“Si Jehova an Sakuyang Pastor”

“Si Jehova an sakuyang Pastor. Dai ako magkukulang nin ano man.”​—SALMO 23:1.

1, 2. Ano an nagkapira sa mga nagibo ni David, asin pirang salmo an ginibo nia?

IMAHINARA an eksenang ini: An mga hukbong Filisteo kahampang kan hukbo nin Israel. Si Goliat, sarong higanteng Filisteo, mapan-angat. An sarong barobata, na an dara sanang armas lagpitaw asin mga gapo, nagdadalagan sa pagsabat sa saiya. An sentro sa punteriyang gapo luminagbas sa payo kan higante asin ginadan sia. Siisay an barobata? Si David, sarong pastor na ginana an pambihirang kapangganahan na ini sa tabang ni Jehova Dios.—1 Samuel, kapitulo 17.

² Pag-abot nin panahon an barobatang ini nagin hade sa Israel, na naghade sa laog nin 40 taon. Sia ekspertong paratugtog nin arpa asin nagkompuwesto nin dakol na berso sa pasabong nin Dios. Si David nagsurat man nin labing 70 magagayon na salmo na gikanan nin dakulang pagpakosog asin paggiya para sa banwaan ni Jehova ngonyan. An pinakamidbid sa mga ini iyo an Salmo 23. Taano ta dai bukasan an saindong Biblia asin sundan iyan mantang pinag-aadalan niato nin bersikulo-por-bersikulo an salmong ini?

Si Jehova, Sarong Mamomoton na Pastor

3. (a) Sa anong mga okasyon na isinapeligro ni David an saiyang buhay sa pagprotehir sa saiyang mga karnero? (b) Sa anong sentido na si Jehova satong Pastor?

³ “Si Jehova an sakuyang Pastor.” (Salmo 23:1) Bilang eksperyensiadong pastor, si David tataong maggiya, magpasabsab, asin magprotehir sa mga karnero. Halimbawa, mapuso niang prinotehiran an saiyang mga karnero tumang sa sarong leon sa sarong pangyayari asin sa sarong oso iba na naman na panahon. (1 Samuel 17:34-36) An mga karnero ni David lubos na nagsarig sa saindang pastor. Alagad kun manongod ki Jehova, sia mismo sarong karnero. Mantang si David tiwasay sa mamomoton na pangataman nin Dios, sia nakapagsabi: “Si Jehova an sakuyang Pastor.” Nakakamtan daw nindo an katiwasayan na ini sakop kan Dakulang Pastor, si Jehova Dios? Tunay na saiyang ginigiyahan, pinasasabsab, asin pinoprotehiran an saiyang arog-karnerong mga parasamba ngonyan. Dugang pa, bilang nombradong kamagurangan sa mga kongregasyon nin mga Saksi ni Jehova, an maimbod, mamomoton na katabang na mga pastor maigot na nag-aataman sa mga karnero.—1 Pedro 5:1-4.

4. Paano an kamugtakan niato ngonyan nakaaagid sa kamugtakan kan mga Israelitas sa kapatagan?

⁴ “Dai ako magkukulang nin ano man.” Maingat na isip-isipon an mga tataramon na ini. Huli sa mamomoton na pangataman ni Jehova, bako daw na kamo igwa nin nakararangang pakamate nin pagkakalmado asin pagkompiar? Nagigirumdoman daw nindo kun ano an nangyari sa mga Israelitas kan sinda magbaklay sa kapatagan sa laog nin 40 taon? Tara, itinagama nin Dios an gabos nindang pundamental na pangangaipo! Iyo man ngonyan. An maimbod na mga lingkod ni Jehova dai nagkukulang nin ano man. An dakol makapagsasabi man kan ipinasabong na mga tataramon na ini ni David: “Ako nagin hoben man, asin naggurang man, alagad dai ako noarin man nakaheling nin siisay man na matanos na lubos na pinabayaan, ni an saiyang mga aki na nakikilimos nin tinapay.” (Salmo 37:25) Ngonyan, abunda an espirituwal na kakanon na itinatagama paagi sa “maimbod asin madonong na oripon.” (Mateo 4:4; 24:45-47) Apuwera sa nagkapirang pagtiripon kada semana, igwa kita kan Biblia, kan mga magasin na An Torrengbantayan asin Magmata!, asin dakol pang ibang publikasyon. Minsan sa mga nasyon na an paghuhulit kan mga Saksi ni Jehova prohibido, an suplay nin espirituwal na kakanon regular na inaako. An karnero ni Jehova dai nagkukulang nin ano man!

