Hinahagad daw nin Dios an Pag-ayuno?
AN Ley nin Dios na itinao paagi ki Moises hinagad an pag-ayuno sa saro sanang okasyon—sa taonan na Aldaw nin Pagtubos. An Ley nagboot na sa aldaw na idto an mga Israelita dapat na ‘pasakitan an saindang kalag,’ na sinasabot na nangangahulogan na sinda nag-ayuno. (Levitico 16:29-31; 23:27; Salmo 35:13) Alagad, an pag-ayunong ini bako sanang pormalismo. An pag-otob sa Aldaw nin Pagtubos nagpahiro sa banwaan nin Israel na orog nindang mamatean an saindang pagkamakasalan asin an pangangaipo nin pagbalukat. Nag-ayuno man sinda kan aldaw na idto tanganing ipahayag an kamondoan para sa saindang mga kasalan asin pagsolsol sa atubangan nin Dios.
Minsan ngani ini sana an obligatoryong pag-ayuno sa irarom kan Ley Mosaiko, an mga Israelita naggibo nin mga pag-ayuno sa iba pang mga okasyon. (Exodo 34:28; 1 Samuel 7:6; 2 Cronica 20:3; Esdras 8:21; Ester 4:3, 16) Kabale digdi an boluntad na mga pag-ayuno bilang paagi nin pagpaheling nin pagsolsol. Sinadol ni Jehova an nagkasalang banwaan nin Juda: “Magbalik kamo sa sakuya sa bilog nindong puso, asin may pag-ayuno asin paghibi patin pagtangis.” Dapat na bako ining pagsaginsagin, huli ta an Dios nagsabi pa: “Baaka nindo an saindong puso, asin bakong an saindong mga gubing.”—Joel 2:12-15.
Pag-abot nin panahon, an dakol nag-ayuno bilang panluwas na pormalismo. Ikinaongis ni Jehova an siring na bakong sinserong pag-ayuno asin sa siring hinapot an nagsasaginsagin na mga Israelita: “Maninigo daw na an pag-ayuno na pipilion ko magin arog kaini, bilang aldaw para sa daganon na tawo na pasakitan an saiyang kalag? Para sa pagdoko kan saiyang payo siring sa tangbo, asin na bikladon nia an telang sako asin an mga abo bilang saiyang higdaan? Ini daw an inaapod nindong pag-ayuno asin aldaw na maaako ni Jehova?” (Isaiah 58:5) Imbes na ipagpaabaw-abaw an saindang pag-ayuno, hinagad sa sumbikalan na banwaan na ini na magpaluwas nin mga gibo na angay sa pagsolsol.
An ibang pag-ayuno na inestablisar kan mga Judio dai naoyonan nin Dios poon pa sa kapinonan. Halimbawa, may panahon na an banwaan nin Juda nagkaigwa nin apat na taonan na pag-ayuno tanganing girumdomon an mga nangyaring kapahamakan may koneksion sa pagsalikop asin paggaba sa Jerusalem kan ikapitong siglo B.C.E. (2 Hade 25:1-4, 8, 9, 22-26; Zacarias 8:19) Pakatapos na butasan an mga Judio sa pagkabihag sa Babilonya, si Jehova nagsabi paagi ki propeta Zacarias: “Kan kamo mag-ayuno . . . , asin ini sa laog nin pitong polong taon, kamo daw talagang nag-ayuno sa sako mismo?” Dai inoyonan nin Dios an mga pag-ayunong ini huli ta ipinag-aayuno asin ipinagmomondo kan mga Judio an mga paghokom na hale ki Jehova mismo. Nag-aayuno sinda huli sa kapahamakan na nangyari sa sainda, bakong huli sa sainda mismong pagkakasala na nagbunga kaiyan. Pakatapos na sinda ibalik sa saindang sadiring daga, panahon na para sa sainda na maggayagaya imbes na pagbasolan an nakaagi.—Zacarias 7:5.
Para daw sa mga Kristiano an Pag-ayuno?
