Agosto

Mangnuhon an duwang importanteng punto sa sinambit na salmo: (1) An matanos na mga tawo napapaatubang sa mga problema. (2) Iliniligtas kita ni Jehova sa satong mga kasakitan. Paano kita iliniligtas ni Jehova? An sarong paagi iyo an pagtabang sa sato na magkaigwa nin realistikong pagmansay sa buhay sa sistemang ini nin mga bagay. Dawa ngani nanunuga si Jehova na magigin maugma kita sa paglilingkod sa saiya, dai niya man ginagarantiya na dai kita magkakaigwa nin problema ngunyan. (Isa. 66:14) Dinadagka niya kita na magpokus sa satong puturo—sa panahon na magkakaigwa kita kan buhay na gusto niyang makamtan ta sagkod pa man. (2 Cor. 4:​16-18) Pero mantang dai pa iyan nag-aabot, tinatabangan niya kita na makapagpadagos sa kada aldaw. (Lam. 3:​22-24) Ano an puwede tang manudan sa mga halimbawa kan maimbod na mga parasamba ni Jehova, kan mga panahon kan Bibliya asin sa satong panahon? Puwede kitang mapaatubang sa dai inaasahan na mga problema. Pero kun magsasarig kita ki Jehova, pirmi niya kitang aalalayan.​—Sal. 55:22. w23.04 14-15 ¶3-4

Makakanuod kita sa halimbawa ni Jose asin Maria, na nagin andam na magsunod sa haralangkaw na awtoridad dawa pag bako iyan kumbenyente. (Luc. 2:​1-6) Kan mga siyam na bulan nang bados si Maria, nabalo an pagigin masinunod ninda ni Jose. Si Augusto, na tagapamahala kan Imperyo nin Roma, ipinagbuot an pagpaparehistro. Kinaipuhan ni Jose asin Maria na magbaklay pa-Betlehem, na maabot sa 150 kilometros an distansiya asin nag-aagi sa mabulod na lugar. An pagbaklay na iyan bakong madali, lalo na para ki Maria. Tibaad ikinahadit nindang mag-agom an kaligtasan ni Maria asin kan ipinagbabados kaini. Paano kun sa dalan siya abutan nin pangangaki? An dara-dara niya sa saiyang tulak iyo an magigin Mesiyas. Dahil daw diyan dai na sinda masunod sa gobyerno? Dai tinugutan ni Jose asin Maria an arin man sa mga kahaditan na iyan para magduwa-duwa kun baga masunod sinda sa ley. Binendisyunan ni Jehova an saindang pagigin masinunod. Ligtas na nakaabot si Maria sa Betlehem, nangaki nin sarong umboy na marahay an salud, asin nakatabang pa ngani para mautob an propesiya sa Bibliya!—Mik. 5:2. w23.10 8 ¶9; 9 ¶11-12

Paano kun iniisip mo pa sanang magkomento sa mga pagtiripon pignenerbiyos ka na? Tibaad makatabang saimo na mag-andam na marhay. (Tal. 21:5) Pag mas pamilyar ka sa materyal na pag-aadalan, magigin mas pasil man sa saimo na magtaas nin kamot para magkomento. Siring man, gibuhon na halipot an saimong mga komento. (Tal. 15:23; 17:27) An halipot na simbag dai gayong nakakanerbiyos. Paagi sa pagtao nin halipot na komento gamit an sadiri mong mga tataramon, maipapahiling mo na nag-andam kang marhay asin na malinaw mong nasasabutan an pinag-aadalan. Paano kun pinurbaran mo na an nagkapira sa mga suhestiyon na ini pero grabe pa man giraray an nerbiyos mo pag nagkokomento ka nin labi sa saro o duwang beses? Makakasigurado ka na pinapahalagahan ni Jehova an saimong sinserong paghihinguwa na gibuhon an makakaya mo. (Luc. 21:​1-4) An paggibo kan satong pinakamakakaya dai nangangahulugan na papasakitan ta an sadiri ta. (Fil. 4:5) Determinaran kun ano an kaya mong gibuhon, magbugtak nin pasuhan para magibo iyan, asin mamibi na tawan ka nin kalmadong puso. Sa primero, puwede mong magin pasuhan na makapagtao nin halipot na komento. w23.04 21 ¶6-8

Ikinumparar kita ni apostol Pablo sa mga suldados na alerto asin nakasulot nin panggiyera. Inaasahan sa sarong suldados na nasa serbisyo na magin andam para sa pakikipaglaban sa gabos na panahon. Arog man kita kaiyan. Nagdadanay kitang andam para sa aldaw ni Jehova paagi sa pagsulot nin takop sa daghan na pagtubod saka pagkamuot asin helmet na paglaom. An takop sa daghan nagpoprotektar sa puso kan sarong suldados. An pagtubod asin an pagkamuot nagpoprotektar sa satong piguratibong puso. Makakatabang an mga iyan sa sato na padagos na maglingkod sa Diyos asin magsunod ki Jesus. An pagtubod nag-aasigurar sa sato na babalusan kita ni Jehova sa paghanap ta sa saiya nin bilog na puso. (Heb. 11:6) Papahiruon kita kaiyan na magdanay na maimbod sa satong lider, si Jesus, dawa pa mag-agi kita nin mga kasakitan. Mapapakusog ta an satong pagtubod para makayanan an mga kadipisilan sa buhay paagi sa pagkonsiderar sa mga halimbawa kan mga indibidwal sa modernong panahon na pinagdanay an saindang integridad sa ibong nin persekusyon o pagtios. Asin puwede tang malikayan an silo nin materyalismo paagi sa pag-arog sa mga indibidwal na nagpasimple kan saindang buhay para inuton an intereses kan Kahadian. w23.06 10 ¶8-9

