Ilinigtas na Buhay sa Dakulang Kahorasaan
“An mga ini an nagluwas sa dakulang kahorasaan, asin hinugasan ninda an saindang mga gubing asin pinaputi iyan sa dugo kan Kordero.”—KAPAHAYAGAN 7:14.
1. Sairisay an mataratara sa mga bubuhayon liwat sa daganon na pagkabuhay liwat?
KUN bangonon na an dai mabilang na minilyon sa ‘pagkabuhay liwat kan mga matanos asin kan mga bakong matanos,’ dai sinda bubuhayon liwat sa sarong daing laog na daga. (Gibo 24:15) Sinda mabangon sa pinagayon na mga palibot asin manonompongan ninda na inandaman sinda nin dadagusan, gubing, asin abundang kakanon. Siisay an magibo kan gabos na pag-andam na ini? Malinaw nanggad, may mga tawong mabubuhay sa bagong kinaban bago magpoon an daganon na pagkabuhay liwat. Sairisay? Ipinaheheling kan Biblia na sinda an mga makakaligtas sa maabot na dakulang kahorasaan. Sa gabos na katokdoan sa Biblia, mayong duda na saro ini sa mga pinakainteresante—na an ibang mga maimbod ililigtas na buhay sa dakulang kahorasaan asin dai na noarin man kaipuhan na magadan. An paglaom na ini pinatutunayan na marhay sa Banal na Kasuratan.
Siring kan mga Aldaw ni Noe
2, 3. (a) Ano an mga pagkakaagid kan mga aldaw ni Noe asin kan satong panahon? (b) Ano an ipinaririsa kan pagkaligtas ni Noe asin kan saiyang pamilya sa Baha?
2 Sa Mateo 24:37-39, pinagkomparar ni Jesu-Cristo an mga aldaw ni Noe asin an huring mga aldaw, na yaon kita dian ngonyan. Sia nagsabi: “Kun paano kan mga aldaw ni Noe, siring man an presensia kan Aki nin tawo. Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na magdatong an baha asin iinanod sinda gabos, magigin siring man kaiyan an presensia kan Aki nin tawo.”
3 Iinanod kan panglobong Baha an gabos na dai naghimate sa nagpapatanid na mensahe nin Dios. Alagad, dai kaiyan iinanod si Noe asin an saiyang pamilya. Sinda “naglaog sa dahong,” siring kan sabi ni Jesus. Huli sa saindang diosnon na debosyon, tinawan sinda ni Jehova nin paaging makaligtas. Nasasambitan kan 2 Pedro 2:5, 9 an pagkaligtas ni Noe asin kan saiyang pamilya kan iyan magsabi: “Ilinigtas [nin Dios] si Noe, sarong parahulit nin katanosan, kaibanan nin pito pa kan pabahaan nia an kinaban nin maraot na mga tawo. Si Jehova tataong magligtas sa mga tawong may diosnon na debosyon hale sa pagbalo.” Pinagkomparar ni Jesus an aldaw ni Noe asin an huring mga aldaw tanganing ipaheling na an mga tawo sa pankagabsan dai maghihimate sa nagpapatanid na mensahe nin Dios. Minsan siring, sa paggibo kaiyan pinatunayan man nia na si Noe asin an saiyang pamilya nagkuyog ki Jehova Dios, naglaog sa dahong, asin nakaligtas sa dakulang Baha. An pagkaligtas ni Noe asin kan saiyang pamilya nagpaparisa na maliligtas an maimbod na mga lingkod nin Dios sa katapusan kan kinaban na ini.
Sarong Arogan kan Enot na Siglo
4. Bilang kaotoban kan mga tataramon ni Jesus, anong mga pangyayari an suminagkod sa pagkalaglag kan Jerusalem kan 70 C.E.?
