Setyembre

Tinawan nin Diyos nin kapangyarihan si Jesus na resolberan an gabos na problema kan katawuhan. Paagi sa saiyang mga milagro, ipinahiling ni Jesus an saiyang kapangyarihan na halion an mga problema na dai ta masosolusyunan kun kita sana. Halimbawa, may kapangyarihan siya na patalingkason kita sa pinakaugat kan mga problema kan katawuhan—an minanang kasalan saka an mga epekto kaiyan, kaiba na an hilang asin kagadanan. (Mat. 9:​1-6; Roma 5:​12, 18, 19) An saiyang mga milagro nagpapatunay na kaya niyang paumayan an “gabos na klase nin” hilang asin magbuhay pa ngani nin mga gadan. (Mat. 4:23; Juan 11:​43, 44) Apuwera kaiyan, may kapangyarihan man siya na kontrulon an makusugon na alipuros nin bagyo asin daugon an maraot na mga espiritu. (Mar. 4:​37-39; Luc. 8:2) Nakakapakusog nanggad sa buot na maaraman na tinawan ni Jehova nin arog kaiyan kakusog na kapangyarihan an saiyang Aki! Lubos kitang makakapagtiwala na magkakatotoo an mga bendisyon na ipapaabot kan Kahadian nin Diyos. An mga milagro na ginibo ni Jesus bilang sarong tawo digdi sa daga nagtutukdo sa sato kan mas mahiwas na gigibuhon niya bilang makalangit na Hadi kan Kahadian nin Diyos. w23.04 3 ¶5-7

Kun yaon ka sa dakulang kongregasyon asin namamati mo na sa parati dai ka naaapod, tibaad maisip mo na dai na lang magkomento. Pero dai ka magsuko. Magpreparar ka nin nagkapirang komento sa kada pagtiripon. Sa siring kun dai ka tulos maapod, igwa ka pa nin ibang oportunidad na magkomento mantang nagpapadagos an pagtiripon. Pag nag-aandam para sa Pag-adal sa Torrengbantayan, pag-isipan kun paano an kada parapo konektado sa tema kan artikulo. Kun gigibuhon mo iyan, posibleng marhay na may maikomento ka sa bilog na pagtukar. Dugang pa, puwede mo man na pag-andaman na komentuhan an mga parapo na nagtutukar nin mas hararom na mga katukduan sa Bibliya na mas dipisil ipaliwanag. Taano? Huling tibaad dikit sana an magtaas nin kamot sa parteng iyan kan pinag-aadalan. Pero paano kun dai ka pa man giraray natatawan nin oportunidad na magkomento pagkatapos nin nagkapirang pagtiripon? Sabihon sa konduktor bago an pagtiripon kun arin na hapot an gusto mong komentuhan. w23.04 22 ¶9-10

Sinunod tulos ni Jose an instruksiyon ni Jehova, asin nakatabang iyan saiya na magin sarong marahay na agom na lalaki. Sa kisiyera tulong pagkakataon, nag-ako siya nin mga instruksiyon hali sa Diyos mapadapit sa saiyang pamilya. Sa kada pagkakataon, nagsunod tulos siya, dawa pa mangahulugan iyan nin dakulang mga pagbabago. (Mat. 1:20; 2:​13-15, 19-21) Huli sa pagsunod sa paggiya nin Diyos, prinotektaran ni Jose si Maria, sinuportaran, asin itinao an mga pangangaipo kaini. Imahinara na sana kun paanong an mga ginibo ni Jose nagpararom kan pagkamuot asin respeto ni Maria sa agom niya! Mga agom na lalaki, puwede nindong maarog si Jose paagi sa paghihinguwang aramon an sadol na basado sa Bibliya sa kun paano aatamanon an saindong pamilya. Kun iaaplikar mo an sadol na ini, dawa pa mangahulugan iyan nin paggibo nin mga pagbabago, ipinapahiling mo an pagkamuot mo sa saimong agom asin pinapakusog mo an saindong relasyon. Sarong sister sa Vanuatu na labing 20 taon nang may agom an nagsabi: “Pag hinihinguwa kan agom ko na aramon asin iaplikar an paggiya ni Jehova, mas lalo ko siyang irinerespeto. Pamugtak an buot ko, asin may kumpiyansa sa mga desisyon niya.” w23.05 21 ¶5

An mabalik na mga Judio hali sa Babilonya magigin sarong “banal na banwaan” para sa saindang Diyos. (Deu. 7:6) Pero, dai iyan nangangahulugan na dai na ninda kaipuhan na gumibo nin mga pagbabago para mapaugma si Jehova. An kadaklan sa mga Judio na namundag na sa Babilonya minalataw na tuod na sa kaisipan asin mga pamantayan kan mga Babilonyo. Mga dekada pagkatapos na makabalik sa Israel an inot na mga Judio, nabigla si Gobernador Nehemias kan maaraman niya na an mga aki na namundag sa Israel dai lamang ngani tatao kan lengguwahe kan mga Judio. (Deu. 6:​6, 7; Neh. 13:​23, 24) Paano manunudan kan mga aking idto na mamutan asin sambahon si Jehova kun dai ninda nasasabutan an Hebreo—an panginot na lengguwahe kun sain isinurat an tataramon nin Diyos? (Esd. 10:​3, 44) Kaya dakulang pagbabago an dapat na gibuhon kan mga Judiong idto, pero magigin mas madali na gibuhon iyan huling yaon na sinda sa Israel, kun sain padikit-dikit na ibinabalik an dalisay na pagsamba.​—Neh. 8:​8, 9. w23.05 15 ¶6-7

