Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 15: An Antitipiko, Modernong Edom Paparaon
1, 2. Ano an pagheling kan Kaglalang sa mga nasyon na may makokosog na armas, asin ano an desisyon ni Jehova, sono sa hula ni Isaias?
NGONYAN an kinaban mas dakol an armas kisa kasuarin pa man. An mga armas nuklear kan mga nasyon tunay na peligro sa mismong pag-eksister nin katawohan. Kun siring, ano an pagheling kan Kaglalang sa pamilya nin tawo, si Jehova Dios, sa situwasyon? Ini malinaw na sinasabi sa kapitulo 34 kan hula ni Isaias, na minapoon sa mga tataramon na:
2 “Rani kamo, mga nasyon, sa pagdangog; asin kamong mga banwaan, paghinanyog kamo. Maghinanyog an daga asin an nakapapano dian, an mabungang daga asin an gabos na bunga kaiyan. Huli ta si Jehova may dakulang kaanggotan tumang sa gabos na nasyon, asin malaad na kaanggotan tumang sa saindang mga hukbo. Kaipuhan na itao nia sinda sa kalaglagan; kaipuhan na itao nia sinda sa pangadan. Asin an mga gadan ninda ipangangapon; asin kun manongod sa saindang mga bangkay, an saindang bata maalintoto; asin an mga bukid magkakaturunaw nin huli kan saindang dugo. Asin an gabos na nasa hukbo kan kalangitan magkakaralapa. Asin an kalangitan [daing maginibong mga gobyerno nin tawo] malululon, siring sa balumbon nin libro; asin an saindang hukbo gabos malalaya, siring sa pagkalaya asin pagkaragdag nin mga dahon sa ubas asin siring sa nalayang higos na narakdag sa higuerra.” (Isaias 34:1-4) Ini saro nanggad na hula nin kapahamakan!
3. (a) An mga nasyon inaapodan na maghinanyog sa ano, asin taano ta tama na sinda pagbotan ni Jehova? (b) Ano an nagpapaheling na an mga nasyon dai naghinanyog?
3 An Kaglalang sa uniberso may kontrobersia sa mga nasyon ngonyan. Iyan an dahelan na an mga nasyon inaapodan na maghinanyog sa basado sa Bibliang mensahe na ipinabalangibog nia sa bilog na kinaban poon kan 1919. Maninigo sindang maghinanyog sa sinasabi nia paagi sa saiyang mga Saksi. Alagad an dalagan kan mga pangyayari sa kinaban nagpapatunay na iyan dai ninda ginibo, asin an saiyang mga Saksi dai dinadangog nin seryoso kan mga nasyon, na pinili an Naciones Unidas asin bakong an langitnon na Kahadean sa kamot kan saiyang natutukaw na sa tronong Aki, an “Prinsipe nin Katoninongan.”
An Hula ni Isaias Tumang sa Edom
4, 5. (a) Siisay an mga Edomita, asin ano an iginawe ninda sa saindang kakambal na nasyon, an Israel? (b) Kaya ano an ipinagboot ni Jehova manongod sa Edom?