An pagpupugol sa sadiri iyo an kakayahan kan saro na kontrulon an saiyang pagmati asin paggawi. Kaipuhan iyan para mapahiro kita na abuton an satong mga pasuhan, lalo na kun masakit abuton an sarong pasuhan o kun mayo kita nin motibasyon. Tandaan na an pagpupugol sa sadiri kabtang kan bunga kan espiritu, kaya hagadon ki Jehova an saiyang banal na espiritu para tabangan ka na mapatalubo an mahalagang kuwalidad na iyan. (Luc. 11:13; Gal. 5:​22, 23) Dai maghalat nin perpektong sitwasyon. Sa kinaban na ini, posibleng marhay na nungka kitang magkakaigwa nin perpektong sitwasyon. Kun hahalaton ta iyan, tibaad dai ta nuarin man maabot an satong pasuhan. Puwedeng kulang kita sa motibasyon huling an satong pasuhan garo masakiton na maabot. Kun arog kaiyan an sitwasyon mo, puwede mo daw banga-bangaon sa saradit an pasuhan mo? Kun pasuhan mo na patalubuon an sarong kuwalidad, puwede mo daw hinguwahon na ipahiling nguna iyan sa simpleng mga paagi? Kun pasuhan mo na basahon an bilog na Bibliya, puwede mo daw punan iyan paagi sa pag-iskedyul nin haralipot na oras nin pagbasa? w23.05 29 ¶11-13

Sa bilog na peryodo nin huring mga aldaw, padagos na ginamit ni Jehova an saiyang organisasyon para magtao nin dagos-dagos na suplay nin espirituwal na kakanon tanganing matabangan kita gabos na padagos na maglakaw sa “Dalan nin Kabanalan.” (Isa. 35:8; 48:17; 60:17) Masasabi ta na pag an saro nag-ako nin pag-adal sa Bibliya, nagkakaigwa siya nin oportunidad na maglakaw sa “Dalan nin Kabanalan.” May mga naglalakaw sa mayor na tinampong iyan sa halipot sanang distansiya dangan minahali na. An iba man determinado na padagos na maglakaw sagkod na makaabot sinda sa destinasyon. Ano an destinasyon na iyan? Para sa mga may paglaom na mabuhay sa langit, an “Dalan nin Kabanalan” minagiya pasiring sa “paraiso nin Diyos” sa langit. (Kap. 2:7) Para sa mga may paglaom na mabuhay sa daga, an mayor na tinampong iyan minagiya pasiring sa pagkaperpekto sa katapusan kan 1,000 taon. Kun naglalakaw ka ngunyan sa mayor na tinampong iyan, dai magsalingoy asin padagos na maglakaw diyan sagkod na matapos mo an pagbaklay pasiring sa bagong kinaban! w23.05 17 ¶15; 19 ¶16-18

Kun iisipon mo an gabos na ginibo ni Jehova para saimo, mapapahiro kang magpasalamat asin idusay sa saiya an saimong sadiri. (Sal. 116:​12-14) Sa Bibliya, tama sanang inaapod si Jehova bilang an Paratao nin “lambang marahay na balaog [asin] lambang perpektong regalo.” (Sant. 1:17) An pinakanangungurog sa mga balaog na iyan iyo an atang kan saiyang Aking si Jesus. Isipa na sana! Huli sa pantubos, nagin posible na magkaigwa ka nin dayupot na relasyon ki Jehova. Asin tinawan ka niya nin paglaom na mabuhay nin daing katapusan. (1 Juan 4:​9, 10) An pagdusay mo ki Jehova sarong paagi para maipahiling mo an saimong pagpapahalaga sa pinakadakulang kapahayagan nin pagkamuot kasuarin man, pati na sa iba pang mga bendisyon na itinao ni Jehova sa saimo.​—Deu. 16:17; 2 Cor. 5:15. w24.03 5 ¶8

Kun manungod sa mga pamantayan sa moral na ipinapalakop kan kinaban na ini, namamati ta nanggad an arog kan namati kan matanos na si Lot. “Grabe an pagkapurisaw [niya] sa daing pakundangan na paggawi kan mga tawong mayong pigsusunod na pamantayan,” huling aram niya na ikinakaungis kan satong Ama sa langit an maraot na paggawi. (2 Ped. 2:​7, 8) An pagkatakot asin pagkamuot sa Diyos an nagpahiro ki Lot na isikwal an hababang mga pamantayan sa moral kan mga tawo sa palibot niya. Napapalibutan man kita nin mga tawong daing gayo o mayo nganing paggalang sa mga pamantayan ni Jehova sa moral. Sa ibong kaiyan, puwede kitang magdanay na malinig sa moral kun papagdanayon ta an satong pagkamuot sa Diyos asin kun papatalubuon ta an tamang pagkatakot saiya. Para magibo iyan, nagtatao si Jehova nin mamumuton na pampakusog asin motibasyon paagi sa libro nin Talinhaga. An gabos na Kristiyano, mga lalaki asin mga babayi, hoben asin gurang, makikinabang na marhay sa pagkonsiderar kan madunong na sadol na mababasa sa librong iyan. Pag igwa kita nin pagkatakot ki Jehova, nag-iingat kita na dai maimpluwensiyahan nin salang paggawi kan iba. w23.06 20 ¶1-2; 21 ¶5

