Nobyembre

Kun saro kang magurang, tabangan an saimong mga aki na makapaghanda nin mga komento na angay sa edad ninda. Kun minsan, seryosong mga bagay an pinag-uulayan sa pag-adal, arog kan problemang pang mag-agom o mga isyu sa moral. Pero posibleng may saro o duwang parapo diyan na puwedeng komentuhan nin sarong aki. Saro pa, tabangan an saimong mga aki na masabutan kun taano ta puwedeng dai sinda maapod sa kada magtaas sinda nin kamot. Makakatabang iyan sa sainda na dai madisganar pag iba an naapod. (1 Tim. 6:18) Gabos kita puwedeng makapaghanda nin nakakapakusog na mga komento na makakatao nin onra ki Jehova asin makakapakusog sa satong mga kapwa Kristiyano. (Tal. 25:11) Dawa ngani puwede kitang magtao kun minsan nin halipot na personal na eksperyensiya, likayan tang magtaram nin sobra manungod sa satong sadiri. (Tal. 27:2; 2 Cor. 10:18) Imbes, hinihinguwa tang isentro an atensiyon ki Jehova, sa saiyang Tataramon, asin sa saiyang banwaan sa kabilugan.​—Kap. 4:11. w23.04 24-25 ¶17-18

Mahalagang marhay an pagkamuot para magdanay na mata asin tultol an pag-iisip. (Mat. 22:​37-39) An pagkamuot sa Diyos makakatabang sato na magtagal sa paghuhulit sa ibong nin ano man na problema na tibaad mapaatubang sa sato huli kaiyan. (2 Tim. 1:​7, 8) Huling namumutan ta pati idtong mga bako tang kapagtubod, padagos kitang naghuhulit, iyan man paagi sa pagpapatotoo sa telepono o sa surat. Dai kita nawawaran nin paglaom sa satong kapwa na sarong aldaw magbago sinda asin magpuon na gibuhon an tama. (Ezek. 18:​27, 28) Kaiba sa pinapahilingan ta nin pagkamuot sa kapwa an satong mga kapwa Kristiyano. Ipinapahiling ta an siring na pagkamuot paagi sa ‘pagpakusog asin pagparigon sa lambang saro.’ (1 Tes. 5:11) Arog nin mga suldados na sinusuportaran an kada saro sa pakikipaglaban, pinapakusog ta man an lambang saro. Nungka tang tutuyuhon na kulgan an satong mga tugang o na magbalos nin maraot sa maraot. (1 Tes. 5:​13, 15) Ipinapahiling ta man an satong pagkamuot paagi sa paggalang sa mga brother na nanginginot sa kongregasyon.​—1 Tes. 5:12. w23.06 10 ¶6; 11 ¶10-11

An sarong paagi na mapapakusog ta an satong pagtubod iyo an paghurop-hurop sa pantubos. An pantubos sarong garantiya na magkakatotoo an mga panuga nin Diyos. Kun pag-iisipan tang marhay kun taano ta itinao an pantubos asin kun ano an kalabot diyan, mapapakusog ta an satong pagtubod na an panuga nin Diyos na buhay na daing katapusan sa sarong marahayon na kinaban siguradong mauutob. Taano ta nasabi ta iyan? Buweno, ano an kalabot sa pantubos? Isinugo ni Jehova an saiyang namumutan na marhay na panganay na Aki, an saiyang pinakadayupot na kaiba-iba, hali sa langit para ipangaki bilang sarong perpektong tawo. Mantang nasa daga, tinagalan ni Jesus an gabos na klase nin kadipisilan. Dangan nagsakit siya asin nag-agi nin makulugon na kagadanan. Dakulaon nanggad na halaga an ibinayad ni Jehova! Kun para sana iyan sa sarong mas marahay pero haliputon man sanang buhay, nungka kutanang itinugot kan satong mamumuton na Diyos na magsakit asin magadan an saiyang Aki. (Juan 3:16; 1 Ped. 1:​18, 19) Huli sa dakulaon na halaga na ibinayad ni Jehova, sisiguraduhon niyang magkakatotoo an buhay na daing katapusan sa bagong kinaban. w23.04 27 ¶8-9

Igwa daw si Jehova nin pagmawot na buhayon an mga gadan? Siyerto nanggad! Pinasabngan niya an nagkapirang kagsurat kan Bibliya na isurat an saiyang panuga na pagkabuhay liwat sa maabot. (Isa. 26:19; Kap. 20:​11-13) Asin pag nanunuga si Jehova, pirmi niya iyan na inuutob. (Jos. 23:14) Sa katunayan, gustong-gusto ni Jehova na buhayon an mga gadan. Pag-isipan an mga sinabi kan patriyarkang si Job. Sigurado siya na dawa pa magadan siya, hihidawon ni Jehova na mahiling giraray si Job na buhay. (Job 14:​14, 15) Arog man kaiyan an pagmawot ni Jehova sa gabos niyang mga parasamba na nagadan. Gustong-gusto niyang buhayon sinda, na may makusog na salud asin maugma. Paano man an bilyon-bilyon na nagadan na dai nagkaigwa nin pagkakataon na maaraman an katotoohan manungod ki Jehova? Gusto man kan satong mamumuton na Diyos na buhayon sinda. (Gibo 24:15) Gusto niya na magkaigwa sinda nin oportunidad na magin amigo niya asin mabuhay nin daing katapusan sa daga.​—Juan 3:16. w23.04 9 ¶5-6