4 Naghihiro sa tahaw kan nasyonal na mga grupo ngonyan an sarong responsableng elemento sa partikular. An elementong iyan ipinanganino kan nasyon nin Edom, na espisipikong nginaranan sa hulang ini. An mga Edomita gikan ki Esau, na nagpabakal kan saiyang pagkamatua sa saiyang kakambal, si Jacob, para sa “tinapay asin linutong lentihas.” Sa okasyon na idto na si Esau inapod na Edom, na an kahulogan “Mapula.” (Genesis 25:24-34) Huling sinalidahan sia ni Jacob sa mahalagang pagkamatua, si Esau napano nin pagkaongis sa saiyang kakambal. An Edom nagin daing herak na kaiwal kan suanoy na nasyon nin Israel, o Jacob, minsan ngani sinda magkakambal na nasyon. Huli sa pagkaongis na ini tumang sa banwaan nin Dios, inako kan Edom an maninigong pagkaanggot ni Jehova, an Dios nin Israel, asin Saiyang ipinagboot an daing sagkod na pagkapara nin Edom. An banal na pagboot na ini yaon sa mga tataramon kan propetang si Isaias:
5 “Huli ta sa kalangitan an sakuyang minasbad mababasa. Uya! Iyan mahilig sa Edom, asin sa banwaan na idinusay ko sa kalaglagan huli sa hustisya. Si Jehova igwa nin minasbad; iyan kaipuhan na mapano nin dugo; iyan kaipuhan na magin masebo huli sa taba, sa dugo nin mga ogbon na karnero asin lalaking kanding, sa taba kan mga bato nin mga lalaking karnero. Huli ta si Jehova igwa nin atang sa Bosra [an pinakaprominenteng siudad nin Edom], asin nin dakulang pangadan sa daga nin Edom.”—Isaias 34:5, 6.
6. (a) Taano ta nakapagtaram si Jehova manongod sa paggamit kan saiyang “minasbad” tumang sa Edom “sa kalangitan”? (b) Kan an kahadean nin Juda salakayon kan Babilonya, anong bakong sa tugang na kaisipan an ipinaheling nin Edom sa banwaan ni Jehova?
6 An daga kan mapangadan na nasyon nin Edom kaipuhan na mapano kan sadiri nindang dugo paagi sa “minasbad” ni Jehova. An Edom nasa halangkaw, mabukid na lugar. (Jeremias 49:16) Sa pagpangyari nin pangadan sa dagang iyan, masasabi ni Jehova sa makaladawan na paagi na ginagamit nia an saiyang minasbad sa paghokom “sa kalangitan.” An Edom militarisadong gayo, asin an mga hukbo kaiyan naglilibotlibot sa sukdo sa langit na mga kabukidan tanganing protehiran an nasyon tumang sa mga parasalakay. Kaya an hukbo nin Edom tamang maaapod na “hukbo kan kalangitan.” Alagad an makapangyarihan na Edom dai nagtao nin tabang sa kakambal kaiyan na nasyon, an Israel, kan ini salakayon kan mga hukbo nin Babilonya. Imbes, an Edom naogmang maheling an pagbagsak kan kahadean nin Juda asin sinulsulan pa an mga naglalaglag dian. (Salmo 137:7) An katraydoran nin Edom uminabot sagkod sa paglapag sa mga nagdudulag para sa saindang buhay asin pagtao sa sainda sa kaiwal. (Abdias 10-14) Plano kan mga Edomita na sakopon an nabayaan na daga kan mga Israelitas, na may paghambog na nagtataram tumang ki Jehova.—Ezequiel 35:10-15.
7. Ano an nagin pagheling kan Dios nin Israel sa traydor na gaweng ini kan nasyon nin Edom?
7 Pinalihis sana daw ni Jehova, an Dios kan suanoy na Israel, an bakong sa tugang na gaweng ini kan mga Edomita sa saiyang piniling banwaan? Dai. Iyan an dahelan na an puso nin Dios nagkaigwa kan katuyohan na “aldaw nin pamalos” asin “taon nin mga pagkastigo” bilang balos sa ginibo na may maraot na intension sa saiyang daganon na organisasyon, na inaapod Sion. Sabi kan hula: “Huli ta si Jehova igwa nin aldaw nin pamalos, nin taon nin mga pagkastigo para sa legal na kaso [sa atubang kan Husgado kan Uniberso] dapit sa Sion.”—Isaias 34:8; Ezequiel 25:12-14.
8. (a) Siisay an ginamit ni Jehova tanganing padusahan an Edom? (b) Ano an ihinula ni propeta Abdias manongod sa Edom?