Tibaad nakaeksperyensiya ka nin pagkontra nin mga kapamilya, o tibaad isinakripisyo mo na magkaigwa nin mas dakul na materyal na mga bagay para inuton an intereses kan Kahadian. (Mat. 6:33) Kun iyo, makakasigurado ka na nahiling ni Jehova an gabos na ginibo mo para sa saiya. (Heb. 6:10) Posibleng marhay na naeksperyensiyahan mo na an pagigin totoo kan sinabi ni Jesus: “Mayong nagbaya nin harong o mga tugang na lalaki o mga tugang na babayi o ina o ama o mga aki o mga uma alang-alang sa sako asin alang-alang sa maugmang bareta an dai maako nin 100 na doble ngunyan sa panahon na ini—mga harong, mga tugang na lalaki, mga tugang na babayi, mga ina, mga aki, asin mga uma, na may kasabay na mga pagpersegir—tapos sa maabot na sistema nin mga bagay, nin buhay na daing katapusan.” (Mar. 10:​29, 30) An mga bendisyon na nakamtan mo nakakalabi nanggad kisa sa ano man na sakripisyong ginibo mo.​—Sal. 37:4. w24.03 9 ¶5

Kan mag-agi nin grabeng tiggutom an mga Kristiyano sa Judea, an mga tugang sa kongregasyon sa Antioquia “nagdesisyon . . . , sigun sa kakayahan kan kada saro, na magpadara nin ayuda sa mga tugang na nakaistar sa Judea.” (Gibo 11:​27-30) Dawa ngani medyo harayo an istaran kan mga tugang na naapektaran kan tiggutom, desidido an mga Kristiyano sa Antioquia na tabangan sinda. (1 Juan 3:​17, 18) Puwede man kitang magpahiling nin pagmalasakit sa ngunyan pag naaraman tang naapektaran nin kalamidad an satong mga kapagtubod. Tulos-tulos kitang minatabang—tibaad paagi sa paghapot sa mga elder kun puwede kitang magtabang sa sarong proyekto, paagi sa pagdonar sa pambilog na kinaban na gibuhon, o paagi sa pagpamibi para sa mga naapektaran kan kalamidad. Puwede man mangaipo nin tabang an mga tugang ta para sa panginot na mga pangangaipo ninda. Pag an satong Hadi, si Cristo Jesus, uminabot na para maghukom, lugod na abutan niya kita na nagpapahiling nin pagmalasakit tanganing maimbitaran niya kita na “manahon . . . an Kahadian.”​—Mat. 25:​34-40. w23.07 4 ¶9-10; 6 ¶12

Inarog ni Jesus an pagigin rasonable ni Jehova. Isinugo siya digdi sa daga para maghulit sa “mga nawawarang karnero . . . kan nasyon nin Israel.” Pero nagpahiling siya nin pagkarasonable mantang ginigibo niya an asignasyon na iyan. Sa sarong pagkakataon, sarong bakong Israelitang babayi an nakimahirak sa saiya na paumayan an aking babayi kaini na “nagsasakit nin grabe dahil sa demonyong nagsanib sa [aki].” May pagmalasakit na ginibo ni Jesus an hinagad saiya kan babayi asin pinaumayan an aki kaini. (Mat. 15:​21-28) Pag-isipan an saro pang halimbawa. Sa kapinunan kan saiyang ministeryo, sinabi ni Jesus: “An siisay man na nagninigar . . . na nagtutubod siya sa sako, ninigaran ko man . . . na disipulo ko siya.” (Mat. 10:33) Pero pignigaran niya daw si Pedro, na tulong beses siyang pignigaran? Dai. Kinonsiderar ni Jesus an pagsulsol asin pagtubod ni Pedro. Pagkatapos na buhayon liwat si Jesus, nagpahiling siya ki Pedro asin posibleng marhay na inasigurar niya na pinatawad niya na ini asin na namumutan niya pa man giraray ini. (Luc. 24:​33, 34) Parehong rasonable an Diyos na Jehova asin si Jesu-Cristo. Kumusta man kita? Inaasahan ni Jehova na magigin rasonable man kita. w23.07 21 ¶6-7

Anong mga asigurasyon an puwede tang sabihon sa mga nagdududa na magkakatotoo an panuga nin Diyos na Paraiso? Inot, si Jehova mismo an nanuga kaiyan. Sinasabi kan libro nin Kapahayagan: “An Saro na nakatukaw sa trono nagsabi: ‘Uya! Ginigibo kong bago an gabos na bagay.’” Igwa siya nin kadunungan, kapangyarihan, asin pagmawot na utubon an saiyang panuga. Ikaduwa, an kautuban kan saiyang panuga siguradong-sigurado na sa pagmansay ni Jehova, nangyayari na iyan. Tama sanang sabihon niya: “An mga tataramon na ini maimbod asin totoo. . . . Nautob na an mga iyan!” Ikatulo, pag may pinunan si Jehova na sarong bagay, mapanggana niyang tatapuson iyan, arog kan sinisigurado kan mga tataramon na “Ako an Alpha asin an Omega.” (Kap. 21:6) Papatunayan ni Jehova na si Satanas putikon asin dai Siya kayang papunduhon sa pag-utob kan Saiyang katuyuhan. Kaya pag may magsabing, “Garo sobra man kagayon kaiyan para paniwalaan,” basahon asin ipaliwanag an Kapahayagan 21:​5,6. Ipahiling kun paano ginagarantiyahan ni Jehova an saiyang panuga paagi sa paglaag diyan, sabi ngani, kan saiya mismong pirma.​—Isa. 65:16. w23.11 7 ¶18-19

