Hulyo

Gabos na sinabi asin ginibo ni Jesus, kaiba na an mga milagro na ginibo niya, perpektong naarog an kaisipan asin pagmati kan saiyang Ama. (Juan 14:9) Ano an manunudan ta sa mga milagro ni Jesus? Namumutan na marhay kita ni Jesus asin kan saiyang Ama. Mantang nasa daga, ipinahiling ni Jesus kun gurano niya kanamumutan an mga tawo paagi sa paggamit kan saiyang kapangyarihan na magmilagro para tabangan an mga nagsasakit. Sarong beses, duwang lalaking buta an nakimahirak na marhay saiya para magpatabang. (Mat. 20:​30-34) Mangnuhon na “nahirak na marhay” si Jesus dangan pinaumayan niya sinda. An Griegong pandiwa na ginamit digdi na itrinadusir na “nahirak na marhay” nanunungod sa grabeng pagmalasakit na namamati sa kalaog-laugi nin sarong tawo. An grabeng pagmalasakit na iyan, na sarong kapahayagan nin pagkamuot, nagpahiro man ki Jesus na pakakanon an mga nagugutom asin paumayan an sarong may leproso. (Mat. 15:32; Mar. 1:41) Makakasigurado kita na si Jehova, an Diyos nin “mapagpadangat na pagmalasakit,” asin an saiyang Aki namumuot na marhay sa sato asin nakukulgan sa satong pagsakit. (Luc. 1:78; 1 Ped. 5:7) Sigurado nanggad na gustong-gusto na nindang halion an gabos na problema na nagpapasakit sa katawuhan! w23.04 3 ¶4-5

Puwede kitang gumibo nin praktikal na mga lakdang tanganing mabawasan an pagkabantad ta sa salang mga kaisipan asin ideya na popular sa sistema ni Satanas. Puwede tang panuon an satong isip nin marahay na mga kaisipan paagi sa pagbasa asin pag-adal nin Bibliya. An pag-atender sa mga pagtiripon asin pagpartisipar sa ministeryo makakatabang man na maprotektaran ta an satong kaisipan. Saka nanunuga si Jehova na dai niya tutugutan na mapaatubang kita sa sugot na dai ta makakaya. (1 Cor. 10:​12, 13) Kaipuhan kan lambang saro sa sato na urog pang mamibi kisa kasuarin man para magdanay na maimbod ki Jehova sa masakit na huring mga aldaw na ini. Gusto ni Jehova na ‘sabihon ta sa saiya an laog kan satong puso’ paagi sa pamibi. (Sal. 62:8) Umawon si Jehova asin pasalamatan siya sa gabos na ginigibo niya. Hagadon sa saiya na tabangan kang magin makusog an buot sa ministeryo. Makimahirak sa saiya na tabangan kang makayanan an ano man na problema asin mapaglabanan an ano man na sugot na tibaad napapaatubang sa saimo. Dai pagtugutan an ano man o an siisay man na papunduhon ka sa regular na pamimibi ki Jehova. w23.05 7 ¶17-18

Taano ta nag-aatender kita sa mga pagtiripon kan kongregasyon? Panginot na, para umawon si Jehova. (Sal. 26:12; 111:1) Nag-aatender man kita sa mga pagtiripon tanganing mapakusog ta an lambang saro sa masakit na mga panahon na ini. (1 Tes. 5:11) Pag nagtataas kita nin kamot para magkomento, nagigibo ta an duwang bagay na iyan. Pero pag-abot sa pagkomento, tibaad magin dipisil iyan para sa sato. Tibaad ninenerbiyos kita na magkomento, o tibaad gustong-gusto ta kutana na parating magkomento pero bihira kitang maapod. Ano an makakatabang sa sato? Sinabi ni apostol Pablo na dapat tang isaisip an ‘pagpakusog sa lambang saro.’ Pag iniisip ta na puwede tang mapakusog an iba dawa sa satong simpleng kapahayagan nin pagtubod, dai kita gayong ninerbiyuson na magkomento. Asin kun bihira kitang maapod, puwede tang ikaugma na an iba sa kongregasyon nagkaigwa nin oportunidad na magkomento.​—1 Ped. 3:8. w23.04 20 ¶1-3

May ipinaluwas na anunsiyo! An mga Judio na mga 70 taon nang bihag sa Babilonya, puwede nang bumalik sa saindang sadiring lugar, an Israel. (Esd. 1:​2-4) Si Jehova sana an makakagibo kaiyan. Sa parati, dai nagpapatalingkas nin mga bihag an Babilonya. (Isa. 14:​4, 17) Pero nadaog an Babilonya, asin an bagong tagapamahala kaiyan nagsabi na an mga Judio puwede nang maghali. An lambang Judio, lalo na an mga payo nin pamilya, kaipuhan na magdesisyon: maghali sa Babilonya o magdanay diyan. Posibleng dai nagin madali an desisyon na iyan. Dakul sa sainda an gurang nang marhay para sa halawig na pagbaklay. Asin huling kadaklan sa mga Judio namundag na sa Babilonya, iyan sana an istaran na aram ninda. Para sa sainda, an Israel dagang tinubuan kan mga apuon lang ninda. Minalataw na may nagkapirang Judio na nagin mayaman sa Babilonya, kaya posibleng nagin masakit sa sainda na bayaan an saindang komportableng mga harong o mga negosyo asin mag-istar sa dai ninda kabisadong lugar. w23.05 14 ¶1-2

