Naninigoan daw Kamo sa Espirituwal na mga Probisyon ni Jehova?

“‘Tabi baloa nindo ako sa bagay na ini,’ sabi ni Jehova nin mga hukbo, ‘kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.’”—MALAQUIAS 3:10.

1. Sa anong mga probisyon naninigoan an kadaklan na nabubuhay na linalang?

KUN kamo mapondo sa paghangos, magagadan kamo pakalihis nin pirang minuto. Kun kamo mapondo sa pag-inom nin tubig, magagadan kamo pakalihis nin pirang aldaw. Kun kamo mapondo sa pagkakan, magagadan kamo pakalihis nin pirang semana. Kun kamo mapondo sa pagkakan sa espirituwal na mga probisyon ni Jehova, kun kamo magadan magagadan kamo sagkod lamang. Si Jehova an nagtatao kan aire, tubig, asin kakanon na kaipuhan nin gabos na nabubuhay na linalang. Kaya, ki Jehova an salmista nagsasabi: “Binibiklad mo an saimong kamot asin pinaninigoan an mawot nin lambang bagay na may buhay.” (Salmo 145:16) An mawot nin kadaklan na nabubuhay na bagay napaninigoan nin materyal na mga probisyon. Alagad ini bakong totoo sa mga linalang na tawo.

2. Ano an mawot kan puso nin tawo, asin anong probisyon an kaipuhan tanganing iyan maotob?

² Idinoon ini ni Jesus kan sia magsabi: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mateo 4:4) An mas harababang linalang mayo nin ideya manongod sa kadaihan nin katapusan, pero an tawo igwa, arog kan sinasabi kan Eclesiastes 3:11: “Minsan an panahon na daing sagkod ibinugtak nia sa saindang puso.” O arog kan pagkatradusir dian kan Revised Standard Version: “Ibinugtak Nia an kadaihan nin katapusan sa isip nin tawo.” Kaya, an odok sa pusong mawot nin tawo mabuhay sa panahon na daing sagkod, sagkod lamang. An aire, tubig, asin tinapay sana bakong igo para kaiyan. Tanganing mabuhay sagkod lamang kaipuhan an espirituwal na mga probisyon na basado sa “lambang tataramon na minaluwas sa ngoso ni Jehova.” Ngonyan, iyan nasa sarong libro, an Biblia, asin an suplay dai nauubos—an gabos na kaipuhan nindo, labi kisa kaya nindo. An estanteng ini noarin man dai nawawaran nin laog.

3. Ano an isinabi ni Jesus na pinakamahalaga, asin anong hilom an nanodan ni Pablo?

³ Tinokdoan kita ni Jesus na mamibi para sa kinakaipuhan na materyal na kakanon: “Itao mo samo ngonyan an samong kakanon para sa aldaw na ini.” Alagad dai nahaloy ibinugtak nia sa enot na lugar an espirituwal na mga bagay kan sia magsabi: “Kaya padagos na hanapon nguna an kahadean asin an saiyang katanosan.” (Mateo 6:11, 33) An materyal na kakanon binubuhay kita sa laog nin sarong aldaw; an padagos na pagkakan sa espirituwal magigibo iyan nin parasiyempre, sagkod pa ngani sa daing katapusan. Kaya dai mahadit sa materyal na mga bagay. Si Pablo dai. Sia nagtaram manongod sa espirituwal na mga kayamanan na nagpangyari saiya na makontento minsan ano an materyal na kamugtakan, na an sabi: “Nanodan ko an hilom nin pagigin basog asin nin pagigin gutom, kun paano magin abunda asin kun paano magkulang. Igwa ako kan kosog para sa gabos na bagay huli sa saiya na nagtatao nin kapangyarihan sa sako.”—Filipos 4:12, 13.