Paano mo mapapakusog an saimong paglaom? Halimbawa, kun an paglaom mo iyo na mabuhay nin daing sagkod digdi sa daga, basahon an paglaladawan kan Bibliya manungod sa Paraiso asin hurop-hurupon iyan. (Isa. 25:8; 32:​16-18) Isip-isipon kun ano an magigin buhay sa bagong kinaban. Imahinaron na yaon ka duman. Kun padagos tang isinasaisip an paglaom manungod sa bagong kinaban, an satong mga problema ‘maagi sana asin magigin magian.’ (2 Cor. 4:17) Papakusugon ka ni Jehova paagi sa paglaom na itinatao niya sa saimo. Itinao niya na an kaipuhan mo para mag-ako ka nin kusog hali sa saiya. Kaya pag kaipuhan mo nin tabang para magibo an asignasyon, para matagalan an pagbalo, o para mapagdanay an saimong kaugmahan, dumulok ki Jehova paagi sa udok na pamibi asin hagadon an saiyang paggiya paagi sa personal na pag-adal. Akuon an pampakusog na hali sa saimong Kristiyanong mga tugang. Papagdanayon na malinaw asin buhay na buhay sa isip an saimong paglaom. Sa siring, “[tatawan] kamo kan gabos na kusog na kaipuhan nindo paagi sa . . . mamuraway na kapangyarihan [nin Diyos] tanganing lubos kamong makatagal na may pagpapasensiya asin kaugmahan.”​—Col. 1:11. w23.10 17 ¶19-20

Kadakul kita nin dahilan para pasalamatan si Jehova pag namimibi. Puwede ta siyang pasalamatan sa ano man na marahay na bagay na igwa kita; tutal, hali sa saiya an lambang marahay na balaog. (Sant. 1:17) Halimbawa, puwede tang ipahayag an satong pag-apresyar sa kagayunan kan daga asin sa makangangalas na mga linalang. Puwede ta man sambiton an pasasalamat ta sa satong buhay, sa satong pamilya, sa satong mga amigo, asin sa satong paglaom. Asin gusto tang pasalamatan si Jehova sa pagtugot niya na magkaigwa kita nin haraning relasyon sa saiya. Tibaad kaipuhan tang gumibo nin urog na paghihinguwa para pag-isipan an mga dahilan kun taano ta personal kitang nagpapasalamat ki Jehova. Nabubuhay kita sa bakong mapagpasalamat na kinaban. Sa parati, an mga tawo nakapokus sa kun paano ninda makukua an gusto ninda imbes na kun paano ninda maipapahiling an pasasalamat sa mga bagay na igwa sinda. Kun mapaimpluwensiya kita sa siring na kaisipan, an satong mga pamibi tibaad magin garo lista na sana nin mga kahagadan. Para malikayan iyan, kaipuhan tang padagos na pauswagon asin ipahayag an satong pasasalamat sa gabos na ginigibo ni Jehova para sa sato.​—Luc. 6:45. w23.05 4 ¶8-9

Bilang an satong mamumuton na Ama, habo ni Jehova na mahiling kitang nagsasakit. (Isa. 63:9) Dawa arog kaiyan, dai niya kita ilinilikay sa gabos na problema, na puwedeng iagid sa mga salog o kalayo. (Isa. 43:2) Minsan siring, nangangako siya na tatabangan niya kita na malampasan an mga iyan. Asin dai niya tutugutan na biyo kitang madanyaran kan satong mga problema. Tinatawan man kita ni Jehova kan saiyang makapangyarihan na banal na espiritu para tabangan kita na makatagal. (Luc. 11:13; Fil. 4:13) Kaya, makakapagtiwala kita na pirmi niyang itatao sa sato an talagang kaipuhan ta para makatagal asin magdanay na maimbod sa saiya. Inaasahan ni Jehova na magtitiwala kita sa saiya. (Heb. 11:6) Kun minsan, tibaad garo baga dai ta na kaya an satong mga problema. Tibaad ngani magduda na kita kun baga tatabangan kita ni Jehova. Pero inaasigurar kita kan Bibliya na paagi sa kapangyarihan nin Diyos “an sarong pader kaya [tang] sakaton.” (Sal. 18:29) Kaya imbes na magpadara sa satong mga pagduda, mamibi kita na may bilog na pagtubod, asin nagtitiwala na sisimbagon ni Jehova an satong mga pamibi.​—Sant. 1:​6, 7. w23.11 22 ¶8-9