Dinadagka kita kan Tataramon nin Diyos na padagos na patalubuon an pakatagal, pagmalasakit, asin pagkamuot. An Lucas 21:19 nagsasabi: “Paagi sa saindong pakatagal maiingatan nindo an saindong buhay.” Sinasabi man sa Colosas 3:12: “Isulot nindo an . . . pagmalasakit.” Asin an 1 Tesalonica 4:​9, 10 nagsasabi: “Tinukduan mismo kamo nin Diyos na kamutan an lambang saro. . . . Pero dinadagka mi kamo, mga tugang, na padagos nindong gibuhon iyan nin mas urog pa.” An gabos na tekstong ini isinurat para sa mga disipulong nakapahiling na nin pakatagal, pagmalasakit, asin pagkamuot. Alagad, kinaipuhan nindang padagos na patalubuon an mga kuwalidad na ini. Iyo man an dapat tang gibuhon. Para matabangan ka na magibo iyan, pag-isipan kun paano ipinahiling kan inot na mga Kristiyano an mga kuwalidad na iyan. Dangan maaaraman mo kun paano mo maaarog an mga disipulong idto asin, bilang resulta, magigin andam ka para sa dakulang kasakitan. Dangan pag nagpuon na an dakulang kasakitan, aram mo na kun paano magtagal asin magigin determinado ka na padagos na magtagal. w23.07 2-3 ¶4, 8

Kita man kabilang sa mga linahidan o sa “ibang mga karnero,” kaipuhan tang padagos na maglakaw sa “Dalan nin Kabanalan” huling pinapagdanay kita kaiyan sa espirituwal na paraiso asin magiya iyan sa sato pasiring sa maabot na mga bendisyon kan Kahadian. (Juan 10:16) Puon kan 1919 C.E., minilyon na mga lalaki, mga babayi, asin mga aki an naghali sa Dakulang Babilonya, an pambilog na kinaban na imperyo nin palsong relihiyon, asin nagpuon na maglakaw sa piguratibong dalan na iyan. Kan an mga Judio maghali sa Babilonya, sinigurado ni Jehova na mahali an mga ulang sa saindang dalan. (Isa. 57:14) Kumusta man an “Dalan nin Kabanalan” sa modernong panahon? Dakul na siglo bago 1919, ginamit ni Jehova an mga lalaking may takot sa Diyos para magtabang sa paglinig kan dalan paluwas sa Dakulang Babilonya. (Ikumparar an Isaias 40:3.) Naggibo sinda nin kinakaipuhan na preparasyon—an espirituwal na paggibo nin tinampo tanganing sa huri magin posible para sa mga tawong may tamang kamugtakan nin puso na makaluwas sa Dakulang Babilonya asin makalaog sa espirituwal na paraiso, kun sain ibinalik an dalisay na pagsamba ki Jehova. w23.05 15-16 ¶8-9

Gusto ni Jehova na maugma asin gikan sa buot kitang maglingkod sa saiya. (2 Cor. 9:7) Kaya dapat daw na padagos na maghinguwa na abuton an sarong espirituwal na pasuhan dawa bako kitang motibado na gibuhon iyan? Pag-isipan an halimbawa ni apostol Pablo. Sinabi niya: ‘Istrikto kong dinidisiplina an sakuyang hawak asin ginigibo iyan na magin siring sa uripon.’ (1 Cor. 9:​25-27, nota sa ibaba.) Pinuwersa ni Pablo an sadiri niya na gibuhon an tama dawa kan bako siyang motibado na gibuhon iyan. Ikinaugma daw ni Jehova an paglilingkod ni Pablo? Siyerto nanggad! Asin binalusan siya ni Jehova sa saiyang mga paghihinguwa. (2 Tim. 4:​7, 8) Sa kaparehong paagi, nauugma si Jehova na mahiling kitang naghihinguwa na abuton an satong pasuhan dawa pag bako kitang motibado na gibuhon iyan. Nauugma siya ta dawa ngani bako man sa gabos na pagkakataon gustong-gusto tang gibuhon iyan, aram niya na ginigibo ta iyan huling namumutan ta siya. Kun paanong binendisyunan ni Jehova si Pablo, bebendisyunan Niya man an satong mga paghihinguwa. (Sal. 126:5) Asin mantang naeeksperyensiyahan ta an bendisyon ni Jehova, puwede pa nganing magpuon nang kumusog an satong motibasyon. w23.05 29 ¶9-10

Ikinumparar ni apostol Pablo idtong mga dai makakaligtas sa aldaw ni Jehova sa mga tawong nagtuturog. Dai ninda aram an mga nangyayari sa palibot o an paglihis nin oras. Kaya dai ninda aram kun may importanteng mga nangyayari o kun paano mahiro huli kaiyan. Kadaklan sa mga tawo sa ngunyan turog sa espirituwal. (Roma 11:8) Dai sinda nagtutubod sa mga patunay na nabubuhay na kita sa “huring mga aldaw” asin na an dakulang kasakitan madali nang mag-abot. (2 Ped. 3:​3, 4) Minsan siring, aram ta na an ipinasabong na konseho na magdanay na mata mas nagigin apurado sa kada aldaw na minaagi. (1 Tes. 5:6) Kaya, dapat kitang magdanay na kalmado asin marigon. Taano? Tanganing dai kita mapalabot sa mga isyu ngunyan sa pulitika o sosyedad. An mga panggigipit na kumampi sa mga isyung iyan lalo pang magrabe mantang lalo pang nagrarani an aldaw ni Jehova. Minsan siring, dai ta kaipuhan na mahadit sa kun ano an dapat na gibuhon ta. Puwede kitang tabangan kan espiritu nin Diyos na magkaigwa nin kalmado saka marigon na kamugtakan nin isip asin makagibo nin madunong na mga desisyon.​—Luc. 12:​11, 12. w23.06 10 ¶6-7