Ginibo ni Jehova an promesang iyan ki Abraham kan 75 anyos na siya asin mayong aki. Nahiling daw ni Abraham an kautuban kan panugang iyan? Dai lubos. Pagkabalyo sa Salog nin Eufrates asin pagkatapos na maghalat nin 25 taon, nahiling ni Abraham an milagrosong pagkamundag kan aki niyang si Isaac, asin pakalihis nin 60 pang taon, namundag an mga makuapo niyang si Esau saka si Jacob. (Heb. 6:15) Pero dai lamang nahiling ni Abraham an saiyang mga gikan na magin sarong dakulang nasyon asin manahon an Dagang Panuga. Alagad, an maimbod na lalaking iyan nagkaigwa nin dayupot na pakikiamigo sa saiyang Kaglalang. (Sant. 2:23) Asin pag binuhay liwat si Abraham, siguradong mauugma siyang maaraman na an saiyang pagtubod asin pagpapasensiya, o pakatios, nagresulta nin mga bendisyon sa gabos na nasyon! (Gen. 22:18) Ano an leksiyon? Tibaad dai ta man tulos mahiling an kautuban kan gabos na panuga ni Jehova. Pero, kun mapasensiya kita arog ni Abraham, makakasigurado kitang babalusan kita ni Jehova ngunyan asin lalo na sa Saiyang ipinanugang bagong kinaban.​—Mar. 10:​29, 30. w23.08 24 ¶14

Kan hoben pa si Hading Uzias, mapakumbaba siya. Nanudan niya “na magkaigwa nin pagkatakot sa tunay na Diyos.” Asin binendisyunan ni Jehova an haros bilog na 68 taon na buhay niya. (2 Cron. 26:​1-4) Nadaog ni Uzias an dakul sa mga kalaban kan nasyon ninda asin pinakusog an depensa kan Jerusalem. (2 Cron. 26:​6-15) Siguradong naugma si Uzias sa gabos na tabang na itinao sa saiya nin Diyos. (Ecl. 3:​12, 13) Natuod na si Hading Uzias na pigsusunod kan iba an mga instruksiyon niya. Dahil diyan, inisip daw niya na magigibo niya an ano man na gustuhon niya? Buweno, sarong aldaw nagdesisyon siyang maglaog sa templo ni Jehova asin may kapangahasan na pinurbaran na magtutong nin insenso sa ibabaw kan altar, sarong gibuhon na dai itinutugot na gibuhon nin mga hadi. (2 Cron. 26:​16-18) Pinurbaran siyang itanos kan Halangkaw na Saserdoteng si Azarias, pero naanggot na marhay si Uzias. Makamumundo, rinaot ni Uzias an saiyang rekord nin maimbod na paglilingkod asin bilang padusa, nagkaleproso siya. (2 Cron. 26:​19-21) Bako kutang arog kaiyan an kinaabtan kan buhay niya kun nagdanay siyang mapakumbaba! w23.09 10 ¶9-10

Dawa kan pagkatapos na magin sarong linahidan na Kristiyano si apostol Pedro, kinaipuhan niyang paglabanan an saiyang mga kaluyahan. Kan 36 C.E., yaon si Pedro kan an bakong turing Hentil na si Cornelio lahidan kan banal na espiritu, na malinaw na ebidensiya na “an Diyos mayong pinapalain” asin na puwedeng magin kabtang kan Kristiyanong kongregasyon an mga Hentil. (Gibo 10:​34, 44, 45) Pagkatapos kaiyan, nagkakakan na si Pedro kaiba kan mga Hentil, sarong bagay na dai niya lamang gigibuhon kaidto. Minsan siring, para sa nagkapirang Kristiyanong Judio dai dapat iribang nagkakakan an mga Judio saka an mga Hentil. Kan an nagkapira na may arog kaiyan na pagmansay mag-abot sa Antioquia, ipinundo ni Pedro an pagkakan kaiba kan saiyang mga tugang na Hentil, na posibleng marhay na huli sa pagkatakot niya na mapaanggot an mga Kristiyanong Judio. Nahiling ni apostol Pablo an pagsagin-sagin na ini asin sinaway niya si Pedro sa atubangan kan gabos na iba pa. (Gal. 2:​13, 14) Sa ibong kan salang ginibo na ini ni Pedro, dai siya suminuko. w23.09 22 ¶8