4 Nagtaram man si Jesus manongod sa mga mangyayari sa katapusan kan kinaban na ini. Sa Mateo 24:21, 22, mababasa niato: “Dangan magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray. Sa katotoohan, kun dai pahalipoton an mga aldaw na iyan, mayong laman na makaliligtas; alagad huli sa mga pinili an mga aldaw na iyan pahahalipoton.” An mga tataramon na ini nagkaigwa nin enot na kaotoban sa enot na siglo kan satong Komon na Kapanahonan. Kan 66 C.E., an siudad nin Jerusalem sinalikopan kan mga hukbo nin Roma sa pangengenot ni Cesto Galo. Puwede na kutanang rumpagon kan mga hukbo nin Roma an mga lanob kan templo, asin dakol na Judio an andam nang sumuko. Alagad, sa dai linalaoman asin bakong malinaw na dahelan, pinaatras ni Cesto Galo an saiyang mga hukbo. Kan maheling na uminatras an mga Romano, kinuyog kan mga Kristiano an mga itinaram ni Jesus dakol nang taon an nakaagi: “Kun maheling na nindo na an Jerusalem napalilibotan nin nagkakampong mga hukbo, dangan saboton nindo na harani na an saiyang pagkagaba. Dangan an mga nasa Judea magpoon nang dumulag pasiring sa kabukidan, asin an mga nasa tahaw nia magruluwas, patin an mga nasa oma dai na magralaog dian.” (Lucas 21:20, 21) An mga Judiong nagin Kristiano, an mga pinili, tolos-tolos na binayaan an malalaglag na siudad nin Jerusalem asin sa siring naligtas sa makaturotristeng kalaglagan na nagdatong dian dai nahaloy. Kan 70 C.E., nagbalik an mga hukbo nin Roma sa pangengenot ni Heneral Tito. Nagkampo sinda sa palibot kan Jerusalem, sinalikopan an siudad, asin ginaba iyan.
5. Sa anong sentido na pinahalipot an kahorasaan sa Jerusalem kan 70 C.E.?
5 An Judiong historyador na si Josefo nagsaysay na 1,100,000 na Judio an nagadan, mantang 97,000 an natadang buhay asin dinarang bihag. An bako-Kristianong mga Judiong idto na natadang buhay bako nanggad an “mga pinili” sa ilustrasyon ni Jesus. Kinakaolay an rebeldeng Judiong nasyon, si Jesus nagsabi: “Uya! An saindong harong pinabayaan na sa saindo. Ta ako nagsasabi sa saindo, Magpoon ngonyan dai na kamo sa ano man na paagi makakaheling sa sako sagkod na kamo magsabi, ‘Omawon an minadatong sa ngaran ni Jehova!’” (Mateo 23:38, 39) Mayo nin rekord na an mga Judiong idto, na nalaom sa Jerusalem, sa ultimong minuto inako si Jesus bilang Mesiyas, nagin mga Kristiano, asin nag-ako kan pabor ni Jehova. Minsan siring, pinahalipot an kahorasaan na nagdatong sa Jerusalem kan 70 C.E. An ultimong pagsalikop kan hukbo nin Roma dai luminawig nin haloy. Tinogotan kaini na matadang buhay an nagkapirang Judio, minsan ngani dinara sana sa laen-laen na parte kan Imperyo nin Roma bilang mga oripon.
Sarong Dakulang Kadaklan nin mga Nakaligtas
6, 7. (a) Anong dakulang relihiyosong siudad an lalaglagon pa, bilang kabtang nin anong dai pang kaagid na kahorasaan? (b) Ano an ihinula ni Juan manongod sa maabot na dakulang kahorasaan sa kinaban na ini?