5. Taano an mga karnero ni Jehova ngonyan ta matoninong asin tiwasay, asin may anong resulta?

⁵ “Sa madoot na mga sabsaban pinahihigda nia ako.” (Salmo 23:2) May mahihiwas na madoot na sabsaban sa palibot nin dakol na siudad sa suanoy na Israel. Kun paanong an mamomoton na pastor kaidto ginigiyahan an saiyang mga karnero sa marahay, ligtas na sabsaban, inaataman man ni Jehova an saiyang mga karnero ngonyan. Sabi kan salmista: “Kita an mga tawo sa saiyang pasabsaban.” (Salmo 79:13; 95:7) An literal na karnero marahay kun kontento asin nakapagpapahingalo sa kainitan kan aldaw. An mga karnero ni Jehova ngonyan matoninong asin trangkilo huli ta sinda may kompiansa sa maygurang na mga pastor—natokdoan na mga paraataman sa mga kongregasyon asin sirkito. Bilang resulta, an espirituwal na mga aripompon nagdadakol. An dakol na dati minamaltrato kan falsong mga pastor sa Dakulang Babilonya ngonyan ogmahon na asin kontento bilang mga karnero ni Jehova.

6. Paano si Jehova ‘dinadara kita sa matubig na mga pahingaloan’?

⁶ “Dinadara nia ako sa matubig na mga pahingaloan.” Sa Israel an pastor kaipuhan na giyahan an saiyang aripompon sa sarong bobon o sapa tanganing makainom. Pero an tubig parateng masakit na makua sa tig-initan. Ngonyan, dinadara kita ni Jehova “sa matubig na mga pahingaloan” paagi sa pagtao nin dakol nanggad na tubig nin katotoohan. (Ikomparar an Ezequiel 34:13, 14.) Asin si propeta Isaias nagtatao kan nakapupukaw na pangagdang ini: “Hoy! kamo gabos na napapaha! Dolok kamo sa tubig.” (Isaias 55:1) Paagi sa pag-inom kan espirituwal na tubig na ini, an mga karnero nagkakamit nin proteksion laban sa naglalaad na mga paghokom na maabot sa mga dai nakakamidbid sa Dios asin sa mga dai nagkukuyog kan maogmang bareta.”—2 Tesalonica 1:8; Kapahayagan 7:16, 17.

7. Noarin espesyalmenteng nakatatabang an espirituwal na pagpaginhawa gikan ki Jehova, asin sa anong mga kamugtakan na puwedeng magin kapakipakinabang nanggad an tinoom na mga teksto sa Biblia?

⁷ “An sakuyang kalag saiyang pinagiginhawa.” (Salmo 23:3) Kun napapagal, may problema, nanluluya an boot, o napapaatubang sa grabeng pagtumang, pinagiginhawa kita ni Jehova paagi sa saiyang Tataramon. Kaya, marahay na ugaleon nin mga Kristiano na bumasa nin sarong kabtang kan Biblia aroaldaw. Ginigibo daw nindo ini? An iba nadiskobre na nakatatabang an pagtoom sa pirang teksto, arog baga kan Exodo 34:6, 7 o Talinhaga 3:5, 6. Taano ta kapakipakinabang ini? Bueno, kun magkakrisis asin mayo kamo nin Biblia, an nakararangang mga punto sa Kasuratan makapakokosog tolos sa saindo. An dakol na tugang na nakondenar sa mga bilanggoan o kampo nin mga bilanggo huli sa marigon na paninindogan para sa matanos na mga prinsipyo napaginhawa asin napakosog na gayo kan paggirumdom sa toom na mga teksto. Iyo, an Tataramon nin Dios puwedeng ‘makapaogma sa puso’ ‘magpaliwanag kan mga mata’!—Salmo 19:7-10.

