Siisay an Makaliligtas sa Katapusan kan Kinaban na Ini?

AN KADAKLAN na tawo na nabubuhay sa daga ngonyan dai makaliligtas sa katapusan na ini kan kinaban. Iyan nagigin maliwanag na gayo sa pagsiyasat sa ipinasabong na Tataramon nin Dios. Arog kan sabi ni Jesus: “Halakbang asin mahiwas an dalan na pasiring sa kalaglagan, asin dakol an mga nagraralaog dian; sa ibong na kampi piot an tata asin hayakpit an dalan pasiring sa buhay, asin diit an mga nakakakua kaiyan.”—Mateo 7:13, 14.

Tibaad makubhanan an iba sa ideya na tibaad laglagon nin Dios an minilyon, iyo, binilyon na tawo na ibinibilang niang maraot. Alagad girumdomon na an Dios “habo na an siisay man malaglag kundi boot nia na an gabos makapagsolsol.” (2 Pedro 3:9) Dai, an Dios dai naoogmang laglagon minsan an mga maraot: “Naoogma ako, bakong sa pagkagadan kan maraot, kundi sa bagay na an sarong maraot minatalikod sa saiyang dalan asin magdanay na mabuhay.” (Ezequiel 33:11) Minsan siring, an Dios kaipuhan na magmaimbod sa saiyang Tataramon asin otobon an saiyang katuyohan para sa dagang ini. Tanganing magibo iyan, kaipuhan na haleon an mga ibinibilang niang tampalasan.

An mga Makaliligtas

Huli ta dai nangyayari sa aroaldaw an pagkatapos nin sarong kinaban, dakol an dai nagtutubod na iyan mangyayari. Alagad marahay na girumdomon nin siring na mga tawo na iyan nangyari kaidto.

Kasuarin? Kan panahon kan lakop sa dagang Baha kan aldaw ni Noe. Tinapos nin Dios an bilog na kinaban nin mga tawo na siblag sa saiya. Kaiba sa mga nagadan an mga lalaki asin babae na hinokoman kan Kaglalang na maraot. Kaiba man an saindang mga aki, ta an mga aking idto pinadadakula na magin arog kan saindang mga magurang—maraot. Kaya, “an gabos na igwa sa dongo kaiyan kan hinangos kan puwersa nin buhay, arin na baga, an gabos na nasa ibabaw kan marang daga, nagadan . . . , magpoon sa tawo sagkod sa hayop,” sabi sato kan Biblia.

Siisay an nakaligtas sa Baha? An Tataramon nin Dios minasimbag: “Solamente si Noe asin an saiyang kairiba sa dahong an natadang buhay.” (Genesis 7:21-23) Kaiba digdi si Noe asin an saiyang agom, an saindang tolong aki asin an agom kan mga ini, walo katawo, saka an mga representante sa mga klase nin hayop. Taano ta inoyonan nin Dios si Noe asin an saiyang pamilya? Huli ta kan pagbotan sinda nin Dios, sinda nagkuyog. Arog kan sabi kan Genesis: “Ginibo ni Noe an sono sa gabos na ipinagboot sa saiya nin Dios. Siring nanggad kaiyan an saiyang ginibo.”—Genesis 6:22; 7:5.

May manonodan kitang makahulogan na mga leksion sa nangyari kaidto. “An gabos na mga bagay na isinurat kaidto isinurat sa pagtokdo sato.” (Roma 15:4) Kun siring nakapagtotokdong mangnohon na pinapaninimbag nin Dios an mga tawo sa saindang mga gibo. Tinawan nia kita kan balaog na libreng kabotan asin naghahagad nin paninimbag. Dai niato puwedeng lingawan an Kaglalang, an saiyang mga katuyohan, asin an saiyang kabotan, dangan magpalibre sa pagkondenar na garo baga obligado an Dios na tawan kita nin pabor ano man an satong nagin kaisipan o gibo. “Dai kamo madayaan: An Dios dai maoolog-olog. Huli ta an ano man na itinatanom nin tawo, iyan man sana an saiyang aanihon.”—Galacia 6:7.