Nakakamundo, gurano man kakusog kan satong motibasyon o disiplina sa sadiri, may mga ulang pa man giraray kitang maeeksperyensiyahan. Halimbawa, an “dai linalauman na mga pangyayari” puwedeng makaagaw kan satong panahon na kaipuhan ta sa pag-abot kan satong pasuhan. (Ecl. 9:11) Puwede kitang mapaatubang sa sarong kadipisilan na huli kaiyan madisganar kita asin pangluyahan. (Tal. 24:10) An satong pagkabakong perpekto puwedeng magtulod sa sato na gumawi sa paaging dai makakatabang na maabot ta an satong pasuhan. (Roma 7:23) O puwedeng makamati kita nin kapagalan. (Mat. 26:43) Ano an makakatabang sa sato na mapangganahan an sarong ulang? Tandaan na pag may ulang dai iyan nangangahulugan na dai mo na maaabot an pasuhan mo. Sinasabi kan Bibliya na puwedeng pauruutro kitang makaeksperyensiya nin mga problema o kasakitan. Minsan siring, malinaw man kaiyan na sinasabi na puwede man giraray kitang magpadagos. Iyo, paagi sa dai pagpundo sa ibong nin sarong ulang, pinapatunayan mo ki Jehova na gusto mong mapaugma siya. Siguradong nauugmang marhay si Jehova pag nahihiling kang nagpapadagos sa paghihinguwang abuton an saimong pasuhan! w23.05 30 ¶14-15

An pagpapayunir nakakatabang sa sarong hoben na lalaki na makanuod kun paano makikiiba-iba sa manlain-lain na tawo na iba-iba an personalidad. Nakakatabang man iyan sa saiya na magbadyet asin dai gumastos nin sobra diyan. (Fil. 4:​11-13) An sarong magayon na paagi para punan an bilog na panahon na paglilingkod iyo an pag-auxiliary payunir, na makakatabang sa saro na magin handa sa paglaog bilang regular payunir. An pagpapayunir puwedeng magbukas nin pinto para sa iba pang klase nin bilog na panahon na paglilingkod, kaiba na an paglilingkod bilang construction servant o Bethelite. An Kristiyanong mga lalaki dapat na magkaigwa nin pasuhan na makuwalipikar na maglingkod sa saindang mga tugang bilang elder sa kongregasyon. Sinasabi kan Bibliya na an mga lalaking naghihinguwang maabot an pribilehiyong ini “nagmamawot . . . nin marahay na gibuhon.” (1 Tim. 3:1) Inot, an sarong brother dapat na makuwalipikar bilang ministeryal na lingkod. An mga ministeryal na lingkod nagtatabang sa mga elder sa dakul na praktikal na paagi. An mga elder saka mga ministeryal na lingkod parehong mapakumbaba na naglilingkod sa saindang mga tugang asin maigot na nagpapartisipar sa ministeryo. w23.12 28 ¶14-16

Tin-edyer pa sana si Hading Josias kan punan niyang hanapon si Jehova. Gusto niyang makanuod manungod ki Jehova asin gibuhon an kabutan Niya. Alagad, dai nagin madali an buhay para sa hoben na hading ini. Kinaipuhan niyang manindugan sa dalisay na pagsamba kan panahon na lakop na marhay an palsong pagsamba. Asin nagibo niya nanggad iyan! Bago siya mag-20 anyos, pinunan niyang halion sa nasyon an palsong pagsamba. (2 Cron. 34:​1, 2) Dawa kun hoben ka pang marhay, puwede mong maarog si Josias paagi sa paghanap ki Jehova asin pakanuod na pahalagahan an Saiyang mga kuwalidad. Pag ginibo mo iyan, mamawuton mong idusay an saimong buhay sa saiya. Ano an epekto kan pagdusay na iyan sa pang-aroaldaw na buhay mo? Si Luke, na nabawtismuhan kan 14 anyos, nagsabi, “Puon ngunyan, magigin panginot sa sakong buhay an paglilingkod ki Jehova asin hihinguwahon ko na mapaugma siya.” (Mar. 12:30) Magigin dakulang bendisyon nanggad sa saimo kun mamawuton mong gibuhon man iyan! w23.09 11 ¶12-13

