Oktubre

Nasasakitan ka daw kun minsan na magin masinunod? Si Hading David iyo, kaya namibi siya sa Diyos: “Pukawon mo sa sako an pagmawot na magsunod sa saimo.” (Sal. 51:12) Namutan ni David si Jehova. Pero, may mga pagkakataon pa man giraray na nasasakitan kaidto si David na magin masinunod, asin iyo man kita. Taano man? Inot, namana ta an tendensiya na magin bakong masinunod. Ikaduwa, padagos na naghihinguwa si Satanas na sutsutan kitang magrebelde, arog kan ginibo niya. (2 Cor. 11:3) Ikatulo, lakop sa kinaban na ini an rebelyosong kaisipan, “an espiritu na iyo ngunyan an nang-iimpluwensiya sa mga aki nin pagsuway.” (Efe. 2:2) Dapat kitang magmaigot na marhay bako lang para labanan an satong tendensiya na magkasala kundi para labanan man an panggigipit sa sato kan Diyablo asin kan kinaban na ini na dai magsunod. Dapat na maghinguwa kitang sunudon si Jehova asin an mga tinawan niya nin awtoridad. w23.10 6 ¶1

Ano an manunudan ta sa milagro ni Jesus kan gibuhon niyang arak an tubig? Makakanuod kita diyan nin kapakumbabaan. Dai ni Jesus ipinaghambog an manungod sa milagro; sa katunayan, dai niya nuarin man ipinaghambog an saiyang mga nagibo. Sa kabaliktaran, mapakumbaba asin pauruutro niyang itinatao an gabos na kamurawayan asin kaumawan sa saiyang Ama. (Juan 5:​19, 30; 8:28) Kun aarugon ta si Jesus paagi sa pagdadanay na mapakumbaba, dai ta ipaghahambog an manungod sa mga nagibo ta. Ipaghambog ta, bako an manungod sa satong sadiri, kundi an manungod sa satong marahayon na Diyos na pribilehiyo tang paglingkudan. (Jer. 9:​23, 24) Itao ta sa saiya an onra na maninigo sa saiya. Tutal, anong marahay na bagay an magigibo ta kun mayo an tabang ni Jehova? (1 Cor. 1:​26-31) Kun mapakumbaba kita, dai ta kaipuhan na kuanon an onra sa marahay na mga bagay na ginigibo ta para sa iba. Kontento kita huling aram ta na nahihiling asin pinapahalagahan ni Jehova an ginigibo ta. (Ikumparar an Mateo 6:​2-4; Heb. 13:16) Siguradong napapaugma ta si Jehova pag inaarog ta si Jesus sa pagpahiling nin kapakumbabaan.​—1 Ped. 5:6. w23.04 4 ¶9; 5 ¶11-12

Paagi sa pasabong nin Diyos, dinagka ni apostol Pablo an mga Kristiyano na tawan nin atensiyon an kapakanan kan iba. Paano ta maiaaplikar an konsehong iyan sa mga pagtiripon? Paagi sa paggirumdom na an iba, arog ta, gusto man na magpartisipar. Pag-isipan an bagay na ini. Pag nakikipag-ulay ka sa saimong mga amigo, ika na sana daw an nagpaparataram kaya dikit na sana an pagkakataon kan iba na magtaram? Siyempre dai! Gusto mo na umiba man sinda sa pag-urulay. Sa kaagid na paagi, sa mga pagtiripon, gusto tang dakul an makapagkomento sagkod na mapupuwede. Sa katunayan, an saro sa pinakamarahay na paagi na mapapakusog ta an mga tugang iyo an pagtao sainda nin pagkakataon na ipahayag an saindang pagtubod. (1 Cor. 10:24) Kaya pagdanayon na haralipot sana an satong mga komento, sa siring dakul an makakapagpartisipar huling may oras pa. Dawa pag nagtatao ka nin halipot na komento, likayan na magsambit nin dakulon na punto. Pag haros maubos mo nang komentuhan an gabos na punto sa parapo, dikit na sana an matatada para sa iba. w23.04 23 ¶11-13

Dapat tang girumdumon kun gurano kaimportante kan padagos na pagtabang sa iba, lalo na paagi sa satong Kristiyanong ministeryo. Sa satong ministeryo, kaipuhan na madali kitang makibagay. An mga nakakaulay ta iba-iba an mga paniniwala saka ugali asin lain-lain an pinaghalian. Si apostol Pablo madaling makibagay, asin makakanuod kita sa saiyang halimbawa. Pinili ni Jesus si Pablo bilang “sarong apostol sa mga nasyon.” (Roma 11:13) Sa papel na iyan, naghulit si Pablo sa mga Judio, mga Griego, mga intelektuwal, mga pobre, mga may halangkaw na katungdan, asin mga hadi. Tanganing maabot an puso kan manlain-lain na tawong ini, si Pablo nagin “gabos na bagay sa gabos na klase nin tawo.” (1 Cor. 9:​19-22) Kinonsiderar niya an kultura, pinaghalian, asin mga paniniwala kan mga nakakaulay niya dangan ibinagay diyan an paagi niya nin pakikipag-ulay sa sainda. Puwede man kitang magin mas epektibo sa satong ministeryo kun mapamaagi kita asin ibinabagay an satong paagi nin pakikipag-ulay sigun sa pangangaipo kan mga nakakaulay ta. w23.07 23 ¶11-12