8. Pasil daw na sumunod sa “mga dalan nin katanosan,” alagad an paggibo kaiyan minagiya pasiring sa ano?

⁸ “Ginigiyahan nia ako sa mga dalan nin katanosan.” An mga dalan nin katanosan depisil na sundan, pero iyan minagiya pasiring sa buhay. Arog kan sabi ni Jesus: “Piot an tata asin hayakpit an dalan pasiring sa buhay.” (Mateo 7:14) Si apostol Pablo nagpahayag nin konektadong punto sa pagsabi sa mga disipulo sa Listra, Iconio, asin Antioquia: “Kita kaipuhan na lumaog sa kahadean nin Dios paagi sa dakol na kasakitan.” Asin aram nanggad ni Pablo kun ano an saiyang sinasabi. Dai mahaloy bago kaiyan, sia pinaggapo sa Listra asin iwinalat na pinaghohonang gadan na!—Gibo 14:19-22.

9. (a) Paano an Dios ‘ginigiyahan kita sa mga dalan nin katanosan’? (b) Sa anong paagi puwedeng makatabang an Salmo 19:14? (c) Anong mga teksto an makatatabang sato na malikayan an mga peligro nin ipinangangalad na sekso?

⁹ Si Jehova ‘ginigiyahan kita sa mga dalan nin katanosan’ paagi sa paggiya asin pagtotokdo sato na ginagamit an saiyang Tataramon asin organisasyon. Alagad an kadaklan nagsusunod sa halakbang asin mahiwas na dalan “na pasiring sa kalaglagan.” (Mateo 7:13) An lakop na seksuwal na karigsokan asin an marikas makaluyap na damat nin AIDS nagdodoon kan pangangaipo na an mga Kristiano lumikay sa maraot na pag-iriba. (1 Corinto 15:33) Kaipuhan man kitang mag-ingat na olangon mismo an satong isip sa pagduman sa maating mga bagay. (Salmo 19:14) Sa katuyohan na iyan, permi niatong iaplikar an marahay na hatol na itinatao kan Tataramon nin Dios manongod sa sekso asin kun paano malilikayan an dakol na peligro nin inmoralidad.​—1 Corinto 7:2-5; Efeso 5:5; 1 Tesalonica 4:3-8.

10. (a) Ano an paninimbagan nin mga Saksi ni Jehova manongod sa banal na ngaran? (b) Taano ta parate kitang tinatatsaran nin mga kinabanon? (c) Sa anong mga kamugtakan na tatabangan kita ni Jehova?

¹⁰ “Huli sa saiyang ngaran.” An mga Saksi ni Jehova igwa kan magabat na paninimbagan na pamurawayon an ngaran nin Dios asin dai magdara nin langhad dian. (Mateo 6:9; Exodo 6:3; Ezequiel 38:23) An dakol na kinabanon listong magsahot sa banwaan ni Jehova. Kun ini ginigibo huli sa satong paninindogan sa mga prinsipyo sa Biblia arog baga kan neutralidad o kabanalan nin dugo, malinaw an satong konsensia. Alagad kun ini mangyayari huli sa sala niatong gibo, lalanghadan niato si Jehova. (Isaias 2:4; Gibo 15:28, 29; 1 Pedro 4:15, 16) Kaya ikaongis logod niato an maraot. (Salmo 97:10) Kun kita paglamagon, permi kitang tatabangan ni Jehova asin iingatan kita huli sa saiyang ngaran.