Magayunon nanggad na deskripsiyon sa tunay na pagkamuot! An mga tataramon na iyan igwa nin nakakapakusog sa buot na katotoohan para sa mga mag-agom: Puwede kamong magkaigwa nin nagdadanay na pagkamuot sa kada saro. Kaipuhan nin paghihinguwa para an sarong mag-agom magkaigwa nin nagdadanay na pagkamuot sagkod na sinda nabubuhay. Para iilustrar, an sarong gatong puwedeng padagos na maglaad—solamente kun gagatungan iyan. Kun papabayaan sana iyan, puwedeng luway-luway na mawara an laad. Sa kaagid na paagi, an pagkamuot sa pag-ultanan nin mag-agom puwedeng magdanay na makusog—solamente kun papakusugon ninda an saindang relasyon. Kun minsan, tibaad mamati nin sarong mag-agom na naglilipot na an saindang pagkamuot, lalo na pag napapagabatan sinda nin mga problema sa pinansiyal, problema sa salud, o kadipisilan sa pagpadakula nin mga aki. Kaya para padagos na mapalaad “an laad ni Jah,” parehong kaipuhan kan mag-agom na maghinguwa para magkaigwa nin haraning relasyon ki Jehova. w23.05 20-21 ¶1-3

Tanganing mapatalubo an kusog nin buot, ano an kaipuhan tang gibuhon? Puwede kitang sadulon kan satong mga magurang na magin makusog an buot, pero dai ninda maipapamana sa sato an kuwalidad na ini. An pagkaigwa nin kusog nin buot kapareho kan pakanuod nin sarong bagong kakayahan. An sarong paagi para magin mahusay sa kakayahan na iyan iyo an pag-obserbar na marhay sa mga ginigibo kan nagtutukdo dangan pag-arog sa halimbawa niya. Sa kaagid na paagi, nakakanuod kitang magin makusog an buot paagi sa pag-obserbar na marhay sa kun paano ipinapahiling kan iba an kuwalidad na iyan dangan pag-arog sa halimbawa ninda. Arog ni Daniel, kaipuhan tang makanuod na marhay sa Tataramon nin Diyos. Dapat kitang magkaigwa nin dayupot na relasyon ki Jehova paagi sa parating pakikipag-ulay saiya na dai nag-aalangan. Asin kaipuhan tang magtiwala ki Jehova, na kumbinsido na pirmi niya kitang tatabangan. Sa siring, pag nabalo an satong pagtubod, magigin makusog an satong buot. An mga tawong makusog an buot sa parati nakukua an respeto kan iba. Puwede man nindang madagka an mga tawong sadiyosan an puso na midbidon si Jehova. Iyo, may marahay na mga dahilan nanggad kita para patalubuon an kusog nin buot. w23.08 2 ¶2; 4 ¶8-9

An Griegong tataramon na trinadusir na “siyertuhon” ginamit may koneksiyon sa pagsiyasat o pagkilatis nin mamahalon na mga metal. Kun siring, kaipuhan tang siyasaton an mga nadadangog o nababasa ta para madeterminaran kun baga iyan tunay. Urog na magigin mahalaga iyan para sa sato mantang mas nagrarani kita sa dakulang kasakitan. Imbes na basta na sana paniwalaan an sinasabi kan iba, ginagamit ta an satong kakayahan na mag-isip para ikumparar an mga nababasa o mga nadadangog ta sa kun ano an sinasabi kan Bibliya asin kan organisasyon ni Jehova. Paagi kaiyan, dai kita madadaya kan ano man na propaganda o panglalansi kan mga demonyo. (Tal. 14:15; 1 Tim. 4:1) Bilang sarong grupo, an mga lingkod nin Diyos makakaligtas sa dakulang kasakitan. Pero bilang indibidwal, dai ta aram kun ano an mangyayari sa sato sa maabot. (Sant. 4:14) Minsan siring, abuton ta man an dakulang kasakitan o magadan bago kaiyan, babalusan kita nin buhay na daing katapusan kun magdadanay kitang maimbod. Lugod na gabos kita magpokus sa satong magayunon na paglaom asin padagos na magin andam para sa aldaw ni Jehova! w23.06 13 ¶15-16

Dai ta aram kun paano mauutob an nagkapirang mga propesiya sa Bibliya. (Dan. 12:​8, 9) Pero dai buot sabihon na miling dai ta lubos na nasasabutan kun paano mauutob an sarong propesiya dai na iyan magkakatotoo. Siguradong makakapagtiwala kita ki Jehova na ihahayag niya sa sato an kaipuhan tang maaraman nin eksakto asin sa tamang panahon, arog kan ginibo niya kaidto. Sarong pagproklamar nin “katuninungan asin katiwasayan” an mangyayari. (1 Tes. 5:3) Dangan aatakihon kan pulitikal na mga kapangyarihan kan kinaban an palsong relihiyon asin lalaglagon iyan. (Kap. 17:​16, 17) Pagkatapos, sasalakayon ninda an banwaan nin Diyos. (Ezek. 38:​18, 19) An mga pangyayaring ini masagkod sa pangultimong giyera nin Armagedon. (Kap. 16:​14, 16) Makakasigurado kitang mangyayari an mga ini sa dai na mahahaloy. Mantang dai pa iyan nangyayari, padagos tang ipahiling an pagpapasalamat niyato sa satong mamumuton na Ama sa langit paagi sa pagtaong atensiyon sa mga propesiya sa Bibliya asin sa pagtabang sa iba na iyo man an gibuhon. w23.08 13 ¶19-20