An kahuyuan sarong kakusugan, bakong kaluyahan. Kaipuhan nin panglaog na kusog para magdanay na kalmado pag napapaatubang sa masakit na sitwasyon. An kahuyuan sarong aspekto kan “bunga kan espiritu.” (Gal. 5:​22, 23) An sarong porma kan Griegong tataramon na itrinadusir na “kahuyuan” ginagamit kun minsan para iladawan an sarong layas na kabayo na pinagaro. Imahinara an sarong layas na kabayo na nagin mabuot. Mabuot na iyan, alagad makusog pa man giraray. Bilang mga tawo, paano ta makukultibar an kahuyuan asin kasabay kaiyan magin makusog? Dai iyan posible sa sadiri ta sanang paghihinguwa. Kaipuhan tang mamibi para sa espiritu nin Diyos, na hinahagad sa saiya na tabangan kitang kultibaron an magayon na kuwalidad na ini. Ipinapahiling kan mga eksperyensiya na puwede ining magibo. Dakul na Saksi an nagpahiling nin kahuyuan kan kumprontaron sinda nin mga nagkokontra, asin nagtao iyan nin marahay na impresyon sa mga nagmamasid.​—2 Tim. 2:​24, 25. w23.09 14 ¶3

Sa sarong makangangalas na bisyon, nahiling ni apostol Juan sa langit an 24 kamagurangan na nagsasamba ki Jehova. Inuumaw ninda an Diyos, na sinasabi na maninigo siya na mag-ako “kan kamurawayan asin kan onra saka kan kapangyarihan.” (Kap. 4:​10, 11) An maimbod na mga anghel igwa man nin kadakul na dahilan para umawon asin tawan nin onra si Jehova. Yaon sinda sa langit kaiba niya asin namidbid nindang marhay si Jehova. Nahihiling ninda an saiyang mga kuwalidad paagi sa mga ginigibo niya. Mantang naoobserbaran ninda an mga pamamaagi ni Jehova, nadadagka sinda kaiyan na umawon siya. (Job 38:​4-7) Gusto ta man na iiba sa satong mga pamibi an pag-umaw ki Jehova, na sinasabi kun ano an nagugustuhan ta asin hinahangaan sa saiya. Mantang binabasa asin pinag-aadalan mo an Bibliya, hinguwahon na mahiling an mga kuwalidad ni Jehova na pinakanagugustuhan mo. (Job 37:23; Roma 11:33) Dangan sabihon ki Jehova kun ano an namamatian mo manungod sa mga kuwalidad na iyan. Puwede ta man na umawon si Jehova huli sa pagtabang niya sa sato asin sa satong bilog na espirituwal na pamilya.​—1 Sam. 2:​1, 2. w23.05 3-4 ¶6-7

Kan 1919, an Dakulang Babilonya, nawaran nin kontrol sa banwaan nin Diyos. Kan taon na iyan, an “maimbod asin mapagmansay na uripon” nagpuon na magpunsiyonar, eksakto nanggad para i-welcome an mga tawong sadiyosan an puso sa paglaog sa bagong bukas na “Dalan nin Kabanalan.” (Mat. 24:​45-47; Isa. 35:8) An preparasyon na ginibo kaidto kan maimbod na mga indibidwal nakatabang sa mga tawo na nagpuon nang maglakaw sa mayor na tinampong iyan na urog pang makanuod manungod ki Jehova asin sa saiyang mga katuyuhan. (Tal. 4:18) Nakatabang man iyan tanganing makapamuhay sinda kauyon kan mga kahagadan ni Jehova. Dai inaasahan ni Jehova sa saiyang banwaan na gibuhon nin sararuan sana an kinakaipuhan na mga pagbabago. Imbes, luway-luway na dinadalisay niya an saiyang banwaan. Nakakaugma nanggad kun magigibo na niyato gabos na mapaugma an satong Diyos sa gabos tang ginigibo! An ano man na tinampo nangangaipo nin regular na pagmentenar. Puon 1919, padagos an patrabaho sa “Dalan nin Kabanalan” tanganing mas dakul pang tawo an makaluwas sa Dakulang Babilonya. w23.05 17 ¶15; 19 ¶16

Personal na nagsasanay an Namamahalang Grupo nin mga paratabang sa manlain-lain na komite kan Namamahalang Grupo. Maimbod na isinasagibo sa ngunyan kan mga paratabang na ini an saindang magabat na responsabilidad. Andam sindang marhay na ipagpadagos an pangangataman sa mga karnero ni Cristo. Pag an mga natatada sa mga linahidan darahon na sa langit sa panahon na madali nang matapos an dakulang kasakitan, magpapadagos an dalisay na pagsamba digdi sa daga. Huli sa panginginot ni Jesu-Cristo, an mga lingkod ni Jehova padagos na maimbod na magsasamba sa Saiya. Iyo, sa panahon na iyan aatakihon kita kan Gog nin Magog, an maringis na koalisyon nin mga nasyon. (Ezek. 38:​18-20) Pero mayong magigibo an halipot na pag-atakeng iyan; dai kaiyan mapapapundo an mga lingkod nin Diyos sa pagsamba ki Jehova. Siguradong ililigtas niya sinda! Sa sarong bisyon, nahiling ni apostol Juan an “dakulang kadaklan” kan ibang mga karnero ni Cristo. Sinabi ki Juan na an “dakulang kadaklan” na ini nakabalyo “hali sa dakulang kasakitan.” (Kap. 7:​9, 14) Iyo, magdadanay sindang ligtas! w24.02 5-6 ¶13-14