Ano an nagsasabong sa isip mo pag nadadangog mo an pangaran na Samson? Posibleng marhay na an naiisip mo sarong lalaking may pambihirang kusog. Tama iyan. Pero nakagibo si Samson nin salang desisyon na nagresulta nin grabeng pagsakit. Dawa arog kaiyan, nagpokus si Jehova sa ginibong kaimbudan ni Samson, asin ipinasurat Niya iyan sa Bibliya para makinabang kita. Ginamit ni Jehova si Samson na gibuhon an pambihirang mga bagay para tabangan an pinili Niyang banwaan, an Israel. Ginatos na taon pagkagadan ni Samson, pinasabngan ni Jehova si apostol Pablo na iiba an pangaran ni Samson sa listahan nin mga lalaking may pambihirang pagtubod. (Heb. 11:​32-34) Mapapakusog kita kan halimbawa ni Samson. Nagsarig siya ki Jehova dawa sa dipisil na mga kamugtakan. Mapapakusog kita saka makakanuod nin iba pang praktikal na mga leksiyon sa halimbawa niya. w23.09 2 ¶1-2

Puwede tang pakusugon an satong pakatagal paagi sa parati asin udok na pagsabi ki Jehova kan satong mga ikinakahadit. (1 Tes. 5:17) Tibaad mayo ka man nin inaagihan na grabeng mga problema sa ngunyan. Dawa arog kaiyan, naghahagad ka daw nin paggiya ki Jehova pag nakulgan an buot mo, napupurisaw ka, o dai mo aram kun ano an gigibuhon? Kun pirmi kang mahagad nin tabang sa satong Diyos sa mga problema mo sa aroaldaw ngunyan, dai ka mag-aalangan na gibuhon iyan pag napaatubang ka sa darakulang problema sa maabot. Dangan makakapagtiwala ka na aram niya nanggad kun nuarin asin kun paano ka niya tatabangan. (Sal. 27:​1, 3) Mas dakula an posibilidad na makatagal kita sa maabot na dakulang kasakitan kun tatagalan na niyato an mga pagbalo sa ngunyan. (Roma 5:3) Taano ta nasabi niyato iyan? Nahiling kan dakul na tugang na an lambang pagbalo sa pagtubod na natagalan ninda nakatabang sa sainda na makayanan an sunod na pagbalo. Dinalisay sinda kan pakatagal, na pinapakusog an pagtubod ninda na andam saka gusto ni Jehova na magtabang. Huli kaiyan, natabangan sinda kan pagtubod na matagalan an sunod na pagbalo.​—Sant. 1:​2-4. w23.07 3 ¶7-8

Pinapahiro si Jehova kan saiyang kapakumbabaan asin pagmalasakit na magin rasonable. Halimbawa, ipinahiling ni Jehova an saiyang kapakumbabaan kan madali na niyang laglagon an maraot na mga tawo sa Sodoma. Paagi sa saiyang mga anghel, sinabi ni Jehova sa matanos na si Lot na magdulag pasiring sa kabukidan. Natakot si Lot na magduman. Kaya nakimahirak siya na tugutan siya saka an pamilya niya na magpaili sa Zoar, sarong sadit na banwa na nakatagamang laglagon. Puwede kutanang iinsistir ni Jehova na sunudon ni Lot nin eksakto an Saiyang pagbuot. Imbes, itinao niya an hinahagad ni Lot, dawa ngani mangahulugan iyan na dai niya na lalaglagon an Zoar. (Gen. 19:​18-22) Pakalihis nin mga siglo, nagpahiling si Jehova nin pagmalasakit sa mga nakaistar sa Nineve. Isinugo niya an propetang si Jonas para ipaisi na madali nang laglagon an siyudad asin an mga maraot na nakaistar diyan. Pero kan magsulsol an mga taga Nineve, nahirak si Jehova sa sainda asin dai na niya linaglag an siyudad.​—Jon. 3:​1, 10; 4:​10, 11. w23.07 21 ¶5

Ano an manunudan ta sa halimbawa ni Jehoas? Garo siya sarong kahoy na hababaw an pagkakagamot asin nakadepende sa suporta nin sarong pantukod. Kan an pantukod—si Jehoiada—mawara asin mag-abot an mga duros kan apostasya, natumba si Jehoas. Mapuwersa kaining iniilustrar na an pagkatakot ta sa Diyos dai dapat na nakadepende sana sa marahay na impluwensiya kan satong mga kapwa Kristiyano, pati kan satong mga kapamilya. Tanganing magdanay na makusog sa espirituwal, dapat na pakusugon ta an sato mismong debosyon asin pagkatakot sa Diyos paagi sa regular na pag-adal, paghurop-hurop, asin pagpamibi. (Jer. 17:​7, 8; Col. 2:​6, 7) Bako man talagang dakulon an hinahagad sato ni Jehova. An hinahagad ni Jehova sato mababasa sa Eclesiastes 12:​13, na an sabi: “Magkaigwa ka nin pagkatakot sa tunay na Diyos asin utubon mo an saiyang mga tugon, huling iyo ini an bilog na obligasyon nin tawo.” Kun may pagkatakot kita sa Diyos, maaatubang ta an mga pagbalo sa maabot na panahon asin makakatindog kitang marigon. Mayo nin makakaraot sa satong pakikiamigo ki Jehova. w23.06 19 ¶17-19