An Kalamidad Minaabot sa mga Dai Naninigoan

4. Anong mga probisyon an kulang pa para sa enot na tawong mag-agom, asin ano pa an gusto ninda?

⁴ Alagad dakol an dai naninigoan sa mga probisyon ni Jehova. An enot niatong mga magurang dai. Nag-iistar sinda sa sarong tatamnan na paraiso—an magayon na mga tanawon nagpapaogma sa saindang mga mata, an mahahamot na burak nagpapahamot sa aire na hinahangos ninda, an masisiram na kakanon nagpapagana sa saindang pagnamit, an mga awit nin gamgam naghaharana sa saindang talinga. Dugang pa, igwa sinda kan kawiliwiling trabaho na atamanon an tatamnan na ini, saka kan bendisyon na panoon an daga nin sangkap na mga aki. Alagad ta sinda paslo. Bako pang igo an itinao nin Dios. Gusto ninda nin orog pa. Gusto nindang magsadiring desisyon kun ano an tama asin kun ano an sala. Kaya ginibo ninda iyan, asin an pinakaenot na desisyon na ginibo ninda kapahapahamak, na nagbunga kan pagkawara nin gabos, para sa sainda man sana asin sa saindang mga aki.—Genesis 3:1-7, 16-19.

5. Ano an itinaong bendisyon ni Jehova sa mga Israelitas, asin ano an reaksion ninda?

⁵ Inarog kan mga Israelitas an maraot nindang halimbawa. Kinalda sinda nin Dios sa kaoripnan sa Egipto, ginibo sindang sarong nasyon, tinawan sinda nin sangkap na Pagboot, giniyahan sinda sa saindang mga pagbaklay sa kapatagan, tinawan sinda nin mga gubing na dai nadadaan, asin binuhay sinda nin milagroso paagi sa manna na hale sa langit asin sa tubig na nagluluwas sa gapo. Alagad ta dai sinda nanigoan sa mga probisyon ni Jehova. (1 Corinto 10:1-5) Sa saindang pagbaklay sa kapatagan, sinda paorootrong nagreklamo.—Exodo 13:21, 22; Bilang 11:1-6; Deuteronomio 29:5.

6. Anong gawe an nagdara nin kalaglagan sa mga Israelitas bilang sarong nasyon?

⁶ Nagreklamo pa man giraray sinda kan yaon na sa Dagang Panuga—mataba, matubig na daga na “nagbubulos nin gatas asin tangguli.” Ingrato pa man giraray, dai pa man giraray naninigoan sa mga probisyon ni Jehova, tinalikdan ninda an pagsamba sa saiya, buminaling sa idolatrosong pagsamba sa sekso, iinatang an saindang mga aki ki Moloc, asin nagdara nin kalaglagan sa sainda man sana bilang nasyon. Kan makapuli hale sa pagkabihag sa Babilonya, nagsunod sinda sa berbal na mga tradisyon na naghale nin halaga sa Tataramon nin Dios. An nasagkodan ninda iyo an paggadan sa saindang ipinanugang Mesiyas, si Cristo Jesus.—Deuteronomio 6:3; 8:7-9; Hokom 10:6; 1 Hade 14:22-24; 2 Hade 21:1-16; Isaias 24:1-6; Mateo 15:3-9; 27:17-26.

7. Paano an klero nin Kakristianohan ngonyan nagpapadagos sa kaparehong gawe kan bakong maimbod na mga saserdote kan kapanahonan ni Malaquias?

⁷ Sagkod sa aldaw na ini an kadaklan na tawo nagpadagos na ipaorog an falsong mga katokdoan sa relihiyon. An klero minimenus an ngaran ni Jehova, na dai ngani iyan ginagamit. Linalanghadan sia ninda paagi sa bakong Makakasuratan na mga katokdoan na arog kan Trinidad, dai nagagadan na kalag, asin daing sagkod na pasakit sa impiernong may kalayo. An mga doktrina ninda bako sanang nadigtaan nin mga kaputikan na gikan sa suanoy na Babilonya asin Egipto kundi, sa dakol man na kaso, nailo kan pagnigar sa pantubos ni Cristo asin kan pag-ako sa ebolusyon. Hinahabon ninda ki Jehova an maninigong pag-omaw sa saiya, arog kan ginibo kan mga saserdote kan aldaw ni Malaquias.—Malaquias 1:6-8; 3:7-9.