Kun gigibuhon nindo an onestong pagsiyasat sa sadiri, tibaad mahiling nindo an nagkapirang kaluyahan nindo, pero dai kamo madisganar. ‘Mabuot an Kagurangnan,’ asin tatabangan niya kamong umuswag. (1 Ped. 2:3) Inaasigurar kita ni apostol Pedro: “An Diyos . . . iyo mismo an makumpleto kan saindong pagsasanay. Paparigunon niya kamo.” Namatian kaidto ni Pedro na bako siyang maninigo na makaibanan kan Aki nin Diyos. (Luc. 5:8) Pero huli sa mamumuton na suporta ni Jehova asin ni Jesus, dai suminuko si Pedro bilang parasunod ni Cristo. Sa siring, itinugot ki Pedro an “paglaog sa daing sagkod na Kahadian kan satuyang Kagurangnan asin Paraligtas na si Jesu-Cristo.” (2 Ped. 1:11) Magayunon nanggad na balos! Kun dai ka masuko arog kan ginibo ni Pedro asin tutugutan mong sanayon ka ni Jehova, makakamtan mo man an balos na buhay na daing katapusan. Magigibo mong ‘abuton an pasuhan kan saimong pagtubod, an saimong kaligtasan.’—1 Ped. 1:9. w23.09 31 ¶16-17

An suanoy na tabernakulo igwa nin sarong patyo—sarong nakukudalan na mahiwas na lugar kun sain ginigibo kan mga saserdote an saindang mga paninimbagan. Yaon sa patyo an dakulang altar na tanso para sa dulot na pigtututong asin an tansong planggana nin tubig na ginagamit kan mga saserdote para sa paglinig kan saindang sadiri bago ninda gibuhon an saindang sagradong paglilingkod. (Exo. 30:​17-20; 40:​6-8) Ngunyan, an natatada kan linahidan na mga tugang ni Cristo maimbod na naglilingkod sa daga sa patyong nasa laog kan espirituwal na templo. An pagkaigwa nin dakulang planggana nin tubig sarong mahalagang pagirumdom sa sainda, siring man sa gabos na Kristiyano, na magdanay na malinig sa moral asin espirituwal. Kun siring, sain naglilingkod an “dakulang kadaklan”? Nahiling sinda ni apostol Juan na “nakatindog sa atubangan kan trono,” na katumbas digdi sa daga kan patyong nasa luwas, kun sain “nagtatao sinda [sa Diyos] nin sagradong paglilingkod aldaw asin banggi sa saiyang templo.” (Kap. 7:​9, 13-15) Pinapahalagahan tang marhay an pagkaigwa niyato nin lugar sa areglo ni Jehova para sa dalisay na pagsamba! w23.10 28 ¶15-16

An sarong paagi na nagtatao si Jehova nin kusog sa sato iyo an pagtabang kan mga elder. (Isa. 32:​1, 2) Kaya pag nakakamati ka nin kahaditan, sabihon mo sa mga elder an manungod diyan. Pag nag-alok sinda nin tabang saimo, mapagpasalamat na akuon iyan. Paagi sainda, mapapakusog ka ni Jehova. An satong paglaom na basado sa Bibliya na buhay na daing sagkod—iyan man sa Paraiso digdi sa daga o sa Kahadian sa langit—makakapakusog man sa sato. (Roma 4:​3, 18, 19) An satuyang paglaom nagpapakusog sa sato na tagalan an mga pagbalo, ihulit an maugmang bareta, asin gibuhon an manlain-lain na asignasyon sa laog kan kongregasyon. (1 Tes. 1:3) An paglaom man na iyan an nagpakusog ki apostol Pablo. Siya ‘ginipit nin grabe,’ ‘naribaraw,’ ‘pinersegir,’ asin “bagsak na.” May mga pagkakataon pa ngani na nameligro an buhay niya. (2 Cor. 4:​8-10) Nagkua si Pablo nin kusog para makatagal paagi sa pagpokus sa saiyang paglaom. (2 Cor. 4:​16-18) Nagpokus si Pablo sa saiyang puturo—sa buhay na daing sagkod sa langit. Hinurop-hurop ni Pablo an paglaom na iyan, asin bilang resulta, “[nagkaigwa siya] nin panibagong kusog sa kada aldaw.” w23.10 15-16 ¶14-17

Pag namimibi, pag-isipan kun panahon na daw para simbagon ni Jehova an saimong pamibi. Tibaad iniisip ta na kaipuhan ta tulos an simbag sa satong mga pamibi. Pero, si Jehova an talagang nakakaaram kun nuarin an pinakamarahay na panahon na magtabang. (Heb. 4:16) Pag dai tulos itinatao sa sato an hinahagad ta, tibaad isipon tang an simbag ni Jehova ‘Dai.’ Pero puwedeng an simbag niya palan ‘Dai nguna.’ Halimbawa, sarong hoben na brother an namimibing maumayan sa saiyang hilang pero dai nagrahay an kondisyon kaini. Kun milagroso ining papaumayan ni Jehova, puwedeng magrason si Satanas na kaya sana nagpadagos sa paglilingkod ki Jehova an brother ta pinaumayan ini. (Job 1:​9-11; 2:4) Saro pa, igwa nang itinalaan na panahon si Jehova para paumayan an gabos na klase nin hilang. (Isa. 33:24; Kap. 21:​3, 4) Asin sagkod na dai pa iyan nangyayari, dai kita nag-aasa nin milagrosong mga pagpaumay. Kaya puwedeng hagadon kan brother ki Jehova na tawan siya nin kusog asin katuninungan nin isip para matagalan an hilang niya saka padagos na maimbod na makapaglingkod sa Diyos. w23.11 23 ¶13