6 Mantang an kalaglagan kan Jerusalem kan 70 C.E. tunay nanggad na nagdara nin “dakulang kahorasaan” sa relihiyosong siudad na idto, an pangenot na kaotoban kan mga tataramon ni Jesus maootob pa. An sarong mas dakulang relihiyosong siudad, an Dakulang Babilonya, an pankinaban na imperyo nin falsong relihiyon, makakaeksperyensia nin nakagagadan na dakulang kahorasaan na susundan tolos nin dai pang kaagid na kahorasaan sa natatada pang kabtang kan palakaw nin mga bagay ni Satanas. (Mateo 24:29, 30; Kapahayagan 18:21) Mga 26 na taon pagkalaglag kan Jerusalem, si apostol Juan, sa Kapahayagan 7:9-14, nagsurat manongod sa lakop sa kinaban na dakulang kahorasaan na ini. Ipinaheling nia na sarong dakulang kadaklan nin mga tawo an makakaligtas dian.
7 An mga makakaligtas na ini, na inaapod na “dakulang kadaklan,” mamimidbid sa nagkapirang desididong paghiro na saindang ginigibo. Sono sa Kapahayagan 7:14, an saro sa 24 magurang sa langit nagsabi ki Juan: “An mga ini an nagluwas sa dakulang kahorasaan, asin hinugasan ninda an saindang mga gubing asin pinaputi iyan sa dugo kan Kordero.” Iyo, an dakulang kadaklan inoomaw si Jehova bilang gikanan kan saindang kaligtasan. Sinda naggigibo nin pagtubod sa pinabolos na dugo ni Jesus asin igwa nin matanos na kamugtakan sa atubangan kan saindang Kaglalang asin kan saiyang ninombrahan na Hade, si Jesu-Cristo.
8. Anong marahay na relasyon an yaon sa pag-oltanan kan “dakulang kadaklan” asin kan mga natatada sa linahidan na mga tugang ni Jesus?
8 Ngonyan, an haros limang milyon na miembro kan dakulang kadaklan namumuhay sa irarom kan aktibong pangengenot kan langitnon na Hadeng si Jesu-Cristo. Sinda napasasakop ki Cristo asin dayupot na nakikiasosyar sa saiyang linahidan na mga tugang na yaon pa digdi sa daga. Mapadapit sa pagtratar na itinatao kan dakulang kadaklan sa mga linahidan na ini, si Jesus nagsasabi: “Sa katotoohan sinasabi ko sa saindo, Huli ta ginibo nindo iyan sa saro sa pinakasadangoton kan sakong mga tugang, ginibo nindo iyan sa sako.” (Mateo 25:40) Huli ta daing kapasloan na nagtatabang sinda sa linahidan na mga tugang ni Cristo, an mga kabilang sa dakulang kadaklan hinusgaran na nakagibo nin marahay ki Jesus mismo. Tinatabangan sinda kaini na magkaigwa nin masarig na relasyon ki Jesu-Cristo asin ki Jehova Dios. Nagkapribilehiyo sinda na umiba sa linahidan na mga natatada sa pagigin mga Saksi nin Dios asin paradara kan saiyang ngaran.—Isaias 43:10, 11; Joel 2:31, 32.
Pagdadanay na Puka
9, 10. (a) Ano an dapat niatong gibohon tanganing mapagdanay an satong matanos na kamugtakan sa atubangan kan Aki nin tawo? (b) Paano kita dapat humiro tanganing ‘makapagpuka’?
9 Dapat na daing ontok na papagdanayon kan dakulang kadaklan an saindang matanos na kamugtakan sa atubangan kan Aki nin tawo, na nagkakaipo nin pagdadanay na puka sagkod sa katapusan. Malinaw an pagkasabi kaini ni Jesus kan sia magsabi: “Mag-ingat kamo sa saindo man sana na an saindong mga puso dai manganaan nin kapasloan asin nin kaburatan asin mga paghadit sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga. Kaya magpuka kamo, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog sa atubangan kan Aki nin tawo.”—Lucas 21:34-36.