Kan isurat ni apostol Pablo an surat na ini, mayo pang sarong taon an kongregasyon sa Tesalonica. Posibleng marhay na an nombradong mga lalaki diyan dikit pa sana an eksperyensiya asin tibaad may nagigibong mga sala. Minsan siring, maninigo man giraray sinda na igalang. Mantang paparani an dakulang kasakitan, posibleng kakaipuhanon ta na magdepende sa satong mga elder para sa paggiya nin urog kisa sa ginigibo ta ngunyan. Puwedeng mawaran kita nin komunikasyon sa world headquarters asin sa sangang opisina; kaya, mahalagang manudan ta na mamutan asin igalang an satong mga elder ngunyan. Ano man an mangyari, pagdanayon tang tultol an satong pag-iisip, na nagpopokus bako sa mga kaluyahan ninda kundi sa katunayan na ginigiyahan ni Jehova paagi ki Cristo an maimbod na mga lalaking ini. Kun paanong napoprotektaran kan helmet an payo nin sarong suldados, an satong paglaom na kaligtasan nagpoprotektar sa satong kaisipan. Aram ta na an iinaalok kan kinaban na ini mayong kamanungdanan. (Fil. 3:8) An satong paglaom nakakatabang sa sato na magdanay na kalmado asin marigon. w23.06 11-12 ¶11-12

An mga nakakadangog sa pangapudan kan “babaying mangmang” kaipuhan na pumili: Aakuon an imbitasyon o sasayumahan iyan? Igwa nin marahayon na mga rason kun taano ta dapat tang likayan an imoral na mga paggawi. An “babaying mangmang” ilinadawan na nagsasabi: “Mahamis an tubig na hinabunan.” (Tal. 9:17) Ano an “tubig na hinabunan”? Iinaagid kan Bibliya an seksuwal na relasyon nin mag-agom sa sarong nakakarepreskong tubig. (Tal. 5:​15-18) An sarong lalaki saka babayi na legal na mag-agom puwedeng makamati nin kaugmahan sa saindang seksuwal na relasyon. Ibang-iba nanggad iyan sa “tubig na hinabunan.” Puwedeng nanunungod iyan sa bawal asin imoral na seksuwal na relasyon. An mga siring kaiyan sa parati ginigibo nin patago, arog nin sarong parahabon na naghahabon nin patago. An “tubig na hinabunan” puwedeng garo baga mahamis pag iniisip kan mga naggigibo kaiyan na dai mabubuyagyag an makasalan nindang gibo. Dinadaya nanggad ninda an saindang sadiri! Nahihiling ni Jehova an gabos. Mayo na nanggad nin mas mapait pa kisa sa maiwara an pag-uyon ni Jehova, kaya dai lamang magigin “mahamis” an mamundong mga konsekwensiya kaiyan.​—1 Cor. 6:​9, 10. w23.06 22 ¶7-9

Paano kun marisa mo na an mga pamibi mo nagigin pauruutro na sana o dai ka na nauugma sa saimong ministeryo? Dai pag-isipon na mayo na saimo an espiritu ni Jehova. Bako kang perpekto, asin an saimong pagmati puwedeng magbago sa pana-panahon. Kun marisa mo na nagluluya na an kaigutan mo, pag-isipan an halimbawa ni apostol Pablo. Dawa pinagmaigutan niyang arugon si Jesus, aram niya na may mga panahon na puwedeng bako siyang gayong motibado. Determinado si Pablo na utubon an saiyang ministeryo dawa sa mga pagkakataon na bako siyang gayong motibado. Sa kaparehong paagi, dai pagtugutan na diktahan ka kan saimong bakong perpektong pagmati sa desisyon na gigibuhon mo. Magin determinado na gibuhon an tama dawa bako kang motibado na gibuhon iyan. Kun padagos mong gigibuhon an tama, puwedeng magbago man an pagmati mo pag-abot nin panahon.​—1 Cor. 9:16. w24.03 11-12 ¶12-13

Puwede tang maipahiling an pagkamuot sa satong mga tugang paagi sa pag-ako sa sainda bilang mga amigo. (2 Cor. 6:​11-13) Dakul sa sato an kabilang sa mga kongregasyon na kompuwesto nin mga tugang na may iba-ibang pinaghalian asin lain-lain an personalidad. Puwede tang pakusugon an satong pagkamuot sa sainda gabos paagi sa pagpokus sa marahay nindang mga kuwalidad. Pag nanunudan niyato na hilingon an iba arog kan paghiling ni Jehova sa sainda, pinapatunayan ta na namumutan niyato sinda. An pagkamuot magigin mahalagang marhay sa panahon kan dakulang kasakitan. Pag nagpuon na an kasakitan na iyan, sain kita makakakua nin proteksiyon? Pag-isipan an instruksiyon ni Jehova kun ano an gigibuhon kan banwaan niya pag sinalakay an suanoy na Babilonya: “Lumaog ka, sakuyang banwaan, sa saimong tagong mga kuwarto, asin isara mo an saimong mga pinto. Magtago ka nin kadikit na panahon sagkod na makalihis an grabeng kaanggutan.” (Isa. 26:20) Minalataw na an mga tataramon na iyan aplikado man sa sato na mapapaatubang sa dakulang kasakitan. w23.07 6-7 ¶14-16