Pinoprotehiran ni Jehova an Saiyang mga Karnero

11. Ano an boot sabihon kan “kababan nin kadikloman,” asin ano an puwedeng ipagirumdom kaini sa sato manongod ki Jesus?

¹¹ “Minsan ako maglakaw sa kababan nin kadikloman, dai ako natatakot sa ano man na maraot.” (Salmo 23:4) An traduksion ni Isaac Leeser nagsasabi: “Iyo, minsan ako naglalakaw sa kababan kan anino nin kagadanan, dai ako matatakot sa maraot.” Ini puwedeng magpagirumdom sa hararom na mga ampas, o kababan, na hale sa kabukidan nin Judea sa parteng solnopan kan Gadan na Dagat. An kababan, o bungaw, na dian nagpapahipli sa kadikloman an mga hayop na naniniba peligrosong lugar para sa mga karnero. Si David nag-agi sa dakol na peligrosong kababan sa saiyang buhay, na napapaatubang sa kagadanan. Alagad mantang an Dios an naggigiya sa saiya, sia may kompiansa asin dai napadaog sa daing kontrol na takot. Maninigo kitang magkaigwa nin kaparehong kompiansa ki Jehova. An pagkasambit na ini sa “kadikloman” puwede man na magpagirumdom sato kan hula ni Isaias: “[An] mga nag-eerok sa daga nin kadikloman, an liwanag mismo suminirang sa sainda.” Nasambitan ni Mateo an hulang ini asin iinaplikar iyan ki Jesu-Cristo, na sinasabi: “An banwaan na nagtutukaw sa kadikloman nakaheling nin dakulang liwanag, asin an mga nagtutukaw sa lugar nin limpoy nin kagadanan, suminirang an liwanag sa sainda.” Paano? Paagi sa dakulang kampanya nin paghuhulit na ginibo ni Jesus.​—Isaias 9:2; Mateo 4:13-16.

12. (a) Paano ibinagay kan mga lingkod ni Jehova an saindang gibo sa paglamag sa dakol na nasyon, asin may anong resulta? (b) Paano pinakosog ni Pedro an pinaglalamag na enot na mga Kristiano?

¹² Si David ‘dai natakot sa ano man na maraot.’ Totoo man iyan sa mga lingkod ni Jehova ngonyan, minsan ngani sinda bakong popular sa maraot na kinaban na ini na pinamamamahalaan ni Satanas. (1 Juan 5:19) An dakol sa katotoohan naoongis sa sainda, asin sinda pinaglalamag nin maringis sa pirang nasyon. Alagad sa mga nasyon na ini sinda nagpapadagos na maghulit kan maogmang bareta kan Kahadean, minsan ngani bakong arog kahayag sa normal nindang gigibohon. Aram ninda na si Jehova nasa sainda asin magpoprotehir sa sainda. (Salmo 27:1) Nagigibo an marahay na pag-oswag sa dakol na nasyon na an gibong pan-Kahadean kaipuhan na gibohon nin hilom. Sa mga nasyon na iyan, an mga Saksi ni Jehova nagsasabi man kan mga tataramon kan salmo: “Si Jehova nasa kampi ko; dai ako matatakot. Ano an magigibo sako nin daganon na tawo?” (Salmo 118:6) An mga Saksing ini nasa kamugtakan na kapareho kan sa enot na mga Kristiano na sinuratan ni apostol Pedro kan nakapakokosog na mga tataramon na ini: “Minsan pa kun kamo magtios dahel sa katanosan, maogma kamo. Minsan siring, dai nindo katakotan an saindang kinatatakotan, ni maribok man.”​—1 Pedro 3:14.

