An Punto-de-Vista kan Biblia

An mga Saksi ni Jehova—Napapalaen sa Ibang Relihiyon

“SIBOT ako, asin saro pa, dai ako nakikipag-olay sa mga Saksi ni Jehova.” Iyan an simbag nin sarong kagharong sa pagtoktok nin saro sa mga Saksi ni Jehova.

An bisita maboot na nagsimbag: “Nadangog kong sinabi nindo na sibot kamo, pero puwede daw tabing ihapot saindo kun taano ta sinasabi nindo na dai kamo nakikipag-olay samo?” An mga dahelan palan mga salang paghona sana manongod sa tinutubod asin ginigibo nin mga Saksi. Kan ikapaliwanag ini, marahayon na orolay an ibinunga.

Aram daw nindo kun ano an tinutubod kan mga Saksi ni Jehova? Aram daw nindo kun taano sinda ta napapalaen sa ibang relihiyon asin kun ano an halaga kaini para sa saindo?

An Saindang mga Tinutubod

An saindang mga tinutubod—na daing kasalak na mga tradisyon, paganong mga ideya, o nasyonalistikong mga pasohan—biyong nasasarig sa Biblia, na tinutubod ninda na iyo an dai nasasala, ipinasabong na Tataramon nin Dios. Ini nagbubunga nin nagkapirang dakulang pagkakalaen sa pundamental na mga tinutubod.

An paggamit sa banal na ngaran: An ngaran na JEHOVA, Yahweh para sa nagkapira, tibaad pambihira para sa dakol, pero an paggamit dian nin labing 7,000 na beses sa Biblia nagpapaheling na an mga parasamba sa Dios linalaoman na makaaram sa asin gamiton an saiyang personal na ngaran. (Salmo 83:18) Mantang an mga Kristiano “sarong banwaan para sa saiyang ngaran,” ginamit iyan ni Jesus sa pagtotokdo sa saiyang mga disipulo. (Gibo 15:14; Juan 17:26) Huli kaini, imbes na isipon na an mga Saksi ni Jehova palaen huli sa paggamit sa ngaran, bako daw na mas angay na ihapot kun taano an ibang relihiyon ta dai danay na naggagamit kaiyan?—Malaquias 3:16.

An Kahadean nin Dios: Sarong tunay na gobyerno—minsan ngani langitnon—na si Cristo Jesus an hade, na makasasakop sa daga. Iyan bako sanang ‘nasa puso.’ “An gobyerno mamumugtak sa saiyang [ki Cristo] abaga.” (Isaias 9:6, 7, Revised Standard Version) Iyan mabindikar sa may diretsong soberaniya nin Dios. Sia “mapatindog nin sarong kahadean na . . . matapos kan gabos na ining kahadean” nin tawo, na ibinabalik an pagkasararo asin katoninongan sa bilog na kinaban sagkod lamang.—Daniel 2:44.

An kalag nin tawo: Bakong bagay na daing hawak asin inmortal na natatada pagkagadan kan hawak kundi, imbes, an tawo mismo o an buhay nia. Kan lalangon “an tawo nagin buhay na kalag.” (Genesis 2:7; 1 Corinto 15:45) “An inmortalidad kan kalag sarong teoriyang Griego na nahaman sa suanoy na mga kultong misteryoso asin pinahiwas kan pilosopong si Plato.” (Presbyterian Life, Mayo 1, 1970) Kaya an mga gadan sa katunayan dai man nagsasakit saen man. Sinda natotorog. (Eclesiastes 9:5, 10) An paglaom sa buhay sa ngapit para sa mga gadan depende sa katongdan ni Cristo Jesus bilang pantubos na atang asin sa pagkaigwa kan pag-oyon nin Dios para sa pagkabuhay liwat.—Juan 5:28, 29; Gibo 17:31; 24:15; 1 Corinto 15:13, 14.