Magkaigwa nin reputasyon nin pagigin rasonable. Haputon an saimong sadiri: ‘An paghiling daw sako nin mga tawo saro akong tawong rasonable, mapagpahunod, asin mapasensiya? O an paghiling ninda sako sarong tawong istriktuhon, maringis, o matagas an payo? Dinadangog ko daw an iba asin nagpapahunod sa mga gusto ninda kun okey man iyan?’ Mantang mas hinihinguwa niyatong magin rasonable, mas naaarog ta man si Jehova asin si Jesus. Kalabot sa pagigin rasonable an pagigin madaling makibagay pag nagbago an satong mga kamugtakan. An siring na mga pagbabago puwedeng magkawsa nin dai inaasahan na mga kadipisilan. Tibaad bigla kitang magkaigwa nin problema sa salud. O tibaad biglang magkaigwa nin pagbabago sa ekonomiya o sa gobyerno kun sain kita nakaistar asin dahil diyan maapektaran na marhay an satong buhay. (Ecl. 9:11) Dawa an pagbabago sa satong teokratikong asignasyon puwedeng makabalo sa sato. Puwede kitang mapangganang makibagay sa bagong mga kamugtakan kun gigibuhon ta an minasunod na apat na lakdang: (1) akuon an realidad, (2) magpokus sa maabot na panahon, (3) magpokus sa mga bagay na positibo, asin (4) gumibo nin mga bagay para sa iba. w23.07 21-22 ¶7-8

Hoben pa si propeta Daniel kan darahon siyang bihag kan mga Babilonyo sa lugar na harayuon na marhay sa saiyang dagang tinubuan. Alagad napahangang marhay ki Daniel an mga nambihag saiya. Nahiling ninda “kun ano an nahihiling kan mga mata”—na si Daniel “mayong depekto, marahay an itsura” asin na gikan siya sa respetadong pamilya. (1 Sam. 16:7) Dahil kaiyan, sinanay siya kan mga Babilonyo para mapabilang sa mga naglilingkod sa palasyo. (Dan. 1:​3, 4, 6) Namutan ni Jehova si Daniel huli sa klase nin pagkatawo na pinili kan hoben na lalaking ini. An totoo, posibleng ma-20 o labing 20 anyos pa sana si Daniel kan may pag-uyon na sambiton siya ni Jehova kaiba si Noe asin Job, mga lalaki na sa laog nin dakul na dekada nakapatalubo nin marahay na reputasyon sa Diyos. (Gen. 5:32; 6:​9, 10; Job 42:​16, 17; Ezek. 14:14) Asin padagos na namutan ni Jehova si Daniel sa bilog na panahon kan saiyang halawig asin pambihirang buhay.​—Dan. 10:​11, 19. w23.08 2 ¶1-2

Kun nag-iisip kang magbakal nin harong, gugustuhon mong mahiling mismo an gabos na detalye kan saimong magigin harong. Puwede ta man gibuhon an arog kaiyan pag nagbabasa asin nag-aadal kita nin Bibliya. Kun babasahon mo sana iyan nin madali, tibaad an manudan mo sana iyo an panginot na mga katotoohan—an “pundamental na mga bagay kan sagradong mga kapahayagan nin Diyos.” (Heb. 5:12) Kaya, arog kan sa harong, kaipuhan mong magduman sa “laog” kaiyan tanganing masiyasat mong marhay an mga detalye. An sarong marahayon na paagi para pag-adalan an Bibliya iyo na maaraman kun paano magkakoronektar an manlain-lain na kabtang kan mensahe kaiyan. Maghinguwang marhay na masabutan bako sana kun ano an mga katotoohan na tinutubod mo kundi pati man kun taano ta nagtutubod ka sa mga iyan. Para lubos na masabutan an Tataramon nin Diyos, dapat tang pag-adalan an hararom na mga katotoohan sa Bibliya. Dinagka ni apostol Pablo an saiyang Kristiyanong mga tugang na mahigos na pag-adalan an Tataramon nin Diyos tanganing “masabutan [ninda] nin lubos kun ano an lakbang asin laba asin langkaw saka rarom” kan katotoohan. Sa siring, magigin urog pa sindang ‘nakagamot asin nakatindog’ sa saindang pagtubod. (Efe. 3:​14-19) Kaipuhan na arog man kaiyan an gibuhon ta. w23.10 18 ¶1-3