8. (a) Anong pag-agda an isinikwal kan mga saserdote kan kaaldawan ni Malaquias asin kan mga namomoon sa relihiyon ngonyan? (b) Siisay an nag-ako kan pag-agda, asin may anong resulta?

⁸ An mga Israelitas kaidto dinagka na linigan an sadiri asin bumalik ki Jehova. “Pagbalik kamo sa sakuya, asin ta ako mabalik sa saindo,” sabi ni Jehova. Inagda pa nia sinda: “‘Tabi baloa nindo ako sa bagay na ini,’ sabi ni Jehova nin mga hukbo, ‘kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.’” (Malaquias 3:7, 10) Natatada na sana sa nasyon na Judio an nagbalik; ngonyan, an maimbod na natatada sa espirituwal na Israel nagluwas sa falsong mga relihiyon kan kinaban na ini. Sinda, kaiba an nagdadakol na dakulang kadaklan nin iba pang mga parasamba na arog-karnero, nag-oomaw ki Jehova bilang saiyang mga Saksi. (Juan 10:16) Sa sainda, inotob ni Jehova an saiyang panuga asin ‘binukasan an mga gaha kan kalangitan asin inulaan sinda nin mga bendisyon sagkod na mayo na nin kulang’—garo bangkete nin espirituwal na kakanon!—Isaias 25:6.

Abundang Espirituwal na Kakanon

9. Anong espirituwal na mga probisyon an makukua ngonyan, paagi sa ano, asin may anong resulta?

⁹ “An maimbod asin madonong na oripon” na ihinula ni Jesus para sa satong kaaldawan sibot na nagtatao nin abundang espirituwal na kakanon. (Mateo 24:45) Kan nakaagi sanang taon, sa 208 kadagaan asin isla, asin sa mga 200 na tataramon, iwinaras nin labing tolong milyon na Saksi ni Jehova an espirituwal na mga probisyon na ini paagi sa pagharongharong asin pagwaras nin ginatos na milyon na libro, magasin, asin Biblia. Dakol an nagkakan kan espirituwal na kakanon na ini asin nabasog: Labing 225,000 na bagohan an nabautismohan sa laog nin sarong taon!

10. Anong mga probisyon an yaon para sa pagkuyog sa hatol ni Pablo na magtiripontipon?

¹⁰ An espirituwal na mga probisyon ni Jehova itinatao man paagi sa mga pandistritong kombension, pansirkitong mga asamblea, asin sa limang semanal na mga pagtiripon na regular na ginigibo sa mga 52,000 na kongregasyon nin mga Saksi ni Jehova—na gabos pagkuyog sa hatol ni Pablo sa Hebreo 10:25 na “dai pagpabayaan an satong pagtorotiripon.”

11. Ano an nag-iilustrar kan kawiliwiling paagi nin pag-andam nin espirituwal na kakanon?

¹¹ Kun an sarong babae nag-iimbitar nin mga bisita sa sarong pagkakan, dai sia naglalaga sana nin karne asin ibinubugtak iyan sa plato. Minagamit sia nin mga rikado asin sarsa tanganing magkaigwa nin nagpapaganang namit asin nin pandekorar tanganing iyan nakaaakit sa mata. An itsura asin parong sana kaiyan igo nang magpaliwoy asin makagutom. Arog kaiyan an pagkaandam sa espirituwal na mga probisyon ni Jehova—bakong sa daing buhay, garo ensiklopedyang estilo, kundi sa masiram na paagi tanganing mawilihan kan isip asin mataros an puso. An kada Kristiano maninigong umarog sa halimbawang iyan. “Bako daw na an talinga binabalo an mga tataramon kun paanong an ngaragngag nagnanamit sa kakanon?”—Job 12:11.

