An Punto-de-Vista kan Biblia

Kumpirma—Iyan daw Kahagadan sa Kristiano?

“An kumpirma iyo an sakramento na nagtatao sa nabautismohan na Kristiano kan bilog na pagkasangkap nin Kristianong buhay, na ginigibo siang nasa tama nang edad, soldados, asin saksi ni Cristo sa espirituwal na paagi.”—The Catholic Encyclopedia for School and Home.

AN KADAKLAN na Protestante sinasayumahan an ideya na an kumpirma sarong sakramento. Minsan siring, an teologong Katoliko kan ika-13 siglo na si Thomas Aquinas nagsurat na “an kumpirma ultimong pagsangkap kan sakramento nin bautismo.” Arin man digdi, minalataw an mga hapot: Nagkumpirma daw an enot na mga Kristiano? An seremonyal daw na aktong iyan kahagadan sa Kristiano ngonyan?

“Mayo man lamang nin nagpaparisa sa Ebanghelyo na si Jesus Mismo pinonan an Sakramento nin Kumpirma,” an inadmitir kan New Catholic Encyclopedia. Kun siring taano ta kan huri pinalakop nin mga paratokdo sa iglesya an ideya na pakalihis nin bautismo, kaipuhan an ikaduwang seremonya, na tibaad may kaibang paglahid nin lana asin pagdoon nin mga kamot, tanganing gibohon an saro na mas lubos na miembro kan iglesya?

Paano Nagpoon an Kumpirma?

An pagbautismo sa mga omboy saro sa pangenot na mga bagay na nagbunga kan pangangaipo nin saro pang sakramento. “Aram an mga problema gikan sa pagbautismo sa mga omboy,” sabi kan librong Christianity, “an mga iglesya . . . ipinagigirumdom sa mga nabautismohan kun ano an kahulogan kaini paagi sa ‘pagkumpirma’ sa sainda kun dakula na.” Talaga daw na an kumpirma nagpapagirumdom sainda kun ano an kahulogan nin bautismo, o natatahoban daw kaiyan an katotoohan manongod sa bautismo?

An totoo iyo na an bautismo nin mga omboy dai suportado kan Kasuratan. Halimbawa, an pagwirik nin tubig sa omboy dai kinakalda an omboy sa orihinal na kasalan; solamente an pagtubod sa pantubos na atang ni Cristo Jesus an makagigibo kaiyan. (Juan 3:16, 36; 1 Juan 1:7) An bautismo sa tubig panluwas na simbolo na an binautismohan lubos na nagdusay paagi ki Jesus na gibohon an kabotan ni Jehova Dios. An bautismo sa tubig para sa mga disipulo—‘nagturubod’—bakong para sa mga omboy.—Mateo 28:19, 20; Gibo 8:12.

“Saen natapos an Bautismo asin saen nagpoon an Kumpirma?” an hapot kan New Catholic Encyclopedia. Iyan minasimbag: “Seguro dai niato maninigong probaran na paglaenon na gayo iyan, ta an pinag-oolayan niato saro sanang seremonya sa enot na Iglesya.” Iyo, kan enot na siglo, an “saro sanang seremonya” na nagtao nin lubos na pagkamiembro sa Kristianong kongregasyon iyo an bautismo.—Gibo 2:41, 42.

An seremonya daw nin kumpirma, na may kaibang pagdodoon nin kamot, kaipuhan bago an saro umako kan banal na espiritu? Dai. Sa enot na Kristianong kongregasyon, an pagdoon nin kamot pagkabautismo para sa espesyal na pagnombra o pagtao nin milagrosong mga balaog kan espiritu. An mga balaog na ini nawara kan magadan na an mga apostol. (1 Corinto 13:1, 8-10) Asin an pagdoon nin kamot parateng konektado, bakong sa bautismo sa tubig, kundi sa espisipikong mga trabaho mapadapit sa Kristianong magmimisyonero. (Gibo 6:1-6; 13:1-3) Kaya, an ideya na an kumpirma nagpapadagos kan siring na apostolikong pagdodoon nin kamot asin, arog kan sabi kan Basics of the Faith: A Catholic Catechism, sarong “sakramento na nakakapabago nin lubos sa sarong tawo kaya iyan saro sanang beses na maaako,” napatutunayan na falso kun sisiyasaton na marhay.