Ano an puwede tang gibuhon para mag-ako kan banal na espiritu? Puwede tang hagadon iyan sa pamibi, pag-adalan an ipinasabong na Tataramon nin Diyos, asin makiasosyar sa saiyang organisasyon na ginigiyahan kan espiritu. An paggibo kaiyan makakatabang sa sato na maipahiling “an bunga kan espiritu.” (Gal. 5:​22, 23) Itinatao nin Diyos an saiyang espiritu duman sana sa mga tawo na pinapagdanay an malinig na kaisipan asin paggawi. Dai niya kita padagos na tatawan kan saiyang espiritu kun dai ta hahalion an maating kaisipan asin paggawi. (1 Tes. 4:​7, 8) Tanganing padagos na mag-ako kan banal na espiritu, dapat man na “dai [niyato] pagbasang-basangon an mga propesiya.” (1 Tes. 5:20) An “mga propesiya” na sinambit digdi nanunungod sa mga mensahe na itinao ni Jehova sa sato paagi sa saiyang espiritu, kaiba na an mga mapadapit sa aldaw ni Jehova asin sa pagkaapurado kan satong panahon. Dai ta ipinapasipara an aldaw na iyan, na iniisip na an Armagedon dai mangyayari sa panahon ta. Imbes, pirmi ta iyan na isinasaisip paagi sa pagpapadanay nin marahay na paggawi asin pagigin sibot sa “mga gibong nagpapahiling nin debosyon sa Diyos.”​—2 Ped. 3:​11, 12. w23.06 12 ¶13-14

Bilang mga Kristiyano, ano an dapat tang gibuhon kun may biglang magluwas na sarong pornograpikong video o ritrato sa satong mga electronic device? Dapat tang irayo tulos an satong mata sa paghiling diyan. Mas magigin madali sato na gibuhon iyan kun gigirumdumon niyato na an satong pinakamahalagang pagsadiri iyo an relasyon ta ki Jehova. Sa katunayan, an mga ritrato o video na sa pangkagabsan dai man ibinibilang na pornograpiko puwedeng makapukaw nin imoral na mga kaisipan. Taano ta dapat tang likayan an mga iyan? Huling habo ta na gumibo nin dawa dikit na lakdang para makakomiter kita sa puso ta nin pagsambay. (Mat. 5:​28, 29) Sarong elder sa Thailand na an pangaran David an nagsabi: “Hinahapot ko an sadiri ko: ‘Dawa pa bako man pornograpiko an mga ritrato, mauugma daw si Jehova kun pagpaparahilingon ko iyan?’ An arog kaining pangangatanusan nakatabang sako na humiro nin may kadunungan.” Matatabangan kita na humiro nin may kadunungan paagi sa pagpatalubo nin tamang pagkatakot na mapamundo si Jehova. An diyosnon na pagkatakot iyo an “kapinunan,” o pundasyon “nin kadunungan.” w23.06 23 ¶12-13

An “tagong mga kuwarto” puwedeng magpanungod sa satong mga kongregasyon. Sa panahon nin dakulang kasakitan, makukua ta an proteksiyon na ipinanuga ni Jehova kun magdadanay kitang nagkakasararo kaiba kan satong mga kapagtubod. Kaya, pagmaigutan ta nang marhay ngunyan na dai lang pagpasensiyahan an mga tugang ta kundi mamutan man sinda. Puwedeng magdepende diyan an satong kaligtasan! “An dakulang aldaw ni Jehova” magdadara nin kapurisawan sa katawuhan. (Sof. 1:​14, 15) An banwaan ni Jehova mapapaatubang man sa mga kasakitan. Pero kun maandam na kita ngunyan, magigibo tang magdanay na kalmado asin matatabangan ta an iba. Matatagalan niyato an ano man na mga problema na mag-abot sa sato. Pag nagsakit an mga kapagtubod niyato, gigibuhon ta an satong pinakamakakaya para tabangan sinda paagi sa pagpahiling nin pagmalasakit asin pagtao kan saindang mga pangangaipo. Asin magdadanay kitang dayupot sa satong mga tugang, na namutan na niyato. Dangan, babalusan kita ni Jehova nin buhay na daing sagkod sa sarong kinaban na an gabos na mga kalamidad asin mga kasakitan dai ta na magigirumduman.​—Isa. 65:17. w23.07 7 ¶16-17

Sa parati ilinaladawan kan Tataramon nin Diyos an maimbod na mga lingkod niya bilang makusog na mga tawo. Pero dawa an pinakamakusog sa sainda dai pirming nakakamati na makusog sinda. Halimbawa, sa nagkapirang pagkakataon namati ni Hading David na ‘makusog siya arog sa sarong bukid,’ pero sa iba man na pagkakataon “natakot” siya. (Sal. 30:7) Minsan ngani pambihirang marhay an kusog ni Samson kan siya pinahiro kan espiritu nin Diyos, aram niya na kun mayo an kapangyarihan na hali sa Diyos, “mangruruluya [siya] asin magigin kapareho kan gabos na iba pang tawo.” (Huk. 14:​5, 6; 16:17) An maimbod na mga lingkod na ini nagin makusog sana huling tinawan sinda ni Jehova nin kusog. Sinabi ni apostol Pablo na kaipuhan niya man an kusog na hali ki Jehova. (2 Cor. 12:​9, 10) Napaatubang siya sa mga problema sa salud. (Gal. 4:​13, 14) Kun beses, nasakitan man siyang gibuhon an tama. (Roma 7:​18, 19) Asin kun minsan, nahadit asin natakot siya sa kun ano an puwedeng mangyari saiya. (2 Cor. 1:​8, 9) Alagad, kan maluya si Pablo, nagin siyang makusog. Paano? Itinao ni Jehova ki Pablo an kusog na kaipuhan kaini. Pinakusog niya si Pablo. w23.10 12 ¶1-2