An kaaabtan kan daga: An daga dai magigin daing buhay na abo, baga man sa kamot nin Dios o paagi sa nuklear na pagkatunaw. An Dios “dai iyan linalang na dai nin kapakanan.” Sia “naghaman kaiyan tanganing pag-istaran.” (Isaias 45:18; Eclesiastes 1:4) Sisiertohon kan Kahadean nin Dios na an saiyang kabotan “gibohon, kun paano sa langit, siring man sa daga.” (Mateo 6:10) Dangan, “an mga matanos mismo magmamana kan daga, asin sinda mag-eerok dian sagkod lamang.”—Salmo 37:29.

An mga nag-aako sa siring na mga pagtubod naliliwat an kaisipan manongod sa Dios, sa buhay, asin sa kapwa. An buhay nagkakaigwa nin katuyohan asin kahulogan.—Roma 8:19-21.

An Saindang mga Gibo

An mga ini nasasarig man sa Biblia. Minsan ngani an iba tibaad ibinibilang na palaen, an mga gibong ini mahalagang mga midbidan nin tunay na pagsamba.

Ministeryo sa publiko: Dakol an nasasabihan ini bilang dakulang ikinapapalaen sa aktibidad asin organisasyon. Pero, sa gibohon na ini kinukuyog nin mga Saksi ni Jehova an pagboot ni Jesus na “paduman kamo . . . asin gumibo kamo nin mga disipulo.” Sa pag-arog sa halimbawa kan mga apostol, an gabos na kuwalipikadong ministro puwedeng magtokdo “sa publiko asin sa pagharongharong.” (Mateo 28:19, 20; Gibo 20:20) An ibang iglesya igwa kan tradisyonal na pagkakabanga nin klero asin lego, pero “mayo ni kadikit na katanosan . . . an ‘may duwang gradong’ pagkakalaen na iyan,” sabi kan Theology Today. Imbes, arog kan komento kan Encyclopedia Canadiana: “An gibohon kan mga Saksi ni Jehova iyo an pagbabalik asin pag-establisar otro kan orihinal na Kristianismo na ginibo ni Jesus asin kan saiyang mga disipulo kaidtong enot asin ikaduwang siglo. . . . An gabos magturugang.”

Kristianong neutralidad: Minsan ngani daing gayo nasasabotan manongod sa bagay na ini, an mga Saksi ni Jehova nagdadanay na neutral kun dapit sa politika asin sa gabos na klase nin iriwal na naghahagad sa saro na ikaongis an kapwa. (Juan 18:36; Isaias 2:2-4) Manongod sa enot na mga Kristiano, an historyador na si Edward Gibbon nagsasabi: “Sinda nagsayuma na magkaigwa nin aktibong kabtang sa administrasyon sibil o sa militar na pagdepensa sa imperyo.” Kaya, an sa primero tibaad garo baga radikal sa katotoohan iyo an matoninong na kabtang kan mga kaipuhan na magin “bakong kabtang kan kinaban.”—Juan 17:16.

Rasismo: “An pagpalaenlaen sa rasa—na isyu sagkod ngonyan sa nagkapirang iglesya—bakong problema para sa mga Saksi,” sabi nin sarong peryodiko sa parteng timog kan Estados Unidos. An tunay na pagkamoot para sa saindang Kristianong mga tugang nakabobogkos sa sainda sa sarong lakop sa kinaban na asosasyon nin magturugang. Minsan ngani bakong sangkap kapareho nin iba, hinihingoa ninda na iaplikar sa saindang sadiri an katokdoan ni Jesus: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”—Juan 13:35.

Midbidon Sinda nin Orog

Siyempre, dai ikinapaliwanag digdi an gabos na minagibo sa mga Saksi ni Jehova na napapalaen sa kapakipakinabang na paagi. Kaya taano ta dai orog na midbidon an mga Kristianong ini? An saindong paglaom para sa maogmang buhay sa presente asin sa ngapit depende sa tamang pagkamidbid sa relihiyon na kaipuhan na napapalaen tangani na maotob kaiyan an mga pamantayan nin Dios.—Mateo 7:21.