Kan ipinapaliwanag ni apostol Pablo an manungod sa pagtubod, paglaom, asin pagkamuot, nagkongklusyon siya paagi sa pagsabi na “an pinakaurog sa mga [kuwalidad na] ini iyo an pagkamuot.” (1 Cor. 13:13) Taano ta nasabi ini ni Pablo? Sa maabot na panahon, dai ta na kakaipuhanon na magkaigwa nin pagtubod sa mga panuga nin Diyos manungod sa saiyang bagong kinaban o nin paglaom na an mga panugang iyan mauutob huling an mga bagay na iyan nagkakatotoo na. Pero pirmi tang kakaipuhanon na magkaigwa nin pagkamuot ki Jehova asin sa mga tawo. Sa katunayan, an pagkamuot ta para sa sainda padagos na makusog sagkod pa man. An pagkamuot nagpapamidbid man sa sato bilang tunay na mga Kristiyano. Sinabi ni Jesus sa saiyang mga apostol: “Paagi kaini, maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.” (Juan 13:35) Siring man, nagdadanay kitang nagkakasararo huli sa pagkaigwa niyato nin pagkamuot sa lambang saro. Inapod ni Pablo an pagkamuot na “bugkos nin lubos na pagkasararo.” (Col. 3:14) Nagsurat si apostol Juan sa saiyang mga kapagtubod: “An siisay man na namumuot sa Diyos dapat man na mamuot sa saiyang tugang.” (1 Juan 4:21) Pag ipinapahiling niyato an satong pagkamuot sa lambang saro, ipinapahiling ta an satong pagkamuot sa Diyos. w23.11 8 ¶1, 3

Iinagid kan Bibliya an satong buhay bilang mga Kristiyano sa sarong paurumbasan. An mga paradalagan na mapangganang makakaabot sa finish line tatawan nin premyo na buhay na daing katapusan. (2 Tim. 4:​7, 8) Kaipuhan tang gibuhon an pinakamakakaya ta para padagos na magdalagan, lalo na ta haranihon na kita sa finish line. Sinambit ni apostol Pablo kun ano an makakatabang sa sato na manggana sa paurumbasan. Ipinagbuot niya sa sato na “iapon . . . an lambang pagabat asin . . . magdalagan kita na may pakatagal sa daralaganan na ibinugtak sa atubangan ta.” An buot daw sabihon ni Pablo mayo na nin pasan na dapat darahon an sarong Kristiyano? Dai, bako iyan an punto niya. Imbes, an buot niyang sabihon iyo na kaipuhan tang halion an lambang dai kinakaipuhan na pagabat. An klase nin pagabat na ini makakaulang sa sato asin magigin dahilan para mapagal kita. Para makatagal, dapat na aramon ta tulos asin halion an ano man na dai kinakaipuhan na pagabat na makakapaluway sa satong pagdalagan. Pero, kasabay kaiyan, dai ta man babaliwalaon an mga pasan na dapat tang darahon. Ta kun gigibuhon niyato iyan, puwede kitang madiskuwalipikar sa paurumbasan.​—2 Tim. 2:5. w23.08 26 ¶1-2

An pagigin rasonable nakakatabang sa sato na igalang an pagmansay kan iba. Halimbawa, may mga sister na gustong maggamit nin make-up, mantang an iba habo. May mga Kristiyano na nag-iinom nin arak basta katamtaman sana, mantang an iba nagdesisyon na dai talaga mag-inom. Gusto kan gabos na Kristiyano na magkaigwa nin marahay na salud pero iba-iba an pamamaagi ninda nin pag-ataman sa salud. Kun ipipirit ta sa mga tugang sa kongregasyon an pighuhuna tang pinakamarahay na pamamaagi, puwede niyatong masingkog an iba asin maresulta iyan sa pagkabaranga. (1 Corinto 8:9; 10:​23, 24) Halimbawa, imbes na magtao nin istriktong mga pagbuot manungod sa paagi nin pagbado, nagtao si Jehova sa sato nin mga prinsipyo na susundon. Kaipuhan na an paagi niyato nin pagbado angay para sa mga ministro nin Diyos, na nagpapahiling nin pagigin rasonable, kabinian, asin “tultol na isip.” (1 Tim. 2:​9, 10) Sa siring, dai kita nagsusulot nin bado na makakakua nin sobrang atensiyon kan iba. Makakatabang man sa mga elder an mga prinsipyo sa Bibliya na malikayan na magtao kan sadiri nindang mga susundon manungod sa pagbado asin istilo nin buhok. w23.07 23-24 ¶13-14