Dakul an halimbawa sa Bibliya nin mga tawong mapasensiya. Taano ta dai gibuhon na sarong proyekto sa pag-adal an pagsiyasat sa mga halimbawang iyan? Halimbawa, dawa ngani akion pa si David kan lahidan siya para magin hadi kan Israel sa maabot, kinaipuhan niyang maghalat nin dakul na taon bago itao saiya an pagkahadi. Si Simeon asin si Ana maimbod na sinamba si Jehova mantang hinahalat ninda an ipinanugang Mesiyas. (Luc. 2:​25, 36-38) Mantang pinag-aadalan mo an siring na mga pagkasaysay, aramon an simbag sa minasunod na mga hapot: Ano daw an nakatabang sa tawong ini para makapahiling nin pagpapasensiya? Paano siya nakinabang sa pagigin mapasensiya? Paano ko siya maaarog? Puwede ka man makinabang sa pakanuod manungod sa mga dai nagpahiling nin pagpapasensiya. (1 Sam. 13:​8-14) Tibaad maihapot mo: ‘Ano daw an dahilan kaya dai sinda nagin mapasensiya? Ano an mga konsekwensiya na sinapar ninda?’ w23.08 25 ¶15

Maimbod si apostol Pedro; dai niya tinugutan an ano man na papunduhon siya sa pagsunod ki Jesus. Sa sarong pagkakataon, ipinahiling niya an saiyang kaimbudan kan sabihon ni Jesus an sarong bagay na dai nasabutan kan mga disipulo kaini. (Juan 6:68) Dakul an nagpundo sa pagsunod ki Jesus na dai lamang naghalat nin paliwanag. Pero bakong arog kaiyan si Pedro. Aram niya na si Jesus sana an igwa kan “mga tataramon nin buhay na daing katapusan.” Aram ni Jesus na babayaan siya ni Pedro saka kan iba pang mga apostol. Minsan siring, ipinahayag ni Jesus an saiyang pagtitiwala na mabalik si Pedro asin magdadanay ining maimbod. (Luc. 22:​31, 32) Nasabutan ni Jesus na “gustuhon kan espiritu, pero an laman maluya.” (Mar. 14:38) Kaya, dawa pagkatapos na nigaran ni Pedro na bisto niya si Jesus, dai ni Jesus sinukuan an saiyang apostol. Nagpahiling ki Pedro an binuhay na liwat na si Jesus—minalataw na kan si Pedro nagsosolo. (Mar. 16:7; Luc. 24:34; 1 Cor. 15:5) Isip-isipa na sana kun gurano kaiyan napakusog an munduon na marhay na apostol! w23.09 22 ¶9-10

Pinapatawad nin Diyos o tinatahuban an mga kasalan kan mga nagtutubod sa saiya. Lubos niya sindang pinapatawad asin dai na ginigirumdom an saindang mga kasalan. (Sal. 32:​1, 2) Ibinibilang niya an siring na mga indibidwal bilang daing sala asin matanos huli sa saindang pagtubod. Dawa ngani ibinilang na matanos, si Abraham, David, asin iba pang maimbod na mga parasamba nin Diyos bako pa man giraray perpekto asin nagkakasala. Pero huli sa saindang pagtubod, ibinilang sinda nin Diyos na daing sala, lalo na kun ikukumparar sa mga dai nagtutubod sa saiya. (Efe. 2:12) Arog kan lininaw ni apostol Pablo sa saiyang surat, mahalagang marhay an pagtubod para magkaigwa nin personal na relasyon sa Diyos. Nagin totoo iyan ki Abraham asin David, asin puwede man iyan magin totoo sa sato. w23.12 3 ¶6-7

Sa ngunyan, an gabos na Kristiyano igwa nin pribilehiyo na magdulot nin mga atang ki Jehova paagi sa paggamit kan saindang panahon, kusog, asin materyal na mga pagsadiri para pauswagon an intereses kan Kahadian nin Diyos. Maipapahiling niyato na pinapahalagahan tang marhay an satong pribilehiyo na sambahon si Jehova paagi sa pagdulot sa saiya kan satong pinakamarahay na mga atang. Sinambit ni apostol Pablo an manlain-lain na aspekto kan satong pagsamba na dai ta dapat nuarin man pagpabayaan. (Heb. 10:​22-25) Kaiba digdi an pagdulok ki Jehova sa pamibi, hayagan na pagpatotoo mapadapit sa satuyang paglaom, pagtiripon bilang sarong kongregasyon, asin pagpakusog sa lambang saro “lalo na ta nahihiling [niyato] na an aldaw [ni Jehova] paparani na.” Sa pagtatapos kan rekord kan Kapahayagan, bilang pagduduon, duwang beses na sinambit kan anghel ni Jehova an mga tataramon na ini: “Sambahon mo an Diyos!” (Kap. 19:10; 22:9) Lugod na dai ta nuarin man paglingawan an hararom na espirituwal na katotoohan na ini mapadapit sa dakulang espirituwal na templo ni Jehova asin an satong mahalagang marhay na pribilehiyo na sambahon an satong makapangyarihan na Diyos! w23.10 29 ¶17-18