An garantiya nin Diyos inintrodusir sa arog kaining paagi: “An Saro na nakatukaw sa trono nagsabi.” (Kap. 21:5a) Iniintrodusir kan mga tataramon na ini an saro sa tulo sanang pagkakataon sa libro nin Kapahayagan kun sain si Jehova an nagtataram sa mga bisyon. Kaya an garantiyang ini itinao, bako nin sarong makapangyarihan na anghel, ni kan binuhay liwat na si Jesus, kundi ni Jehova mismo! Kaya idinuduon kaiyan an pagigin mapagtitiwalaan kan sunod na mga tataramon. Taano man? Huling si Jehova “dai makakapagputik.” (Tito 1:2) Kaya mapagtitiwalaan ta nanggad an mga tataramon na mababasa sa Kapahayagan 21:​5, 6. Pag-isipan an tataramon na “Uya!” An Griegong tataramon na itrinadusir na “uya!” pauruutrong ginamit sa libro nin Kapahayagan. Ano an sunod na sinabi nin Diyos? Sinabi niya: “Ginigibo kong bago an gabos na bagay.” Iyo, manungod sa mga pagbabago sa maabot an sinasabi ni Jehova, pero para sa saiya an panugang ini sigurado nanggad na magkakatotoo kaya sinasabi niya an mga pagbabagong ini na garo baga nangyayari na.​—Isa. 46:10. w23.11 3-4 ¶7-8

Nasakitan si apostol Pedro na paglabanan an saiyang mga kaluyahan. Konsideraron ta an pirang halimbawa. Kan ipinaliwanag ni Jesus kun paano siya magsasakit asin magagadan bilang kautuban kan propesiya sa Bibliya, sinaway siya ni Pedro. (Mar. 8:​31-33) Pauruutrong nagdidiriskusyunan si Pedro saka an iba pang mga apostol kun siisay an pinakaurog sa sainda. (Mar. 9:​33, 34) Kan huring banggi bago magadan si Jesus, nagin pabigla-bigla si Pedro asin tinigbas kaini an talinga kan sarong lalaki. (Juan 18:10) Kan banggi man sanang idto, nadaog nin takot si Pedro asin tulong beses niyang pignigaran na bisto niya an amigo niyang si Jesus. (Mar. 14:​66-72) Dahil diyan naghibi si Pedro sa sobrang kamunduan. Dai ni Jesus sinukuan an pinangluluyahan nin buot na apostol niya. Pagkatapos na buhayon liwat si Jesus, tinawan niya si Pedro nin oportunidad na ipahiling na namumutan pa man giraray siya kaini. Sinabihan ni Jesus si Pedro na mapakumbabang maglingkod bilang pastor kan saiyang mga karnero. (Juan 21:​15-17) Andam si Pedro na gibuhon an ipinapagibo sa saiya. Kaya yaon siya kaidto sa Jerusalem kan aldaw nin Pentecostes asin kabilang siya sa mga inot na linahidan kan banal na espiritu. w23.09 22 ¶6-7

“Pasturan nindo an aripumpon nin Diyos,” an sadol ni apostol Pedro sa kapwa niya mga elder. (1 Ped. 5:​1-4) Kun saro kang elder, aram niyamo na namumutan mo an saimong mga tugang asin gusto mong pasturan sinda. Minsan siring, tibaad kun minsan pagmati mo sibot-sibot o pagalon ka nang marhay kaya dai mo na kayang gibuhon an asignasyon na iyan. Ano an puwede mong gibuhon? Sabihon mo ki Jehova an gabos na ikinakahadit mo. Si Pedro nagsurat: “Kun an saro naglilingkod sa iba, gibuhon niya iyan na nagsasarig sa kusog na itinatao nin Diyos.” (1 Ped. 4:11) Tibaad an saimong mga tugang napapaatubang sa mga problema na dai lubos na masosolusyunan sa sistemang ini nin mga bagay. Pero tandaan na “an panginot na pastor,” si Jesu-Cristo, makakatabang sa sainda nin labi pa sa kaya mong gibuhon. Magigibo niya iyan sa ngunyan asin sa bagong kinaban. An gusto man sana nin Diyos na gibuhon kan mga elder iyo na kamutan an saindang mga tugang, pasturan an saindang mga tugang, asin na magin “mga halimbawa sa aripumpon.” w23.09 29-30 ¶13-14