Ipinahiling sa sato ni Jehova kun paano kita magkakaigwa nin maugmang puturo. Idtong mga nag-ako kan imbitasyon kan daing supog asin “mangmang na babayi” pinurbaran na namitan an “mahamis,” patagong kaugmahan. An kaaabtan ninda iyo “an kairaruman kan Lubungan.” (Tal. 9:​13, 17, 18) Ibang-iba nanggad sa magigin puturo kan mga nag-ako kan imbitasyon hali sa “tunay na kadunungan”! (Tal. 9:1) Nakakanuod kita na mamutan an namumutan ni Jehova asin ikaungis an mga ikinakaungis niya. (Sal. 97:10) Asin nauugma nanggad kita na imbitaran an iba na makanuod sa “tunay na kadunungan.” Garo kita nangangapudan “hali sa ibabaw kan haralangkaw na lugar kan siyudad: ‘An siisay man na daing eksperyensiya, maglaog digdi.’” An mga pakinabang niyato diyan asin kan mga maako kan imbitasyon bako lang sa presente. Nagdadanay iyan, kaya puwede kitang “mabuhay” nin daing katapusan mantang “paabante [kitang naglalakaw] sa dalan nin pakasabot.”​—Tal. 9:​3, 4, 6. w23.06 24 ¶17-18

Ano an namamatian mo pag hinahapot ka kan sarong katrabaho o kaeskuwela manungod sa saimong mga tinutubod? Ninenerbiyos ka daw? Kadaklan sa sato iyo. Pero an arog kaiyan na hapot tibaad makatao sato nin ideya sa kun ano an iniisip o mga tinutubod kan naghapot, na nagtatao sa sato nin oportunidad para ihiras an maugmang bareta. Pero, kun minsan, tibaad maghapot an saro sa paagi na garo baga gusto niyang makiargumento sa sato. Dai kita dapat magngalas kaiyan. May mga tawo kaya na natawanan nin salang mga impormasyon manungod sa satong mga tinutubod. (Gibo 28:22) Apuwera kaiyan, nabubuhay kita sa “huring mga aldaw,” sarong panahon kun sain dakul an “habo nin ano man na kasunduan” asin “maringis” pa ngani. (2 Tim. 3:​1, 3) Tibaad maisip mo, ‘Paano ako magigin mabuot asin mataktika pag may gustong makiargumento manungod sa mga paniniwala ko na basado sa Bibliya?’ Ano an makakatabang saimo? Sa sarong tataramon—kahuyuan. An saro na mahuyo dai tulos naaanggot kundi nagigibo niyang kontrulon an saiyang sadiri pag pinoprobokar o pag dai siya sigurado kun paano masimbag. w23.09 14 ¶1-2

Kun minsan, nakakaresibi kita nin konseho na nakakatabang sa sato na malikayan an mga bagay na arog kan materyalismo asin mga gibo na puwedeng magin dahilan na mabalga ta an mga katugunan nin Diyos. Asin dawa sa mga bagay na iyan, nakikinabang kita pag sinusunod ta an paggiya ni Jehova. (Isa. 48:​17,18; 1 Tim. 6:​9, 10) Siguradong padagos na magamit si Jehova nin mga tawong representante para giyahan kita sa panahon nin dakulang kasakitan sagkod sa Sangribong Taon na Paghadi. Padagos ta daw na susunudon an giyang iyan? Magigin madali sa sato an pagsunod kun sa ngunyan pa sana, nagsusunod na kita sa paggiya ni Jehova. Kun siring, pirmi tang sunudon an paggiya ni Jehova, pati na an mga giyang itinatao kan mga ninombrahan niya na mangataman sa sato. (Isa. 32:​1, 2; Heb. 13:17) Mantang ginigibo iyan, lubos kitang makakapagtiwala na an satong Giya, si Jehova, magiya sa sato parayo sa espirituwal na peligro asin pasiring sa satong destinasyon—sa buhay na daing katapusan sa bagong kinaban. w24.02 25 ¶17-18

Ikinaugma ni apostol Pablo an nakakakontentong buhay sa paglilingkod ki Jehova, pero dakul na mga kadipisilan an inatubang niya. Parating hararayo an dinudumanan ni Pablo, asin bakong pasil an pagbiyahe kan panahon na idto. Sa saiyang mga pagbiyahe, namugtak si Pablo kun minsan “sa mga peligro sa mga salog” asin sa “mga peligro sa mga tulisan.” May mga pagkakataon man na hinampak siya kan mga nagkokontra. (2 Cor. 11:​23-27) Asin an Kristiyanong mga tugang ni Pablo bako pirming mapagpasalamat sa sinserong mga paghihinguwa niya na tabangan sinda. (2 Cor. 10:10; Fil. 4:15) Ano an nakatabang ki Pablo para makapagpadagos sa paglilingkod ki Jehova? Dakul an nanudan ni Pablo sa Kasuratan asin sa mga eksperyensiya niya mismo manungod sa personalidad ni Jehova. Kumbinsido si Pablo na namumutan siya kan Diyos na Jehova. (Roma 8:​38, 39; Efe. 2:​4, 5) Asin namutan niya man na marhay si Jehova. Ipinahiling ni Pablo an pagkamuot niya ki Jehova “paagi sa paglilingkod asin padagos pang paglilingkod sa mga banal.”​—Heb. 6:10. w23.07 9 ¶5-6