Nakapagtotokdo man an nangyari sa mga siudad nin Sodoma asin Gomorra. Huli sa labi-labi nindang inmoralidad, ipinagboot nin Dios an paglaglag sa sainda. “An iniyak tumang sa sainda kuminosog na sa atubangan ni Jehova, kaya isinugo kami ni Jehova tanganing laglagon an siudad,” sabi kan mga ahente nia sa paglaglag. An gabos apuwera sa tolo katawo—si Lot asin an duwa niang aking babae—nalaglag. Taano sinda ta ilinigtas? Huli ta sinda naghinanyog sa mga instruksion nin Dios asin nagkuyog. Alagad ta an agom ni Lot dai—asin napara. Nagadan man an duwang lalaki na katratong pakasalan kan mga aking babae ni Lot. Taano? Huli ta kan patanidan sinda ni Lot manongod sa nagdadangadang na kalaglagan, “sa pagheling kan saiyang [magigin] mga manugang garo sia tawong nagsusuba.” Alagad ta idto bakong suba-suba. Nagadan sinda.—Genesis 19:12-14.

Siring man sa satong panahon, dakol an nagtutuya sa patanid manongod sa kaharanihan kan katapusan kan kinaban na ini. Alagad ta ihinula ni apostol Pedro na sa “huring mga aldaw an mga paraolog-olog madatong na may pag-olog-olog.” Sinabi nia na liningawan kan mga ini an bagay na may kinaban na natapos kaidto—sa Baha. Si Jesus nagsabi man: “Huli ta kun paano kan mga aldaw ni Noe, siring man an presensia kan Aki nin tawo. Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na magdatong an baha asin iinanod sinda gabos.” Idinugang nia: “Magigin siring man kaiyan an presensia kan Aki nin tawo.”—2 Pedro 3:3-7; Mateo 24:37-39.

Kaya, dakol an malalaglag huli ta ginusto nindang dai mangnohon an risang tanda kan “huring mga aldaw” na ini. (2 Timoteo 3:1-5) Minsan siring, an maogmang bareta iyo na magkakaigwa nin mga makaliligtas, mas dakol kisa walo katawo na nakaligtas sa Baha o sa tolo na nakaligtas sa katapusan kan Sodoma asin Gomorra. Na dakol an makaliligtas ihinula ni apostol Juan sa sarong banal na kapahayagan. Sia nagsurat: “Ako nagheling, asin, uya! an sarong dakulang kadaklan, na dai nin siisay man na makabibilang, hale sa gabos na nasyon asin tribo asin banwaan patin tataramon . . . ‘An mga ini an nagluwas [nakaligtas] sa dakulang kahorasaan. . . . Asin papahidon nin Dios an gabos na luha sa saindang mga mata.’”—Kapahayagan 7:9, 14, 17.

An Katapusan kan Kinaban—Noarin?

Noarin matatapos an kinaban na ini? An Biblia dai nagtatao nin espisipikong petsa. Liniwanag ini ni Jesus kan simbagon nia an hapot saiya kan saiyang mga disipulo manongod dian. Sinabi nia na an eksaktong panahon, an boot sabihon, an aldaw asin oras, dai aram nin siisay man na tawo. (Mateo 24:36) Minsan siring, an bagay na dai niato makakarkulong mga tawo an eksaktong petsa kan katapusan kan kinaban na ini dai nangangahulogan na an Dios dai magtatao sato nin ano man na impormasyon sa kun noarin iyan harani na.

An dakol na hula sa Biblia nagtatanda sa panahon na iyan. Si Jesus mismo an nagsabi kan dakol sa mga pangyayari na mangyayari bago an katapusan. Dangan sia nagsabi manongod sa mga tawo na makaheheling sa pagpopoon kan mga pangyayaring iyan: “Kun maheling na nindo an gabos na bagay na ini, aramon nindo na sia harani na sa mga tata. Sa katotoohan sinasabi ko saindo na an kapag-arakian na ini dai noarin man makalilihis sagkod na an gabos na bagay na ini mangyari.”—Mateo 24:33, 34.

Arin na kapag-arakian an boot sabihon ni Jesus? Daing duwa-duwa, iyan an kapag-arakian na nabuhay poon kan taon 1914. Naheling kaiyan an gabos na isinabi ni Jesus na mangyayari bago an katapusan. Ini nangangahulogan na an nagkapira na buhay na kan 1914 maheheling an katapusan kan kinaban na ini.—Mateo 24:1-34.