Kun may mga panahon na pagmati ta mayo kitang halaga, puwede tang girumdumon na naggibo mismo si Jehova nin paagi para maparani kita sa saiya. (Juan 6:44) Nahihiling niya an marahay tang mga kuwalidad na tibaad dai ta nahihiling sa satong sadiri, saka aram niya an nasa puso ta. (2 Cron. 6:30) Kaya makakapagtiwala kita sa saiya pag sinabi niya na mahalagang marhay kita. (1 Juan 3:​19, 20) Bago maaraman an katotoohan, an iba sa sato nakagibo nin mga bagay na tibaad sagkod ngunyan nagpaparibok pa man giraray sa satong konsiyensiya. (1 Ped. 4:3) Dawa an maimbod na mga Kristiyano may mga kaluyahan na pinaglalabanan. Kinokondenar ka daw kan saimong puso? Kun iyo, mararanga ka na maaraman na may maimbod na mga lingkod si Jehova na nakamati man kaiyan. Halimbawa, namati ni apostol Pablo na miserable siya kan inisip-isip niya an saiyang mga kaluyahan. (Roma 7:24) Siyempre, pinagsulsulan na ni Pablo an saiyang mga kasalan asin nagpabawtismo. Pero ibinilang niya pa man giraray an saiyang sadiri na “pinakahamak sa mga apostol” asin “panginot” sa mga makasalan.​—1 Cor. 15:9; 1 Tim. 1:15. w24.03 27 ¶5-6

An sarong leksiyon na manunudan ta sa salang desisyon ni Hading Jehoas iyo na kaipuhan tang pumili nin mga amigo na magigin marahay na impluwensiya sa sato—mga amigo na namumuot ki Jehova asin gustong paugmahon siya. Bako lang mga kaedad ta an dapat tang pilion na magin mga amigo. Tandaan, mas hoben na marhay si Jehoas kisa sa amigo niyang si Jehoiada. Sa pagpili mo nin mga amigo, haputon an saimong sadiri: ‘Tinatabangan daw ninda ako na pakusugon an pagtubod ko ki Jehova? Dinadagka daw ninda ako na mamuhay kauyon kan mga pamantayan nin Diyos? Nakikipag-ulay daw sinda manungod ki Jehova saka sa saiyang mahalagang mga katotoohan? Iginagalang daw ninda an mga pamantayan nin Diyos? An sinasabi lang daw ninda sako iyo an mga gusto kong madangog, o igwa daw sinda nin kusog nin buot na itanos ako pag nahihiling nindang napapasala na ako?’ (Tal. 27:​5, 6, 17) An totoo, kun dai namumutan kan saimong mga amigo si Jehova, dai mo sinda kaipuhan. Pero kun may mga amigo ka na namumutan si Jehova, pagdanayon mo an pakikiamigo sa sainda—matatabangan ka ninda!—Tal. 13:20. w23.09 9-10 ¶6-7

An Griegong alpabeto nagpupuon sa letrang alpha, asin nagtatapos iyan sa letrang omega. Paagi sa paggamit kan deskripsiyon na “an Alpha asin an Omega,” ipinaparisa ni Jehova na pag may pinunan siyang sarong bagay, mapanggana niyang tatapuson iyan. Pagkatapos na lalangon ni Jehova si Adan asin Eva, sinabi Niya sa sainda: “Magkaigwa kamo nin mga aki asin magpakadakul kamo, panua nindo an daga asin sakupon iyan.” (Gen. 1:28) Kan panahon na iyan, garo man sana sinabi ni Jehova “Alpha.” Malinaw niyang sinabi an saiyang katuyuhan: Maabot an panahon na an daga mapapano nin perpekto, masinunod na mga gikan ni Adan asin Eva asin gigibuhon iyan na magin paraiso. Sa maabot na panahon na iyan, garo man sana sasabihon ni Jehova “Omega.” Pagkatapos na mahaman “an kalangitan saka an daga pati an gabos na yaon diyan,” nagtao si Jehova nin garantiya. Ginagarantiyahan niya na uutubon niya an saiyang katuyuhan para sa katawuhan asin para sa daga. Lubos na mauutob iyan sa katapusan kan ikapitong aldaw na iyan.​—Gen. 2:​1-3. w23.11 5 ¶13-14