8 Dai mahaloy pagkalaglag kan Jerusalem, pinonan na ipahayag ni Jehova an saiyang matanos na pamamalos sa mga Edomita paagi sa hade nin Babilonya, si Nabucodonosor. (Jeremias 25:8, 15, 17, 21) Kan an mga hukbo nin Babilonya sumalakay tumang sa Edom, mayo nin ano man na nakapagligtas sa mga Edomita! Ihinolog kan mga hukbo nin Babilonya an mga Edomita gikan sa saindang magapong mga kalangkawan. Idto “taon nin mga pagkastigo” sa Edom. Arog kan ihinula ni Jehova paagi sa saro pang propeta: “Huli sa kadahasan sa saimong tugang na si Jacob, matatahoban ka nin kasopganan, asin popohoon ka sagkod noarin pa man. . . . Siring kan saimong ginibo, iyan an gigibohon sa saimo. An saimong pagtrato mabalik sa saimong payo.”—Abdias 10, 15.
9. Siisay an antitipikong modernong Edom, asin taano?
9 Ini nagpaparisa man kan kaisipan ni Jehova manongod sa antitipikong Edom sa modernong aldaw. Siisay iyan? Bueno, sa ika-20 siglo, siisay an nangengenot sa pagtuya asin paglamag sa mga lingkod ni Jehova? Bako daw na an apostatang Kakristianohan paagi sa mapalangkaw na klero kaiyan? Iyo! An Kakristianohan, an lugar nin falsong Kristianismo, ilinangkaw an sadiri sa mga gibo-gibo kan kinaban na ini. Sia halangkaw na kabtang kan organisasyon kan palakaw nin mga bagay nin katawohan, asin an saiyang mga relihiyon iyo an lataw na kabtang kan Dakulang Babilonya. Alagad ta si Jehova nagboot nin “taon nin mga pagkastigo” tumang sa antitipiko, modernong Edom huli sa labi-labi karaot na gawe sa saiyang banwaan, an saiyang mga Saksi.
Kaaabtan na Kapareho kan sa Edom
10. Paano ilinaladawan kan Isaias 34:9, 10 an kaaabtan nin Edom, alagad kiisay minaaplikar ngonyan an hula?
10 Mantang inaadalan niato an iba pang kabtang kan hulang ini ni Isaias, puwede niatong girumdomon an Kakristianohan: “An saiyang mga salog magigin alkitran, asin an saiyang kabokabo magigin asupre; asin an saiyang daga magigin naglalaad na alkitran. Sa banggi o sa aldaw iyan dai mapaparong; sagkod sa panahon na daing katapusan an aso kaiyan dagos-dagos na mag-iitaas.” (Isaias 34:9, 10) Kaya ilinaladawan an daga nin Edom na nagin alang na gayo kaya garo baga an mga salog kaiyan binubulosan nin alkitran asin garo asupre an kabokabo kaiyan, dangan ginatungan an malaad na mga bagay na ini.—Ikomparar an Kapahayagan 17:16.
11, 12. Gikan sa makahulang paglaladawan na itinao sa Isaias 34:10-15, ano an mangyayari sa daga nin Edom, asin gurano kahaloy na magpapadagos an siring na kamugtakan kan daga?
11 An hula ni Isaias nagpapadagos: “Sa sunod-sunod na kapag-arakian sia magigin alang; sagkod lamang mayo nin siisay man na maagi sa saiya. Asin sasadirihon sia kan pelikano asin kan erizo, asin an mga butbut kuwaw na may haralabang talinga asin an mga uwak mag-oorontok sa saiya; asin uunaton nia sa saiya an pansokol nin kadaihan nin laog asin an mga gapo nin kagabaan. An saiyang mga mahal na tawo—mayo dian an aapodon ninda sa pagkahade, asin an saiyang mga prinsipe magigin gabos daing kamanungdanan. Sa saiyang mga torreng istaran matubo an mga tonok, an mga langaton asin binit sa saiyang mga kuta; asin sia magigin erokan nin mga layas na ayam, an patyo para sa mga avestruz. Asin an mga nag-eerok sa alang na mga lugar makikipagsabatan sa mga hayop na nag-uungal, asin pati an balukagon maapod sa kaiba kaiyan. Iyo, dian an chotacabra magpapahingalo asin makakanompong nin pahingaloan. Dian an maliksing halas naggibo nin salag asin nagsogok.”—Isaias 34:10-15.