Isinabi man ni Jesus an pag-apretang ini: “Kamo man magin andam, huli ta sa oras na dai nindo pinaghohona, an Aki nin tawo madatong.” An “Aki nin tawong” iyan iyo si Jesus mismo, na madatong bilang Poon na Parapadusa nin Dios.—Mateo 24:44; helingon man an Kapahayagan 19:11-21.

Panahon nin Pagdedesisyon

Halipoton na an panahon na natatada para sa maraot, madahas, daing hustisyang kinaban na ini. Kaya an lambang saro sato kaipuhan na magdesisyon kun baga boot niang magin kabilang sa mga makaliligtas.

Ano an magdedeterminar kun baga an saro malalaglag o maliligtas? Hinanyoga an simbag na itinao ni apostol Pedro: “Mantang an gabos na bagay na ini tutunawon nin siring, kamo maninigong magin anong klaseng mga tawo sa banal na mga gawe asin gibo nin diosnon na debosyon, na naghahalat asin naggigirumdom sa presensia kan aldaw ni Jehova.”—2 Pedro 3:11, 12.

Iyo, kaipuhan kitang maghinanyog sa sinasabi ngonyan nin Dios asin gibohon an ipinagboot nia sa sato. Kun iyan gigibohon niato, dai kita malalaglag kundi iingatan na buhay tanganing lumaog sa bagong palakaw nin katanosan. (2 Pedro 3:13) Ini liniliwanag man kan ipinasabong na mga tataramon ni apostol Juan: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:17.

An desisyon na manindogan sa lado nin Dios asin kan saiyang mga katotoohan dai puwedeng basado sana sa emosyon. Iyan kaipuhan na bunga nin tamang kaaraman: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.”—Juan 17:3.

Hinahagad man kaiyan sato na “magpadagos na magtalubo” sa kaaraman na iyan. (2 Pedro 3:18) Kaiba digdi an lubos na kaaraman sa probisyon nin Dios para sa kaligtasan paagi sa saiyang langitnon na Kahadean, na ngonyan tinindog na sa kamot kan saiyang Ganador sa Kinaban, si Cristo Jesus. (Mateo 6:9, 10) Kaiba man dian an satong mapusong pagtaram sa iba manongod sa makangangalas na paglaom sa buhay na daing katapusan digdi sa daga sakop kan gobyerno kan Kahadean nin Dios. Arog kan ihinula ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14.

Nakaoogma nanggad na maaraman na an katapusan kan kinaban na ini dai mangangahulogan nin kapahamakan para sa magayon na planetang ini! Asin nakaoogma man na maaraman na puwede kitang makaiba sa minilyon na makaliligtas pasiring sa sarong nalinigan nang daga!

Boot daw nindong makabilang sa mga makaliligtas? Puwede kun dai nindo aarogon an mga ‘dai nagmangno’ kundi imbes arogon an halimbawa ni Noe na ‘paggibo nin siring nanggad kaiyan’ manongod sa kabotan nin Dios. Kun gigibohon nindo iyan, an panuga nin Dios iyo na tibaad kamo mabuhay sagkod lamang sa sarong daga na ipinanuga ni Jesus na magigin paraiso. “An mga matanos mismo magmamana kan daga, asin sinda mag-eerok dian sagkod lamang.”—Salmo 37:29; Lucas 23:43; Mateo 5:5.

[Tsart sa pahina 22]

An Kaaabtan kan Daga

Punto-de-Vista nin Kadaklan

Lubos na pagkalaglag kan rasa nin tawo

An daga mapapara; mayo nin mga makaliligtas

An daga magigin dai nang data

Punto-de-Vista kan Biblia

Kalaglagan kan mga maraot (Talinhaga 2:21, 22; Mateo 25:31-46)

Seguradong kaligtasan para sa mga nag-ootob sa kabotan nin Dios (Sofonias 2:2, 3; 1 Juan 2:15-17)

Buhay na daing katapusan sa sarong paraisong daga para sa gabos (Salmo 37:29; Lucas 23:43)

[Ritrato sa pahina 21]

An maraot na mga tawo sa Sodoma asin Gomorra linaglag, alagad si Lot asin an saiyang mga aking babae nakaligtas

[Ritrato sa pahina 23]

An mga nag-ootob sa kabotan nin Dios makaliligtas sa katapusan kan kinaban na ini asin mabubuhay sagkod lamang sa daga sa Paraiso