An masakit na literal na pagbaklay haling Babilonya pasiring sa Israel aabuton nin mga apat na bulan, pero nangako si Jehova na hahalion niya an ano man na ulang na garo baga nakakapugol sa saindang pagbalik. Aram kan maimbod na mga Judio na an ano man na sakripisyo na gibuhon ninda mayo lamang kun ikukumparar sa mga pakinabang kun mabalik sinda sa Israel. An pinakadakulang bendisyon na makakamtan ninda iyo an may koneksiyon sa saindang pagsamba. Mayo nin templo ni Jehova sa Babilonya. Mayong altar kun sain puwedeng magdulot an mga Israelita kan saindang mga atang na hinahagad sa katugunan ni Moises. Asin mayong organisadong areglo sa pagkasaserdote na madulot kan mga atang na iyan. Apuwera kaiyan, kakadikit kan mga lingkod ni Jehova kumpara sa mga paganong lalaki asin babayi, na mayong pagpapahalaga ki Jehova o sa mga pamantayan niya. Kaya gustong-gusto na kan ribo-ribong mga Judio na namumuot sa Diyos na bumalik sa saindang sadiring lugar kun sain maibabalik na ninda an dalisay na pagsamba. w23.05 14-15 ¶3-4

Kaipuhan ta an tabang kan banal na espiritu nin Diyos tanganing padagos kitang makapamuhay “bilang mga aki nin liwanag.” Taano? Huling masakit talaga na magdanay na malinig sa imoral na kinaban na ini. (1 Tes. 4:​3-5, 7, 8) An banal na espiritu makakatabang sa sato na labanan an kaisipan kan kinaban, kaiba na an mga pilosopiya asin pagmansay kaiyan na kontra sa kaisipan nin Diyos. Makakatabang man sato an banal na espiritu tanganing maipahiling ta an “gabos na klase nin karahayan asin katanusan.” (Efe. 5:9) An sarong paagi para mag-ako kita kan banal na espiritu iyo an paghagad kaiyan sa pamibi. Sinabi ni Jesus na si Jehova matao “nin banal na espiritu sa mga naghahagad sa saiya.” (Luc. 11:13) Asin pag iriba tang inuumaw si Jehova sa Kristiyanong mga pagtiripon, nag-aako man kita nin banal na espiritu. (Efe. 5:​19, 20) An marahayon na epekto kan banal na espiritu nin Diyos makakatabang sa sato na mamuhay sa paaging nakakapaugma sa Diyos. w24.03 23-24 ¶13-15

Kaipuhan mo daw na magin mas mapasensiya? Kun iyo, hagadon iyan sa pamibi. An pagpapasensiya sarong aspekto kan bunga kan espiritu. (Gal. 5:​22, 23) Kaya puwede kitang mamibi para sa banal na espiritu asin hagadon ki Jehova na tabangan kitang patalubuon an bunga kaiyan. Kun mapaatubang kita sa sarong sitwasyon na diyan mababalo an satong pasensiya, ‘padagos kitang mahagad’ nin banal na espiritu na tabangan kitang magin mapasensiya. (Luc. 11:13) Puwede ta man na hagadon ki Jehova na tabangan kitang mansayon an mga bagay-bagay kapareho kan pagmansay niya. Dangan pagkatapos na mamibi, kaipuhan tang gibuhon an pinakamakakaya ta na magin mapasensiya kada aldaw. Mantang mas parati kitang namimibi na magin mapasensiya asin naghihinguwa kitang ipahiling iyan, mas makakagamot sa satong puso an kuwalidad na iyan asin magigin parte na iyan kan satong personalidad. Tinatabangan man kita kaiyan na hurop-hurupon an mga halimbawa sa Bibliya. Dakul na halimbawa sa Bibliya nin mga tawong mapasensiya. Paagi sa paghurop-hurop sa mga halimbawang iyan, makakanuod kita nin mga paagi kun paano maipapahiling an pagkamapasensiya. w23.08 22-23 ¶10-11

Inasigurar ni Jesus si apostol Pedro na susuportaran ini ni Jehova. An binuhay liwat na si Jesus naggibo giraray nin sarong milagro na paagi kaiyan nakadakop nin kadakul na sira si Pedro saka an kapwa mga apostol kaini. (Juan 21:​4-6) Daing duda na an milagrong ini nag-asigurar giraray ki Pedro na pasil sana ki Jehova na itao an materyal na mga bagay na kaipuhan niya. Tibaad nagirumduman kaidto kan apostol an mga tataramon ni Jesus na itatao ni Jehova an mga pangangaipo kan mga padagos na ‘naghahanap nguna kan Kahadian.’ (Mat. 6:33) Kauyon kaiyan, ginibo ni Pedro na priyoridad an ministeryo, bako an negosyong paninira. Kusog-buot siyang nagpatotoo kan aldaw nin Pentecostes 33 C.E., na tinatabangan an rinibo na mag-ako kan maugmang bareta. (Gibo 2:​14, 37-41) Pagkatapos kaiyan, tinabangan niya an mga Samaritano asin an mga Hentil na akuon si Cristo. (Gibo 8:​14-17; 10:​44-48) Siguradong ginamit ni Jehova si Pedro sa pambihirang paagi para darahon an gabos na klase nin tawo palaog sa kongregasyon. w23.09 20 ¶1; 23 ¶11