Nakagibo si Samson nin seryosong pagkakasala, pero dai siya suminuko. Naghanap siya nin pagkakataon para mautob an itinao sa saiya nin Diyos na asignasyon na labanan an mga Filisteo. (Huk. 16:​28-30) Nakimahirak si Samson ki Jehova: “Tugutan mo akong makabalos sa mga Filisteo.” Sinimbag kan tunay na Diyos an pakiulay ni Samson asin ibinalik an pambihira kaining kusog. Bilang resulta, mas dakul siyang ginadan na mga Filisteo sa pagkakataon na ini kisa kan mga nakaagi. Dawa ngani nagsapar si Samson nin makulog na mga konsekwensiya kan nagibo niyang sála, dai siya nagpundo sa paghihinguwang gibuhon an kabutan ni Jehova. Dawa kun makagibo kita nin sála asin kaipuhan na sagwion o mawaran nin pribilehiyo, dai kita dapat sumuko. Tandaan, dai kita sinusukuan ni Jehova. (Sal. 103:​8, 9) Sa ibong kan satong nagibong mga sála, puwede pa man giraray kitang magin kapaki-pakinabang para ki Jehova, arog ni Samson. w23.09 6 ¶15-16

Nakakamtan mo an pag-uyon ni Jehova huli sa saimong pakatagal. Dai buot sabihon kaiyan na nauugma si Jehova na nag-aagi ka nin mga kasakitan o problema. An inuuyunan nin Diyos ika. An saimong pakatagal nagbubunga nin pagigin inuuyunan nin Diyos. Magayunon nanggad na bendisyon! (Sal. 5:12) Girumdumon si Abraham na tinagalan an mga pagbalong inagihan niya asin nakamtan an pag-uyon nin Diyos. Ibinilang siya ni Jehova na Saiyang amigo asin inapod na matanos. (Gen. 15:6; Roma 4:​13, 22) Puwede man iyan magin totoo sa sato. An pag-uyon nin Diyos sa sato dai niya ibinabase sa kadakulan kan satong nagigibo sa paglilingkod sa saiya o sa pribilehiyo na igwa kita. Makakamtan ta an saiyang pag-uyon kun kita maimbod na nagtatagal. Asin ano man an satong edad, kamugtakan, o abilidad, makakaya ta gabos na magtagal. Maimbod mo daw na tinatagalan sa ngunyan an sarong pagbalo? Kun iyo, mararanga ka sa pakaaram na inuuyunan ka nin Diyos. Pag aram tang napapaugma ta an Diyos, puwede iyan magkaigwa nin mapuwersang epekto sa sato. Mapapakusog kaiyan an satong paglaom. w23.12 11 ¶13-14

An sarong Kristiyano dapat na makanuod na magin mahusay makikomunikar. An saro na mahusay makikomunikar nagdadangog asin sinasabot an iniisip saka namamatian kan iba. (Tal. 20:5) Nababasa niya an tono kan boses kan iba, ekspresyon nin lalawgon, asin hiro-hiro. Dai mo manunudan ini kun dai ka matao nin panahon para makipag-ulay sa iba. Kun pirmi kang naggagamit nin elektronikong mga paagi nin pakikikomunikar, arog kan email asin pag-text, makakapaluya iyan sa kakayahan mo na makipag-ulay sa iba nin personal. Kun siring, gumibo nin mga paagi para personal na makaulay an iba. (2 Juan 12) An sarong maygurang na Kristiyanong lalaki dapat man na may kakayahan na suportaran an saiyang sadiri asin an saiyang pamilya. (1 Tim. 5:8) Marahay na makanuod nin kasanayan na makakatabang sa saimo na makahanap nin trabaho. (Gibo 18:​2, 3; 20:34; Efe. 4:28) Hinguwahon na mamidbid ka bilang saro na mahigos asin saro na dai binabayaan an trabaho sagkod na dai iyan natatapos. Paagi kaiyan, magkakaigwa ka nin mas dakulang tsansa na makakua nin trabaho asin magdanay diyan. w23.12 27 ¶12-13

Pag sinasambit kan Bibliya an manungod sa “aldaw ni Jehova,” nanunungod iyan sa panahon kun nuarin ipapaabot ni Jehova an saiyang paghukom sa saiyang mga kaiwal asin ililigtas an saiyang banwaan. Kaidto, may nagkapirang paghukom nang ginibo si Jehova. (Isa. 13:​1, 6; Ezek. 13:5; Sof. 1:8) Sa panahon niyato, an “aldaw ni Jehova” mapuon sa pag-atake sa Dakulang Babilonya asin matatapos sa ralaban nin Armagedon. Para makaligtas sa “aldaw” na iyan, kaipuhan tang mag-andam na ngunyan. Itinukdo ni Jesus na dai lang kita dapat na magin andam sa “dakulang kasakitan” kundi dapat man na “magdanay [kitang] andam” para diyan. (Mat. 24:21; Luc. 12:40) Sa saiyang inot na ipinasabong na surat sa mga taga Tesalonica, naggamit si apostol Pablo nin nagkapirang ilustrasyon para tabangan an mga Kristiyano na magdanay na andam para sa dakulang aldaw ni Jehova nin paghukom. Aram ni Pablo na an aldaw ni Jehova dai pa maabot kan mismong panahon na idto. (2 Tes. 2:​1-3) Minsan siring, sinadol niya pa man giraray an saiyang mga tugang na mag-andam para sa aldaw na iyan na garo baga maabot na iyan kinaagahan, asin puwede ta man na iaplikar an sadol na iyan. w23.06 8 ¶1-2