Uyon an dakul na tawo na kaipuhan ta an sekular na mga gobyerno asin na dapat tang sunudon an kisiyera pira sa mga ley na ipinapautob kan “haralangkaw na awtoridad” na ini. Pero an iyo man sanang mga tawo tibaad magduwa-duwang magsunod sa sarong ley na sa hiling ninda bakong makatanusan o garo baga magabaton man. Sinasabi kan Bibliya na an mga gobyerno nin tawo nagtatao nin kasakitan, kontrolado ni Satanas, asin madali nang laglagon. (Sal. 110:​5, 6; Ecl. 8:9; Luc. 4:​5, 6) Sinasabi man kaiyan sa sato na “an siisay man na nagtutumang sa awtoridad minatumang sa areglo nin Diyos.” An satong limitadong pagpasakop sa haralangkaw na awtoridad kabtang kan temporaryong areglo ni Jehova tanganing mapagdanay an pagigin areglado kan mga bagay-bagay. Kun siring, dapat niyatong “itao sa gabos an para sa sainda,” kaiba diyan an mga buhis, paggalang, asin pagsunod. (Roma 13:​1-7) Tibaad mansayon ta an sarong ley na bakong kumbenyente, bakong makatanusan, o magastos kun susunudon. Alagad sinusunod ta si Jehova, asin sinasabi niya sa sato na sunudon niyato an mga awtoridad na ini basta dai ninda hinahagad sa sato na balgahon an saiyang mga pagbuot.​—Gibo 5:29. w23.10 8 ¶9-10

Kan ipinangaki si Samson, an mga Filisteo an namamahala sa nasyon nin Israel asin inaapi ninda ini. (Huk. 13:1) An maringis na pamamahala ninda nagresulta nin grabeng pagsakit sa mga Israelita. Pinili ni Jehova si Samson para ‘manginot sa pagligtas sa Israel sa kamot kan mga Filisteo.’ (Huk. 13:5) Para magibo iyan ni Samson, kaipuhan niyang magsarig ki Jehova. Sa sarong pagkakataon, sarong hukbong militar kan mga Filisteo an nag-arabot para dakupon si Samson sa Lehi, na posibleng sa Juda. Nagkatarakot an mga lalaki kan Juda, kaya nagdesisyon sindang itao si Samson sa mga kalaban. Ginapos si Samson kan mga kahimanwa niya gamit an duwang bagong pisi asin dinara siya sa mga Filisteo. (Huk. 15:​9-13) Minsan siring, “tinawan [si Samson] nin kusog kan espiritu ni Jehova” asin tinaranggal niya an mga pisi na nakagarapos sa saiya. Dangan “may nahiling siyang panga nin lalaking asno na bago pa sanang magadan,” kinua niya iyan asin ginamit para gadanon an 1,000 lalaking Filisteo!—Huk. 15:​14-16. w23.09 2 ¶3-4

Padikit-dikit na ihinahayag ni Jehova sa Bibliya an saiyang “daing sagkod na katuyuhan.” Sa ano man na paagi, pirmi siyang nagigin mapanggana huling “an gabos na bagay ginibo [niya] para mautob an saiyang katuyuhan.” (Tal. 16:4) Asin an resulta kan mga ginigibo ni Jehova magdadanay sagkod lamang. Ano an katuyuhan ni Jehova, asin anong mga pagbabago an ginibo niya para mangyari iyan? Sinabi nin Diyos sa inot na mga tawo kun ano an katuyuhan niya para sa sainda. Dapat na ‘magkaigwa sinda nin mga aki asin magpakadakul, panuon ninda an daga asin sakupon iyan, asin pamahalaan an gabos na buhay na linalang’ sa daga. (Gen. 1:28) Kan magrebelde si Adan asin Eva, na nagin dahilan kaya luminaog an kasalan sa katawuhan, dai kaiyan naulang an katuyuhan ni Jehova. Binago niya an paagi niya nin paggibo kan saiyang katuyuhan. Insigida, nagdesisyon siyang mag-establisar nin sarong Kahadian sa langit na iyo an masagibo kan orihinal na katuyuhan niya para sa katawuhan asin sa daga.​—Mat. 25:34. w23.10 20 ¶6-7

Matatabangan kita ni Jehova na dai sumuko. Tibaad masakit para sa sato na magpadagos, lalo na kun igwa kitang piglalabanan na dai mahali-haling kaluyahan. Kun minsan, tibaad garo baga mas masakit labanan an satong mga kaluyahan kisa sa mga kaluyahan na igwa si apostol Pedro. Pero tatawanan kita ni Jehova nin kusog para dai sumuko. (Sal. 94:​18, 19) Halimbawa, sarong brother an namuhay nin homoseksuwal sa laog nin dakul na taon bago nanudan an katotoohan. Lubos niyang binayaan an imoral na mga gibo-gibong iyan. Pero, paminsan-minsan nakakamati pa man giraray siya nin salang mga pagmawot. Ano an nakatabang saiya na dai sumuko? Sinabi niya: “Pinapakusog kita ni Jehova.” Sinabi pa niya: “Sa tabang kan espiritu ni Jehova . . . , nanudan ko na posible na [makapagpadagos] sa dalan nin katotoohan . . . Nagin posible na gamiton ako ni Jehova, asin sa ibong kan sakong pagkabakong perpekto padagos niya akong pinapakusog.” w23.09 23 ¶12

