Pagtagama nin Panahon Para sa Teokratikong mga Probisyon
1 Si Jehova nagin matinao sa pag-otob sa saiyang mga panuga na itao an saiyang kadonongan sa saiyang mga lingkod ngonyan. (Isa. 55:1; Dan. 12:4; Roma 11:33; 1 Cor. 2:8-10) Kita daw nagpapaheling kan satong pag-apresyar paagi sa pagtagama nin panahon para sa saiyang programa sa pagtotokdo sa sato sa katotoohan?
2 Kaipuhan an paghihingoa asin pagpopogol sa sadiri tanganing magtagama nin de kuwalidad na oras para sa personal na pag-adal asin pag-andam para sa pagtiripon. Alagad dai daw kita nakakamate na kita binabalosan nin nagsosopay kun tinutubos niato an panahon kada semana para sa teokratikong pag-adal? (Efe. 5:15-17) Ano an pira sa mga probisyon ni Jehova sa pagtotokdo sa sato?
KUN ANO AN IINAREGLO NIA
3 Enot, yaon sato an Biblia bilang an pangenot na librong pag-aadalan. May iineskedyul na marahay na programa sa pagbasa sa Biblia serosemana. Sinusubaybayan daw niato iyan?
4 Igwa pa daw nin ibang kaipuhan, o bastante na daw an pagbasa sa Biblia? (Sant. 1:5, 6) Kaipuhan man niato an organisasyon na ginagamit ni Jehova sa pagsuplay sato nin abundang espirituwal na kakanon, na itinatao paagi sa mga publikasyon sa Biblia, pagtiripon kan kongregasyon, pansirkitong mga asamblea, asin pandistritong mga kombension.—Mat. 24:45.
5 An saro pang probisyon ni Jehova iyo an mamomoton na mga pastor. (Gibo 20:28) Alisto daw kita na iaplikar tolos an mga suhestion na itinatao ninda? An maimbod na kamagurangan maigot na nag-aadal tanganing makadungan sa organisasyon. (2 Tim. 2:15) Kita gabos puwedeng makinabang sa saindang kabatidan asin sa oras na ginagamit ninda para sa sato.
PAGTABANG SA SATONG MGA AKI ASIN IBA PA
6 An pagtotokdo sa satong mga aki sa katotoohan sarong napakahalaga nanggad na kabtang nin teokratikong edukasyon. An ekspertong pagtao nin “disiplina asin pagtatanos nin isip” napakahalaga. (Efe. 6:4) Iyan parateng iyo an nagdedeterminar kun baga sinda magtatalubo sa espirituwal na pagkamaygurang o biyong matalikod sa katotoohan. Kaipuhan an panahon para sa pagtotokdong ini. Mayo nin ikasasalida.
7 An mga bagohan kaipuhan na matabangan na masabotan an pangangaipo na magtagama nin oras para sa saindang semanal na pag-adal sa Biblia. Maninigo niato sindang dagkahon na mag-andam nanggad para sa kada pag-adal. Kun marahay an pagkatokdo niato sa sainda, dai mahahaloy sinda galagang maiba sa sato sa paghuhulit. An teokratikong edukasyon dai minapondo sa “simpleng mga bagay.” (Heb. 5:12–6:3) Boot niato na tabangan sindang ‘magpadagos sa pagkamaygurang.’ Ini nagkakaipo nin panahon.
8 Gibohon logod niatong desisyon na magtagama nin oras tanganing lubos na aprobetsaran an gabos na teokratikong probisyon na ginibo para sa sato kan satong Kaharohalangkaweng Paratokdo. Ini magpapangyari sato na padagos na umoswag sa dalan pasiring sa buhay na daing katapusan.—Isa. 30:20, 21; Fil. 3:13-16.