Gusto niyato gabos na “padagos [na] kamutan an lambang saro.” Minsan siring, mahalaga na girumdumon niyato na nagpatanid si Jesus na “magigin malipot an pagkamuot kan kadaklan.” (Mat. 24:12) Dai digdi sinasabi ni Jesus na mangyayari ini sa kadaklan sa mga disipulo niya. Pero, dapat na mag-ingat kita tanganing dai kita maimpluwensiyahan kan kawaran nin pagkamuot kan mga tawo sa palibot niyato. Mantang isinasaisip iyan, pag-ulayan ta an mahalagang hapot na ini: Ano an makakatabang sa sato para maaraman kun baga makusog an pagkamuot ta sa satong mga tugang? An sarong paagi para madeterminaran kun gurano kakusog kan satong pagkamuot iyo an pag-aram kun paano ta inaatubang an partikular na mga sitwasyon sa buhay. (2 Cor. 8:8) Sinambit ni apostol Pedro an saro sa sitwasyon na iyan: “Urog sa gabos, magkaigwa nin makusog na pagkamuot sa lambang saro, huli ta an pagkamuot nagtatahob sa dakul na kasalan.” (1 Ped. 4:8) Kaya an mga kaluyahan asin pagkabakong perpekto kan iba puwedeng makatesting kan satong pagkamuot. w23.11 10-11 ¶12-13

Dai ta nasusunod an pagbuot ni Jesus manungod sa pagkamuot kun nagpapahiling kita nin pagkamuot sa nagkapira sa kongregasyon pero dai sa iba. Siyempre, tibaad mas dayupot kita sa nagkapira kisa sa iba, arog ni Jesus. (Juan 13:23; 20:2) Pero ipinapagirumdom sa sato ni apostol Pedro na dapat hinguwahon tang magkaigwa nin “pagkamuot na sa-magturugang”—na siring sa kadayuputan nin magkakapamilya—sa gabos niyatong tugang. (1 Ped. 2:17) Sinasadol kita ni Pedro na “kamutan . . . nin udok an lambang saro nin gikan sa puso.” (1 Ped. 1:22) Sa kontekstong ini, an buot sabihon kan kamutan an iba nin “udok” iyo na mamutan an saro dawa kun masakit na magpahiling nin pagkamuot sa saiya. Halimbawa, paano kun makulgan kita nin sarong tugang? Tibaad an inot na reaksiyon ta iyo na magbalos imbes na magpahiling nin pagkamuot. Alagad, nanudan ni Pedro ki Jesus na an pagbalos dai nakakapaugma sa Diyos. (Juan 18:​10, 11) Si Pedro nagsurat: “Dai magbalos nin maraot sa maraot o nin insulto sa insulto. Imbes, magbalos nin mabuot na mga tataramon.” (1 Ped. 3:9) Tugutan an udok na pagkamuot na pahiruon ka na magin mabuot asin makonsiderasyon. w23.09 29 ¶9-11

Napapangalas kita kun gurano karikas magin adulto an sarong aki. An pagtalubong iyan sa pisikal garo baga madalion lang. Minsan siring, an pagtalubo sa espirituwal o an pagigin maygurang na Kristiyano bako nanggad madali. (1 Cor. 13:11; Heb. 6:1) Para maabot an pasuhan na iyan, kaipuhan na magkaigwa kita nin dayupot na relasyon ki Jehova. Kaipuhan ta man kan saiyang banal na espiritu mantang pinapatalubo an diyosnon na mga kuwalidad, nakakanuod nin praktikal na mga kasanayan, asin nag-aandam para sa maabot na mga responsabilidad. (Tal. 1:5) Ginibo ni Jehova an tawo na lalaki asin babayi. (Gen. 1:27) Madali ta nanggad mahiling an pisikal na pagkakalain kan lalaki asin babayi, pero dakul pa an pagkakalain ninda. Halimbawa, linalang ni Jehova an lalaki asin babayi na igwa nin espesipikong mga papel na dapat gibuhon, kaya kaipuhan ninda kan mga kuwalidad asin kasanayan na makakatabang sainda na utubon an saindang kanya-kanyang mga papel.​—Gen. 2:18. w23.12 18 ¶1-2

Gusto daw ni Jesus na gamiton kan iba an personal na pangaran kan saiyang Ama? Siyertong iyo. Posibleng naniniwala an nagkapirang debotong lider nin relihiyon kan panahon na idto na sagradong marhay an pangaran nin Diyos para sambiton, pero dai nuarin man tinugutan ni Jesus an siring na bakong maka-Kasuratan na tradisyon na makaulang saiya para tawan nin onra an pangaran kan saiyang Ama. Pag-isipan an panahon kan paumayan niya an sarong lalaking sinaniban nin demonyo sa rehiyon kan mga Geraseno. Nagkatarakot an mga tawo asin pinakiulayan ninda si Jesus na maghali, kaya naghali siya sa rehiyon na iyan. (Mar. 5:​16, 17) Pero, gusto pa man giraray ni Jesus na mabisto kan mga tawo duman an pangaran ni Jehova. Kaya sinabihan niya an lalaking pinaumayan niya na sabihon sa mga tawo, bako kun ano an ginibo niya, kundi kun ano an ginibo ni Jehova. (Mar. 5:19) Arog man kaiyan an gusto niya ngunyan—na ipamidbid ta an pangaran kan saiyang Ama sa bilog na kinaban! (Mat. 24:14; 28:20) Pag ginigibo ta an satong kabtang, napapaugma ta an satong Hadi, si Jesus. w24.02 10 ¶10