Mga duwang taon pagkatapos na laglagon kan mga Babilonyo an Jerusalem, si Hading Nabucodonosor kan Babilonya nagkaigwa nin nakakapurisaw na pangaturugan manungod sa sarong dakulaon na imahen. Naghuma siya na gagadanon niya an gabos niyang madunong na mga lalaki, kaiba si Daniel, kun dai ninda masasabi kun ano an napangaturugan niya asin kun ano an kahulugan kaiyan. (Dan. 2:​3-5) Kaipuhan na humiro tulos si Daniel; ta kun dai, dakul an magagadan. “Nagduman [siya] sa hadi asin nakiulay na tawan siya nin panahon para maisabi niya sa hadi an kahulugan kan pangaturugan.” (Dan. 2:16) Nangaipo iyan nin kusog nin buot asin pagtubod. Mayong sinasabi an Bibliya na bago kaidto nakapagtao na si Daniel nin kahulugan sa mga pangaturugan. Pinakiulayan niya an mga kairiba niya “na mamibi tanganing mahirak an Diyos nin langit asin ihayag sa sainda an hilom na ini.” (Dan. 2:18) Sinimbag ni Jehova an mga pamibi na iyan. Sa tabang nin Diyos, natawan ni Daniel nin kahulugan an pangaturugan ni Nabucodonosor. Nakaligtas sa kagadanan si Daniel saka an mga kairiba niya. w23.08 2 ¶4

Isip-isipon an mga pakinabang kan pagigin mapasensiya. Pag kita mapasensiya, mas maugma asin mas kalmado kita. Kaya an pagkamapasensiya nakakatabang sa satong mental asin pisikal na salud. Pag mapasensiya kita sa iba, nagkakaigwa kita nin mas marahay na relasyon sa sainda. Mas nagkakasararo an satong kongregasyon. Kun may magprobokar sa sato, an satong pagigin dai tulos naaanggot makakatabang para dai maglala an sitwasyon. (Sal. 37:​8, nota sa ibaba; Tal. 14:29) Pero urog sa gabos, inaarog ta an satong Ama sa langit asin nagigin mas dayupot kita sa saiya. Magayunon saka kapaki-pakinabang nanggad na kuwalidad an pagkamapasensiya! Dawa ngani tibaad bako pirming pasil sa sato na magin mapasensiya, sa tabang ni Jehova, padagos tang mapapatalubo an kuwalidad na ini. Asin mantang mapasensiya kitang naghahalat kan bagong kinaban, makakapagtiwala kita na “an mata ni Jehova nakabantay sa mga may pagkatakot sa saiya, sa mga naghahalat kan maimbod na pagkamuot niya.” (Sal. 33:18) Lugod na magin determinado kita gabos na padagos na isulot an pagkamapasensiya. w23.08 22 ¶7; 25 ¶16-17

Sinabi ni Santiago na an sarong tawo tibaad naghihingako na igwa siya nin pagtubod pero nahihiling daw iyan sa gibo niya? (Sant. 2:​1-5, 9) Sinambit man ni Santiago an sarong tawo na may nahiling na ‘sarong tugang na lalaki o babayi na mayo nin maisulot o kakanon’ pero dai niya ini tinabangan sa praktikal na paagi. Dawa pa an sarong iyan maghingako na igwa siyang pagtubod, dai iyan nahihiling sa saiyang mga gibo; kaya, mayo man sanang saysay iyan. (Sant. 2:​14-16) Sinambit ni Santiago si Rahab bilang sarong magayon na halimbawa nin pagtubod na may kaibang gibo. (Sant. 2:​25, 26) Nadangog niya an manungod ki Jehova asin nahiling niya na sinusuportaran Niya an mga Israelita. (Jos. 2:​9-11) Ipinahiling niya an saiyang pagtubod paagi sa saiyang mga gibo—prinotektaran niya an duwang espiyang Israelita kan mameligro an mga ini. Bilang resulta, an bakong Israelitang babaying ini, dawa bakong perpekto, ibinilang na matanos arog ni Abraham. Idinuduon kan halimbawang ipinahiling ni Rahab an kahalagahan kan pagkaigwa nin pagtubod na may kaibang mga gibo. w23.12 5-6 ¶12-13

Bilang mga Kristiyano, dai kita nakokontento sa pagkaigwa sana nin hababaw na pakasabot sa Bibliya. Sa tabang kan banal na espiritu nin Diyos, gustong-gusto tang manudan “dawa an harararom na bagay nin Diyos.” (1 Cor. 2:​9, 10) Taano ta dai mo punan an sarong proyekto nin personal na pag-adal na makakatabang sa saimo na magin mas dayupot ki Jehova? Halimbawa, puwede mong siyasaton na marhay kun paano niya ipinahiling an pagkamuot niya sa mga lingkod niya kaidto asin kun paano iyan nagpapatunay na namumutan ka man niya. Puwede mong pag-adalan an areglo ni Jehova sa pagsamba kaidto sa Israel asin ikumparar iyan sa Kristiyanong areglo sa ngunyan. O tibaad puwede kang gumibo nin hararom na pag-adal sa mga propesiya na inutob ni Jesus sa panahon kan saiyang buhay asin ministeryo digdi sa daga. Mauugma kang marhay na pag-adalan an arog kaiyan na mga tema sa tabang kan Watch Tower Publications Index o kan Giya sa Pag-research Para sa Mga Saksi ni Jehova. An hararom na pag-adal sa Bibliya makakapakusog kan saimong pagtubod asin makakatabang na “[manumpungan] mo an kaaraman manungod sa Diyos.”​—Tal. 2:​4, 5. w23.10 18-19 ¶3-5