10 Tanganing magin mapanggana sa pagtindog sa atubangan kan Aki nin tawo, dapat na igwa kita kan saiyang pag-oyon, na dai niato makakamit kun totogotan ta an satong sadiri na maimpluwensiahan kan kaisipan kan kinaban na ini. Nakaaakit an kaisipan kan kinaban asin puwedeng sugotan an saro na magpangana sa mga kasingawan nin laman o maghadit na marhay sa mga problema sa buhay kaya dai na nia inienot an intereses kan Kahadean. (Mateo 6:33) An siring na dalan pinapaluya an saro sa espirituwal asin puwede siang gibohon na indiperente manongod sa saiyang mga paninimbagan sa Dios asin sa iba. Puwede siang magin inaktibo o raoton an saiyang kamugtakan sa kongregasyon paagi sa pagkomitir nin seryosong kasalan, na tibaad nagpapaheling pa ngani nin daing pagsolsol na kaisipan. An lambang indibiduwal sa dakulang kadaklan dapat na mag-ingat sa saiya man sana. Dapat siang magdanay na siblag sa maraot na kinaban na ini asin sa mga gibo kaiyan.—Juan 17:16.
11. An pag-aplikar kan anong Makakasuratan na mga prinsipyo makatatabang sato na makaligtas sa Armagedon?
11 Sa katuyohan na iyan, itinao ni Jehova an satong kaipuhan paagi sa saiyang Tataramon, sa saiyang banal na espiritu, asin sa saiyang naheheling na organisasyon. Dapat niatong lubos na aprobetsaran ini. Dugang pa, dapat kitang magin mapagngayongayo asin makinuyog sa Dios kun linalaoman tang makamtan an saiyang pabor. Enot, dapat kitang magpatalubo nin makosog na pagkaongis sa maraot. An salmista nagsabi: “Dai ako nagtukaw sa kaibanan nin mga tawong putikon; asin dai man ako naglaog sa kaibanan kan mga nagtatago kan saindang tunay na pagkatawo. Ikinaongis ko an kongregasyon nin mga maraot, asin dai ako minatukaw sa kaibanan nin mga tampalasan. Dai mo pagkuanon an sakong kalag sa kaibanan nin mga parakasala, ni an sakong buhay sa kaibanan nin mga tawong may pagkakasala sa dugo.” (Salmo 26:4, 5, 9) Sa Kristianong kongregasyon, kaipuhan na limitaran kan mga hoben asin man mga gurang an pakikiasosyar sa mga bakong dusay ki Jehova. Tanganing akoon an pabor nin Dios, naghihingoa kitang magin daing kanawayan asin daing digta kan kinaban. (Salmo 26:1-5; Santiago 1:27; 4:4) Kun siring, masisierto ta na sa Armagedon, dai kita paparaon ni Jehova sa kagadanan kaiba kan mga maraot.
An Iba “Dai Noarin Man Magagadan”
12, 13. (a) Bago binuhay liwat si Lazaro, nagtaram si Jesus nin anong mga tataramon na dai lubos na nasabotan ni Marta? (b) Ano an dai boot sabihon kan mga tataramon ni Jesus manongod sa iba na “dai noarin man magagadan”?
12 Nakaoogmang horophoropon an pagkaligtas sa katapusan kan palakaw na ini nin mga bagay asin an posibilidad na dai na noarin man magadan. Ini an paglaom na itinao sato ni Jesus. Bago binuhay liwat an saiyang gadan nang katood na si Lazaro, sinabihan ni Jesus an tugang ni Lazaro na si Marta: “Ako iyo an pagkabuhay liwat asin an buhay. An naggigibo nin pagtubod sa sako, minsan pa sia magadan, mabubuhay; asin an gabos na nabubuhay asin naggigibo nin pagtubod sa sako dai noarin man magagadan. Minatubod ka kaini?” Nagtubod si Marta sa pagkabuhay liwat, alagad dai nia nasabotan an gabos na itinataram ni Jesus.—Juan 11:25, 26.