Dapat niyatong likayan na magbasar sa pangangatanusan nin tawo. Kun mamansayon ta an mga bagay-bagay uyon sa punto de vista nin tawo, tibaad mabaliwala ta si Jehova asin an mga pamantayan niya. (1 Cor. 3:19) “An kadunungan kan kinaban na ini” sa parati nakakaakit sa makalaman na mga pagmawot. An pira sa mga Kristiyano sa Pergamo asin Tiatira naimpluwensiyahan nin idolatroso asin imoral na mga gibo-gibo na komun sa mga siyudad na idto. Tinawan ni Jesus nin magabat na konseho an duwang kongregasyon huli sa pagkunsinti ninda sa seksuwal na imoralidad. (Kap. 2:​14, 20) Sa ngunyan, napapaatubang kita sa panggigipit na arugon an salang mga kaisipan. Tibaad sabihon kan mga kapamilya saka kamidbid ta na sobra man kita kaistrikto asin dagkahon kita na magkompromiso. Halimbawa, tibaad sabihon ninda na bako man maraot na magpadara sa satong mga pagmawot asin na an mga pamantayan kan Bibliya sa moral lihis na sa panahon. Kun minsan, tibaad isipon niyato na an itinataong mga instruksiyon ni Jehova bakong gayong malinaw. Tibaad matentaran kita na “maglampas sa mga bagay na nasusurat.”​—1 Cor. 4:6. w23.07 16 ¶10-11

Si Maria, na ina ni Jesus, nangaipo nin kusog. Mayo siyang agom; alagad, magbabados siya. Mayo siya nin eksperyensiya sa pagpadakula nin sadiri niyang aki, pero aatamanon niya an sarong aking lalaki na iyo an magigin Mesiyas. Asin huling dai pa lamang si Maria nakikidurog, paano niya ipapaliwanag an gabos na ini sa saiyang katratong si Jose? (Luc. 1:​26-33) Paano si Maria nag-ako nin kusog? Naghagad siya nin tabang sa iba. Halimbawa, naghagad siya ki Gabriel nin dagdag na impormasyon manungod sa asignasyon. (Luc. 1:34) Dai nahaloy pakalihis kaiyan, nagbaklay siya pasiring sa “mabulod na rehiyon” kan Juda para bisitahon an paryente niyang si Elizabeth. Kinomendaran ni Elizabeth si Maria asin pinasabngan siya ni Jehova na ihiras an sarong nakakapakusog na propesiya manungod sa dai pa namumundag na umboy ni Maria. (Luc. 1:​39-45) Sinabi ni Maria na “ipinahiling [ni Jehova] an saiyang kapangyarihan paagi sa saiyang takyag.” (Luc. 1:​46-51) Paagi ki Gabriel asin ki Elizabeth, pinakusog ni Jehova si Maria. w23.10 14-15 ¶10-12

Sarong limitadong bilang nin mga disipulo ni Cristo an linahidan nin banal na espiritu, asin igwa sinda nin espesyal na relasyon ki Jehova. An 144,000 na ini maglilingkod bilang mga saserdote sa langit kaiba ni Jesus. (Kap. 14:1) An Banal kan tabernakulo nagrerepresentar sa saindang kamugtakan bilang pinaniaki sa espiritu mantang nasa daga bilang mga aki nin Diyos. (Roma 8:​15-17) An Kabanal-banali nagrerepresentar sa langit, kun sain nag-iirok si Jehova. An “kurtina” na nagseseparar sa Banal asin sa Kabanal-banali nagrerepresentar sa pisikal na hawak ni Jesus na ulang sa paglaog niya sa langit bilang an nangungurog na Halangkaw na Saserdote kan espirituwal na templo. Paagi sa pagtao kan saiyang pisikal na hawak bilang atang para sa katawuhan, binuksan ni Jesus an dalan pasiring sa buhay sa langit para sa gabos na linahidan na Kristiyano. Dapat man nindang itao an saindang pisikal na hawak para mag-ako kan saindang balos sa langit.​—Heb. 10:​19, 20; 1 Cor. 15:50. w23.10 28 ¶13

Nagdanay na kalmado si Gideon kan kritikaron siya kan mga Efraimita. (Huk. 8:​1-3) Bako siyang anggot na suminimbag. Nagpahiling siya nin kababaan nin pag-iisip paagi sa pagdangog sa saindang mga reklamo, asin mataktika niyang pinakalma an mainit na sitwasyon. Inaarog si Gideon kan madunong na mga elder paagi sa pagdangog na marhay asin pagigin kalmado pag kinikritika. (Sant. 3:13) Kaya nakakakontribwir sinda sa katuninungan kan kongregasyon. Kan umawon si Gideon huli sa kapangganahan niya sa Midian, itinao niya an onra ki Jehova. (Huk. 8:​22, 23) Paano puwedeng arugon si Gideon kan ninombrahan na mga lalaki? Dapat nindang itao ki Jehova an kaumawan sa mga nagibo ninda. (1 Cor. 4:​6, 7) Halimbawa, kun komendaran an sarong elder huli sa abilidad niya sa pagtutukdo, puwede niyang darahon an atensiyon sa gikanan kan instruksiyon, an Tataramon nin Diyos, o sa pagsasanay na inaako ta hali sa organisasyon ni Jehova. Puwede man na pag-isipan kan mga elder kun baga an saindang paagi nin pagtutukdo nakakakua nin sobrang atensiyon sa saindang sadiri. w23.06 4 ¶7-8