Minsan ngani nungkang pinagbotan ni Jesu-Cristo an saiyang mga disipulo na mag-ayuno, sia asin an saiyang mga parasunod nag-ayuno kan Aldaw nin Pagtubos huli ta sakop sinda kan Ley Mosaiko. Dugang pa, an nagkapira sa saiyang mga disipulo boluntad na nag-ayuno sa ibang mga okasyon, huli ta dai man sinda pinagbotan ni Jesus na biyo nang likayan an paggibo kaiyan. (Gibo 13:2, 3; 14:23) Pero, dapat na nungka nindang ‘raoton an itsura kan saindang mga lalauogon tanganing paghelingon sinda nin mga tawo na nag-aayuno.’ (Mateo 6:16) An siring na panluwas na pagpaheling nin kabanalan tibaad hangaan asin oyonan nin ibang mga tawo. Minsan siring, an Dios dai naoogma sa siring na pagpaabaw-abaw.—Mateo 6:17, 18.
Si Jesus nagtaram man manongod sa pag-ayuno kan saiyang mga parasunod sa panahon kan saiyang kagadanan. Sa siring dai sia nag-iintrodusir nin rituwal na pag-ayuno. Imbes, ipinaririsa nia an reaksion sa odok na pagmondo na mamamatean ninda. Oras na sia buhayon na liwat, sia masasakaibanan giraray ninda, asin mayo nang dahelan na sinda mag-ayuno.—Lucas 5:34, 35.
An Ley Mosaiko natapos kan “an Cristo idinolot nin makasaro sa gabos na panahon tanganing magpasan kan mga kasalan nin dakol.” (Hebreo 9:24-28) Asin sa pagtapos kan Ley, natapos man an pagboot na mag-ayuno sa Aldaw nin Pagtubos. Sa siring, hinale na an solamenteng obligatoryong pag-ayuno na sinambit sa Biblia.
Ano Man an Kuarisma?
Ano, kun siring, an basehan kan kaugalean nin pag-ayuno kan Kakristianohan durante nin Kuarisma? An mga iglesiang Katoliko asin Protestante pareho minimidbid an Kuarisma, minsan ngani magkalaen an paagi nin paggibo kaiyan kan laen-laen na iglesia. An nagkapira sarong beses sanang nagkakakan kada aldaw durante kan bilog na peryodo nin 40 aldaw bago an Pasko. An iba biyong nag-aayuno kun Mierkoles de Senisa asin Biernes Santo sana. Para sa iba, an Kuarisma naghahagad nin paglikay sa karne, sira, sogok, asin mga produktong gibo sa gatas.
An Kuarisma basado daa sa 40 aldaw na pag-ayuno ni Jesus pakatapos kan saiyang bautismo. Nag-eestablisar daw sia kaidto nin sarong rituwal na dapat sunodon taon-taon? Dai man. Maririsa ini sa bagay na mayong irinekord an Biblia na ano man na siring na kaugalean sa tahaw kan enot na mga Kristiano. An Kuarisma enot na ginibo kan ikaapat na siglo pagkatapos ni Cristo. Arog kan dakol na iba pang katokdoan nin Kakristianohan, iyan inako hale sa mga ginikanan na pagano.
Kun an Kuarisma pag-arog sa pag-ayuno ni Jesus sa kaawagan pakatapos kan saiyang bautismo, taano ta ginigibo iyan durante kan mga semana bago an Pasko—na iyo daa an panahon kan saiyang pagkabuhay liwat? Si Jesus dai nag-ayuno durante kan mga aldaw bago kan saiyang kagadanan. An mga tala sa Ebanghelyo nagpaparisa na sia asin an saiyang mga disipulo nagsongko sa mga harong asin nagkakan sa Betania nagkapirang aldaw na sana bago sia magadan. Asin nagkakan sia kan Paskua kan banggi bago kan saiyang kagadanan.—Mateo 26:6, 7; Lucas 22:15; Juan 12:2.
May manonodan sa pag-ayuno ni Jesus pakatapos kan saiyang bautismo. Pinoponan nia an sarong mahalagang marhay na ministeryo. Napapalabot an pagbindikar sa soberaniya ni Jehova asin an ngapit kan bilog na rasa nin tawo. Panahon ini para sa odok na paghorophorop asin para sa mapagngayongayong pagdolok ki Jehova tanganing humagad nin tabang asin giya. Durante kan panahon na ini si Jesus tama sanang nag-ayuno. Ipinaririsa kaini na an pag-ayuno puedeng magin kapakipakinabang kun ginigibo na may tamang motibo asin sa angay na okasyon.—Ikomparar an Colosas 2:20-23.