13 Dai boot sabihon ni Jesus na an saiyang maimbod na mga apostol padagos na mabubuhay sa laman asin dai noarin man magagadan. Sa kabaliktaran, kan huri sinabi nia na an saiyang mga apostol magagadan. (Juan 21:16-23) Tunay nanggad, an paglahid sa sainda nin banal na espiritu kan Pentecostes 33 C.E. nangahulogan na kaipuhan sindang magadan tanganing mag-ako kan saindang langitnon na mana bilang mga hade asin saserdote. (Kapahayagan 20:4, 6) Kaya, sa pag-agi nin panahon, an gabos na Kristiano kan enot na siglo nagadan. Alagad, may katuyohan an pagkasabing ini ni Jesus. An saiyang mga tataramon manongod sa buhay na dai na noarin man magagadan maootob.
14, 15. (a) Paano maootob an mga tataramon ni Jesus manongod sa iba na “dai noarin man magagadan”? (b) Ano an situwasyon sa kinaban na ini, alagad ano an paglaom kan mga matanos?
14 Enot, an maimbod na linahidan na mga Kristiano nungka na makakaeksperyensia nin kagadanan na daing katapusan. (Kapahayagan 20:6) Saro pa, an mga tataramon ni Jesus nagtotokdo sa sarong espisipikong panahon na an Dios makikilabot sa mga gibo-gibo nin tawo asin paparaon an karatan digdi sa daga, siring kan ginibo nia kan aldaw ni Noe. An mga maimbod na manonompongan na naggigibo kan kabotan nin Dios sa panahon na iyan dai kaipuhan na magadan paagi sa mga paghokom nin Dios. Imbes, arog ni Noe asin kan saiyang pamilya, sinda magkakaigwa kan oportunidad na makaligtas sa kalaglagan nin sarong kinaban. An siring na paglaom masarig, na basado sa mga katokdoan kan Biblia asin iiniilustrar nin mga halimbawa. (Ikomparar an Hebreo 6:19; 2 Pedro 2:4-9.) An kaotoban kan hula sa Biblia nagpapaheling na sa dai na nanggad mahahaloy an presenteng kinaban na kompuwesto nin maraot na sosyedad nin tawo matatapos sa kalaglagan. Dai na puwedeng baliktadon an presenteng situwasyon, huli ta an kinaban dai na mababakle an karatan. An sinabi nin Dios manongod sa kinaban kan kaaldawan ni Noe totoo man sa kinaban ngonyan. An karatan an nakapapano sa puso kan dakulang mayoriya nin tawo, asin an saindang kaisipan perming maraot.—Genesis 6:5.
15 Tinogotan ni Jehova an mga tawo na pamahalaan an daga sa laog nin mga siglo na mayo kan pakikilabot nin Dios, alagad haros ubos na an saindang panahon. Sa dai na mahahaloy paparaon ni Jehova an gabos na maraot digdi sa daga, siring nanggad sa sinasabi kan Biblia. (Salmo 145:20; Talinhaga 2:21, 22) Alagad, dai nia lalaglagon an mga matanos kaiba kan mga maraot. Nungkang ginibo nin Dios an siring na bagay! (Ikomparar an Genesis 18:22, 23, 26.) Taano ta lalaglagon nia an mga naghihingoang maglingkod sa saiya na may kaimbodan, na may diosnon na takot? Makatanosan sana na an maimbod na mga parasamba ki Jehova na nabubuhay pagpoon kan dakulang kahorasaan makakanompong nin pabor sa saiyang mga mata asin dai lalaglagon, kun paanong si Noe asin an saiyang pamilya dai linaglag kan an maraot na kinaban kan saiyang kaaldawan tapuson paagi sa baha. (Genesis 7:23) Kakamtan ninda an proteksion nin Dios asin makakaligtas sinda sa katapusan kan kinaban na ini.
16. Anong makangangalas na mga bagay an mangyayari sa bagong kinaban, na nangangahulogan nin ano para sa mga makakaligtas?