Si apostol Pablo nagpatanid manongod sa pagsiblag sa pundamental na katotoohan kan Biblia: “Siertong maabot an panahon na, imbes na makontento sa tamang katokdoan, an mga tawo mababangkag sa pinakabagong bagay . . . dangan, imbes na maghinanyog sa katotoohan, sinda magugusto sa mga osipon.” (2 Timoteo 4:3, 4, The Jerusalem Bible) Pero, an mga nagtutubod sa seremonya nin kumpirma may sinisitar na duwang halimbawa sa Kasuratan bilang pruweba.

Makakasuratan na Pasisikadan?

An tala sa Gibo 8:14-17 parateng ginagamit bilang pasisikadan nin kumpirma. Minsan siring, an pagdoon na ini nin kamot tanganing umako nin banal na espiritu pambihirang okasyon. Taano man? An mga Samaritano bakong mga proselitong Judio. Kaya, sinda nagin an enot na mga bakong Israelita na nakaiba sa Kristianong kongregasyon. Kan an disipulong si Felipe naghulit sa Samaria, dakol na Samaritano an “nabautismohan, mga lalaki asin babae,” pero dai man tolos sinda nag-ako kan banal na espiritu. (Gibo 8:12) Taano?

Girumdoma, ki Pedro ipinaniwala ni Cristo Jesus “an mga liyabe kan kahadean kan kalangitan”—an pribilehiyo na enot na mag-atubang kan oportunidad na makalaog sa “kahadean kan kalangitan” sa laen-laen na grupo nin mga nakombertir. (Mateo 16:19) Kaya kaidto sanang si Pedro asin Juan paduman sa Samaria asin dinoonan kan saindang kamot an enot na mga disipulong ining bakong Judio na ibinubo sainda an banal na espiritu bilang garantiya kan saindang maabot na pagkamiembro sa “kahadean kan kalangitan.”

An iba nagsasabi na an Gibo 19:1-6 ebidensia na an enot na mga Kristiano may separadong seremonya pakatapos nin bautismo. Minsan siring, sa kasong ini malinaw na an dahelan na an banal na espiritu dai itinao sa pirang disipulo sa siudad nin Efeso iyo na an bagong mga nagturubod na ini nabautismohan “sa bautismo ni Juan,” na bako nang balido. (Helingon man an Gibo 18:24-26.) Kan ini ikapaliwanag sa sainda, sinda tolos na “nagpabautismo sa ngaran kan Kagurangnan na Jesus.” Asin sa pangyayaring ini, si apostol Pablo “idinoon an saiyang kamot sa sainda” tanganing akoon ninda an ibang milagrosong balaog kan banal na espiritu nin Dios apuwera sa pagigin inampon na espirituwal na mga aki nin Dios.—Roma 8:15, 16.

Manongod sa mga talang ini, an New Dictionary of Theology nagsasabi: “Mayo nin direktang pagpapadagos nin paggamit na masususog sa mga pangyayaring ini, asin, dawa pa kun iyan talagang nagtatao nin arogan, dai segurado kun baga iyan maninigong ibilang na susundon sa paglaog sa pagka-Kristiano na arog kan bautismo sa tubig. . . . An Mga Gibo kan mga Apostol kadakol na pangyayari nin paggamit nin bautismo sa tubig na mayo kan suminunod na pagdoon nin kamot (kaya an mga pangyayaring ini minalataw na pambihirang mga pangyayari).” Iyo, an mga ini pambihirang mga aksion sa pag-atubang sa pambihirang mga kamugtakan.

“An seremonya na inaapod ‘kumpirma,’” an konklusyon kan New Dictionary of Theology, “nagin ‘seremonya sa paghanap nin sarong teolohiya.’” Sa katunayan, iyan rituwal na bakong makakasuratan, bunga nin salang mga katokdoan, asin tunay na bakong kahagadan sa mga Kristiano.