12 An Edom magigin daga nin “kadaihan nin laog” kun manongod sa mga tawo. Idto magigin kadlagan na an yaon na sana mga layas na hayop, gamgam, asin halas. An pagkaalang kan daga magpapadagos, arog kan sabi kan bersikulo 10, “sagkod lamang.” Dai makababalik an dating mga nag-iistar dian.—Abdias 18.
13. Ano an ihinula para sa Kakristianohan sa “libro ni Jehova,” asin ano, sa espisipiko, an librong ini?
13 Kanigoan kamakatatakot na pangyayari an ipinanganino kaini para sa modernong katimbang kan Edom—an Kakristianohan! Pinatunayan nia na sia an mapait na kaiwal ni Jehova Dios, na an mga Saksi mabangis niang pinaglamag. Kaya an nagdadangadang na pagkalaglag niang ini bago an Armagedon ihinula sa “libro ni Jehova.” (Isaias 34:16) Sa espisipiko, ining “libro ni Jehova” iyo an saiyang libro sa pakipagkuwenta, na idinidetalye an gigibohon niang pakipagkuwenta sa mga kaiwal nia asin mga paraapi sa saiyang banwaan. An isinurat sa “libro ni Jehova” manongod sa suanoy na Edom naotob, asin ini garantiya na an hula na aplikado sa Kakristianohan, an modernong Edom, maootob man.
14. Ano an dai inako kan antitipikong mga Edomita ngonyan, asin anong halimbawa kan banwaan ni Jehova an dai ninda naarog?
14 An antitipikong mga Edomita ngonyan dai inako si Jehova Dios bilang Hade sa panahon na ini kan “pagtatapos kan palakaw nin mga bagay.” Dugang pa, mantang an Kakristianohan lataw na gayong kabtang kan Dakulang Babilonya, sia nakatalagang makikabtang sa mga damat sa saiya. Dai nia kinuyog an pagboot ni Jehova na “lumuwas” sa Dakulang Babilonya. (Kapahayagan 18:4) Dai nia inarog an halimbawa kan natatada sa espirituwal na mga Israelitas o kan “dakulang kadaklan” nin “ibang karnero.”
15, 16. Ano an harani nang ngapit nin Kakristianohan, siring sa ihinula sa Kapahayagan 17 asin 18 saka Isaias 34?
15 Mapungaw nanggad an harani nang ngapit nin Kakristianohan. Ginigibo nia an bilog niang makakaya na masaway an saiyang politikal na mga katood asin maolang sinda sa pag-iriba tanganing salakayon sia, sa saiyang biyong ikalalaglag, alagad ta dai ini nin kamanungdanan!
16 Sono sa Kapahayagan kapitulo 17 asin 18, an Makakamhan sa gabos na Dios, si Jehova, ibubugtak sa saindang puso na itao an saindang politikal asin militar na kosog sa makahayop na paghiro tumang sa Dakulang Babilonya sa gabos niang relihiyosong kabtang, kaiba an Kakristianohan. Hahaleon kaini sa bilog na daga an palsipikadong Kristianismo. An magigin kamugtakan nin Kakristianohan magigin kapareho kan mapungaw na kamugtakan na ilinaladawan sa Isaias 34. Dai na nia maheheling an nagdedesisyon na “ralaban kan dakulang aldaw nin Dios na Makakamhan sa gabos” tumang sa mga nasyon, na iyo an nanamsam sa Dakulang Babilonya. An antitipikong Edom, an Kakristianohan, biyong paparaon sa ibabaw kan daga, “sagkod lamang.”