Kan huring mga taon kan dekada nin 1970, sarong halangkawon na edipisyo na may 60 eskalon an itinugdok sa Tokyo, Japan. Inisip-isip kan mga tawo kun paano kaiyan makakayanan an parating paglinog sa siyudad na iyan. An sekreto? An edipisyo dinisenyo kan mga inhenyero na magin masarig pero kayang magsabay sa pagyugyog na kawsa nin paglinog. An mga Kristiyano nakakaagid sa halangkawon na edipisyong iyan. Sa anong paagi? Dapat na papagdanayon nin sarong Kristiyano na magin timbang pag-abot sa pagigin marigon asin sa pagigin madaling makibagay. Kaipuhan niyang magin makusog asin dai natatanyog kun manungod sa pagsunod sa mga pagbuot asin mga pamantayan ni Jehova. Siya “andam na magsunod” asin dai nagkokompromiso. Sa ibong na kampi, kaipuhan niyang magin “rasonable,” o madaling makibagay, pag itinutugot iyan kan kamugtakan o hinahagad pa ngani iyan. (Sant. 3:17) An sarong Kristiyano na nakanuod na magkaigwa kan arog kaini na pagigin timbang lilikayan na magin sobra kaistrikto o sobra man kaluwag. w23.07 14 ¶1-2

Kinaipuhan ni Jesus na manindugan sa mga sugot ni Satanas na Diyablo, kaiba na an direktang mga pag-atake sa kaimbudan niya sa Diyos. (Mat. 4:​1-11) Determinado si Satanas na papagkasalaon si Jesus tanganing dai niya maitao an pantubos. Durante kan saiyang ministeryo digdi sa daga, dakul pang pagbalo an tinagalan ni Jesus. Napaatubang siya sa persekusyon asin mga huma. (Luc. 4:​28, 29; 13:31) Kinaipuhan niyang pagpasensiyahan an pagkabakong perpekto kan saiyang mga parasunod. (Mar. 9:​33, 34) Kan bistahon siya, pinasakitan siya asin tinuya-tuya. Dangan ginadan siya sa makulugon asin makasusupog na paagi. (Heb. 12:​1-3) Asin sa huring parte kan saiyang pagsakit, kinaipuhan niyang tagalan iyan nin solo, na mayo kan pagprotektar ni Jehova. (Mat. 27:46) Malinaw nanggad, dakulaon na sakripisyo an ginibo ni Jesus para maitao an pantubos. Kaya pag hinuhurop-hurop ta an gabos na sakripisyong gikan sa buot na ginibo niya para sa sato, bako daw na nakakamati kita nin grabeng pagkamuot sa saiya? w24.01 10-11 ¶7-9

An pagkamapasensiya makakatabang sa sato na magkaigwa nin marahay na relasyon sa iba. Nakakatabang iyan sa sato na atentibong magdangog pag nagtataram an iba. (Sant. 1:19) An pagkamapasensiya nakakakontribwir man sa katuninungan. Pinupugulan kita kaiyan na dai magin pabigla-bigla sa satong reaksiyon asin na dai magtaram nin bakong mabuot pag nai-stress kita. Asin kun mapasensiya kita, dai kita tulos maaanggot pag may nakakulog kan buot ta. Imbes na magbalos, ‘padagos tang pagpapasensiyahan an lambang saro asin lubos na papatawadon an lambang saro.’ (Col. 3:​12, 13) An pagkamapasensiya makakatabang man sa sato na gumibo nin mas marahay na mga desisyon. Imbes na magin pabigla-bigla o maghidali, matao kita nin panahon para siyasaton asin turutimbangon an mga opsiyon na naiisip ta. Halimbawa, kun naghahanap kita nin trabaho, tibaad may tendensiya kitang akuon an inot na ialok sato na trabaho. Pero, kun mapasensiya kita, matao kita nin panahon para pag-isipan an puwedeng magin epekto kan trabaho sa satong pamilya asin sa satong espirituwalidad. Paagi sa pagigin mapasensiya, malilikayan ta na makagibo nin bakong marahay na desisyon. w23.08 22 ¶8-9

Kun nakakamati ka nin pagkadisganar huli sa mga tendensiya mo na magkasala, an pagsaisip kan ipinanuga mo ki Jehova kan magdusay ka saiya makakapakusog kan determinasyon mo na labanan an sugot. Paano man? Pag nagdusay ka ki Jehova, pinapaindahan mo an saimong sadiri. Nangangahulugan ini na nagsasabi ka nin dai sa saimong mga pagmawot asin ambisyon na makakapamundo ki Jehova. (Mat. 16:24) Kaya pag napaatubang ka sa pagbalo, dai mo na kaipuhan na magduwa-duwa kun ano an dapat mong gibuhon. Isinara mo na an pinto sa gabos na pagpipilian apuwera sa saro—an kaimbudan mo ki Jehova. Padagos kang magigin determinado na paugmahon si Jehova. Sa paggibo kaiyan, magigin arog ka ni Job. Dawa napaatubang sa masakiton na mga pagbalo, determinado niyang sinabi: “Papagdanayon ko an sakuyang integridad!”—Job 27:5. w24.03 9 ¶6-7