Sarong bendisyon nanggad sa sato na magin kabtang kan organisasyon ni Jehova sa masakit na mga huring aldaw na ini. Mantang padagos na nagrururo an kamugtakan kan kinaban, tinatawan kita ni Jehova nin nagkakasararong espirituwal na pamilya nin magturugang. (Sal. 133:1) Tinatabangan niya kita na magkaigwa nin maugmang buhay pampamilya. (Efe. 5:33–6:1) Asin tinatawan niya kita nin pakasabot asin kadunungan na kaipuhan ta para magkaigwa nin tunay na katuninungan. Minsan siring, kaipuhan niyatong maghinguwa tanganing padagos kitang maimbod na makapaglingkod ki Jehova. Taano? Huling kun minsan, tibaad makulgan an buot ta huli sa pagkabakong perpekto kan iba. Tibaad pangluyahan man kita nin buot huli sa sadiri tang mga kaluyahan, lalo na kun pauruutro tang nagigibo an iyo man sanang sala. Kaipuhan tang padagos na maglingkod ki Jehova dawa (1) nakulgan an buot ta kan sarong tugang, (2) nadisganar kita kan satong agom, asin (3) disganado kita sa satong sadiri. w24.03 14 ¶1-2

Sa pana-panahon, makakadangog ka nin mga eksperyensiya kan mga tugang na naghinguwa na pahiwason an saindang sagradong paglilingkod. Puwedeng nagklase sinda sa School for Kingdom Evangelizers o nagbalyo kun sain mas dakula an pangangaipo. Kun nasa kamugtakan ka, marahayon kun magin pasuhan mo man iyan. Gustong-gusto kan mga lingkod ni Jehova na pahiwason an saindang ministeryo. (Gibo 16:9) Pero paano kun sa ngunyan dai mo magigibo iyan? Dai pag-isipon na maluya ka kisa sa mga nakakagibo kaiyan. An mahalaga padagos kang nagtatagal. (Mat. 10:22) Tandaan na napapaugma mong marhay si Jehova pag ginigibo mo an pinakamakakaya mo base sa saimong kakayahan asin kamugtakan. Mahalagang paagi iyan tanganing padagos mong masundan si Jesus pagkatapos kan bawtismo.​—Sal. 26:1. w24.03 10 ¶11

Nangangako an satong Ama sa langit na papatawadon niya kita kun masulsol kita. (Sal. 86:5) Kaya kun talagang pinagbabasulan ta an mga kasalan na nagibo ta, makakapagtiwala kita sa sinabi ni Jehova—pinatawad na niya kita. Girumdumon na si Jehova bakong mapaghanap, o sobra kaistrikto. Dai niya hinahagad sa sato an labi sa rasonableng makakaya ta. Pinapahalagahan niya an ano man na nagigibo ta para sa saiya basta ginigibo ta an satong pinakamakakaya. Siring man, girumdumon an mga halimbawa sa Bibliya kan mga naglingkod ki Jehova nin bilog na kalag. Isipa si apostol Pablo. Maigot siyang naglingkod nin dakul na taon, na nagbibiyahe nin rinibong kilometro asin nagbibilog nin dakul na kongregasyon. Pero kan nalimitaran an saiyang paghuhulit huli sa sitwasyon niya, naiwara niya daw an pag-uyon nin Diyos? Dai. Padagos niyang ginibo an makakaya niya, asin binendisyunan siya ni Jehova. (Gibo 28:​30, 31) Arog ni Pablo, posible man na mabago an kaya tang maitao para ki Jehova. Pero an mahalaga ki Jehova iyo an motibo ta sa paggibo kaiyan. w24.03 27 ¶7, 9

Paagi sa saiya mismong mga pamibi ki Jehova, nagpahiling si Jesus nin halimbawa na maaarog kan saiyang mga disipulo. Sa bilog niyang ministeryo, parating namimibi si Jesus. Kaipuhan niyang magtagama nin oras para mamibi huling parati siyang sibot asin napapalibutan nin dakul na tawo. (Mar. 6:​31, 45, 46) Nagmamata siya nin amay pagkaaga tanganing magkaigwa siya nin oras na makapagsolo asin mamibi. Sa saro nganing pagkakataon, magdamlag siyang namibi bago naggibo nin importanteng desisyon. (Luc. 6:​12, 13) Asin pauruutrong namibi si Jesus kan banggi bago siya magadan mantang nakapokus sa pagtapos kan pinakamasakit na parte kan saiyang asignasyon digdi sa daga. (Mat. 26:​39, 42, 44) Itinutukdo sa sato kan halimbawa ni Jesus na gurano man kita kasibot, kaipuhan tang magtagama nin oras para mamibi. Arog ni Jesus, tibaad kaipuhan tang maghanap nin oras para mamibi—magmata nin amay pagkaaga o magpuka nin dikit sa banggi. Kun gigibuhon ta iyan, maipapahiling ta ki Jehova na pinapahalagahan ta an espesyal na regalong ini. w23.05 3 ¶4-5