Kun dai itinatao sa sato an hinahagad ta sa pamibi, puwede tang ihapot sa satong sadiri, ‘Tama daw an ipinapamibi ko?’ Sa parati, iniisip niyato na aram ta kun ano an pinakamarahay para sa sato. Pero an mga ipinapamibi ta tibaad bako man talaga an pinakamarahay. Kun ipinapamibi ta an manungod sa sarong problema, tibaad igwa pa nin mas marahay na solusyon sa problemang iyan kisa sa solusyon na hinahagad ta. Asin an iba sa hinahagad ta tibaad bakong kauyon kan kabutan ni Jehova. (1 Juan 5:14) Halimbawa, pag-isipan an manungod sa mga magurang na namibi ki Jehova na magdanay sa katotoohan an aki ninda. Garo baga angay man na hagadon iyan. Alagad, dai pipiriton ni Jehova an siisay man sa sato na paglingkudan siya. Gusto niya na gabos kita, pati na an satong mga aki, pilion na sambahon siya. (Deu. 10:​12, 13; 30:​19, 20) Kaya tibaad mas marahay na hagadon kan mga magurang ki Jehova na tabangan sindang maabot an puso kan aki ninda tanganing mapahiro ining kamutan si Jehova asin magin amigo Niya.​—Tal. 22:6; Efe. 6:4. w23.11 21 ¶5; 23 ¶12

Taano ta an pagranga sa iba sarong mahalagang ekspresyon kan satong pagkamuot? Sigun sa sarong reperensiya sa Bibliya, an tataramon na ginamit ni Pablo para sa termino na “rangahon” nangangahulugan na “pagtindog kataid nin saro para pakusugon siya pag nag-aagi siya nin grabeng problema.” Kaya, pag pigraranga ta an sarong kapagtubod na nasa kasakitan, tinatabangan ta siya na makabangon asin na magpadagos sa paglakaw sa dalan pasiring sa buhay. Sa kada beses na rinaranga ta an sarong tugang, ipinapahayag ta an satong pagkamuot para sa satong kapagtubod. (2 Cor. 7:​6, 7, 13) An pagmalasakit asin pagranga magkakonektar na marhay. Sa paanong paagi? An sarong mapagmalasakit na tawo napapahirong rangahon an iba asin naghihinguwang pagianon an saindang pagsakit. Kaya inot, nakakamati kita nin pagmalasakit; dangan, nagtatao kita nin pagranga. Mangnuhon kun paano ikinonektar ni Pablo an pagmalasakit ni Jehova sa pagranga na itinatao Niya. Ilinadawan ni Pablo si Jehova bilang “an Ama nin mamumuton na pagkahirak asin an Diyos nin gabos na karangahan.”​—2 Cor. 1:3. w23.11 9-10 ¶8-10

An gabos na parasunod ni Cristo puwedeng mag-agi nin kasakitan. Pag-isipan an halimbawa ni apostol Pablo. Sinabi niya sa mga taga Tesalonica: “Kan kaibanan mi baga kamo, pirmi ming sinasabi sa saindo na maagi kita nin kasakitan, asin iyan an nangyari.” (1 Tes. 3:4) Asin sa mga taga Corinto, isinurat niya: “Habo ming dai nindo naaaraman, mga tugang, an mapadapit sa kasakitan na naeksperyensiyahan mi . . . Mala ta dai na kami nakakasigurado maski kan buhay mi.” (2 Cor. 1:8; 11:​23-27) Inaasahan man kan mga Kristiyano ngunyan na makakaeksperyensiya sinda nin manlain-lain na kasakitan. (2 Tim. 3:12) Mantang nagpapahiling ka nin pagtubod ki Jesus asin nagsusunod sa saiya, tibaad an saimong mga amigo o kapamilya magin maringis sa saimo. Nagkaproblema ka daw sa trabaho huli sa pagigin determinado mo na magin onesto sa gabos na bagay? (Heb. 13:18) Napaatubang ka daw sa pagkontra kan gobyerno huli sa paghiras mo sa iba kan saimong paglaom? Minsan siring, ano man na kasakitan na tibaad maeksperyensiyahan ta, sinasabi ni Pablo na dapat kitang mag-ugma. w23.12 10-11 ¶9-10

Tinagalan ni Jacob an dakul na problema. An duwang aki ni Jacob, si Simeon asin si Levi, nagdara nin kasusupgan sa pamilya asin katuyawan sa pangaran ni Jehova. Apuwera kaiyan, nagadan an namumutan na agom ni Jacob na si Raquel mantang ipinapangaki an ikaduwa nindang aki. Asin huli sa grabeng tiggutom, napiritan si Jacob na magbalyo sa daga nin Ehipto dawa gurang na siya. (Gen. 35:​16-19; 37:28; 45:​9-11, 28) Sa ibong kan gabos na iyan, dai nawara an pagtubod ni Jacob ki Jehova asin sa Saiyang mga panuga. Bilang balos, ipinahiling ni Jehova ki Jacob na inuuyunan Niya ini. Halimbawa, binendisyunan ni Jehova si Jacob nin mga pagsasadiri. Asin isipa na sana an grabeng pasasalamat ni Jacob ki Jehova kan makaibanan niya giraray si Jose—an saiyang aki na pighuna niyang haloy nang gadan! Huli sa pagigin dayupot ni Jacob ki Jehova, nakayanan niya an mga kasakitan. (Gen. 30:43; 32:​9, 10; 46:​28-30) Kun magdadanay kitang dayupot ki Jehova, makakayanan ta man an dai inaasahan na mga problema. w23.04 15 ¶6-7