An tataramon na ginamit ni apostol Pedro para sa “makusog” literal na nangangahulugan na “nababanat.” Sinasabi sa ikaduwang parte kan bersikulo kun ano an gigibuhon ta kun igwa kita nin makusog na pagkamuot—tatahuban ta an mga kasalan kan satong mga tugang. Mailaladawan ta iyan sa arog kaining paagi: Kinakaputan ta ngaya kan duwa niyatong kamot an pagkamuot, na garo iyan sarong kapidaso nin tela na nababanat, asin binabanat ta iyan nin binabanat sagkod matahuban kaiyan, bako lang an saro o duwa, kundi “dakul na kasalan.” An pagtahob sarong matalinhagang tataramon para sa pagpatawad. Kun paano an sarong kapidasong tela puwedeng makatahob sa mantsa, an pagkamuot puwedeng makatahob sa mga kaluyahan asin pagkabakong perpekto kan iba. An satong pagkamuot sa iba dapat na magin makusog nanggad na huli kaiyan magigibo tang patawadon an mga pagkukulang kan satong mga kapagtubod—dawa ngani kun minsan mangaipo iyan nin grabeng paghihinguwa. (Col. 3:13) Pag nagigibo tang patawadon an iba, ipinapahiling niyato na makusog an satong pagkamuot asin na gusto tang mapaugma si Jehova. w23.11 10-12 ¶13-15

Kan adulto na si Hading Josias, pinunan niyang hirahayon an templo. Sa panahon kan pagtrabaho, nanumpungan “an libro kan Katugunan ni Jehova na itinao paagi ki Moises.” Kan madangog kan hadi an mga sinasabi diyan, tulos-tulos siyang naghiro para gibuhon kun ano an sinasabi diyan. (2 Cron. 34:​14, 19-21) Gusto mo daw na basahon nin regular an Bibliya? Kun ginigibo mo na iyan, kumusta an pagbasa mo? Tinatandaan mo daw an mga bersikulo na puwedeng makatabang sa saimo? Kan si Josias mga 39 anyos na, nakagibo siya nin pagkakasala na nagin dahilan kan saiyang kagadanan. Nagsarig siya sa sadiri niya imbes na maghagad ki Jehova nin paggiya. (2 Cron. 35:​20-25) May leksiyon kitang manunudan digdi. Gurano man kita kagurang o gurano man kita kahaloy nang nag-aadal nin Bibliya, dapat na padagos tang hanapon si Jehova. Kaiba diyan an regular na pagpamibi para sa saiyang paggiya, pag-adal kan saiyang Tataramon, asin pagdangog sa sadol kan maygurang na mga Kristiyano. Sa siring, mas dikit an posibilidad na makagibo kita nin seryosong mga pagkakasala asin posibleng marhay na magigin mas maugma kita.​—Sant. 1:25. w23.09 12 ¶15-16

Sa Bibliya may mababasa kita manungod sa dakul na kahanga-hangang babayi na namutan si Jehova asin naglingkod saiya. Sinda “balanse sa paggawi” asin “maimbod sa gabos na bagay.” (1 Tim. 3:11) Apuwera kaiyan, makakahanap man an mga sister sa saindang kongregasyon nin mga halimbawa nin maygurang na Kristiyana na puwede nindang arugon. Mga hoben na sister, may midbid daw kamong nagkapirang maygurang na Kristiyana na puwede nindong magin arugan? Obserbaran an saindang magagayon na kuwalidad; dangan pag-isipan kun paano mo man maipapahiling an mga kuwalidad na iyan. Sarong mahalagang marhay na kuwalidad nin sarong maygurang na Kristiyana iyo an kapakumbabaan. Pag an sarong babayi mapakumbaba, magkakaigwa siya nin marahay na relasyon ki Jehova asin sa iba. Halimbawa, an sarong babayi na namumutan si Jehova mapakumbabang sinusuportaran an prinsipyo nin pagkapayo na inestablisar kan saiyang Ama sa langit. (1 Cor. 11:3) An prinsipyong iyan igwa nin espesipikong aplikasyon sa kongregasyon asin sa laog kan pamilya. w23.12 18-19 ¶3-5

Inaasahan ni Jehova sa sarong agom na lalaki na mamumutan niya an saiyang agom asin itatao an pisikal, emosyonal, asin espirituwal na mga pangangaipo kaini. An pagpatalubo kan kakayahan na mag-isip, pagpahiling nin paggalang sa mga babayi, asin pagigin maaasahan, makakatabang saimo para magin mahusay na agom na lalaki. Pag may agom ka na, puwede kang magin ama. Ano an manunudan mo ki Jehova sa pagigin sarong marahay na ama? (Efe. 6:4) Hayagan na sinabi ni Jehova sa saiyang Aki, si Jesus, na namumutan asin inuuyunan niya ini. (Mat. 3:17) Kun ika magin sarong ama, siguraduhon na pirmi mong naipapamati sa saimong mga aki na namumutan mo sinda. Pirmi sindang komendaran sa marahay na mga bagay na ginigibo ninda. An mga ama na inaarog an halimbawa ni Jehova tinatabangan an saindang mga aki na magin maygurang na Kristiyanong lalaki asin babayi. Puwede ka nang mag-andam ngunyan para sa responsabilidad na ini paagi sa mamumuton na pag-ataman sa iba sa laog kan saindong pamilya saka kongregasyon. Asin makanuod na ipahayag an saimong pagkamuot asin pag-apresyar sa sainda.​—Juan 15:9. w23.12 28-29 ¶17-18