12. Ano an mga halimbawa niato nin espirituwal na kakanon na inandam sa masiram na paagi?

¹² An Theocratic Ministry School Guidebook sa enot na leksion kaiyan nagdodoon kan paggamit nin kawiliwiling mga tataramon. Si Salomon naggamit bako sanang nin tamang mga tataramon kundi kawiliwili man. (Eclesiastes 12:10) An Salmo 45:2 naghula manongod sa Mesiyas, si Jesu-Cristo: “An kagayonan ibinubo sa saimong mga ngabil.” Iyan nangyari nanggad. An mga nagdadangog sa saiya nagngalas sa “managom na mga tataramon na nagluluwas sa saiyang ngoso.” Sinda dai na minasuway sa saiya tanganing dangogon sia, amay na minaduman sa templo tanganing dangogon sia, naghinanyog sa saiya na may kaogmahan, napangalas sa saiyang paagi nin pagtotokdo. An mga soldados na isinugong dumakop sa saiya nagsabi: “Dai pa nin tawong nagtaram nin arog kaini.” (Lucas 4:22; 19:48; 21:38; Marcos 12:37; Mateo 7:28; Juan 7:46) An Guidebook itinao tanganing tabangan kitang makataram nin kawiliwiling mga tataramon nin katotoohan. Iyan daw lubos nindong ginagamit?

13. Gurano an pagdodoon kan Efeso 5:15-17 manongod sa ‘pagtubos sa panahon,’ asin taano ta idinodoon ini?

¹³ Sinasadol kita kan Efeso 5:15-17: “Magmaan kamong marhay na an saindong paglakaw bakong siring sa mangmang kundi siring sa mga madonong, na tinutubos an panahon para sa saindo man sana, huli ta an mga aldaw maraot. Kaya dai na kamo magpakarungaw, kundi padagos na saboton kun ano an kabotan ni Jehova.” An termino sa Griego na isinalin digding “panahon” dai nangangahulogan nin panahon sa pankagabsan sanang sentido kundi nangangahulogan nin itinalaan na panahon, tamang panahon para sa sarong espisipikong katuyohan. An berbo sa Griego na isinalin na “tinutubos” nasa pormang desidido, asin “sa kontekstong ini iyan posibleng nangangahulogan na ‘bakalon nin desidido’; an boot sabihon, aprobetsaran an gabos na oportunidad na minaabot.”a Inaaprobetsaran daw nindo an panahon sa saindong iskedyul tanganing gibohon na madonong an saindong sadiri paagi sa pagkakan sa espirituwal na mga probisyon ni Jehova? Maninigo. Kita gabos maninigong gibohon iyan. Taano? “Huli ta an mga aldaw maraot.”

Hale sa Espirituwal na Disyerto Pasiring sa Espirituwal na Paraiso

14. Anong bersikulo sa Biblia an nagseserbing halimbawa sa anong kabtang kan satong Ingles na New World Translation Reference Bible?

¹⁴ An sarong pambihirang espirituwal na probisyon iyo an satong New World Translation of the Holy Scriptures—With References, na ilinuwas kan 1984. Iyan may dakol na kabtang na nagpapangyaring magamit an ‘tinubos na panahon’ tanganing madugangan an satong kaaraman.b An sarong halimbawa iyo an mga cross-reference kaiyan. Halimbawa an Salmo 1:3, na manongod sa kamugtakan nin tawo na naghohorophorop sa pagboot nin Dios aldaw-banggi. An bersikulong iyan nagsasabi: “Sia nanggad magigin siring sa kahoy na itinanom sa kataed nin mga sapa, na namumunga sa kapanahonan kaiyan asin dai naaalang an mga dahon kaiyan, asin an gabos niang ginigibo mapapakarhay.” Kadakol pa kan kahulogan kan bersikulong ini kisa nababasa sana nin saro na madaling binabasa iyan asin nagpapadagos na.