An Salmo 23 sarong awit na nagpapahayag nin kumpiyansa sa pagkamuot asin mamumuton na pag-ataman ni Jehova. Ilinaladawan digdi ni David, an kagsurat kan salmong ini, an dayupot na relasyon ninda ni Jehova, an saiyang Pastor. Kampante si David sa paggiya saiya ni Jehova, asin lubos siyang nagsasarig Saiya. Aram ni David na papahilingan siya ni Jehova nin pagkamuot sa bilog niyang buhay. Taano ta arog kaiyan kakusog an saiyang kumpiyansa? Namati ni David na inaataman siyang marhay huling pirming itinatao ni Jehova an mga pangangaipo niya. Igwa man si David nin dayupot na pakikiamigo ki Jehova asin kan pag-uyon Niya. Kaya sigurado siya na ano man an mangyari sa maabot, padagos na itatao ni Jehova an saiyang mga pangangaipo. An pagtitiwala ni David sa pagkamuot ni Jehova mas makusog nanggad kisa sa saiyang mga ikinakahadit asin tinatawan siya kaiyan nin dakulang kaugmahan asin pagkakontento.​—Sal. 16:11. w24.01 29 ¶12-13

Puon kan Giyera Mundiyal II, an banwaan ni Jehova sa dakul na kadagaan talingkas na nakapaghulit. Sa katunayan, uminuswag an gibuhon. Sa ngunyan an mga miyembro kan Namamahalang Grupo padagos na nagpapagiya ki Cristo. Gusto ninda na an itinatao nindang mga instruksiyon sa mga tugang nagpapahiling kan pagmansay ni Jehova sa mga bagay-bagay. Dangan, ipinapaabot man kan mga paraataman nin sirkito saka kan mga elder an mga paggiyang iyan sa mga kongregasyon. An ninombrahan na mga elder nasa “tuong kamot” ni Cristo. (Kap. 2:1) Siyempre, an mga elder na ini bakong mga perpekto asin napapasala. May beses na napasala man si Moises saka si Josue, siring man an mga apostol. (Bil. 20:12; Jos. 9:​14, 15; Roma 3:23) Minsan siring, ginigiyahan na marhay ni Cristo an maimbod na uripon asin an ninombrahan na mga elder, asin padagos niya iyan na gigibuhon. Kaya igwa nanggad kita nin dahilan na magtiwala sa paggiyang itinatao niya paagi sa mga ninombrahan na manginot sa sato. w24.02 23-24 ¶13-14

Sa ngunyan mapapaugma ta man si Jehova paagi sa pagtaram manungod sa saiya sa paaging nagpapahiling na nagpapasalamat asin namumutan ta siyang marhay. Pag nasa ministeryo kita, pirmi tang isinasaisip na an panginot tang katuyuhan iyo na tabangan an mga tawo na magin harani ki Jehova, na mamati ninda an arog kan namamatian ta sa satong namumutan na Ama. (Sant. 4:8) Nauugma kitang ipahiling sa mga tawo kun paano si Jehova ilinaladawan kan Bibliya, na ihinahayag an saiyang pagkamuot, hustisya, kadunungan, kapangyarihan, asin iba pang magagayon na kuwalidad. Nauumaw ta man si Jehova asin napapaugma siya paagi sa paghihinguwa na arugon siya. Pag ginigibo ta iyan, mapapalain kita sa maraot na kinaban na ini. Puwedeng marisa iyan kan mga tawo asin tibaad mag-isip sinda kun taano. (Mat. 5:​14-16) Mantang nakakaibanan ta sinda sa aroaldaw, puwedeng magkaigwa kita nin pagkakataon na ipaliwanag sainda kun taano. Bilang resulta, napaparani sa satong Diyos an sinserong mga tawo. Pag inuumaw ta si Jehova sa arog kaining mga paagi, napapaugma ta siya.​—1 Tim. 2:​3, 4. w24.02 10 ¶7

Tanganing magin maygurang na Kristiyano, kaipuhan mong makanuod nin praktikal na mga kasanayan. Makakatabang ini sa saimo na magibo an mga responsabilidad sa kongregasyon, magkaigwa nin trabaho para masuportaran an sadiri o an saimong pamilya, asin tanganing magkaigwa nin marahay na relasyon sa iba. Halimbawa, magin mahusay sa pagbasa asin pagsurat. Sinasabi kan Bibliya na an sarong tawo na maugma asin mapanggana sa buhay nagtatao nin panahon kada aldaw para magbasa asin maghurop-hurop kan Tataramon nin Diyos. (Sal. 1:​1-3) Paagi sa pagbasa nin Bibliya aroaldaw, nasasabutan niya an kaisipan ni Jehova, na makakatabang sa saiya na makapag-isip nin malinaw asin magkaigwa nin marahay na pangangatanusan. (Tal. 1:​3, 4) Kaipuhan kan satong mga tugang an may kakayahan na mga lalaki na makakatao nin base sa Bibliyang instruksiyon asin sadol. Kun mahusay kang magbasa asin magsurat, makakapag-andam ka nin nakakapagtukdo asin nakakapakusog sa pagtubod na mga pahayag asin komento. Makakagibo ka man nin kapaki-pakinabang na mga nota na matabang saimo para mapakusog mo an saimong pagtubod asin mapakusog mo an iba. w23.12 26-27 ¶9-11

