an satong mga aki, pilion na sambahon siya. (Deu. 10:12, 13; 30:19, 20) Kaya tibaad mas marahay na hagadon kan mga magurang ki Jehova na tabangan sindang maabot an puso kan aki ninda tanganing mapahiro ining kamutan si Jehova asin magin amigo Niya.—Tal. 22:6; Efe. 6:4. w23.11 21 ¶5; 23 ¶12