15. Anong mga hapot an pinalalataw manongod sa kahoy sa Salmo 1:3, asin anong kaliwanagan an itinatao kan Isaias 44:4?

¹⁵ Tabi mangnohon: An kahoy itinanom. Siisay an nagtanom kaiyan? Iyan nasa kataed nin mga sapa, plural. An saro daw na kahoy minatubo sa pangpang nin pirang sapa? Dai. Kaya magnali kamo. Ano an boot sabihon kan kahoy na ini? An cross-reference nakapabubuklat sa mata kan satong isip. Iyan Isaias 44:4, 61:3, asin Jeremias 17:8. An Isaias 44:4 nagsasabi na an saiyang banwaan magigin siring sa mga kahoy na “kataed kan mga kali nin tubig.” Dakol na kali nin tubig? Tara, iyo! An mga sapa mga kali nin patubig na nagbabaribi sa mga kahoy sa sarong tatamnan!

16. Ano pang dugang na pagpaliwanag an itinatao sa Isaias 61:3 asin Jeremias 17:8?

¹⁶ An Isaias 61:3 inaapod an nagkapira sa mga kahoy na ini na “darakulang kahoy nin katanosan, na pananom ni Jehova, tanganing sia mapamuraway.” Si Jehova an nagtatanom asin nagpapatubig sa mga ini, asin sia an napamumuraway kan mga bunga kan mga kahoy na ini! An Jeremias 17:8 ibinabaing an tawong naghohorophorop sa pagboot nin Dios aldaw-banggi sa “kahoy na itinanom sa kataed kan katubigan, na pinatutubo an mga gamot sa mismong kataed kan solog; asin dai nia maheheling kun dumatong an init, kundi an saiyang mga dahon magigin marambong. Asin sa taon nin paghuraw dai sia mahahadit, ni maontok man sia sa pamumunga.” An mga dahon kaiyan dai naaalang; an gabos na ginigibo kaiyan mapapakarhay!

17. Anong ladawan ngonyan an minalataw manongod sa Salmo 1:3, asin ano an kabtang niato dian?

¹⁷ Ngonyan nahale na an garo kiskis sa satong mata! An Salmo 1:3 nagpipinta nin magayon na ladawan. An mga naghohorophorop sa pagboot ni Jehova aldaw-banggi garo mga kahoy na natatanom sa kataed nin dai nauubos na burabod nin tubig. Bako na sindang kabtang kan alang sa espirituwal na kinabanon na mga organisasyon kundi kaayon na ngonyan sa organisasyon nin Dios na abundang tinatawan kan preskong tubig nin katotoohan. Tunay na sinda nasa espirituwal na paraiso, napepreskohan sa espirituwal, asin nagbubunga nin espirituwal na bunga sa ikaoomaw ni Jehova. Asin isip-isipa na sana! Ginagamit nin Dios an saiyang mga Saksi sa paggiya sa mga tawo parayo sa alang, mainit, kinabanon na mga organisasyon pasiring sa presko, matubig na espirituwal na paraisong ini.

18. Ano an reaksion nin nagkapira kun naheheling ninda an iba na matibay sa paghuhulit, asin taano sinda ta tibaad magkulang?