Pag nakakamati ka nin takot, hurop-hurupon an gigibuhon ni Jehova sa maabot pag mayo na si Satanas. Ipinahiling sa sarong dramatization sa pangrehiyon na kumbensiyon kan 2014 an sarong ama na ipinapakipag-ulay sa saiyang pamilya kun paano puwedeng basahon an mga tataramon sa 2 Timoteo 3:​1-5 kun an magigin buhay sa Paraiso an ihinula sa mga bersikulong iyan: “Sa bagong kinaban, magigin maugmang marhay na panahon iyan. Huli ta an mga tawo magigin mamumuton sa kapwa, mamumuton sa espirituwal na mga kayamanan, hababa an buot, mapakumbaba, mga paraumaw sa Diyos, masinunod sa mga magurang, mapagpasalamat, maimbod, mapagpadangat na marhay sa saindang pamilya, bukas sa kasunduan, pirming nagtataram nin positibo dapit sa iba, may pagpupugol sa sadiri, mahuyo, mamumuton sa karahayan, mapagkakatiwalaan, mapagpahunod, may kababaan an pag-iisip, mamumuton sa Diyos imbes na sa pagpasiram-siram, totoong may debosyon sa Diyos; asin magin dayupot ka sa mga tawong ini.” Ipinapakipag-ulay mo daw sa saimong pamilya o sa saimong mga kapagtubod kun ano an magigin buhay sa bagong kinaban? w24.01 6 ¶13-14

Nakakapakusog nanggad na maaraman na inuuyunan ni Jehova an saiyang mga lingkod bilang grupo! Sinasabi kan Bibliya: “Nauugma si Jehova sa saiyang banwaan.” (Sal. 149:4) Pero kun minsan, may nagkapira na sa sobrang pagkadisganar tibaad napapaisip, ‘Inuuyunan daw ako ni Jehova bilang indibidwal?’ May nagkapirang maimbod na lingkod ni Jehova kan mga panahon kan Bibliya na nakamati man nin arog kaiyan na mga pagduda. (1 Sam. 1:​6-10; Job 29:​2, 4; Sal. 51:11) Malinaw na sinasabi kan Bibliya na puwedeng makamtan kan bakong perpektong mga tawo an pag-uyon ni Jehova. Paano? Dapat kitang magpahiling nin pagtubod ki Jesu-Cristo asin magpabawtismo. (Juan 3:16) Sa paaging iyan, ipinapahiling ta sa publiko na pinagsulsulan ta na an satong mga kasalan asin nanuga sa Diyos na gigibuhon ta an saiyang kabutan. (Gibo 2:38; 3:19) Nauugma si Jehova pag ginibo ta an mga lakdang na iyan para magkaigwa kita nin haraning relasyon sa saiya. Sagkod na padagos tang ginigibo an satong pinakamakakaya para utubon an satong pagdusay, padagos man kitang uuyunan ni Jehova asin ibibilang na saiyang dayupot na mga amigo.​—Sal. 25:14. w24.03 26 ¶1-2

Puwede tang maarog an mga disipulo paagi sa padagos na paghuhulit dawa pag pinapundo kita kan sekular na mga awtoridad. Makakapagtiwala man kita na tatabangan kita ni Jehova na mautob an satong ministeryo. Kaya ipamibi na tawan kita nin kusog nin buot saka kadunungan asin hagadon an tabang ni Jehova na makayanan an mga problema. Dakul sa sato an nakakaeksperyensiya nin pisikal o emosyonal na mga kadipisilan, pagkagadan nin sarong mahal sa buhay, sarong masakit na sitwasyon sa pamilya, persekusyon, o iba pang mga problema. Asin lalo pa ngani na nagin dipisil atubangon an mga iyan huli sa pandemya asin mga giyera. Sabihon ki Jehova an gabos na nasa puso mo. Sabihon sa saiya an manungod sa sitwasyon mo, na garo sinasabi mo iyan sa sarong dayupot na amigo. Magtiwala na “mahiro [si Jehova] para sa saimo.” (Sal. 37:​3, 5) An pagigin matiyaga sa pagpamibi makakatabang sa sato na “magtagal pag nag-aagi nin kasakitan.” (Roma 12:12) Aram ni Jehova an inaagihan kan saiyang mga parasamba—“dinadangog niya an paghagad ninda nin tabang.”​—Sal. 145:​18, 19. w23.05 5-6 ¶12-15

Pag may mga importante kitang dapat pagdesisyunan, kaipuhan tang pag-isipan “kun ano an kabutan ni Jehova” dangan humiro kauyon kaiyan. (Efe. 5:17) Paagi sa pag-aram kan mga prinsipyo sa Bibliya na aplikado sa satong sitwasyon, naghihinguwa kita na magkaigwa kan kaisipan nin Diyos sa bagay na iyan. Dangan pag inaplikar ta an saiyang mga prinsipyo, mas posibleng marhay na makagibo kita nin marahay na mga desisyon. Gusto “kan saro na maraot,” an satong kaiwal na si Satanas, na magin sibot kitang marhay sa mga pinagmamaigutan kan kinaban na ini tanganing mawaran na kita nin panahon sa paglilingkod sa Diyos. (1 Juan 5:19) Madalion sana na magin panginot sa sarong Kristiyano an materyal na mga bagay, sekular na edukasyon, o an saiyang karera kisa sa mga oportunidad na maglingkod ki Jehova. Pag mangyari iyan, nagpaparisa iyan na impluwensiyado na siya kan kaisipan kan kinaban. Siyempre, bako man maraot an mga bagay na iyan, pero dai iyan dapat nuarin man magin panginot sa satong buhay. w24.03 24 ¶16-17