16 Dangan ano? Sa bagong kinaban, an nakaoomay na mga bendisyon mabolos sa katawohan mantang lubos na ginagamit an mga pakinabang kan pantubos na atang ni Jesus. An Biblia nagtataram manongod sa sarong simbolikong “salog kan tubig nin buhay, na malinaw siring sa kristal, na nagbobolos hale sa trono nin Dios asin kan Kordero pasiring sa tahaw kan tinampo kaiyan. Asin sa pangpang na ini kan salog asin duman sa ibong igwa nin mga kahoy nin buhay na nagbubunga nin kagduwang gusi nin bunga, na nagbubunga bulan-bulan. Asin an mga dahon kan mga kahoy para sa pagpaomay sa mga nasyon.” (Kapahayagan 22:1, 2) Makangangalas na sabihon, kabale sa “pagpaomay” na iyan an pakadaog sa Adamikong kagadanan mismo! “Hahalonon nanggad nia an kagadanan sagkod lamang, asin papahidon kan Soberanong Kagurangnan na si Jehova an mga luha sa gabos na lalauogon.” (Isaias 25:8) Kaya, an mga makakaligtas sa dakulang kahorasaan pasiring sa bagong kinaban dai na noarin man kaipuhan na mapaatubang sa kagadanan!
Sarong Seguradong Paglaom
17. Gurano kasegurado kan paglaom na an iba makakaligtas sa Armagedon asin “dai noarin man magagadan”?
17 Puwede daw kitang magkaigwa nin lubos na pagsarig sa makangangalas na paglaom na ini? Iyo nanggad! Sinabi ni Jesus ki Marta na magkakaigwa nin panahon na an mga tawo mabubuhay na dai na noarin man magagadan. (Juan 11:26) Saro pa, sa kapitulo 7 kan Kapahayagan na itinao ni Jesus ki Juan, ihinayag na an sarong dakulang kadaklan nagluwas sa dakulang kahorasaan, na nakaligtas dian. Makatutubod daw kita ki Jesu-Cristo asin sa makasaysayan na tala dapit sa Baha kan aldaw ni Noe? Mayong duwa-duwa! Dugang pa, an Biblia igwa pang ibang tala nin mga pangyayari na an Dios ilinigtas na buhay an saiyang mga lingkod sa mga peryodo nin paghokom asin sa pagbagsak nin mga nasyon. Bako daw na iyan man an maninigong laoman sa saiya sa panahon na ini nin katapusan? Igwa daw nin ano man na imposible para sa Kaglalang?—Ikomparar an Mateo 19:26.
18. Paano niato masisierto an buhay sa matanos na bagong kinaban ni Jehova?
18 Paagi sa maimbod na paglilingkod ki Jehova ngonyan, nakasisierto kita sa buhay na daing katapusan sa saiyang bagong kinaban. Para sa dai isinabing minilyon, an buhay sa bagong kinaban na iyan madatong paagi sa pagkabuhay liwat. Pero, sa satong aldaw, an minilyon sa banwaan ni Jehova—iyo, sarong dakulang kadaklan na mayo nin siisay man na makakabilang o makakalimitar—magkakamit kan pambihirang pribilehiyo na maligtas na buhay sa dakulang kahorasaan. Asin dai na sinda noarin man kaipuhan na magadan.
Tabi Ipaliwanag
◻ Paano ipinanganino kan aldaw ni Noe an pagkaligtas sa Armagedon?
◻ Ano an dapat niatong gibohon tanganing magdanay na nagtitindog pagdatong ni Jesus sa paggibo kan mga paghokom ni Jehova?
◻ Taano ta makasasabi kita na an mga makakaligtas sa Armagedon ‘dai na noarin man kaipuhan na magadan’?
[Retrato sa pahina 15]
An mga Kristiano nakadulag sa kahorasaan kan Jerusalem