¹⁸ Tanganing epektibong magibo ini, kaipuhan na disiplinahon niato an satong isip asin puso tanganing magamit an gabos na espirituwal na probisyon ni Jehova. An nagkapira nadadangog an iba na magpaliwanag nin mga teksto sa Biblia dangan minasabi: “Kutana aram ko man an Biblia na arog nia!” Pero kun didisiplinahon kan mga ini an saindang sadiri na mag-adal kan Biblia, puwede man na madugangan an kaaraman ninda sa Biblia. An nagkapira nadadangog an iba na magpatotoo sa mga harong dangan minasabi: “Kutana makapagpatotoo man ako sa mga harong na arog nia!” Pero kun didisiplinahon ninda an saindang sadiri na makikabtang nin parate sa paglilingkod sa langtad, na ginagamit an librong Reasoning From the Scriptures, sinda man puwedeng magin mas ekspertong mga Saksi. An nagkapira nadadangog an iba na magpahayag sa Biblia dangan minasabi: “Kutana makapagpahayag man ako nin arog saiya.” Alagad, sa liwat, kun an mga ini didisiplinahon an sadiri na andamon na marhay an saindang asignasyon sa pagpahayag, na isinasaboot an mga leksion sa Theocratic Ministry School Guidebook, sinda maoswag man sa abilidad sa pagtaram.

19. Ano an sekreto sa pagkultibar sa satong kakayahan sa paghuhulit?

¹⁹ Ngonyan, an pagmawot marahay, pero an pagmawot na daing gibo daing nahahaman. Gibo an nagpapangyaring maotob an kamawotan. Disiplinahon an saindong sadiri na tubuson an panahon, asin gibohon an trabaho na nagpapangyaring maotob an kamawotan. Kun dai nindo gagamiton an sarong laman, iyan maaalang. Kun dai nindo gagamiton an sarong abilidad, iyan mawawara. Kun dai nindo gagamiton an saindong isip, an kakayahan nin pag-isip mawawara. Kun dai nindo gagamiton an kaaraman, mawawara an dating nasa saindo. Sa kada saro asin sa gabos na kaso, an reglamento iyo ini, “Gamiton iyan o mawaran kaiyan.” Paagi sa ‘paggamit na an kakayahan nin pagmansay napatotood.’ Dangan “an kaisipan mismo mag-iingat sa saimo, an pakamansay mismo magbabantay sa saimo.”—Hebreo 5:14; Talinhaga 2:11.

20. Paagi sa pag-aprobetsar sa espirituwal na mga probisyon ni Jehova, ano an lilikayan niato, asin ano an makakamtan niato?

²⁰ Kaya gamiton an espirituwal na mga probisyon ni Jehova. Maggayagaya kaiba kan naninigoan na mga lingkod nia. Dulagan an gutom na ihinula ni Amos: “‘Uya! May mga aldaw na maabot,’ sabi kan Soberanong Kagurangnan na Jehova, ‘asin mapadara ako nin gutom sa daga, sarong gutom, bakong sa tinapay, asin pagkapaha, bakong sa tubig, kundi sa pagdangog kan mga tataramon ni Jehova.’” (Amos 8:11) Makikabtang sa mga nagkakakan asin naggagayagaya, bakong sa mga nagsisikwal sa kakanon asin napapasopog: “Iyo ini an isinabi kan Soberanong Kagurangnan na Jehova: ‘Uya! An sakong mga lingkod makarakan, alagad kamo magkakagurutom. Uya! An sakong mga lingkod mairinom, alagad kamo magkakaparaha. Uya! An sakong mga lingkod mag-oorogma, alagad kamo magkakasoropog.’”—Isaias 65:13.

[Mga Nota sa Ibaba]

Nagigirumdoman daw Nindo?

◻ Paano ipinaheling kan nasyon nin Israel an dai kaiyan pagkakontento sa mga probisyon ni Jehova?

◻ Paano an Malaquias 3:10 naotob sa mga Saksi ni Jehova?

◻ Ano an nasa irarom na kahulogan kan Salmo 1:3?

◻ Taano ta kaipuhan na gamiton an mga nanodan paagi sa espirituwal na mga probisyon ni Jehova?

[Ritrato sa pahina 13]

An mga naghohorophorop sa pagboot ni Jehova siring sa mga kahoy na natatanom sa kataed nin dai nauubos na burabod nin tubig