13. (a) Anong interesanteng pagliliwat an nangyayari sa Salmo 23:4, asin taano? (b) Paano mahahale nin mga Kristiano an saindang takot?

¹³ “Huli ta ika kaibahan ko.” Tabi mangnohon an sarong interesanteng bagay sa mga tataramon na ini. An pinasabngan na salmista nagliwat hale sa ikatolong persona pasiring sa ikaduwa. Imbes na magtaram manongod ki Jehova bilang “sia,” ngonyan ginagamit ni David an pronombreng “ika.” Taano? Huli ta iyan mas harani. An peligro orog kitang irinarani sa satong mamomoton na Ama, si Jehova. Nagkakaigwa kita nin mas haraning relasyon sa saiya. Paagi sa pamibi asin pagngayongayo, puwede kitang mag-apod sa saiya para sa proteksion, asin sa siring mahale an satong takot.​—Ikomparar an Sofonias 3:12.

14. (a) Ano an mga kasangkapan nin mga pastor kan panahon ni David, asin paano ninda iyan ginagamit? (b) Paano pinoprotehiran nin Kristianong mga pastor an aripompon ngonyan?

¹⁴ “An saimong badas asin an saimong sogkod iyo an mga nakararanga sa sako.” An termino sa Hebreo na sheʹvet, na isinalin na “badas,” puwedeng mangahulogan nin sogkod kan pastor. An badas asin sogkod pareho magagamit para sa pagdepensa asin tanganing magrepresentar o magparisa nin autoridad. Tunay na an mga kasangkapan na ini magagamit nanggad sa pagpukpuk sa mga hayop na naniniba na arog baga kan lobo asin halas. An sogkod kan pastor magagamit man sa pagtulod sa mga karnero sa tamang direksion o pati sa pagkabig sa sarong karnero na minaraning gayo sa lugar na iyan tibaad maholog asin makolgan. Ngonyan, si Jehova nagtatao nin maimbod na mga pastor, kamagurangan sa kongregasyon, na ipinagdedepensa an aripompon sa espirituwal na mga naniniba na arog baga kan mga apostata. O an kamagurangan tibaad kaipuhan na hatolan an mga nagigin pabaya sa pag-atender sa pagtiripon o minarayo sa Kristianong gawe.

Sarong Masiram na Bangkete sa Tahaw nin mga Kaiwal

15. (a) Anong makahulogan na pagliwat nin ilustrasyon an yaon sa Salmo 23:5? (b) Anong mga katunayan an nagpapaheling na an banwaan ni Jehova basog sa espirituwal, kabaliktaran niisay?

¹⁵ “Nag-aandam ka sa atubangan ko nin lamesa sa atubangan kan mga nagpapaheling nin kaanggotan sa sakuya.” (Salmo 23:5) Digdi igwa nin makahulogan na pagliwat nin ilustrasyon, hale sa pastor pasiring sa sarong may andam. Bilang bukas an palad na may andam, si Jehova nagtatagama nin abundang espirituwal na kakanon paagi sa linahidan na grupong “oripon.” (Mateo 24:45) Minsan ngani kita nabubuhay sa maringis na kinaban, kita basog. An Torrengbantayan ipinupublikar sa labing sanggatos na tataramon tanganing an mga nag-iistar sa laen-laen nanggad na lugar na arog kan South Africa, Greenland, Solomon Islands, asin India mapakakan sa espirituwal. Apuwera kaiyan, an mga 55,000 na kongregasyon sa bilog na kinaban igwa nin matibay na mga parapahayag asin paratokdo saka magayon na mga tiriponan, kaiba an ginatos na bagong Kingdom Hall. Labing 3,000,000 na pag-adal sa Biblia an ginigibo sa mga harong tanganing tabangan an mga arog-karnero. Kabaliktaran, an mga nasa Dakulang Babilonya, an pankinaban na imperyo nin falsong relihiyon, nagugutom.​—Isaias 65:13.