Kun Noarin Puedeng Magin Kapakipakinabang an Pag-ayuno
Pag-olayan niato an nagkapirang okasyon ngonyan na an sarong nagsasamba sa Dios tibaad mag-ayuno. An saro na may nakomitir na kasalan tibaad habong kumakan sa laog nin sarong peryodo nin panahon. Ini bako man na tanganing pahangaon an iba o ikaanggot an inakong disiplina. Asin, siempre, an pag-ayuno mismo dai magagamit tanganing makipag-areglo sa Dios. Minsan siring, an saro na tunay na nagsosolsol makamamate nin odok na kamondoan huli ta nakolgan nia an boot ni Jehova asin tibaad kan mga katood asin pamilya. An labi-labing kamondoan asin odok sa boot na pamibi para sa kapatawadan tibaad dai magtao nin gana sa pagkakan.
Kapareho iyan kan naeksperyensiahan ni Hadeng David nin Israel. Kan mapaatubang sa posibilidad na magadan an saiyang aking lalaki ki Bat-seba, ikinonsentrar nia an gabos niang paghihingoa sa pamimibi ki Jehova na kamtan an pagkaherak mapadapit sa aki. Mantang an saiyang mga emosyon asin kosog nauubos sa saiyang mga pamimibi, sia nag-aayuno. Sa kaagid na paagi, an pagkakan tibaad garo bakong angay sa irarom nin nagkapirang nagtatao nin tension na mga kamugtakan ngonyan.—2 Samuel 12:15-17.
Tibaad may mga panahon man na an sarong diosnon na tawo gustong magkonsentrar sa sarong hararom na espirituwal na bagay. Tibaad kaipuhan an pagsiyasat sa Biblia asin sa Kristianong mga publikasyon. Tibaad kaipuhan an sarong peryodo nin panahon para sa paghorophorop. Durante nin siring na nakauubos nin panahon na sesyon sa pag-adal, tibaad pilion nin sarong indibiduwal na dai sia maistorbo nin pagkakan.—Ikomparar an Jeremias 36:8-10.
May mga halimbawa sa Kasuratan nin mga lingkod nin Dios na nag-aayuno kun kaipuhan na gumibo nin magabat na mga desisyon. Kan kaaldawan ni Nehemias may panunumpa na dapat gibohon ki Jehova, asin an mga Judio maninimbag sa sarong sumpa kun balgahon ninda iyan. Dapat sindang manuga na bulagan an saindang mga agom na tagaibang daga asin magdanay na siblag sa nakapalibot na mga nasyon. Bago gibohon an panunumpang ini asin durante kan pagtuga kan saindang kasalan, nag-ayuno an bilog na kongregasyon. (Nehemias 9:1, 38; 10:29, 30) Kun napapaatubang sa magabat na mga desisyon, an sarong Kristiano kun siring tibaad dai magkakan sa laog nin halipot na peryodo nin panahon.
An paggibo nin desisyon kan mga grupo nin kamagurangan sa enot na Kristianong kongregasyon kun beses may kaibang pag-ayuno. Ngonyan, an kamagurangan sa kongregasyon na napapaatubang sa depisil na mga desisyon, na tibaad may koneksion sa sarong kaso hudisyal, tibaad lumikay sa pagkakan mientras na hinohorophorop an bagay.
Indibiduwal na desisyon an pagpiling mag-ayuno sa nagkapirang kamugtakan. An saro maninigong dai husgaran an iba sa bagay na ini. Dai niato maninigong mawoton na magin “garo matanos sa mga tawo”; ni maninigo niatong gibohon an pagkakan na mahalagang marhay kaya nakaoolang na iyan sa pag-asikaso niato sa magabat na mga obligasyon. (Mateo 23:28; Lucas 12:22, 23) Asin ipinaheheling kan Biblia na an Dios dai kita hinahagadan na mag-ayuno ni binabawalan kita na mag-ayuno.
[Retrato sa pahina 7]
Aram daw nindo kun taano si Jesus ta nag-ayuno sa laog nin 40 aldaw pakatapos kan saiyang bautismo?