Mga hoben na brother, dai kamo awtomatikong magigin sarong maygurang na Kristiyano. Kaipuhan nindong pumili nin marahay na mga arugan, patalubuon an kakayahan na mag-isip, magin maaasahan, makanuod nin praktikal na mga kasanayan sa buhay, asin magin andam para sa maabot na mga responsabilidad. Pag iniisip-isip an mga bagay na kaipuhan mong gibuhon, tibaad mamati mo kun minsan na garo baga masakiton iyan. Pero makakaya mo iyan. Tandaan na gustong-gusto kang tabangan ni Jehova. (Isa. 41:​10, 13) Siyempre, tatabangan ka man kan mga tugang sa kongregasyon. Pag saro ka nang maygurang na Kristiyano, magigin maugma asin nakakakontento an saimong buhay. Namumutan niyamo kamo, mga hoben na brother! Lugod na abunda kamong bendisyunan ni Jehova mantang hinihinguwa nindo ngunyan na magin maygurang na mga Kristiyano. w23.12 29 ¶19-20

Imahinara na yaon ka sa sarong pagtiripon-tipon kaiba an mga tugang. Nag-e-enjoy ka, dangan sa pagtatapos kan pagtiripon-tipon, nagritrato ka kaiba an grupo. Nagritrato ka pa ngani nin duwa pa enkaso bakong magayon su nainot. Kaya ngunyan may tulo kang ritrato. Kaya lang sa sarong ritrato, nahiling mo na su sarong brother nakamurusdot. Idi-delete mo na iyan ta igwa ka pa man nin duwang ritrato, na an gabos nakangirit pati na su brother. Sa parati may marahay kitang nagigirumduman sa mga pagkakataon na nakaibanan ta an mga tugang. Pero halimbawa ngaya may nagigirumduman ka na sarong pagkakataon na may nasabi o may nagibong maraot sa saimo an sarong tugang. Ano an dapat mong gibuhon sa bakong magayon na nagigirumduman mong iyan? Puwede mo daw na lingawan na iyan, arog kan gigibuhon mong pag-delete sa saro sa mga ritratong idto? (Efe. 4:32) Magigibo ta iyan ta dakul kitang marahay na nagigirumduman sa pakikiiba-iba niyato sa tugang na iyan. An mga pangyayaring iyan an gusto tang pirming girumdumon asin pahalagahan. w23.11 12-13 ¶16-17

An Griegong mga tataramon na ginamit digdi nagpaparisa na an pagbado kan sarong Kristiyana dapat na magin kagalang-galang asin nagpapahiling nin konsiderasyon sa namamatian o opinyon kan iba. Hinahangaan ta nanggad an satong maygurang na Kristiyanang mga sister sa saindang mabining pagbado! An pakamansay saro pang kuwalidad na kaipuhan ipahiling kan gabos na maygurang na Kristiyana. Ano an pakamansay? Iyan marahay na paghusgar—an kakayahan na maaraman kun ano an tama asin sala, dangan pagpili nin madunong na desisyon. Pag-isipan an halimbawa ni Abigail. An saiyang agom naggibo nin salang desisyon na madara nin kapahamakan sa gabos na kairiba niya sa harong. Huminiro tulos si Abigail. An saiyang marahay na paghusgar nakapagligtas nin buhay. (1 Sam. 25:​14-23, 32-35) An pakamansay makakatabang man sa sato na mahiling kun nuarin mataram asin kun nuarin masilensiyo. Asin makakatabang man iyan sa sato na magdanay na balanse pag nagpapahiling nin personal na interes sa iba.​—1 Tes. 4:11. w23.12 20 ¶8-9

Isinurat ni apostol Pablo an mga tataramon na iyan para sa kongregasyon sa Roma. An mga tugang duman nakanuod manungod ki Jehova asin ki Jesus, nagpahiling nin pagtubod, asin nagin mga Kristiyano. Huli kaiyan, an Diyos “ipinahayag na [sindang] matanos dahil sa pagtubod,” asin linahidan niya sinda nin banal na espiritu. (Roma 5:1) Iyo, nagkaigwa sinda nin sigurado, sarong magayunon na paglaom. Kan huri, nagsurat si Pablo sa linahidan na mga Kristiyano sa Efeso manungod sa paglaom na itinao sa sainda nin Diyos. Kaiba sa paglaom na iyan an pag-ako ninda kan “mana kan mga banal.” (Efe. 1:18) Sinabi man ni Pablo sa mga taga Colosas kun sain ninda aakuon an paglaom na iyan. Inapod niya iyan na “paglaom na nakatagama para sa saindo sa langit.” (Col. 1:​4, 5) Kaya an paglaom kan linahidan na mga Kristiyano, iyo an mabuhay liwat para mag-ako nin buhay na daing katapusan sa langit, na diyan mamamahala sinda kaiba ni Cristo.​—1 Tes. 4:​13-17; Kap. 20:6. w23.12 9 ¶4-5