Bilang maimbod na mga lingkod ni Jehova, napapaatubang kita sa mga kadipisilan asin mga hilang na naeeksperyensiyahan man kan bilog na katawuhan. Puwedeng mapaatubang man kita sa pagkontra o pagpersegir kan mga tawong nauungis sa banwaan nin Diyos. Dawa ngani dai kita ilinilikay ni Jehova sa arog kaiyan na mga kasakitan, nanunuga siya na tatabangan niya kita. (Isa. 41:10) Sa tabang niya, mapagdadanay ta an satong kaugmahan, makakagibo kita nin marahay na mga desisyon, asin makakapagdanay kitang maimbod sa saiya dawa sa pinakamasakit na mga sitwasyon sa buhay ta. Nanunuga si Jehova na itatao niya sa sato an inaapod kan Bibliya na “an katuninungan nin Diyos.” (Fil. 4:​6, 7) An katuninungan na ini nanunungod sa pagigin kalmado asin katuninungan nin isip saka puso na resulta kan pagkaigwa nin haraning relasyon sa saiya. An katuninungan na iyan “nakakalabi sa gabos na pakasabot”; marahayon nanggad iyan kisa sa ano man na maiimahinar ta. Naeksperyensiyahan mo na daw na mamibi nin udok ki Jehova dangan pagkatapos, napangalas ka huli sa grabeng katuninungan na namati mo? An namatian mo iyo “an katuninungan nin Diyos.” w24.01 20 ¶2; 21 ¶4

An pagkamuot sa Diyos nagpapahiro sa maimbod na mga tawo na umawon nin bilog na puso an saiyang pangaran. Nasasabutan ni Hading David na an pag-umaw sa pangaran ni Jehova pag-umaw mismo ki Jehova. Kalabot sa pangaran ni Jehova an saiyang reputasyon, kaya maiisip ta diyan an gabos na magagayon niyang kuwalidad asin an saiyang kahanga-hangang mga gibo. Para ki David, banal an pangaran kan saiyang Ama asin gusto niyang umawon iyan. Gusto niyang gibuhon iyan sa ‘bilog niyang pagkatawo’ o nin bilog na puso. Arog man kaiyan an ginibo kan mga Levita mantang pinapanginutan ninda an pag-umaw ki Jehova. Mapakumbaba nindang inako na kulang an saindang mga tataramon para lubos nindang maipahayag an pag-umaw na maninigo sa sagradong pangaran ni Jehova. (Neh. 9:5) Siguradong an siring na mapakumbaba asin udok sa pusong pag-umaw nakapaugma sa puso ni Jehova. w24.02 9 ¶6

Dai ibibilang ni Jehova na bako kang mapanggana huling dai mo naabot an sarong pasuhan na bakong praktikal sa saimo. (2 Cor. 8:12) Makanuod sa ulang na naeksperyensiyahan mo. Pag-isipan kun ano na an nagibo mo. Sinasabi kan Bibliya na “an Diyos bakong biko para lingawan niya an saindong ginibo.” (Heb. 6:10) Kaya dai mo man iyan paglingawan. Pag-isipan kun ano na an nagibo mo—iyan man pagkaigwa nin haraning relasyon ki Jehova, pakikipag-ulay sa iba manungod sa saiya, o pagpabawtismo. Kun paanong nag-uswag ka asin naabot mo an espirituwal na mga pasuhan mo kaidto, puwede man na padagos kang umuswag para maabot an pasuhan mo ngunyan. Sa tabang ni Jehova, makakaya mo na maabot an saimong pasuhan. Mantang hinihinguwa mong maabot an saimong espirituwal na pasuhan, dai paglingawan na ikaugma an mga nahihiling mong paagi ni Jehova para tabangan ka asin an mga bendisyon niya sa saimo mantang inaabot mo an saimong pasuhan. (2 Cor. 4:7) Kun dai ka masuko, maako ka nin mas urog pa nganing mga bendisyon.​—Gal. 6:9. w23.05 31 ¶16-18

Gustong-gusto ni Jehova na ipahiling an saiyang mamumuton na pag-uyon sa mga namumutan niya. Mababasa sa Kasuratan an duwang pagkakataon na sinabi Niya ki Jesus na siya an Saiyang namumutan asin inuuyunan na Aki. (Mat. 3:17; 17:5) Gusto mo man daw madangog si Jehova na sabihon saimong inuuyunan ka niya? Dai si Jehova aktuwal na nakikipag-ulay sa sato, pero nakikipag-ulay siya sa sato paagi sa mga pahina kan saiyang Tataramon. “Madadangog” ta an boses kan pag-uyon ni Jehova pag binabasa ta an mga tataramon ni Jesus sa Mga Ebanghelyo. Si Jesus an perpektong repleksiyon kan mga kuwalidad kan saiyang Ama. Kaya pag nababasa ta an mga sinabi ni Jesus para ipahayag an saiyang pag-uyon sa saiyang bakong perpekto pero maimbod na mga parasunod, puwede tang imahinaron si Jehova na iyo an nagsasabi sa sato kan mga tataramon na iyan. (Juan 15:​9, 15) Kun magkaigwa kita nin mga pagbalo, dai iyan nangangahulugan na dai na kita inuuyunan nin Diyos. Imbes, nagtatao iyan sa sato nin oportunidad para patunayan kun gurano kararom kan satong pagkamuot asin pagtitiwala sa Diyos.​—Sant. 1:12. w24.03 28 ¶10-11