Mangnuhon an tataramon na “ipinano” sa teksto na nasa itaas. Ilinaladawan iyan nin sarong reperensiya na “siring sa sarong makusog na bulos.” Sarong mapuwersang paglaladawan nanggad para iduon kun gurano kadakula kan pagkamuot ni Jehova para sa mga linahidan! Aram kan mga linahidan na “namumutan [sinda] kan Diyos.” (Jud. 1) Ipinahayag ni apostol Juan an namamatian ninda kan isurat niya: “Hilinga kun anong klaseng pagkamuot an ipinahiling kan Ama sa sato, mala ta inapod ngani kitang mga aki nin Diyos!” (1 Juan 3:1) Para sana daw sa mga linahidan an pagkamuot nin Diyos? Bako. Pinatunayan ni Jehova na gabos kita namumutan niya. Ano an pinakanangungurog na patunay kan pagkamuot ni Jehova? An pantubos—an pinakaekstraordinaryong pagkamuot na ipinahiling kisa kasuarin man!—Juan 3:16; Roma 5:8. w24.01 28 ¶9-10

Mababasa sa bersikulo sa itaas an sarong paagi kun paano nadaog ni David an takot niya. Dawa ngani nasa peligro an buhay niya, hinurop-hurop niya kun ano an gigibuhon ni Jehova sa maabot para sa saiya. Aram ni David na ililigtas siya ni Jehova sa tamang panahon. Kun sabagay, ihinayag na ni Jehova na si David an sunod na magigin hadi kan Israel. (1 Sam. 16:​1, 13) Para ki David, pag nanuga si Jehova garo man sana iyan nautob na. Ano an ipinanuga ni Jehova na gigibuhon niya para saimo? Dai ta inaasahan na ililikay niya kita sa gabos na problema. Minsan siring, ano man na kasakitan an tibaad mapaatubang saimo ngunyan sa sistemang ini nin mga bagay, hahalion ni Jehova an mga iyan sa maabot na bagong kinaban. (Isa. 25:​7-9) Makapangyarihan na marhay an satong Kaglalang kaya kayang-kaya niyang buhayon an mga gadan, paumayan an satong mga hilang, asin paraon an gabos na nagkokontra.​—1 Juan 4:4. w24.01 6 ¶12-13

Hurop-hurupon an saimong pagdusay asin bawtismo. Ginibo mo an mga lakdang na iyan huling gusto mong kumampi ki Jehova. Girumdumon kun ano an nakatabang saimo na makumbinsir na nanumpungan mo na an katotoohan. Nagkua ka nin tamang kaaraman manungod ki Jehova asin napatalubo mo an paggalang saka pagkamuot sa saiya bilang saimong Ama sa langit. Nagkaigwa ka nin pagtubod asin namotibar na magsulsol. Pinahiro ka kan saimong puso na talikdan an maraot na mga gibo asin mamuhay kauyon kan kabutan nin Diyos. Nagin maugma ka kan mamati mo an pagpapatawad nin Diyos. (Sal. 32:2) Nag-atender ka sa Kristiyanong mga pagtiripon asin pinunan na sabihon sa iba an marahayon na mga bagay na nanudan mo. Bilang sarong dusay asin bawtisadong Kristiyano, naglalakaw ka na sa dalan pasiring sa buhay, asin determinado ka na padagos na maglakaw diyan. (Mat. 7:​13, 14) Lugod na magdanay kang marigon sa saimong debosyon ki Jehova asin dai natatanyog sa pagsunod sa mga pagbuot niya. w23.07 17 ¶14; 19 ¶19

Paagi sa paghurop-hurop sa pamibi mo kan nagdusay ka ki Jehova, mapapakusog ka na labanan an ano man na sugot. Halimbawa, makikipag-flirt ka daw sa agom kan iba? Siyempre dai! Nangako ka ki Jehova na dai ka magibo nin arog kaiyan. Kun dai mo tutugutan na makagamot an maraot na mga pagmawot, malilikayan mo an makulog na mga konsekwensiya kaiyan. Lilikayan mo an “agihan kan mga tampalasan.” (Tal. 4:​14, 15) Kun gigirumdumon mo an determinasyon ni Jesus na paugmahon an saiyang Ama, tulos asin determinado mong sasayumahan an ano man na aram mong makakapamundo sa Diyos na pigdusayan mo kan saimong buhay. (Mat. 4:10; Juan 8:29) An mga pagbalo asin mga sugot matao saimo nin oportunidad para ipahiling na determinado kang ‘padagos na magsunod’ ki Jesus. Sa paggibo kaiyan, makakasigurado ka na tatabangan ka ni Jehova. w24.03 9-10 ¶8-10