Si Jehova, “an Diyos nin pagkamuot,” nasa kaibanan ta! (2 Cor. 13:11) Interesado siya sa kada saro sa sato. Kumbinsido kita na “napapalibutan [kita] kan Saiyang maimbod na pagkamuot.” (Sal. 32:10) Mantang mas hinuhurop-hurop ta kun paano niya ipinapahiling sa sato an saiyang pagkamuot, mas nagigin totoong-totoo man siya sa sato asin mas lalo kitang napaparani sa saiya. Makakadulok kita sa saiya na mayong pag-alangan asin makakapagsabi na kaipuhan tang marhay an pagkamuot niya. Puwede tang sabihon saiya an gabos na ikinakahadit ta, na nagtitiwalang nasasabutan niya kita asin gustong-gusto kitang tabangan. (Sal. 145:19) Kun paanong napaparani kita sa mainit na kalayo pag malipot an panahon, napaparani man kita sa mainit na pagkamuot ni Jehova. Maski ngani mapuwersa an pagkamuot ni Jehova, mapagpadangat man iyan. Kaya akuon an mainit na pagkamuot ni Jehova. Asin lugod na pahiruon kita gabos kan saiyang pagkamuot asin masabi tang: “Namumutan ko si Jehova”!—Sal. 116:1. w24.01 31 ¶19-20

Dai lang basta sinabi ni Jesus sa mga tawo na Jehova an pangaran nin Diyos. Aram na kan mga Judiong tinutukduan ni Jesus an pangaran nin Diyos. Imbes, nanginot si Jesus sa ‘pagpaliwanag manungod sa Saiya.’ (Juan 1:​17, 18) Halimbawa, ihinahayag kan Hebreong Kasuratan na si Jehova mahihirakon asin mapagmalasakit. (Exo. 34:​5-7) Lalo pang lininaw ni Jesus an katotoohan na iyan kan isaysay niya an parabula manungod sa ama asin sa aki kaini na naparaot an buhay. Pag nababasa ta an manungod sa amang iyan na kan matanaw an saiyang nagsusulsol na aki “mantang harayo pa” ini, duminalagan para sabaton an saiyang aki, kinugos ini, asin bilog na pusong pinatawad, mas maiimahinar ta kun gurano kamahihirakon asin kamapagmalasakit ni Jehova. (Luc. 15:​11-32) Ihinayag ni Jesus kun anong klaseng persona talaga an saiyang Ama. w24.02 10 ¶8-9

Nagtatao si Jehova nin kaginhawahan asin pagranga sa mga nasasakitan. Paano ta maaarog si Jehova sa pagpahiling nin pagmalasakit asin pagranga sa iba? An sarong paagi para magibo ini iyo an pagpatalubo sa satong puso nin mga kuwalidad na may koneksiyon sa pagtao nin pagranga. Ano an pira sa mga kuwalidad na ini? Ano an makakatabang sa sato na mapagdanay an pagkamuot na kaipuhan niyato tanganing ‘padagos tang maranga an lambang saro’ sa aroaldaw? (1 Tes. 4:18) Kaipuhan tang patalubuon an marahayon na mga kuwalidad na arog kan pakikidamay, pagkamuot na sa-magturugang, asin kabuutan. (Col. 3:12; 1 Ped. 3:8) Paano makakatabang sa sato an mga kuwalidad na ini? Pag an pagigin mapagmalasakit asin an mga kuwalidad na konektado diyan nagin parte na kan satong pagkatawo, magkakaigwa kita nin makusog na pagmawot na rangahon an mga nagsasakit. Arog kan sinabi ni Jesus, “sa kapanuan kan puso nagtataram an nguso. An marahay na tawo nagpapaluwas nin marahay hali sa natipon niyang marahay na mga bagay.” (Mat. 12:​34, 35) An pagranga niyato sa satong mga tugang na nangangaipo mahalaga nanggad na paagi nin pagpahayag kan satong pagkamuot sa sainda. w23.11 10 ¶10-11

Kaipuhan tang maghagad nin tabang para masabutan an mga propesiya sa Bibliya. Pag-isipan an ilustrasyon na ini. Imahinara na nagpasyar ka sa sarong lugar na bakong pamilyar saimo pero kaiba mo sa pagbiyahe an sarong amigo na aram na marhay an lugar na iyan. Aram niya nanggad kun hain kamo asin kun pasain an kada tinampo. Siguradong maugma ka ta nagtugot an amigo mo na mag-iba saimo! Sa kaagid na paagi, aram ni Jehova kun hain na kita sa dalagan nin panahon asin kun ano an nasa puro kan dalan na linalakawan ta. Kaya para masabutan an mga propesiya sa Bibliya, dapat na mapakumbaba tang hagadon an tabang ni Jehova. (Dan. 2:28; 2 Ped. 1:​19, 20) Arog nin sarong marahay na magurang, gusto ni Jehova na magkaigwa nin maugmang puturo an saiyang mga aki. (Jer. 29:11) Pero bakong arog nin siisay man na tawong magurang, kaya ni Jehova na sabihon nin eksakto an mangyayari sa maabot. Ipinasurat niya an mga propesiya sa saiyang Tataramon tanganing maaraman ta an manungod sa importanteng mga pangyayari bago pa iyan mangyari.​—Isa. 46:10. w23.08 8 ¶3-4