An orihinal na terminong ginamit para sa “magbabantay” sarong terminong pangmilitar asin ginagamit iyan para ipanungod sa mga suldados na nagbabantay sa sarong siyudad asin nagpoprotektar diyan laban sa mga pag-atake. An mga nakaistar sa nakukutaan na siyudad matuninong na nakakaturog huling aram nindang may mga suldados na nagbabantay sa mga trangkahan. Sa kaparehong paagi, pag an katuninungan nin Diyos nagbabantay sa satong puso asin isip, tiwasay kita huling aram tang ligtas kita. (Sal. 4:8) Arog kan nagin sitwasyon ni Hana, dawa dai tulos magbago an sitwasyon ta, puwede pa man giraray kitang makamati nin katuninungan. (1 Sam. 1:​16-18) Asin pag igwa kita nin katuninungan, sa parati, mas nagigin madali sa sato na makapag-isip nin malinaw asin gumibo nin madunong na mga desisyon. Ano an puwede tang gibuhon? Pag napupurisaw ka, mag-apod ka nin bantay, sabi ngani. Paano? Mamibi sagkod na mamati mo an katuninungan nin Diyos. (Luc. 11:9; 1 Tes. 5:17) Kun napapaatubang ka sa masakit na sitwasyon, magin matiyaga sa pagpamibi, asin maeeksperyensiyahan mo an katuninungan ni Jehova mantang binabantayan kaiyan an saimong puso asin isip.​—Roma 12:12. w24.01 21 ¶5-6

Para pakangbanalon an pangaran kan saiyang Ama, tinagalan ni Jesus an lambang pagpasakit, pang-iinsulto, asin pagpakaraot sa saiya. Aram niya na nagin makinuyog siya sa saiyang Ama sa gabos na bagay; mayo siya nin dapat na ikasupog. (Heb. 12:2) Aram niya man na direkta siyang inaatake ni Satanas sa masakit na panahon na idto. (Luc. 22:​2-4; 23:​33, 34) Siguradong nag-asa si Satanas na mararaot niya an integridad ni Jesus; alagad, dai nanggad nagin mapanggana si Satanas! Biyong pinatunayan ni Jesus na talagang putikon si Satanas asin na igwa si Jehova nin maimbod na mga lingkod na pinapagdanay an saindang integridad dawa nasa pinakamasakit na mga pagbalo! Gusto mo daw na mapaugma an saimong namamahalang Hadi? Padagos na umawon an pangaran ni Jehova, na tinatabangan an iba na maaraman kun anong klaseng Diyos talaga siya. Sa paggibo mo kaiyan, sinusundan mo an mga lakad ni Jesus. (1 Ped. 2:21) Arog ni Jesus, napapaugma mo si Jehova asin napapatunayan mo na an Saiyang kaiwal, si Satanas, grabe nanggad kaputikon! w24.02 11-12 ¶11-13

Sa nakalihis na limang taon, labing sarong milyon an nabawtismuhan bilang mga Saksi ni Jehova. Pag idinusay mo an sadiri mo ki Jehova, pinipili mo na magin disipulo ni Jesu-Cristo asin magin pinakaimportante sa buhay mo an paggibo kan kabutan nin Diyos. Ano an kalabot sa pagdusay bilang Kristiyano? Sinabi ni Jesus: “Kun an siisay man gustong magsunod sa sako, talikdan niya an saiyang sadiri.” (Mat. 16:24) An frase sa Griego na itrinadusir na “talikdan niya an saiyang sadiri” puwede man itradusir na “dapat siyang magsabi nin dai sa saiyang sadiri.” Bilang nagdusay na lingkod ni Jehova, kakaipuhanon mong magsabi nin dai sa ano man na bakong kauyon kan saiyang kabutan. (2 Cor. 5:​14, 15) Kaiba diyan an pagsabi nin dai sa “mga gibo kan laman,” arog kan seksuwal na imoralidad. (Gal. 5:​19-21; 1 Cor. 6:18) An mga pagbabawal daw na iyan makakalimitar sa saimo? Dai, kun namumutan mo si Jehova asin kumbinsido ka na an saiyang mga katugunan para sa ikakarahay mo.​—Sal. 119:97; Isa. 48:​17, 18. w24.03 2 ¶1; 3 ¶4

Tinatawan ni Jehova kan saiyang banal na espiritu an mga inuuyunan niya. (Mat. 12:18) Puwede tang ihapot sa satong sadiri, ‘Naipapahiling ko daw an pira sa mga aspekto kan banal na espiritu nin Diyos sa sakuyang buhay?’ Narisa mo daw na mas nagin mapasensiya ka sa iba kisa kaidtong dai mo pa nabibisto si Jehova? Sa katunayan, miyentras na mas nakakanuod kang ipahiling an bunga kan espiritu nin Diyos, mas mamamati mo man na yaon sa saimo an pag-uyon niya! Itinatao ni Jehova an mga pakinabang na dara kan pantubos sa mga inuuyunan niya. (1 Tim. 2:​5, 6) Pero paano kun pagmati ta dai kita inuuyunan ni Jehova, dawa ngani nagtutubod kita sa pantubos asin bawtisado na? Tandaan, dai kita pirming makakapagtiwala sa sadiri tang pagmati pero makakapagtiwala kita ki Jehova. An mga may pagtubod sa pantubos ibinibilang niyang matanos asin nanunuga siya na bebendisyunan niya sinda.​—Sal. 5:12; Roma 3:26. w24.03 30 ¶15; 31 ¶17