16. (a) Kabaliktaran sa sarong makasalan na babae, ano an dai nagibo nin sarong Fariseo para ki Jesus? (b) Anong klaseng lana an itinatagama ni Jehova para sa saiyang maimbod na mga lingkod ngonyan?

¹⁶ “Pinahidan mo nin lana an sakuyang payo.” Sa suanoy na Israel an mapag-istimar na may andam nagtatagama nin lana tanganing pahidan an payo kan saiyang mga bisita. Interesante nanggad, sarong beses si Jesus bisita nin sarong Fariseo na dai pinahidan nin lana an payo ni Jesus o nagtagama man nin tubig sa paghanaw sa saiyang bitis. Kaidto, an sarong makasalan na babae hinanawan an saiyang mga bitis kan saiyang mga luha asin pinahidan iyan nin espesyal na mahamot na lana. (Lucas 7:36-38, 44-46) Pero si Jehova mapag-istimar nanggad na may andam! Para sa saiyang maimbod na mga lingkod, sia nagtatagama nin espirituwal na “lana nin kaogmahan.” (Isaias 61:1-3) Iyo, an banwaan ni Jehova ngonyan tunay na nag-oogma.

17. (a) An ‘kopang pano nanggad’ nagpaparisa nin ano? (b) Paano si Jehova nagtatagama nin ‘kopang pano nanggad’ para sa saiyang mga lingkod ngonyan?

¹⁷ “An sakuyang kopa pano nanggad.” An saro pang pagkasalin arog kaini: “An sakuyang kopa nagsusulwak.” (Moffatt) Ini nagpaparisa nin espirituwal na abundansia. Minsan ngani bakong sobrang pag-inom an boot sabihon, an mga tataramon na ini nagsusuherir nin kopa na may masiram na arak. An inomon na ini nakakaomay, arog kan ipinaheheling kan hatol ni Pablo ki Timoteo: “Dai ka na uminom nin tubig, kundi gumamit ka nin kadikit na arak para sa saimong tulak asin sa parate mong kahelangan.” (1 Timoteo 5:23) Sa espirituwal na sentido, an arak nagpapaogma man sa satong puso. (Salmo 104:15) An satong mamomoton na Ama, si Jehova bukas an palad na nagtatao nin espirituwal na bangkete nin masisiram na bagay sa saiyang maimbod na mga lingkod, pati an ‘pano nanggad na kopa’ nin kagayagayahan.

18. (a)  An karahayan asin pagkaherak ni Jehova nakakamtan niisay, asin paano ini ipinaheheling kan Salmo 103:17, 18? (b) Anong mamuraway na paglaom an natatagama sa mga maimbod ki Jehova?

¹⁸ “Sierto na an karahayan asin pagkaherak magdadanay sa sako sa gabos na aldaw nin sakuyang pagkabuhay.” (Salmo 23:6) An karahayan kabtang kan mga bunga kan banal na espiritu ni Jehova. (Galacia 5:22, 23) An karahayan asin pagkaherak nin Dios nakakamtan kan mga naglalakaw sa saiyang dalan. (Salmo 103:17, 18) May marigon na pagtubod ki Jehova, an saiyang banwaan makaaatubang sa ano man na pagbalong agihan ninda. Sinda perming nagkakamit kan saiyang bendisyon asin mamomoton na pangataman. Asin an kaimbodan sagkod sa katapusan mangangahulogan nin buhay na daing katapusan sa bagong kinaban. Kanigoan kamakangangalas na paglaom!

19. (a) Ano an boot sabihon kan ‘pag-ontok sa harong ni Jehova’? (b) Ano an itinogdok kan organisasyon ni Jehova sa pagpalakop kan tunay na pagsamba ngonyan, asin taano an rinibong nagdusay ta ibinibilang na pribilehiyo an maglingkod dian? (c) Sairisay pa an determinadong maglingkod sa Dios sagkod lamang?

¹⁹ “Asin mag-oontok ako sa harong ni Jehova sagkod lamang.” Kan kaaldawan ni David an santuaryo nin Dios iyo an tabernakulo, ta dai pa ikinatotogdok an templo. Mantang an nasa isip kan salmista sarong maboot na kag-imbitar, an ‘pag-ontok sa harong ni Jehova’ nangahulogan nin pagkaigwa nin marahay na relasyon sa Dios bilang Saiyang bisita. (Salmo 15:1-5) Ngonyan, an harong na iyan masasabing iyo an banal na templo ni Jehova, an saiyang areglo para sa malinig na pagsamba. Si Hadeng Salomon nagkapribilehiyo na itogdok an enot na materyal na templo, na nasasamnohan nin dakol na bulawan asin itinogdok sa pag-omaw ki Jehova. Kanigoan kadakulang pribilehiyo na maglingkod duman! Minsan ngani mayo na an templong iyan, an Dios igwa nin banal na organisasyon sa katuyohan na omawon sia asin ilakop an malinig na pagsamba. Bilang sarong paagi na magibo ini, an organisasyon ni Jehova nagtogdok nin mga Bethel Home sa kadakol na nasyon. An “Bethel” nangangahulogan “Harong nin Dios,” asin rinibong nagdusay na mga tawo an naglilingkod sa teokratikong mga sentrong ini. An iba sa mga lalaki asin babaeng ini naglingkod sa paaging ini “sagkod lamang,” na ginamit an kadaklan na taon kan saindang buhay sa paglilingkod sa Bethel. An minilyon pang iba, na bakong miembro kan mga pamilyang Bethel, may kapareho man na determinasyon na maglingkod ki Jehova sagkod lamang.

20. (a) Taano an Salmo 23 ta pambihirang kabtang kan Kasuratan, asin tinatabangan kita kaiyan na pataluboon an ano? (b) Anong mga pribilehiyo an naghahalat sa maimbod na mga lingkod ni Jehova?

²⁰ An ika-23 na Salmo 23 garo sarong mutya na dakol an tapyas asin nagkikinang sa liwanag. Iyan nag-oomaw sa mamuraway na ngaran kan satong mamomoton na langitnon na Ama, si Jehova, asin nagpapahayag kun paano nia ginigiyahan, pinoprotehiran, asin tinatagamahan an saiyang mga karnero. Bilang resulta, an saiyang banwaan maogma, basog sa espirituwal, asin marikas na nagdadakol, minsan sa mga nasyon na mapait an pagtumang. An Salmo 23 nakatatabang man sato na mapatalubo an mainit, haraning relasyon sa satong Kaglalang. Asin kun pinagmamasdan niato an mabitoon na kalangitan, arog kan parateng ginigibo ni David mantang nagbabantay sa saiyang aripompon, kita nagpapasalamat na an Kaglalang sa dakulaon na unibersong ini nangangataman sa sato bilang sarong mamomoton na Pastor. Mamomoton, sia nag-aalok man sato nin buhay na daing sagkod sa bagong kinaban kun magdadanay kita sa satong integridad sa saiya. Kanigoan kamakangangalas nanggad na sabaton sa panahon na iyan an binuhay liwat na maimbod na mga lingkod nin Dios na arog ni David! Asin kanigoan kadakulang pribilehiyo na maglingkod ki Jehova, an Dakulang Pastor, sagkod lamang!

Ano an Isisimbag Nindo?

◻ Paano si Jehova napatutunayan na iyo an satong mamomoton na Pastor?

◻ Paagi sa mga ano na an Dios ‘ginigiyahan kita sa mga dalan nin katanosan’?

◻ Paano pinoprotehiran ni Jehova an saiyang mga karnero?

◻ Sa anong sentido na an Dios nag-andam nin sarong lamesa para sa sato sa tahaw kan satong mga kaiwal?